তেলঙ্গানাগী সেন্ত্রেল পুলদা (এফ.সি.আই. অমসুং দি.সি.পি.গী মখাদা রাজ্যনা) চেং লৈবগী থবক অমুক হন্না হৌদোক্নবা কেন্দ্রনা ৱারেপ লৌখ্রে হায়না কঞ্জ্যুমর এফিয়র্স, ফুদ অমসুং পব্লিক দিস্ত্রিব্যুসন, কম্মর্স অমসুং ইন্দস্ত্রী অমদি তেক্সতাইলগী কেন্দ্র মন্ত্রী, শ্রী পিয়ুশ গোয়লনা মীদিয়াগী মীওইদা পাউদম্বদা ফোংদোকখ্রে।

কেন্দ্রদগী কয়ারক হন্না নীংশিংহনখিবা লৈখ্রবসু, রাজ্য সরকারনা এপ্রিল অমসুং মে থাদা প্রধান মন্ত্রী গরীব কলয়ান অন্না য়োজনা (পি.এম.জি.কে.এ.ৱাই.)গী মখাদা লাইরবশিংদা রাসন অমত্তা য়েন্থোকখিদে হায়না শ্রী গোয়লনা তেলঙ্গানা সরকারগী মাইকৈদা নুংনাংবা ফোংদোকখি।

কেন্দ্রনা লাইরবা অমসুং লৌমীশিংগী য়াইফ য়ুম্বালগীদমক্তা খোঙফম চেৎপগা লোয়ননা অহেনবা মিৎয়েং চঙলি হায়না মহাক্না অমুক্কা হন্না নীংশিংহনখি। কেন্দ্র সরকারনা পি.এম.জি.কে.এ.ৱাই.গী খুত্থাংদা লাইরবা খুদিংনা মশাগী হক অমসুং ফংফম থোকপা কান্নবা খুদিংমক ফংহনবা পাম্মি হায়না শ্রী গোয়লনা মখা তাখি। “তেলঙ্গানা সরকারনা ইং ২০২২গী এপ্রিল অমসুং মে থাগী ওইনা দি.সি.পি. স্তোক্তগী মশক থোকপা চাং (এল.এম.তি. ১.৯০) হান্ননা লৌখ্রবনি, অদুবু মসিবু হৌজিক ফাওবা য়েন্থোক্তনা লৈরি, অমসুং মসিনা মরম ওইরগা সেন্ত্রেল স্কিমগী বেনিফিশরীশিংনা মখোয়গী ফংফম থোকপা কান্নবা অমত্তা ফংহন্দনা লৈরি”, হায়না মন্ত্রীনা হায়খি।

কেন্দ্রগী কাঙবুনা ফৌগী ফিজিকেল ভেরিফিকেসন (পি.ভি.) তৌবদা থেংনখিবা ৱাফম খুদিংবুসু মহাক্না ফোংদোকখি। মিল ৪০দা বোরা ৪,৫৩,৮৯৬ ৱাৎপা থেংনখিবগা লোয়ননা মসিগুম্বা অৱাৎপা লৈবা থেংনখিবগা লোয়ননা মথৌ নীংথিনা পাংথোক্তবা মিল্লরশিংগী পরিং অমসু তেলঙ্গানা রাজ্য সরকারগী মফমদা মতিক চাবা থবক লৌখৎনবগীদমক্তা ৩১/৩/২০২২দা খঙহনখিবা লৈখ্রবনি হায়না মহাক্না হায়খি। মসিগী মতুংদা, ২১/৫/২০২২দা অতোপ্পা থেংনরকপা ৱাফম খরসু রাজ্যদা খঙহনখি: মিল ৬৩দা বোরা ১,৩৭,৮৭২ ৱাৎলম্বা, হায়বদি, কে.এম.এস. ২০২১-২২ (রবী)গী মিল ১২ অমসুং কে.এম.এস. ২০২১-২২ (খরিফ)কী মিল ৫১; অমসুং মিল ৫৯৩, হায়বদি, কে.এম.এস. ২০২১-২২ (রবী)গী মিল ১০১ অমসুং কে.এম.এস. ২০২১-২২ (খরিফ)কী মিল ৪৯২দা ফৌশিংবু মশিং থীবা য়াবা মওংদা থম্লমদে, অমসুং মসিনা মরম ওইরগা ফৌগী স্তোক্কী পি.ভি. পাংথোকপা য়াখিদবনি।

