1947 ஆகஸ்ட் 15 அன்று காலனித்துவ ஆட்சியின் பிடியிலிருந்து நாடு தன்னைத் தானே விடுவித்துக் கொண்ட இந்த இரவு இந்திய மக்கள் ஏழரை தசாப்தங்களாக சுதந்திரத்தை அனுபவித்து வருகின்றனர்.  சுதந்திரத்தின் 76 வது ஆண்டைக் குறிக்கும் பெருமைமிக்க தேசம் 'விடுதலையின் அமிர்தப் பெருவிழாவை' கொண்டாடுகிறது. நாடு முழுவதும் தேசபக்தி உணர்வு பரவியுள்ளது. இந்த முக்கியமான நிகழ்வைக் குறிக்கும் வகையில், இந்திய அரசின் பல்வேறு அமைச்சகங்கள், பல்வேறு மாநில அரசுகள் & யூனியன் பிரதேசங்கள், ஆயுதப்படைகள் மற்றும் பொதுமக்களால் நாடு முழுவதும் தொடர் நிகழ்ச்சிகளுக்கு ஏற்பாடு செய்யப்பட்டுள்ளன.

பிரதமர் திரு நரேந்திர மோடி, ஆகஸ்ட் 15, 2022 அன்று புது தில்லியில் உள்ள செங்கோட்டையின் கொத்தளத்திலிருந்து இந்த வரலாற்றுச் சிறப்புமிக்க 76வது சுதந்திர தினத்தைக் கொண்டாடுவதில் தேசத்தை வழிநடத்துவார். அவர் தேசியக் கொடியை ஏற்றி வைத்து நாட்டு மக்களுக்கு  உரையை ஆற்றுவார்.

செங்கோட்டை வந்தடையும் பிரதமரை பாதுகாப்புத்துறை அமைச்சர் திரு. ராஜ்நாத் சிங், பாதுகாப்புத் துறை இணையமைச்சர் திரு.அஜய் பட் மற்றும் பாதுகாப்புத்துறை  செயலாளர் டாக்டர் அஜய் குமார் ஆகியோர் வரவேற்பார்கள். அங்கு அளிக்கப்படும் அணிவகுப்பு மரியாதையை பிரதமர் ஏற்றுக்கொள்வார்.

பிரதமருக்கான மரியாதைக் காவலர் குழுவில் ராணுவம், கடற்படை, விமானப்படை மற்றும் தில்லி காவல்துறையைச் சேர்ந்த தலா ஒரு அதிகாரி மற்றும் 20 பேர் இடம் பெறுவார்கள்.

அணிவகுப்பு மரியாதையைப் பார்வையிட்ட பிறகு, பிரதமர் திரு நரேந்திர மோடி செங்கோட்டையின் கோட்டைக்குச் செல்கிறார், அங்கு அவரை பாதுகாப்புத்துறை அமைச்சர் திரு ராஜ்நாத் சிங், இணையமைச்சர் திரு அஜய் பட், ராணுவத் தளபதி ஜெனரல் மனோஜ் பாண்டே, கடற்படைத் தளபதி அட்மிரல் ஆர் ஹரி குமார் மற்றும் விமானப்படைத் தளபதி ஏர் சீஃப் மார்ஷல் வி ஆர் சவுத்ரி ஆகியோர் வரவேற்று வாழ்த்து தெரிவிப்பார்கள். பின்னர் தேசியக் கொடியை ஏற்றி வைக்க, கோட்டையில் உள்ள மேடைக்கு பிரதமர்  அழைத்துச் செல்லப்படுவார்.

மூவர்ணக் கொடி பறக்கவிடப்பட்ட பிறகு, 'தேசிய வணக்கம்' செலுத்தப்படும். 20 பேர் கொண்ட விமானப்படை இசைக்குழுவால் தேசியக் கொடி ஏற்றப்பட்ட பின்னர் தேசிய கீதம் இசைக்கப்படும். இசைக்குழுவை மாஸ்டர் வாரண்ட் அதிகாரி ரகுவீர் நடத்துவார்.

