ଜାତୀୟ ସ୍ୱାସ୍ଥ୍ୟ ପ୍ରାଧିକରଣ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ସ୍ତରରେ ସ୍ୱାସ୍ଥ୍ୟ ସେବା ସହ ଜଡିତ ପେଶାଦାର ଏବଂ ସ୍ୱାସ୍ଥ୍ୟ ସୁବିଧା ରେଜିଷ୍ଟ୍ରିଗୁଡିକୁ ମଜବୁତ କରିବାକୁ ପ୍ରଦର୍ଶନ ଭିତ୍ତିକ ପାଣ୍ଠି ଆବଣ୍ଟନ ପାଇଁ ଘୋଷଣା କରିଛନ୍ତି

ଜାତୀୟ ସ୍ୱାସ୍ଥ୍ୟ ପ୍ରାଧିକରଣ (ଏନଏଚଏ) ସ୍ୱାସ୍ଥ୍ୟ ସୁବିଧାଗୁଡିକର ରେଜିଷ୍ଟ୍ରି (ଏଫଏଚଆର) ଏବଂ ସ୍ୱାସ୍ଥ୍ୟ ସେବା ସହ ଜଡିତ ପେଶାଦାରମାନଙ୍କ ରେଜିଷ୍ଟ୍ରି (ଏଚପିଆର)ରେ ଡାଟା ରେକର୍ଡ କାର୍ଯ୍ୟରେ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକର ପ୍ରଦର୍ଶନକୁ ଭିତ୍ତି କରି ଆୟୁଷ୍ମାନ ଭାରତ ଡିଜିଟାଲ ମିଶନ (ଏବିଡିଏମ)ର କାର୍ଯ୍ୟାନ୍ୱୟନ ପାଇଁ ପାଣ୍ଠି ଆବଣ୍ଟନ ପାଇଁ ଘୋଷଣା କରିଛନ୍ତି । ଏହି ପ୍ରଦର୍ଶନଭିତ୍ତିକ ପାଣ୍ଠି ଆବଣ୍ଟନ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ସ୍ତରରେ ଆୟୁଷ୍ମାନ ଭାରତ ଡିଜିଟାଲ ମିଶନ (ଏବିଡିଏମ)ର ବ୍ୟବସ୍ଥିତ କାର୍ଯ୍ୟାନ୍ୱୟନରେ ସହାୟତା କରିବ । ଏହି ଯୋଜନା ଅନୁଯାୟୀ ଯାଞ୍ଚ ହୋଇଥିବା ଏଣ୍ଟ୍ରିଗୁଡିକ ସହ ପ୍ରମୁଖ ଜାତୀୟ ରେଜିଷ୍ଟ୍ରିଗୁଡିକୁ ମଜବୁତ କରାଯାଉଛି । 