ৱাফম অসিগা মরী লৈনবা অমা ওইনা, তেলঙ্গানা সরকারগী সিভিল সপ্লাইগী কম্মিস্নর অমসুং এক্স. ওফিসিও সেক্রেতরীনা তাং ৪/১০/২০২১গী চিথী অমদা “কে.এম.এস. ২০২০-২১ মনুংদা ফৌ/চেংগী ফিজিকেল ভেরিফিকেসন (পি.ভি.) পাংথোকপা মতমদা থেংনখিবা অয়েৎপা-অপনবা কয়াগী ৱারোইশিন পুরক্নবগীদমক্তা রাজ্য অসিনা মওং-মরিল চুম্বা বুক কীপিংগা লোয়ননা স্তোকশিংবু মশিং থীবা য়াবা মওংদা মতম পুম্বদা থমগনি অমসুং মসিগীদমক্তা স্তেন্দর্দ ওপরেতিং প্রোসিজর (এস.ও.পি.) পুম্নমক ইনগনি” হায়না থাজবা পীখিবা লৈখ্রবনি। অদুবু, অৱাৎপা থেংনখিবা মিল্লরশিংগী মাইয়োক্তা  রাজ্য সরকারনা হৌজিক ফাওবদা মশক থোকপা থবক অমত্তা পায়খত্তনা অদুমক লৈরকখি।

শ্রী গোয়লনা তেলঙ্গানা সরকারনা ব্লেন্দিং তৌবগী চাংবু ২০% য়ৌহন্নবগীদমক্তা ইথানোলগী চহিগী কেপাসিতীগী ওইনা লীতর করোর ৩৬কী তঙাই ফবদা লৈরি হায়না শ্রী গোয়লনা পাউদমখি। অদুবু, রাজ্য সরকারনা মসিগী থবক অমত্তা পায়খত্তনা লৈরি। ইথানোল প্রোসেসিং তৌবনা লৌমীশিংদা তেংবাংলম্বা য়াবনি, নহারোলশিংগী থবক কয়া অমা পীরম্বা য়াবনি অমসুং ইনভেস্তমেন্ত কয়া অমসু পুরক্লম্বা য়াবনি হায়না মহাক্না ফোংদোকখি। মসিনা পেত্রোলিয়ম ইম্পোর্ত তৌবদা য়াম্না হন্থহল্লমদুনা ফোরেন এক্সচেঞ্জ কয়া অমা কল্লম্বা য়াবনি।

শ্রী গোয়লনা তেলঙ্গানা সরকারদা মখোয়না বেনিফিশরীশিংনা মখোয়গী ফংফম থোকপা পুম্নমক ফংহনগনি হায়না লাইরবশিংগী মফমদা শকখিবা ৱাশক ঙাক্নবা হায়খি। 

রাজ্য সরকারনা ভারত সরকারগী মহুৎ শিন্দুনা ফৌ লৈবগী প্রোক্যুর্মেন্ত তৌবগী দিসেন্ত্রেলাইজ সীস্তেম্বু তেলঙ্গানা রাজ্যনা ইনখ্রবনি। রাজ্যশিংনা মখোয়গী এজেন্সীশিংগী খুত্থাংদগী লৌমীশিংদগী ফৌ লৈবনি। মিলদা তক্লবা মতুংদা থোকপা চেং অসিবুনা রাজ্যনা এন.এফ.এস.এ./ও.দবল্যু.এস.কী মখাদা মশাগী শিজিন্ননবগী থমজিনবনি অমসুং অহেনবা চেংনা সেন্ত্রেল পুলগী মখাদা এফ.সি.আই.দা পীবনি। সেন্ত্রেল স্কিমগী লৈবা অমসুং য়েনবগী চাদিং খুদিংমক ভারত সরকারনা পুবনি।

কাঙলোনগী তুং ইনবা থৌওং অমা ওইনা, রাজ্য সরকার অমসুং এফ.সি.আই.গী অপুনবা তীম অমনা রাজ্য সরকারনা স্তোক্তা লৈরে তাক্লিবা ফৌ অমসুং চেংগী চাংগী অচুম অরান খঙদোক্নবগীদমক্তা ফৌগী স্তোক্কী ফিজিকেল ভেরিফিকেসন পাংথোকখি। মসিগী পি.ভি. পাংথোকপসিদা তোঙানবা মিল কয়াদা ফৌগী স্তোক ৱাৎপগী ফিভম থেংনখি। মসিগী মতুং ইন্না, থৌওং অসিদা ফৌ স্তোক ৱাৎনা থেংনখিবা মথৌ নীংথিনা পাংথোক্তবা মিল্লরশিংগী মাইয়োক্তা মতিক চাবা থবক লৌখৎনবা রাজ্য সরকারগী মফমদা খঙহনখিবা লৈখ্রবনি। অদুবু, জুন থাবা ফাওবদা মশক থোকপা থবক অমত্তা রাজ্য সরকারনা পাংথোক্তনা লৈখি।

