মনিপুরগী তুপুলদা হন্দক্তা থোকখিবা চীং নীংখাইবগী থৌদোক্তা লৈখিদ্রবা আর্মদ ফোর্সেস পর্সনেলগী ‘বীর নারিশিং’বু ওগস্ত ১৮, ২০২২দা ঙাকশেল মন্ত্রী শ্রী রাজনাথ সিংহনা ওক্তুনা ইকাই খুম্নবা উৎখ্রে। ওকপগী থৌরম অসি ত্রিশক্তি কোর্পসনা শিন্দুনা নোংচুপ বেঙ্গলগী দার্জীলিং জিলাদা লৈবা বেংদুবি মিলিতরী স্তেসন্দা পাঙথোকখি। জুন থাদা থোকখিবা লাইবক থীবা থৌদোক অদুদা লৈখিদবা মীওই ৬১গী মনুংদা ১০৭ ইনফেন্তরী বত্তালিয়ন (তেরিতোরিএল আর্মী) ১১ গোর্খা ফাইল্সকী পর্সনেল ৩০ – ওফিসর অমা, জুনিয়ন কম্মিসন্দ ওফিসর অহুম অমসুং অতোপ্পা রেঙ্ক ২৬ য়াওখি। ঙাকশেল মন্ত্রীনা ‘বীর নারি’ খুদিংমক্তা লুপা লাখ তরেৎকী চেকশিং খুৎশিন্নখি। লাইবক থীবা থৌদোক অদুদা অশোক-অপন নংখ্রবা লান্মীশিংসু থৌরম অদুদা ওক্তুনা ইকাই খুম্নখি।

বীর নারিশিং অমসুং লান্মীশিংগা ৱারী শাবদা শ্রী রাজনাথ সিংহনা লৈখিদ্রবা পর্সনেলশিংবু মখোয়গী থৌনা অমদি কত্থোকখিবা অদুগীদমক ইকাই খুম্নবা উৎখি। মহাক্না হায়খি মদুদি লান্মীশিং অসিনা কত্থোকখিবশিং অদুগীদমক জাতিনা মতম চুপ্পদা মখোয়গী লমন তোনশিন্দুনা লৈহৌরগনি। মহাক্না মখা তারদুনা হায়খি সরকারনা অথৌবা লান্মীশিংগী ইমুং-মনুং অমসুং নুপী অমদি অঙাংশিংদা ফাইনান্সিএল স্তেবিলিতী পীনবা হোৎনরি, ঙাকশেল মন্ত্রালয়না অঙম্বা মতেং পুম্নমক পীগনি হায়না থাজবা পীখি। ঙাকশেল মন্ত্রীনা আর্মদ ফোর্সেসনা খুদোংচাদবা ফীভমদা জিরিবাম-তুপুল-ইম্ফাল রেল লাইন প্রোজেক্ত অসি লোইশিনবদা মরু ওইবা থৌদাং লৌখি। মহাক্না হায়খি, প্রোজেক্ত অসি লৈবাক্কী স্ত্রেতেজিক অমসুং সোসিও-ইকনোমিক্কী ওইবা মথৌ তাবশিং থুংহন্নবগীদমক মরু ওই।

বীর নারিশিং অমসুং লান্মীশিংনা নহারোলশিংনা আর্মদ ফোর্সেস্তা চংনীংনবা ইথিল ফাওহন্নবা ঙাকশেল মন্ত্রালয় অমসুং ইন্দিয়ন আর্মীনা লৌখৎখিবা থৌশিলশিং অদুগীদমক তৌবীমল খঙবা অমদি থাগৎপা ফোঙদোকখি।

থৌরম অসিদা দার্জীলিংগী মেম্বর ওফ পার্লিয়ামেন্ত, শ্রী রাজু বিস্তা, চীফ ওফ আর্মী স্তাফ জেনরেল মনোজ পান্দে, জি.ও.সি., ১১ সব এরিয়া লেফতনেন্ত জেনরেল তরুন কুমার আইচ অমসুং ইন্দিয়ন আর্মীগী অতোপ্পা মকোক থোংবা ওফিসিএলশিংনা শরুক য়াখি।

**********