ஸ்க்ராட்ரான் லீடர் சுனிதா யாதவ் தேசியக் கொடியை ஏற்றி வைப்பதில் பிரதமருக்கு உதவுவார். பிரதமர் தேசியக் கொடியை ஏற்றும் போது விமானப்படை, ராணுவம், கடற்படை மற்றும் டெல்லி காவல்துறையைச் சேர்ந்த 5 அதிகாரிகள் மற்றும் 128 பேர் அடங்கிய தேசியக் கொடிக் காவலர் தேசிய வணக்கம் செலுத்துவார்கள். இந்திய விமானப் படையைச் சேர்ந்த விங் கமாண்டர் டிவிஆர் சிங், இந்த இடை-சேவைக் காவலர் மற்றும் போலீஸ் காவலர்களின் தலைமைப் பொறுப்பில் இருப்பார்.

பிரதமர் தேசியக் கொடியை ஏற்றியவுடன், இரண்டு எம்ஐ-17 1வி ஹெலிகாப்டர்கள் மூலம் அம்ரித் ஃபார்மேஷன் மைதானத்தில் மலர் இதழ்கள் பொழியும்.

மலர் இதழ்களை பொழிந்த பிறகு பிரதமர் நாட்டு மக்களுக்கு உரையாற்றுகிறார். பிரதமரின் உரையின் முடிவில், தேசிய மாணவர் படையினர் தேசிய கீதத்தைப் பாடுவார்கள். நாடு முழுவதிலும் உள்ள பல்வேறு பள்ளிகளில் இருந்து எழுநூற்று தொண்ணூற்று இரண்டு ஆண் மற்றும் பெண் என்சிசியினர்  இந்த தேசிய உற்சாக திருவிழாவில் பங்கேற்பார்கள். இந்த வீரர்கள் இந்திய வரைபடத்தின் புவியியல் அமைப்பில் செங்கோட்டையின் கோட்டைக்கு எதிரே உள்ள 'கியான் பாதை'யில் அமர்ந்திருப்பார்கள். அவர்கள் பிரதிநிதித்துவப்படுத்தும் பிராந்தியங்களின் ஆடைகளை அலங்கரித்து, இந்தியாவின் கலாச்சார பன்முகத்தன்மையை அடையாளப்படுத்துவார்கள். 'ஒரே பாரதம் உன்னத பாரதம் ' என்ற செய்தியை முன்னெடுத்துச் செல்வதற்காக இது செய்யப்படுகிறது.

          முதன்முறையாக, அரசாங்கத்தின் 'மேக் இன் இந்தியா' திட்டத்தின் கீழ் உருவாக்கப்பட்ட அட்வான்ஸ்டு டோவ்டு ஆர்ட்டிலரி கன் சிஸ்டம் (ஏடிஏஜிஎஸ்) என்ற ஹோவிட்சர் பீரங்கி , சம்பிரதாய 21-குண்டு வணக்கத்தின் போது சுடும். இது முற்றிலும் உள்நாட்டு, டிஆர்டிஓவால் வடிவமைக்கப்பட்டு உருவாக்கப்பட்டது. ஆயுதங்கள் மற்றும் வெடிமருந்துகளை உள்நாட்டில் உருவாக்கும் இந்தியாவின் வளர்ந்து வரும் திறனுக்கு இது ஒரு சான்றாக நிற்கும். லெப்டினன்ட் கர்னல் ககன்தீப் சிங் சந்து, துப்பாக்கிச் சூடு பயிற்றுவிப்பாளரான நைப் சுபேதார் குலாப் வாபிலுடன் துப்பாக்கிப் பிரிவுக்கு தலைமை தாங்குகிறார்.

