হকশেল অমসুং য়াইফ-য়ুম্বাল অমদি কেমিকেল অমসুং ফর্তিলাইজরগী কেন্দ্র মন্ত্রী দোক্তর মনসুখ মন্দাবিয়ানা ঙসি পি.জি.আই.এম.ই.আর. সেতলাইত সেন্তর, সঙ্গ্রুরদা চত্তুনা মফমদুদা লৈরিবা ফীভম য়েংশিনখ্রে‍।

প্রোজেক্ত অদু পায়খৎপগী লৈরিবা খোঙজেলদুদা অপেনবা ফোঙদোক্লদুনা, “মেদিকাল দিভাইস অমসুং ইকুইপমেন্ত লৌশিনবা য়াওনা থবক অসি পায়খৎপগী লৈরিবা খোঙজেল অসি য়েংলগদি, সেতলাইত সেন্তর অসি জনুৱারী ২০২৩ ফাওবদা মপুং ফানা মথৌ তৌবা ঙম্লগনি অমদি মফম অসিগী মীয়ামশিংদা নত্তনা অরাপ্পা মফমদগী লাকপা মীয়ামদসু চাউনা কান্নবা পীবা ঙম্লগনি,” হায়না মন্ত্রীনা ফোঙদোকখি‍।

অজাদি কা অমৃৎ মহোৎসবকী শরুক অমা ওইনা প্রধান মন্ত্রীনা জুলাই ১৫দগী হৌদোকখিবা নুমিৎ ৭৫নিগী ওইবা ‘ফ্রী প্রিকোসন ভেক্সিনেসন দ্রাইব’কী লৈরিবা ফীভমগী মতাঙদা পাউদম্লদুনা, “থা অমগা নুমিৎ হুম্নিসিদা হৌজিক ফাওবদা মীওই করোর ১৩ হেনবনা হায়রিবা থৌরাংসিগী মখাদা কান্নবা লৌদুনা ভেক্সিন কাপথোকখ্রে,” হায়না কেন্দ্র মন্ত্রীনা ফোঙদোকখি‍। পঞ্জাবকী মীয়াম, মপুং ওইনা লৈবাকসিগী মীয়াম্না, মরুওইনা খুদোংথিবা নংবা য়াবা মীওইশিংনা নুমিৎ ৭৫নিগী লেমহৌরিবা নুমিৎশিংদা ভেক্সিন কাপহৌনবা অমদি কোবিদ লাংফম অসি মায়োক্ননবা মখোয় মশাবু শেম শাহৌনবা ৱাফম মন্ত্রীনা থমখি‍।

কোবিদ লাংফম লাকশিনবদা হকশেলগী থৌমীশিংনা লৌখিবা শিংথানিংঙাই ওইবা থৌদাংবু থাগৎলদুনা, “ঐখোয়গী লৈবাক অসি ৱাফম অনিগীদমক: চৎন-পথাপ ঙাক্না কোবিদ লাকশিনবা অমসুং ভেক্সিনেসন দ্রাইব দোজ করোর ২০০ লান্থোকপা ঙমবগীদমক, মালেম পুমবনা শিংথানরি,” হায়না মন্ত্রীনা হায়খি‍।

‘পুম্নমক্কী অহোঙবা মমলগী লায়েং’গী মথৌ তাবা ৱাফম থম্লদুনা মন্ত্রীনা লৈঙাক অসিনা জেনেরিক হিদাক য়োকখৎনবগীদমক লৈবাক শিনবা থুংনা নুমিৎ খুদিংগী মীওই লাখ ২০গী মথক্তা জন ঔসধি কেন্দ্র ৮৫০০ থম্লিবা, নেস্নেল মেদিকেল কাউন্সিলগা খুৎশম্নদুনা এৱ্যারনেস কেম্পেনশিং পাঙথোকপা অমসুং জেনেরিক অমসুং ব্রান্দেদ হিদাকশিংদা শীজিন্নরিবা থুমগী মরমদা মীয়ামদা নীংথিনা থঙহন্দুনা মশাগী ফিরেপ লৌজবা ঙমহন্নবগীদমক ‘জন ঔসধি সুগম’ এপ পুথোকখিবনচিংবা থৌরাংশিংগী মরমদা পাউদমখি‍। সেতলাইত সেন্তর, সঙ্গ্রুরদা জন ঔসধি কেন্দ্র অমসু হাংদোক্লগনি হায়না মন্ত্রীনা পাউদমখি‍।

প্রোফেসর বিবেক লাল, দাইরেক্তর পি.জিওআই.এম.ই.আর., অমদি শ্রী ধৱন (আই.আর.এস.), দি.দি.এ., প্রোফেসর বিপিন কৌসাল, এম.এস., শ্রী কুমার অভয়, এফ.এ., প্রোফেসর অসোক কুমার, এদিস্নেল মেদিকেল সিপরিন্তেন্দেন্ত, পি.জি.আই.এম.ই.আর. অমসুং নোদেল ওফিসর, সেতলাইত সেন্তর, সঙ্গ্রুর য়াওনা ফেকল্তী মেম্বর অমসুং মকোক থোংবা এদমিনিস্ত্রেতিব ওফিসরশিং য়াওবা মীফম অমসু মন্ত্রীনা থৌরম মপু ওইদুনা পাঙথোকখি‍।

মন্ত্রীগী মফমদা মচা খায়বা প্রজেন্তেসন অমা উত্তুনা শরুক য়াখিবশিংদা ফমুং ৩০০ লৈবা সেতলাইত সেন্তর অসি পি.জি.আই.এম.ই.আর. চান্দিগরদা মী কা হেন্না চিনবা হন্থহন্নবা অমদি অনাবা মীওইশিংনা চত্থোক চৎশিনদা লৌবা মতম হন্থহন্নবা পান্দমদা লিংখৎখিবনি হায়বা ৱাফমশিং থমখি‍।

“লম একর ২৫ পাক চাউবা মফমদা শাগৎলিবা সেতলাইত সেন্তর অসিগী প্রোজেক্ত কোস্ত অসি লুপা করোর ৪৪৯.০০নি‍। তেম্পররী ও.পি.দি., গেস্ত হাউস অমসুং বাউন্দরী ফক্লাং শেমগত্তুনা অহানবা ফেজ পায়খৎবা লোইখ্রে অমদি অনিসুবা ফেজকী শেমগৎ শাগৎপগী থবক হৌজিক খোঙলৈ থুনা চঙশিল্লি‍। সেতলাইত সেন্তর অসি মথঙ চহিগী অঙনবা শরুক্তা মপুং ফানা মথৌ তৌবা ঙম্লগনি হায়না পানরি,” হায়না প্রোফেসর বিবেক লালনা পাউদমখি‍।

**********