صدر جمہوریہ ہند جناب رام ناتھ کووند نے آج (23 جولائی 2022) پارلیمنٹ کے سنٹرل ہال میں الوداعی تقریب میں شرکت کی۔

اس موقع پر خطاب کرتے ہوئے صدر جمہوریہ نے کہا کہ وہ ہندوستان کے عوام کے ہمیشہ شکر گزار ہیں جنھوں نے انھیں بطور صدر ملک کی خدمت کا موقع فراہم کیا ہے۔ جو کام وہ کرنا چاہتے تھے وہ تمام منتخب نمائندوں کے تعاون کے بغیر پورا نہیں ہو سکتا تھا۔ انھوں نے کہا کہ اپنی مدت کار کے دوران ان کے ساتھ اکثر مختلف پلیٹ فارموں پر بات چیت ہوئی اور انھوں نے پارلیمنٹیرینز کے متعدد وفود اور دیگر شعبوں کے لوگوں سے بھی ملاقاتیں کیں۔ اس مدت کے دوران، انھیں وزیر اعظم جناب نریندر مودی اور ان کی وزرا کونسل کے ارکان کے ساتھ کام کرنے کا موقع بھی ملا۔ انھوں نے ان سب کا شکریہ ادا کیا کہ انھوں نے انھیں خصوصی عزت دی ہے۔ انھوں نے نائب صدرجمہوریہ جناب ایم وینکیا نائیڈو اور اسپیکر لوک سبھا جناب اوم برلا کا بھی شکریہ ادا کیا۔

صدر مملکت نے کہا کہ ہمارے آئین کا آرٹیکل 79 صدر اور دونوں ایوانوں پر مشتمل پارلیمنٹ کا انتظام کرتا ہے۔ اس آئینی شق کو مد نظر رکھتے ہوئے اور اس میں اپنے جذبات کو شامل کرتے ہوئے، وہ صدر کو پارلیمانی خاندان کے اٹوٹ حصے کے طور پر دیکھتے ہیں۔ کسی بھی خاندان کی طرح، اس پارلیمانی خاندان میں بھی اختلافات ضرور ہوتے ہیں۔ آگے بڑھنے کے طریقے کے بارے میں مختلف آرا ہوں گی۔ لیکن ہم ایک خاندان بنے ہوئے ہیں، اور قوم کا مفاد ہماری اولین ترجیح ہے۔ سیاسی عمل پارٹی تنظیموں کے طریقہ کار کے ذریعے چلتے ہیں، لیکن پارٹیوں کو ملک کو سب سے آگے رکھنے کے جذبے کے ساتھ، تعصب سے اوپر اٹھ کر اس بات پر غور کرنا چاہیے کہ کیا اچھا ہے، عام آدمی اور عورت کے لیے کیا ضروری ہے۔

صدر مملکت نے کہا کہ جب ہم پوری قوم کو ایک خاندان سمجھتے ہیں تو ہم یہ بھی سمجھتے ہیں کہ اختلافات وقتاً فوقتاً جنم لیتے ہیں۔ ایسے اختلافات کو پرامن اور ہم آہنگی سے بات چیت کے ذریعے حل کیا جا سکتا ہے۔ شہریوں اور سیاسی جماعتوں کے پاس احتجاج سمیت کئی آئینی راستے کھلے ہیں۔ آخر کار ہمارے بابائے قوم نے اس مقصد کے لیے ستیہ گرہ کا ہتھیار استعمال کیا۔ لیکن انھیں دوسری طرف کی بھی اتنی ہی فکر تھی۔ شہریوں کو اپنے مطالبات کے لیے احتجاج کرنے کا حق ہے، لیکن یہ ہمیشہ پُر امن اور گاندھی جی کے طریقے سے ہونا چاہیے۔

صدر نے کہا کہ عوامی خدمت میں اپنے کیریئر اور حکومتوں کی کوششوں پر نظر ڈالتے ہوئے ہمیں اس بات کو قبول کرنا چاہیے، اگرچہ بہت کچھ حاصل کیا گیا ہے لیکن پسماندہ لوگوں کے معیار زندگی کو بلند کرنے کے لیے ابھی بہت کچھ کرنا باقی ہے۔ ملک، آہستہ آہستہ لیکن یقینی طور پر، ڈاکٹر امبیڈکر کے خوابوں کو پورا کر رہا ہے۔ صدر نے کہا کہ وہ ایک کچے گھر میں پلے بڑھے ہیں، لیکن اب بہت کم بچوں کو ٹپکتی ہوئی چھتوں والے جھاڑیوں والے گھروں میں رہنا پڑتا ہے۔ زیادہ سے زیادہ غریب لوگ جزوی طور پر حکومت کی براہ راست مدد سے پکے گھروں میں منتقل ہو رہے ہیں۔ ہماری بہن بیٹیوں کا پینے کا پانی لانے کے لیے میلوں پیدل چلنا اب ماضی کا واقعہ بنتا جا رہا ہے کیونکہ ہماری کوشش ہے کہ ہر گھر کو نل سے پانی ملے۔ ہم نے ہر گھر میں بیت الخلا بھی لگائے ہیں، جو صاف اور صحت مند ہندوستان کی تعمیر کی بنیاد رکھ رہے ہیں۔ غروب آفتاب کے بعد لالٹین اور دیے جلانے کی یادیں بھی دھندلا رہی ہیں کیونکہ تقریباً تمام دیہاتوں کو بالآخر بجلی کے کنکشن فراہم کر دیے گئے ہیں۔

صدر نے کہا کہ جیسے جیسے بنیادی ضروریات کا خیال رکھا جا رہا ہے، ویسے خواہشات بھی بدل رہی ہیں۔ اوسط ہندوستانیوں کے خوابوں کو اب پنکھ مل گئے ہیں۔ یہ گڈ گورننس کی وجہ سے ممکن ہوا ہے جو کہ کسی بھی قسم کی تفریق کے بغیر ہے۔ یہ ہمہ جہت ترقی بابا صاحب امبیڈکر کے تصور کے مطابق ہے۔

 

ہندی میں صدر کی تقریر دیکھنے کے لیے یہاں کلک کریں

انگریزی میں صدر کی تقریر دیکھنے کے لیے یہاں کلک کریں

                                               **************

ش ح۔ ف ش ع-م ف

U: 8037

(Release ID: 1844310)