2022 குடியரசு தினத்தின் போது எடுக்கப்பட்ட முன்முயற்சியின் தொடர்ச்சியாக, பொதுவாகக் கவனிக்கப்படாத சமுதாயத்தின் ஹீரோக்கள், விழாவிற்கு சிறப்பு விருந்தினர்களாக அழைக்கப்பட்டுள்ளனர். இதில் அங்கன்வாடி பணியாளர்கள், தெருவோர வியாபாரிகள், முத்ரா திட்டத்தில் கடன் வாங்குபவர்கள் மற்றும் பிணவறை பணியாளர்கள் அடங்குவர்.

'விடுதலையின் அமிர்தப் பெருவிழா' நிகழ்ச்சியின் ஒரு பகுதியாக, பாதுகாப்பு மற்றும் கலாச்சார அமைச்சகங்கள் தேசிய நவீன கலைக் கலைக்கூடத்துடன் இணைந்து, இந்தியாவின் சுதந்திரப் போராட்டத்தின் வீரர்களுக்கு ஒரு தனித்துவமான அஞ்சலி செலுத்தும் வகையில் ஒன்றிணைந்தன. ஒரு பிரம்மாண்டமான கலைத் திட்டமான கலா கும்பத்தில், ஐந்நூறு மாஸ்டர் கலைஞர்கள் அயராது உழைத்து, ஒவ்வொன்றும் 75 மீட்டர் நீளமுள்ள பத்து சுருள்களை உருவாக்கினர், அவற்றில் எட்டு இங்கே காட்டப்பட்டுள்ளன. நினைவுச்சின்னச் சுருள்கள் பண்டைய இந்திய கதைக் கலையின் பாரம்பரியத்தைத் தொடர்கின்றன மற்றும் காலனித்துவ ஆட்சியின் தளைகளை உடைக்க இந்தியாவை வழிநடத்திய வரலாற்று நிகழ்வுகளை உயிர்ப்பித்தன.

இந்த ஆண்டு, பல்வேறு மாநிலங்கள் மற்றும் யூனியன் பிரதேசங்களைச் சேர்ந்த முக்கிய சுதந்திரப் போராட்ட வீரர்களின் படங்கள்  செங்கோட்டையின் அற்புதமான சுவர்களை அலங்கரிக்கிறது. இந்த படங்கள் குறிப்பிட்ட மாநிலம் மற்றும் யூனியன் பிரதேசத்தின் வெவ்வேறு கலாச்சார, இயற்கை மற்றும் மத பாரம்பரியத்தையும் கொண்டிருக்கும். ஆந்திராவைச் சேர்ந்த பட்டாபி சீதாராமையா, அருணாச்சலப் பிரதேசத்தைச் சேர்ந்த மோஜே ரிபா, அஸ்ஸாமைச் சேர்ந்த குஷால் கோன்வார், பீகாரைச் சேர்ந்த வீர் குன்வர் சிங், சத்தீஸ்கரைச் சேர்ந்த வீர் நாராயண் சிங், தேசியத் தலைநகரான தில்லியைச் சேர்ந்த லாலா ஹர் தயாள், கோவாவைச் சேர்ந்த புர்சோத்தம் கேசவ ககோட்கர் ஆகியோர் இந்த முக்கிய சுதந்திரப் போராட்ட வீரர்களாவர். குஜராத்தைச் சேர்ந்த பிகாஜி காமா, ஹரியானாவைச் சேர்ந்த ராவ் துலா ராம், இமாச்சலப் பிரதேசத்தைச் சேர்ந்த பதம் தேவ், ஜம்மு & காஷ்மீர் யூனியன் பிரதேசத்தைச் சேர்ந்த சைபுதீன் கிட்ச்லேவ், ஜார்கண்டில் இருந்து பகவான் பிர்சா முண்டா, கர்நாடகாவைச் சேர்ந்த கர்னாட் சதாசிவ ராவ், கேரளாவைச் சேர்ந்த அக்காம்மா செரியன், லடாக்கின் அப்துல் சத்தார் யூடி, மத்தியப் பிரதேசத்தைச் சேர்ந்த சந்திரசேகர் ஆசாத், மகாராஷ்டிராவைச் சேர்ந்த பாலகங்காதர் திலகர், மணிப்பூரைச் சேர்ந்த ராணி கைடின்லியு, மேகாலயாவிலிருந்து ஃபான் நோங்லைட், மிசோரத்திலிருந்து ரொபுலியானி, நாகாலாந்திலிருந்து கைகோஜம் குகி, ஒடிசாவிலிருந்து லக்ஷ்மண் நாயக், பஞ்சாபிலிருந்து பாய் பர்மானந்த், ராஜஸ்தானில் இருந்து சாகர்மல் கோபா, திரிலோச்சனிமிலிருந்து சாகர்மல் கோபா , தமிழ்நாட்டைச் சேர்ந்த கே காமராஜ், தெலுங்கானாவைச் சேர்ந்த சரோஜினி நாயுடு, திரிபுராவில் இருந்து சசீந்திர லால் சிங், உத்தராகாண்டைச் சேர்ந்த அனுசுயா பிரசாத் பகுகுணா காந்த், உத்தரப் பிரதேசத்தைச் சேர்ந்த மங்கள் பாண்டே மற்றும் மேற்கு வங்கத்தைச் சேர்ந்த சித்தரஞ்சன் தாஸ் ஆகியோரும் இடம் பெற்றுள்ளனர்.  சுதந்திரத்திற்கான அவர்களின் இணையற்ற பங்களிப்புகளுக்காக, சில சமயங்களில் அதிகம் பேசப்படாத  இந்த உயர்ந்த ஆளுமைகளுக்கு ஒரு பொருத்தமான அஞ்சலியாகும்.