কোবিদ-১৯ লাইচৎনা মরম ওইরগা থোকহল্লিবা অৱা-অনা কয়া হন্থহন্নবগীদমক্তা ভারত সরকারনা চেং-হৱাই পীবগী এপ্রিল ২০২২দগী হৌখিবা প্রধান মন্ত্রী গরীব কলয়ান অন্না য়োজনা (পি.এম.জি.কে.এ.ৱাই.) ফেজ-৬কী মখাদা য়েন্থোক্নবগীদমক্তা তেলঙ্গানা সরকারগী সিভিল সপ্লাই বিভাগনা চেং (রো রাইস) লৌখ্রবনি, অদুবু, হায়রিবশিং অসি জুন থা ফাওবগী ওইনা বেনিফিশরীশিংগী মফমদা হৌজিক ফাওবা য়েন্থোক্তনা লাক্লি। মখা তাবা ওইনা, ইথানোল পুথোক্নবা রাজ্যসিদা দিস্তিল্লরী শাবগী এপ্লিকেসন প্রোসেসিং তৌবগী থবক থৌরমশিংসু রাজ্য সরকারনা মশক থোকপা থবক অমত্তা পায়খত্তনা লাকখি।

মথক্তা পনখ্রিবা থবক থৌরমশিংদা অসিদা রাজ্য সরকারনা থবক পায়খৎপা ঙমদবনা মরম ওইরগা, রাজ্য সরকারনা মরী লৈনবা থবক অমত্তা পাংথোক্ত্রিবা ফাওবা জুন ৭তগী হৌদুনা তেলঙ্গানাগী ওইনা সেন্ত্রেল পুলগী মখাদা চেং পীবা লেপ্নবা ৱারেপ লৌখ্রে।

তেলঙ্গানা সরকারনা মথৌ নীংথিনা পাংথোক্তবা মিলরশিংগী মাইয়োক্তা থবক পায়খৎপা হৌরে অমসুং হায়রিবা মিল্লরশিংগী মাইয়োক্তা পায়খৎফম থোকপা থবক খুদিংমক পায়খৎপা লোইরগনি হায়না হৌজিক খঙহল্লকখ্রে। মখা তাবা ওইনা, তেলঙ্গানাগী চীফ সেক্রেতরীনা পি.এম.জি.কে.এ.ৱাই. ফেজ-৬কী স্কিমগী মখাদা চেং (রো রাইস) য়েন্থোকপা হৌরে অমসুং এন.এফ.এস.এ.গা লোয়ননা মখোয়দা পীরকপা মপুং ফাবা চাং য়েন্থোক্লগনি হায়বগী থাজবসু পীরকখ্রে। পুম্নমক অসিগী মথক্তা, ইথানোল শুংনবগীদমক্তা দিস্তিল্লরী শাবগী এপ্লিকেসন পুম্নমকপু প্রোসেস তৌবা হৌনবা ৱাফম খঙহনখিবগা লোয়ননা রাজ্য সরকারনা তঙাই ফদবা খোঙথাং থাংবসু হৌখ্রে হায়রি।

রাজ্য সরকারনা থাজবা পীরকপা অমসুং মরী লৈনবা থবক পায়খৎলক্লিবশিং য়েংলুরগা অমসুং লৌমী অমসুং মিল্লিং ইন্দস্ত্রীগী অপাম্বশিং খন্নরবা তুংদা, ভারত সরকারনা সেন্ত্রেল পুলগী মখাদা চেং পীবগী থবক অমুক্কা হন্না হৌখ্রে। ভারত সরকারনা লৌমীশিংগী অপাম্বা ঙাক শেন্নবা অমসুং মখোয়গী য়াইফ য়ুম্বাল পুরকপগীদমক্তা খোঙফম চেৎলি। লৌমী অমসুং মিল্লিং ইন্দস্ত্রীগী অপাম্বগা হকথেংননা মরী লৈনবা মথক্তা পনখ্রিবা থবক-থৌরম কয়াগীদমক্তা তসেংবা ইথিলগা লোয়ননা থবক পায়খৎনবা রাজ্য সরকারগী মফমদা খঙহনখ্রে।

 

*****

(Release ID: 1843425)