পোর্ত, শিপ্পিং অমসুং ৱাতরৱেজ অমসুং আয়ুশকী কেন্দ্রগী মন্ত্রী ওইরিবা শ্রী সর্বানন্দ সোনোৱালনা ইরানগী চাবহারদা লৈরিবা শহিদ বেহেস্ততি হিথাংফম অসিদা পায়খৎলিবা থবকশিংগী খুমাং চাউশিনবগী চাং য়েংশিন্নবা খোঙচৎ অমা ঙসি চৎখ্রে। চাবহার হিথাংফমগী থবকশিং হেন্না মপাঙ্গল কনখৎনবগীদমক কেন্দ্রগী মন্ত্রী সর্বানন্দ সোনোৱালনা ইন্দিয়ন পোর্তস গ্লোবেল চাবহার ফ্রী ত্রেদ জোন (আই.পি.জি.সি.ঈফ.তি.জেদ.)তা মোবাইল হার্বর ক্রেন তরুক খুৎশিন্নখ্রে। কেন্দ্রগী মন্ত্রীগা লোইননা ভারতকী ইরানদা লৈরিবা এম্বাসেদর, গদ্দম ধর্মেন্দ্রসু শরুক য়াখি। দা. ইকু ইজিবির সাফেম দুপ্যুতী মিনিস্তর অমসুং পোর্তস অমসুং মেরিতাইম ওর্গানাইজেসন, ইরানগী মেনেজিং দিরেক্তরনা ঙসি খোংচৎ অদু ইরানগী মাইকৈদগী লুচিংখি।

শ্রী সর্বানন্দ সোনোৱাল অমসুং দা. অলি অকবর সাফেনা ইরান অমসুং ভারতকী মরক্তা মেরিতাইম অমসুং পোর্ত কোওপরেসন হেনগৎনবগী মতাংদা ৱারী কয়া শানখি। খোঙবু অনিমক্না লল্লোন ইতীক্কী ওইবা অমসুং সেন্ত্রেল এসিয়ন লৈবাকশিংগা খা এসিয়া, ইসিন অমসুং ফার ইস্ত লৈবাক ওইরিবা জাপান অমসুং কোরিয়াগা লল্লোন ইতীক্কী ওইবা থবকশিং পায়খৎনবগী মতাংদা খন্ন-নৈনখি। কেন্দ্রগী মন্ত্রী শ্রী সর্বানন্দ সোনোৱালনা চাবহার হিথাংফম্না অথাপ্পগী চাং, মতম অমসুং অচঙবা শেল হন্থনবগীদমক লৌবা য়াবা থৌদাংশিংগী মতাংদা ফোংদোকখি। হিথাংফম অসিবু মথৌ নীংথিনা তৌহনবা য়ানবগীদমক অপুনবা তেক্নিকেল কম্মিতী অমা শেম্নবগী ৱারেপ অমসু লৌখি। মীফম অসিদা হিথাংফম অসিবু চাউখৎনবগীদমক তৌবা য়াবা থবকশিংগী মতাংদসু ফোংদোক্নখি।

থৌরম অদুদা ৱা ঙাংলদুনা কেন্দ্রগী মন্ত্রী শ্রী সর্বানন্দ সোনোৱালনা হায়খি, "ঐখোয়গী মরক্তা লৈরিবা পুৱারী ওইরবা মরী অসিনা ইন্দো ইরানিয়ন লৈবাক অনিগী মরীগী মরু হুনফম ওইরি। তুং কোইনা চৎলবা মরী অমসুং মমাং চহিশিংদগী হৌদুনা পায়খৎমিন্নরক্লিবা থবক কয়ানা লৈবাক অনিগী মরী অসিবু হেন্না পাকথোক চাউথোক্নবা অমসুং হেন্না চেৎশিন্নবা ফম্বাক অমা ওইরগনি। প্রধান মন্ত্রী শ্রী নরেন্দ্র মোদীনা ইরান্দা ২০১৬তা চৎপা মতমদা ৱারেপ লৌখিবা মঙলান মঙফাওননবা ভারতনা ইরানগী চাবহার হিথাংফম্বু চাউখৎনবা অমসুং মীয়ামনা খঙননবা হোৎনবগী থবক লেপ্পা লৈতনা চত্থখিগনি। মোবাইল হার্বর ক্রেন তরুক অসিনা শহিদ বেহেস্তি হিথাংফমগী থবকশিংবু হেন্না থৌ পাংহন্নবা শাফু অমসুং চাবহার হিথাংফম অসিবু হেন্না চাউখৎপা পুরকপা ঙম্বা শাফু অমা ওইরগনি। চাবহার হিথাংফম অসিগী স্ত্রেতেজিক ওইবা থৌদাংনা সেন্ত্রেল এসিয়া, খা এসিয়া অমসুং খা নোংপোক এসিয়াগী রিজনেল ত্রেদতা য়াম্না চাউবা থৌদাং লৈ। ঐখোয়না লেপ্পা লৈতনা ইন্তর্নেসনেল নোর্থ সাউথ ত্রান্সপোর্ত কোরিদোরবু লম অনিসিগী মরক্তা লল্লোন ইতীক্কী ওইবা লম্বী অমা ওইহন্নবা হোৎনখিগনি।"

