নহারোল অমসুং শান্ন-খোৎনবগী মন্ত্রালয়
ভারতনা কম্মনৱেল্থ গেমস ২০২২গী ৮নি চনবা নুমিৎতা গোল্দ ৩, সিলভর ১ অমসুং ব্রোঞ্জ মেদল ২ য়াওনা মেদল ৬ লৌবা ঙমখ্রে
বজরঙ্গ পুনিয়া, দীপক পুনিয়া অমসুং সাক্ষি মলিকনা গোল্দ লৌখি, অন্সু মলিক্না সিলভর অমসুং দিব্যা কাকরন অমসুং মোহিত গ্রেৱালনা ব্রোঞ্জ লৌখি
Posted On:
06 AUG 2022 11:50AM by PIB Imphal
মরু ওইবা হাইলাইৎশিং:
- রাস্ত্রপতি, শ্রীমতি দ্রৌপদী মুর্মু অমসুং প্রধান মন্ত্রী শ্রী নরেন্দ্র মোদীনা লবপ্রীতকী শীংথানীংঙাই ওইরবা পর্ফোরমেন্সকীদমক থাগৎপা ফোঙদোকখ্রে
- ভারতকীদমক গোল্দ ফংনবগীদমক শীংথানীংঙাই ওইরবা স্কিল উৎখিবগীদমক থাগৎপা ফোঙদোকচরিং: শ্রী অনুরাগ সিংহ থাকুর
ভারতকী রেস্তলিং কন্তিঞ্জেন্তনা কম্মনৱেল্থ গেমস ২০২২গী ৮নি চনবা নুমিৎতা গোল্দ ৩, সিলভর ১ অমসুং ব্রোঞ্জ মেদল ২ য়াওনা মেদল ৬ লৌদুনা শীংথানীংঙাই ওইনা পর্ফোরম তৌখি। বজরঙ্গ পুনিয়ানা নুপাগী ফ্রীস্তাইলগী কেজি ৬৫গী রেস্তলিংদা, দীপক পুনিয়ানা নুপাগী ফ্রীস্তাইলগী কেজি ৮৬কী রেস্তলিংদা অমসুং সাক্ষী মলিক্না নুপীগী ফ্রীস্তাইলগী কেজি ৬২গী রেস্তলিংদা গোল্দ মেদল লৌরকপা ঙমখি। অন্সুমলিক্না নুপীগী ফ্রীস্তাইলগী কে.জি.৫৭কী রেস্তলিংদা সিলভর অমা লৌখি, অদুগা দিব্যা কাকরন্না নুপীগী ফ্রীস্তাইলগী কেজি ৬৮গী রেস্তলিংদা অমসুং মোহিত গ্রেৱালনা নুপাগী কেজি ১২৫গী রেস্তলিংদা ব্রোঞ্জ মেদলশিং লৌবা ঙমখি। ভারতকী মেদল তেল্লী অসি গোল্দ ৯, সিলভর ৮ অমসুং ব্রোঞ্জ মেদল ৯ লৌবা ঙমখিবগা লোয়ননা ২৬৮ শুখ্রে। রাস্ত্রপতি শ্রীমতি দ্রৌপদী মুর্মু, প্রধান মন্ত্রী শ্রী নরেন্দ্র মোদী, কেন্দ্রগী স্পোর্তস মন্ত্রী শ্রী অনুরাগ থাকুর অমসুং লৈবাক অসিগী কাচিন কোয়াদা লৈরিবা ভারত মচাশিংনা মেদল লৌরকখ্রবশিংবু মখোয়গী মাইপাকপা অসিগীদমক থাগৎপা ফোঙদোক্নরক্লি।
রাস্ত্রপতি শ্রীমতি দ্রৌপদী মুর্মুনা মেদলশিং লৌরকপদা রেস্তলিং কন্তিঞ্জেন্তবু থাগৎপা ফোঙদোকখি। রাস্ত্রপতিনা ত্বিত তৌখি, “#CommonwealthGamesতা সাক্ষী মলিক্না পুৱারী ওইরবা গোল্দ মেদল লৌরকপা ঙমখ্রে। মহাক্না অচৌবা শীংনবা মায়োক্নখি অমসুং ভারত মচাশিংবু চাউথোকচবা পোকহনখি। অদোম্না ঐখোয়গী নহারোলশিং, মরু ওইনা নুপীমচাশিংগীদমক ফীদম্নফম ওইরবা মীশক অমা ওইরি। অদোম্না হেন্না পাঙ্গল কনখৎপা ওইরসনু। অদোমবু থাগৎপা ফোঙদোকচরি!”