கொண்டாட்டத்திற்கு மற்றொரு அழகான கூடுதலாக இந்தியாவின் விருப்பமான பொழுது போக்குகளில் ஒன்றான காத்தாடி பறக்க விடும் ஓவியங்கள் ஆகும். காத்தாடி பறக்கும் சுவரோவியங்கள் மீனா பஜாரில் பல்வேறு வண்ணங்கள், அளவுகள் மற்றும் நமது தாய்நாட்டின் வேற்றுமையில் ஒற்றுமை மந்திரத்தை குறிக்கும் பட்டைகளின் நுட்பங்களை சித்தரிக்கிறது.

சுதந்திர தின கொண்டாட்டங்களின் ஒரு பகுதியாக, ஆகஸ்ட் 09-17, 2022 க்கு இடையில் ஒரு சிறப்பு இளைஞர் பரிமாற்ற நிகழ்ச்சி ஏற்பாடு செய்யப்பட்டுள்ளது. மொத்தம் 26 அதிகாரிகள்/மேற்பார்வையாளர்கள், அமெரிக்கா, இங்கிலாந்து, அர்ஜென்டினா, பிரேசில் , ஃபிஜி, இந்தோனேசியா, கிர்கிஸ்தான், மாலத்தீவுகள், மொரிஷியஸ், மொசாம்பிக், நைஜீரியா, சீஷெல்ஸ், யுஏஇ & உஸ்பெகிஸ்தான் ஆகிய 14 நாடுகளைச் சேர்ந்த 124 கேடட்கள்/இளைஞர்கள் இதில் பங்கேற்கின்றனர்.  சுதந்திர தினக் கொண்டாட்டங்களுக்காக ஏற்கனவே இந்தியாவில் உள்ள இவர்கள், செங்கோட்டையில் நடைபெறும் முக்கிய நிகழ்வில் கலந்துகொள்வதைத் தவிர, இளைஞர்கள் டெல்லி மற்றும் ஆக்ராவில் உள்ள கலாச்சார மற்றும் வரலாற்று முக்கியத்துவம் வாய்ந்த இடங்களுக்குச் செல்வார்கள்.

*************