ইন্দিয়া পোর্তস গ্লোবেল প্রাইবেৎ লিমিতেদ (আই.পি.জি.পি.এল.)না শহিদ বেহেস্তি পোর্তকী থবক থৌরমশিং পায়খিবদগী মসিনা বল্ক কার্গো মিলিয়ন ৪.৮ হেন্না পায়খ্রে। ওস্ত্রেলিয়া, বঙ্গলাদেশ, ব্রাজিল, জর্মনি, ওমান, রোমানিয়া, রসিয়া, থাইলেন্দ, য়ু.এ.ই., য়ুক্রেন অমসুং উজবেকিস্তান য়াওনা লৈবাক কয়াদগী পোৎ চৈশিংবু ত্রান্স শিপমেন্ত তৌরি। ইরানগী পোর্ত অমসুং মেরিতাইম ওর্গানাইজেসন, ইরানিয়ন কস্তমস এদমিনিস্ত্রেসন অমসুং চাবহার ফ্রী জোন ওথোরিতী, শহিদ বেহেস্তি পোর্ত ওথোরিতী অমসুং অতোপ্পা স্তেকহোল্দরশিং য়াওনা ভারতকী আই.জি.পি.এল. অমসুং ইরানিয়ন স্তেকহোল্দরশিংনা য়াম্না নক্না হোৎনমিন্নদুনা হিথাংফম অসি লমদম অসিগী লল্লোন ইতীক্কী থবক্তা হেন্না মথৌ পাংহল্লগনি। মীফম অসিদা শ্রী সেপাহি, প্রোভিন্সিএল দিপ্যুতী গবর্নর অমসুং চাবহার শহরগী গবর্নর শ্রী ইব্রাহিমি, চাবহার ফ্রী ত্রেদ জোন ওর্গানাইজেসনগী ইন্তরিম সি.ই.ও অমসুং পোর্তস, শিপ্পিং অমসুং ৱাতরৱেজ ভারত সরকারগী মন্ত্রালয়গী মকোক থোংবা ওফিসিএলশিং, ভারতকী এম্বেসী অমসুং ইস্লামিক রিপব্লিক ওব ইরানগী ওফিসিএলশিংসু শরুক য়াখি।

কেন্দ্রগী মন্ত্রী সর্বানন্দ সোনোৱাল ইরান অমসুং য়ু.এ.ই.দা নুমিৎ হুম্নিগী খোঙচত্তা ইরানগী চাবহার হিথাংফম অমসুং য়ু.এ.ই.গী জেবেল অলি হিথাংফম য়েংনবগীদমক লৈরি। খোঙচৎ অসিনা লৈবাক অনিগী মরক্তা লৈরিবা মরী অমসুং মেরিতাইমগী মরী অসিবু হেন্না চেৎশিনহন্নবা পান্দম থম্লি। খোঙচৎ অসিনা চাবহার হিথাংফম্বু ভারতকী লল্লোন ইতীকপু য়ুরোপ, রসিয়া অমসুং সি.আই.এস. লৈবাকশিংগী গেৎৱে অমা ওইহন্নবা হোৎনরি।

***************