অতোপ্পা ত্বিত অমদা রাস্ত্রপতিনা হায়খি, “তুলিকা মানবু #CommonwealthGamesতা রেস্তলিংদা থংন-থংননা গোল্দ অনিরক লৌবা ঙমখিবা অমসুং পুৱারী শেমখিবগীদমক বজরঙ্গ পুনিয়াবু থাগৎপা ফোঙদোকচরি। অদোমগী অখাং কনবা, কত্থোকপা অমসুং মাইপাকপা অসিনা ঐখোয়গী নহারোলশিংদা ইথিল পীরগনি। অদোমগী গোল্দ মেদলশিং অসিনা অনৌবা ভারতকী খ্বাইদগী ফবা, থৌনা লৈবা ওইনা হোৎনরিবা অদু তাক্লি।”
দীপকপু থাগৎলদুনা রাস্ত্রপতিনা ত্বিত তৌরকখি, “তুলিকা মানবু #CommonwealthGamesতা গোল্দ লৌরকপগীদমক ঐখোয়গী নহা ওইরিবা রেস্তলর দীপক পুনিয়াবু থাগৎপা ফোঙদোকচরি। অদোমগী থৌনা অমসুং পোজিতিব এপ্রোচ অদু য়েংবদা মীৎ অপেনবা পোকখি। অদোম্না ভারতপু য়াম্না নুংঙাইহল্লি অমসুং ভারতকীদমক মীংচৎ পুরক্লি।”
অন্সুবু থাগৎলদুনা রাস্ত্রপতিনা ত্বিত তৌরকখি, “#CommonwealthGamesতা রেস্তলিংদা সিলভর লৌরকপগীদমক অন্সু মলিকপু থাগৎচরি। অদোম্না মালেমগী খ্বাইদগী অথোইবা রেস্তলরশিংগী মনুংদা অমা ওইদুনা অদোমগী থৌনা অদু উৎথোকপা ঙমখি। অদোমগী তুংগী পুন্সিগীদমক ঐহাক্না য়াইফ মঙ্গোল পীজরি।”
দিব্যাবু থাগৎপা ফোঙদোক্লদুনা রাস্ত্রপতিনা ত্বিত তৌরকখি, “#CommonwealthGamesতা রেস্তলিংদা ব্রোঞ্জ লৌরকপগীদমক দিব্যা কাকরনবু থাগৎপা ফোঙদোকচরি। অদোমগী খোঙফম চেৎপা অমসুং য়াংবা মতৌ অদুনা ভারতকীদমক মীংচৎ পুরকপা ঙমখি। নহাককুম্বা ঐখোয়গী নহা ওইরিবা রেস্তলরশিংনা ভারতকী স্পোর্তসকী তুংলমচৎ অসিবু ঙান্থোইহল্লগনি।”
রাস্ত্রপতিনা ত্বিত তৌরকখি, “#CommonwealthGamesতা ব্রোঞ্জ মেদল লৌরক্তুনা অতোপ্পা তেলেন্ত লৈবা নহা ওইরিবা রেস্তলর মোহিত গ্রেৱালনা ভারতপু চাউথোকচবা পোকহনখি। অদোম্না হৌজিক লৈরিবা মফম অসি য়ৌনবা হোৎনবদা অদোম্না শীংনাবা কয়া মায়োক্নবা তাখি। লৈবাক অসিনা অদোম্না উংদা মীংচৎ কয়া পুরক্কনি হায়না থাজবা থম্লি।”
প্রধান মন্ত্রীনা রেস্তলরশিংগী ফজরবা পর্ফোরমেন্সকীদমক থাগৎপা ফোঙদোকখি। প্রধান মন্ত্রীনা ত্বিত তৌখি, "সি.দবল্যু.জি. বর্মিংহমদা ঐখোয়গী এথলেৎশিংনা ঐখোয়বু চাউথোকচবা পোকহনবা লেপত্রি। @SakshiMalikকী মশক থোক্লবা শান্নরোই অমগী মগুন্না পুক্নিং শুমহৎখি। মহাক্না গোল্দ মেদল লৌরকখিবা অসিদা মহাক্কী মফমদা থাগৎপা ফোংদোকচরি। মহাক হৈথোই শিংথোইবগী পাৱরহাউজ অমনি অমসুং হনবা লৈতবা ইথিলনা য়োম্লবী অমনি।"
প্রধান মন্ত্রীনা বজরঙ্গবু থাগৎলদুনা ত্বিত তৌখি, "হৈথোই শিংথোইরবা @BajrangPunia অসি হনবা লৈতবা অমসুং মীথোই মীহেনবা হায়বদুমক্নি। মহাক্না বর্মিংহম সি.দবল্যু.জি.দা গোল্দ মেদল লৌখ্রে। সি.দবল্যু.জি.দা মেদল অহুম্লক থংন-থংননা লৌরকখিবা অসিগুম্বা তানফম অমা য়ৌরকপসিগীদমক মহাক্কী মফমদা থাগৎপা ফোংদোকচরি। মহাক্কী থৌনা অমসুং থাজবনা ইথিল কয়া পীরি। মতম চুপ্পদা ঐহাক্না য়াইফবতা ওইরসনু হায়না ফোংদোকচরি।"