ଏନଏଚଏ ଦ୍ୱାରା ପୂର୍ବରୁ ଜାରି ଦିଶାନିର୍ଦ୍ଦେଶ ଅନୁଯାୟୀ, ପାଞ୍ଚ ବର୍ଷ (ଆର୍ଥିକ ବର୍ଷ ୨୦୨୧-୨୨ ଠାରୁ ୨୦୨୫-୨୬ ପର୍ଯ୍ୟନ୍ତ) ଅବଧି ମଧ୍ୟରେ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ସ୍ତରରେ ଆୟୁଷ୍ମାନ ଭାରତ ଡିଜିଟାଲ ମିଶନ (ଏବିଡିଏମ) କାର୍ଯ୍ୟାଳୟ ସ୍ଥାପନ ପାଇଁ ୫୦୦ କୋଟି ଟଙ୍କା ରେଖାଙ୍କିତ କରାଯାଇଛି । ଏହି ପାଣ୍ଠିର ୨୦ ପ୍ରତିଶତ ଅର୍ଥାତ ୧୦୦ କୋଟି ଟଙ୍କା ପ୍ରୋତ୍ସାହନ ଆଧାରିତ ପାଣ୍ଠି ଭାବେ ନିର୍ଦ୍ଧାରିତ ହୋଇଛି । ଏହି ଦୃଷ୍ଟିଭଙ୍ଗୀ ଆଗେଇ ନେବାକୁ ଏନଏଚଏ ସମ୍ପର୍କିତ ରାଜ୍ୟ/କେନ୍ଦ୍ରଶାସିତ ଅଞ୍ଚଳଗୁଡିକ ଦ୍ୱାରା ନିର୍ଦ୍ଧାରିତ ଅବଧି ମଧ୍ୟରେ ପଞ୍ଜିକୃତ ଓ ଯାଞ୍ଚ ହୋଇଥିବା ସଂସ୍ଥାଗୁଡିକ ସଂଖ୍ୟା (ଡାକ୍ତର, ନର୍ସ ଆଦିଙ୍କ ଭଳି ସ୍ୱାସ୍ଥ୍ୟ ସେବା ସହିତ ଜଡିତ ପେଶାଦାର ଓ ଡାକ୍ତରଖାନା, କ୍ଲିନିକ, ସ୍ୱାସ୍ଥ୍ୟ ଓ କଲ୍ୟାଣ କେନ୍ଦ୍ର, ଡାଏଗ୍ନୋଷ୍ଟିକ ଲ୍ୟାବ, ଫାର୍ମାସି ଭଳି ସ୍ୱାସ୍ଥ୍ୟ ସୁବିଧା) ସନ୍ଦର୍ଭରେ ସମ୍ପର୍କିତ ରାଜ୍ୟ/କେନ୍ଦ୍ରଶାସିତ ଅଞ୍ଚଳଗୁଡିକର ପ୍ରଦର୍ଶନକୁ ଭିତ୍ତି କରି ପାଣ୍ଠି ଆବଣ୍ଟନ ସମ୍ପର୍କରେ ନିଷ୍ପତ୍ତି ନିଆଯିବ ।    

ଏହି ପଦକ୍ଷେପ ସମ୍ପର୍କରେ ସିଇଓ, ଏନଏଚଏ, ଡା. ଆର.ଏସ. ଶର୍ମା କହିଛନ୍ତି- ଏଚପିଆର ଓ ଏଫଏଚଆର ଆୟୁଷ୍ମାନ ଭାରତ ଡିଜିଟାଲ ମିଶନ (ଏବିଡିଏମ)ର ପ୍ରମୁଖ ସ୍ତମ୍ଭ । ଅଧିକ ସଂଖ୍ୟକ ସ୍ୱାସ୍ଥ୍ୟ ସେବା ସହ ଜଡିତ ପେଶାଦାର ଓ ସ୍ୱାସ୍ଥ୍ୟ ସୁବିଧାଗୁଡିକୁ ପଞ୍ଜିକୃତ କରିବାରେ ରାଜ୍ୟ/କେନ୍ଦ୍ରଶାସିତ ଅଞ୍ଚଳଗୁଡିକର ପ୍ରେରଣାଦାୟୀ ସମର୍ଥନ ସାହାଯ୍ୟରେ ଆମେ ଡିଜିଟାଲ ସ୍ୱାସ୍ଥ୍ୟ ସେବାଗୁଡିକର ଲାଭ ଲୋକଙ୍କ ନିକଟରେ ପହଞ୍ଚାଇ ପାରିବା । ପଞ୍ଜିକରଣ ବେଳେ ପ୍ରଦାନ କରାଯାଇଥିବା ବିବରଣୀଗୁଡିକ ଯାଞ୍ଚ କରିବା ପାଇଁ ରାଜ୍ୟ/କେନ୍ଦ୍ରଶାସିତ ଅଞ୍ଚଳଗୁଡିକର ସମ୍ପର୍କିତ ସଂସ୍ଥାଗୁଡିକ ଉତ୍ତରଦାୟୀ ରହିବେ । ସେମାନଙ୍କ ସମର୍ଥନ ସ୍ୱାସ୍ଥ୍ୟ ସେବା ସହ ଜଡିତ ପେଶାଦାର ଓ ସ୍ୱାସ୍ଥ୍ୟ ସୁବିଧାଗୁଡିକ ସମ୍ପର୍କରେ ଜାତୀୟ ସ୍ତରରେ ରେଜିଷ୍ଟ୍ରି ପ୍ରସ୍ତୁତିରେ ସହାୟକ ହେବ । ଯାହା ସ୍ୱାସ୍ଥ୍ୟ ସେବା ଆଶାୟୀଙ୍କ ପାଇଁ ଉପଯୋଗୀ ସୂଚନା ଉତ୍ସ ହେବ ।

