ভারতনা নীংতম্লকপা চহি ৭৫ শুরকপগী পালন তৌনবা লৈবাক অসিনা আজাদী কা অমৃত মহোৎসব পাঙথোক্লিবা মতম অসিদা জল জীবন মিসন (জে.জে.এম.)না তোতিগী খুত্থাংদা অফবা অমসুং অরুবা থক্নবা ঈশিং খুঙ্গংগী য়ুমথোং করোর ১০দা পীদুনা অনৌবা মাইপাকপগী পান্দুপ অমা য়ৌবা ঙমখি। ইং কুমজা ২০১৯গী ওগস্ত ১৫দা প্রধান মন্ত্রী শ্রী নরেন্দ্র মোদীনা লাল কিলাগী লানবন্দগী জল জীবম মিসন হৌদোকখিবা মতমদা খুঙ্গংশিংদা লৈরিবা য়ুমথোং করোর ৩.২৩ (১৬.৯০%) খক্তদা তোতি ঈশিং ফংলমখি। লৈবাক অসিনা ওগস্ত ১৯, ২০২২দা ফঙ্কস্নেল হাউসহোল্দ তেপ কন্নেক্সন করোর ১০গী পন্দুপ য়ৌবা ঙমখি।

হৌজিক ফাওবদা রাজ্য ৩ (গোৱা, তেলঙ্গানা অমসুং হরিয়ানা) অমসুং য়ু.তি. ৩ (পুদুচেরী, দি এন্দ দি অমসুং দি এন্দ এন.ঐচ. অমসুং এ এন্দ এন আইলেন্দ)দা ১০০% কবরেজ ঙম্বগী রিপোর্ত তৌরকখি। পঞ্জাবনা ৯৯.৯৩%, মতুংদা ৯৭.০৩%গা লোয়ননা গুজরাত, ৯৫.৫১%গা লোয়ননা বিহার অমসুং ৯৪.৮৮%গা লোয়ননা হিমাচল প্রদেশ হায়রিবশিং অসিনা অতেনবা মতমগী মনুংদা সেচুরেসন ফংবা ঙম্লগনি। ওগস্ত ১৭, ২০২২দা গোৱা অমসুং দদ্রা অমসুং নাগর হবেলি অমসুং দামন অমসুং দ্যু (দি এন্দ এন.ঐচ. অমসুং দি এন্দ দি)না মথং শিৎনা লৈবাক অসিগী অহানবা ‘হর ঘর জল’ সর্তিফাইদ তৌবা রাজ্য অমসুং য়ু.তি. ওইখি, মফমশিং অসিদা লৈরিবা খুঙ্গং পুম্নমক্কী মীওইশিংনা গ্রাম সভাশিংগী খুত্থাংদা মখোয়গী খুঙ্গংশিংদা লৈরিবা য়ুমথোং পুম্নমক্তা মরাং কাইনা, অফবা অমসুং চাং নাইবা ঈশিংগী সপ্লাই ফংলে হায়না ফোঙদোরকখি।

মিসন অসিগী পান্দমদি পীরিবা ক্বালিতী অসিদা মরাং কাইনা চাং নাইনা অমসুং মতম শাংনা চৎকদবা মওংদা থক্নবা ঈশিং খুঙ্গংগী য়ুমথোং খুদিংমক্তা ফংহনবনি। কোবিদ-১৯ লাইচৎকুম্বা তোঙান-তোঙানবা অপনবা অমদি শীংনবা কয়া লৈজরবসু রাজ্য/য়ু.তি.শিংনা খুঙ্গংগী য়ুম খুদিংমক্তা তোতি ঈশিং ফংহনবগীদমক নোংজু-নুংশা, মনুং চংশিনবা, লমিৎ-তুমিৎতা খুদোংচাদবা, চীংনুং-মানুং, উমং-ৱাংমাং অসিনচিংবা কয়াগী শীংনবশিং মায়োক্নদুনা চোকথবা লৈতনা হোৎনদুনা লাকখি। তাঙ্কক কয়াদা পাইপ অমদি অতোপ্পা পোৎলমশিং অসি হেলিকোপ্তরশিং, হী, উৎ, শমু অমসুং শগোলনচিংবা শীজিন্নদুনা পুথোক-পুশিন তৌখি।