অতোপ্পা ত্বিত অমদা পি.এম.না হায়খি, “ঐখোয়গী দীপক পুনিয়াগী শীংথানীংঙাই ওইরবা স্পোর্তিং পর্ফোরমেন্স অদুগীদমক চাউথোকচবা পোকই! মহাক অসি ভারতকী মনীনি অমসুং ভারতকীদমক মীংচৎ কয়া পুরকপা ঙমখ্রে। ভারত মচা খুদিংমক্না মহাক্না গোল্দ মেদল লৌরকপা নুংঙাইবা ফোঙদোকচরি। মহাক্কী তুংগী পুন্সিগীদমক য়াইফ-মঙ্গোল পীজরি।”
অন্সুবু থাগৎপা ফোঙদোক্লদুনা পি.এম.না ত্বিত তৌখি, “@OLyAnshuনা মহাক্কী মপোক নুমিৎসু তারিবা নুমিৎ অসিমক্তদা গোল্দ মেদল লৌরকপগীদমক থাগৎপা ফোংদোকচরি। মতুং তারকপা শান্ন-খোৎনবগী খোঙচৎতা হেন্না মিথোইবা ওইরসনু হায়না য়াইফ-মঙ্গোল পীজরি। মহাক্না শান্না খোৎনবা পামজবগী চাং অসিনা হৌরক্লিবা এথলেৎ কয়াদা ইথিল পীরি।”
দিব্যাবু থাগৎপা ফোঙদোক্লদুনা পি.এম.না হায়খি, “ভারতকী রেস্তলরশিং অসি শীংথানীংঙাই ওই অমসুং মসি সি.দবল্যু.জি.দা ময়েক শেংনা উৎখি। ব্রোঞ্জ লৌরকপদা @DivyaWrestlerগীদমক চাউথোকচবা পোকই। মাইপাকপা অসি মীরোল কয়ানা শীংথান্দুনা লৈহৌরগনি। মহাক্কী তুংগী পুন্সিগীদমক য়াইফ-মঙ্গোল পীজরি।”
অতোপ্পা ত্বিত অমদা পি.এম.না হায়খি, "ঐখোয়গী রেস্তলরশিংনা নীংথিরবা মওংশিং উৎলি। মেদল তেল্লীদা মশীং হাপচিল্লক্লিবা অসি মোহিত গ্রেৱালনি। মহাক্কী অচেৎপা ফিরেপ অসি মহাক্না গোল্দ মেদল অমা লৌরকপগা লোয়ননা ময়েক শেংনা উৎলে। মহাক্কী মফমদা থাগৎপা ফোংদোকচরি। তুংদা লাক্কবশিংদা হেন্না মায় পাকপা ঙম্বা ওইরসনু হায়না থৌনিজরি। ”
কেন্দ্রগী মন্ত্রী, শ্রী অনুরাগ থাকুরননা থাগৎপা ফোঙদোক্লদুনা মেদল লৌরকখ্রবশিংদা য়াইফ-মঙ্গোল পীখি। শ্রী থাকুরনা ত্বিত তৌখি, “@SakshiMalikনা পর্ফোরমেন্স য়াম্না ফজখি! ভারতকীদমক গোল্দ তৌনবা হোৎনবদা উৎখিবা অথোইবা স্কিল অসিগীদমক থাগৎপা ফোঙদোকচরি। সি.দবল্যু.জি. ২০১৮দা ব্রোঞ্জ লৌবা ঙমখিবা অদুদগী #CWG2022দা গোল্দ লৌরকপা অসিনা অদোম্না লেপ্পা লৈতনা পুক্নিং চংখিবা অমসুং কত্থোকখিবা অদু উৎলি। অদোম্না চেম্পিয়ন অমগুম্না মেদল লৌদ্রিবা ফাওবা হনবা লৈতনা শান্নখি।”
পুনিয়াবু থাগৎলদুনা স্পোর্তস মন্ত্রীনা ত্বিত তৌখি, “বজরঙ্গ পুনিয়ানা অমুক হন্না মাইপাকখ্রে!!! #CWG2022দা রেস্তলিংদা অহানবা গোল্দ লৌরকপগীদমক থাগৎপা ফোঙদোকচরি! বজরঙ্গনা মিনিৎ ১০ সেকেন্দ ১৪দা মহাক্কী গোল্দ অদু লৌবা ঙমখি। সি.দবল্যু.জি.দা উৎখিবা হেতত্রিক অদুনা চেম্পিয়নগী কনসিস্তেন্সী অদু উৎখি!”