ସ୍ୱାସ୍ଥ୍ୟ ସୁବିଧା ରେଜିଷ୍ଟ୍ରି (ଏଚଏଫଆର) ଓ ସ୍ୱାସ୍ଥ୍ୟସେବା ସହ ଜଡିତ ପେଶାଦାରମାନଙ୍କ ରେଜିଷ୍ଟ୍ରି (ଏଚପିଆର) ସଂଖ୍ୟା ବୃଦ୍ଧି ଆୟୁଷ୍ମାନ ଭାରତ ଡିଜିଟାଲ ମିଶନ (ଏବିଡିଏମ)ର ଲକ୍ଷିତ ଉଦ୍ଦେଶ୍ୟ ସାଧନ କରିବା ଦୃଷ୍ଟିରୁ ବେଶ ଗୁରୁତ୍ୱପୂର୍ଣ୍ଣ । ରାଜ୍ୟ/କେନ୍ଦ୍ରଶାସିତ ଅଞ୍ଚଳଗୁଡିକ ପାଇଁ ପ୍ରଦର୍ଶନ ଭିତ୍ତିକ ପାଣ୍ଠି ପ୍ରଦାନ ଏହି ଦିଗରେ ଏକ ଉପକ୍ରମ । ସେହି ଅନୁଯାୟୀ, ଏନଏଚଏ ପାଣ୍ଠି ଆବଣ୍ଟନ ମାନଦଣ୍ଡଗୁଡିକୁ ଏହି ପ୍ରକାରେ ସୂଚାଇଛନ୍ତି:    

ଡିସେମ୍ବର ୩୧, ୨୦୨୨ ପର୍ଯ୍ୟନ୍ତ ଏଚଏଫଆର ଓ ଏଚପିଆରରେ ହୋଇଥିବା ପ୍ରତ୍ୟେକ ଏଣ୍ଟ୍ରିର ଯାଞ୍ଚ ପାଇଁ ୧୦୦ ଟଙ୍କା 

ଜାନୁୟାରୀ ୧, ୨୦୨୩ରୁ ମାର୍ଚ୍ଚ ୩୧, ୨୦୨୩ ପର୍ଯ୍ୟନ୍ତ ଏଚଏଫଆର ଓ ଏଚପିଆରରେ ହୋଇଥିବା ପ୍ରତ୍ୟେକ ଏଣ୍ଟ୍ରିର ଯାଞ୍ଚ ପାଇଁ ୫୦ ଟଙ୍କା । 

ମାର୍ଚ୍ଚ ୩୧, ୨୦୨୩ ପରେ ଏଚଏଫଆର ଓ ଏଚପିଆରରେ ହୋଇଥିବା ପ୍ରତ୍ୟେକ ଏଣ୍ଟ୍ରିର ଯାଞ୍ଚ ପାଇଁ କୌଣସି ପାଣ୍ଠି ପ୍ରଦାନ କରାଯିବ ନାହିଁ  

ରାଜ୍ୟ/କେନ୍ଦ୍ରଶାସିତ ଅଞ୍ଚଳଗୁଡିକ ଏବିଡିଏମରେ ପୂର୍ଣ୍ଣକାଳୀନ କିମ୍ବା ସ୍ୱଳ୍ପକାଳୀନ ମାନବ ସମ୍ବଳ ମୁତୟନ ପାଇଁ ଏହି ପାଣ୍ଠି ଉପଯୋଗ କରିପାରିବେ ।  

ଏବିଡିଏମ ସମ୍ପର୍କରେ ଅଧିକ ଜାଣିବା ପାଇଁ ଦେଖନ୍ତୁ: https://abdm.gov.in/

SR