কেন্দ্র অমদি রাজ্য সরকারশিংনা চোকথবা লৈতনা হোৎনখিবশিং অসিনা লৈবাক অসিগী স্কুল লাখ ৮.৬৭ (৮৪.৩৫%) অমসুং অঙ্গনৱাদী সেন্তর লাখ ৮.৯৬ (৮০.৩৪%)দা তোতি ঈশিংগী সপ্লাই ফংহনবা ঙমখি। ঐখোয়গী লৈবাক অসিগী এস্পিরেস্নেল দিস্ত্রিক্ত ১১৭তা মিসন অসি হৌদোকখিবা মতমদা য়ুমথোং লাখ ২৪.৩২ (৭.৫৭%) খক্তনা তোতি ঈশিং ফংলমখি হায়রিবা অসি হৌজিক্তি করোর ১.৫৪ (৪৮.০০%)দা হেনগৎহনবা ঙমখ্রে। তেলঙ্গানাগী এস্পিরেস্নেল দিস্ত্রিক্ত অহুম (কোমারাম ভীম অসিফাবাদ, জয়শঙ্কর ভুপলপল্লি অমসুং ভদ্রাদ্রি কোথাগুদম) অমসুং পঞ্জাব (মোগা), হরিয়া (মেৱাত) অমসুং হিমাচল প্রদেশ (চম্বা) জিলা ১/১দা ১০০% তোতি ঈশিংগী কবরেজ তৌখিবগী রিপোর্ত তৌরকখি।

জে.জে.এম.না খুঙ্গংগী মীয়ামদা সামাজিক অমদি শেন্মীৎলোনগী ওইবা অচৌবা কান্নবশিং ফংহনখি। চাং নাইনা তোতি ঈশিংগী সপ্লাই ফংবনা মীয়ামগী মরু ওইনা নুপীশিং অমসুং নৌরিবা নুপীমচাশিংনা মখোয়গী য়ুমগী নোংমগী মথৌ তাবা ঈশিং অদু থুংহন্নবা অচৌবা অরুম্বা ঈশিংগী বালতিন পুদুনা ঈশিং হোল্লবা চহি কয়াদগী তৌরক্লবা অৱাবা থবক অসি হন্থহন্দুনা অৱাবা কোকহনখি। মসিদা চংগদবা মতম অদু শেন্থোক লৈনবা থবক-থৌরমশিং পাঙথোকপা, অনৌবা স্কিলশিং তমশিনবদা অমসুং অঙাংশিংগী মহৈ-মশিংদা মতেং পাংবদা শীজিন্নবা য়াহনখি।

স্কিমশিংগী লোং তর্ম সস্তেনেবিলিতী লৈহন্নবগীদমক রুরেল পাইপ ৱাতর সপ্লাই স্কিমশিংগী প্লান্নিং, ইমপ্লিমেন্তেসন, ওপরেসন অমসুং মেন্তেনেন্সতা হেক অহৌবদগী হৌদুনা মীয়াম্না শরুক য়াবা হায়বা অসি খ্বাইদগী মরু ওইবা ওইরি। লৈবাক অসিদা বিলেজ ৱাতর এন্দ সেনিতেসন কম্মিতি (ভি.দবল্যু,এস.সি)/পানি সম্মিতি পুন্না লাখ ৫.০৮ শেমখি। লোয়ননা ভি.এ.পি. লাখ ৪.৭৮ শেমদুনা মখোয়না থক্নবা ঈশিংগী সোর্স ওগমেন্তেসন তৌবা, গ্রেৱাতর ত্রীৎমেন্ত অমসুং মখোয়বু রিয়ুজ তৌবা, ইন-বিলেজ ৱাতর সপ্লাই সিস্তেমশিংগী চাং নাইনা ওপরেসন অমসুং মেন্তেনেন্স তৌনবগী পোরমশিং য়াৎলি।

মিসন অসিদা ঈশিংগী ক্বালিতী অসি য়াম্না মরু ওইবা হীরম অমা ওইরি। মিসনগী মতম অসিগী মনুংদা লৈবাক অসিদা পুন্না ৱাতর তেস্তিং লেবোরেতোরী ২,০৭০ শাখি, মপাঙ্গল কনখৎহনখি অমসুং এম্পেনেল তৌখি। হৌজিক ফাওবদা ৱাতর তেস্তিং লেবোরেতোরীশিংগী খুত্থাংদা খুঙ্গং লাখ ৪.৫১দা ঈশিংগী ক্বালিতী তেস্ত লাখ ৬৪ হেন্না তৌখি। রাজ্য/য়ু.তি.শিংগী ৱাতর ক্বালিতী তেস্তিং লেবশিং অসি হৌজিক্তি মীয়াম্না অতাবা মমলশিংদা ঈশিংগী সেম্পলশিং তেস্ত তৌনবগীদমক শীজিন্নবা য়াহনখ্রে। হৌজিক ফাওবদা খুঙ্গংগী নুপী লাখ ১০.৮দা ফিল্দ তেস্তিং কিৎ (এফ.তি.কে.) শীজিন্নবা হৈনবা ত্রেন তৌখি। এফ.তি.কে.শিং শীজিন্নদুনা খুঙ্গং লাখ ১.৭তা ত্রেন তৌরবা নুপীশিংনা ঈশিংগী ক্বালিতী তেস্ত লাখ ৫৮ হেন্না তৌখি।

****