অতোপ্পা ত্বিত অমদা শ্রী থাকুরনা হায়খি, “ভারতনা গোল্দ লৌনবা মাংদা চংশিল্লি! দীপক পুনিয়া অদোম্না গোল্দ লৌরক্তুনা শীংথানীংঙাই ওইবা মতৌ উৎখিবা অসিগীদমক থাগৎচাবা ফোঙদোকচরি! নহাক্কীদমক ঐখোয়না চাউথোকচবা পোকই!”
স্পোর্তস মন্ত্রীনা অন্সুবু থগৎলদুনা ত্বিত তৌখি, “অন্সু মলিক্না মহাক্কী খ্বাইদগী অহানবা সি.দবল্যু.জি.দা সিলভর লৌরকপা ঙমখিবদা অঙাকপা পোকই!!! অদোমগা লম্বা তৌনখিবা অদু মপাঙ্গল য়াম্না কনখি অদুবু অদোম্না হনবা লৈতনা থেংনখি। মেদল অসি নুংঙাইবা অনি ফোঙদোকপনি মরমদি ঙসি অসি অদোমগী ইপোক নুমিৎসু তারি! #SAINCOE সোনিপত্তা অদোম্না পুক্নিং চংনা ত্রেনিং তৌখিবা, মীরৈবাক্তা চৎখিবা অদুনা মহৈশিং অসি ফংবা ঙমখিবনি।”
অতোপ্পা ত্বিত অমদা শ্রী থাকুরনা হায়খি, “মোহিত গ্রেৱালগী ব্রোঞ্জ অসিনা মহাক্কী পান্দম য়ৌনা হোৎনবদা অৱাবা পুম্নমক মায়োক য়াখিবা মহাক্কী অখাং কনবা মতৌ অদুগী খুদম ওইরি। চহি অনিগী মমাংদা শোকখিবা অদুগী মতুংদা মোহিতনা মহাক্কী অহানবা সি.দবল্যু.জি.দা মেদল লায়না লৌবা ঙমখি। মসি মাইপাকপা কয়াগী অহৌবনি। মোহিত থাগৎচরি।”
শ্রী থাকুরনা দিব্যাবু থাগৎলদুনা হায়খি, “সেকেন্দ ৩০ খক্তদা মেদল অমা লৌখি! মসিনি #CWG2022দা দিব্যা কাকরন্না উৎখিবা অসি!!! মিনিৎ অমা মখাই খক্তদা ব্রোঞ্জ অমা লৌরক্তুনা চেম্পিয়ন ওইবা ঙমখি। সাই এন.সি.ও.ই. লখনৌগী অতোপ্পা কেম্পর অমনা মালেমগী ফম্পাক্তা ভারতপু চাউথোকচবা পোকহল্লি। সি.দবল্যু.জি. ২০২২দা ভারতকী রেস্তলরশিংনা ফোর্স অমা ওইনা মশক তাকপা ঙমখ্রে।”
সাক্ষী মলিক্কী মাইপাকখিবা অদু য়েংনবা মসিদা নম্বীয়ু
বজরঙ্গ পুনিয়াগী মাইপাকখিবা অদু য়েংনবা মসিদা নম্বীয়ু
দীপক পুনিয়াগী মাইপাকখিবা অদু য়েংনবা মসিদা নম্বীয়ু
অন্সু মলিক্না মাইপাকখিবা অদু য়েংনবা মসিদা নম্বীয়ু
মোহিত গ্রেৱালনা মাইপাকখিবা অদু য়েংনবা মসিদা নম্বীয়ু
দিব্যা কাকরন্না মাইপাকখিবা অদু য়েংনবা মসিদা নম্বীয়ু
******
(Release ID: 1849147)
Visitor Counter : 96