লৌউ-শিংউ অমসুং লৌমীশিংগী য়াইফ য়ুম্বালগী কেন্দ্র মন্ত্রী, শ্রী নরেন্দ্র সিংহ তোমারনা ইন্দিয়ন কাউন্সিল ফোর রিসর্চ ওন ইকোনোমিক রিলেসন্স (আই.সি.আর.আই.ই.আর.) অমসুং নেস্নেল স্তোক এক্সচেঞ্জ (এন.এস.ই.)গী জোইন্ত কনফরেন্স অমা ঙসি গ্বালিওরদগী ভিদিও কনফরেন্সিংগী খুত্থাংদা হৌদোকখ্রে। শ্রী তোমারনা থৌরমসিদা লৌমী ইচিল ইনাওশিংনা হোৎনবা কনবা অমসুং মখোয়গী য়াইফগদবা পোলিসী কয়া সরকারনা শেম্বনা মরম ওইরগা মালেমগী লৌউ-শিংউ পোত্থোক খ্বাইদগী য়াম্না পুথোকপা মকোক থোংবা লৈবাক অনিগী মনুং চনবা ঙম্লিবনি হায়না ফোংদোকখি। ভারতকী ওর্গানিক পোত্থোকশিংবু মালেম শিনবা থুংবদা পাম্নরি অমসুং কোরোনাগুম্বা লাইচৎ লৈখ্রগসু, ভারতকী লৌউ-শিংউ এক্সপোর্তনা লুপা করোর লাখ ৩.৭৫ য়ৌবসি য়াম্না ফবা খুদম অমনি হায়না মহাক্না হায়খি। অসিগুম্বা ফিভম অসিদা, ঐখোয়না ঐখোয়গী লৌউ-শিং পোত্থোকশিংগী মগুন ঙাক্কদবনি অমসুং মসিবু মালেমগী থাক্তা লৈহন্নবআ হোৎনগদবনি।

লৈবাক্কী মকোক থোংবা থিঙ্ক-তেঙ্কশিংগী মনুংদা অমা ওইরিবা আই.সি.আর.আই.ই.আর. অমসুং মালেমগী খ্বাইদগী চাউবা এক্সচেঞ্জ, এন.এস.ই.না “লৌউ-শিংউগী মার্কেতপু মওং-মরিল তাহনবা” হায়বা হীরমদা কনফরেন্স অসি পুন্না পাংথোকমিন্নবনি। থৌরমগী ময়াই তাংবল লৌরিবা কেন্দ্রগী মন্ত্রী, শ্রী তোমারনা ভারত অসি তোঙানবা মখলগী অইং-অশা লৈবা লৈবাক অমনি অমসুং মফমসিদা লৌউবগী চুনবা অইং-অশাগী ফিভম লৈ হায়না ফোংদোকখি।

 “ঐখোয়গী লৌউ-শিংউ সেক্তর অসি মপাঙ্গল য়াম্না লৈ অমসুং খুদোংচাদবা ফিভম কয়াদা মসিনা নিংহন্নদনা লৈ। মালেম্না চপ লেপখিবা হন্দক্কী কোবিদ ইরাং অমসুং লোকদাউনগী মরক্তা, লৌ-হুনবা, লৌ-লিংবা, লৌ-লোকপা, মার্কেতিংগী থবকশিং অয়েৎপা লৈতনা পাংথোকখি। ভারতকী লৌউ-শিংউ সেক্তর অসি য়াম্না পাক চাউই অমসুং ঐখোয়গী মীশিং অয়াম্বনা মসিদা মখা পোল্লি, মরম অদুনা, মসিগী চাউখৎনবগীদমক্তা সরকারনা তঙাই ফদবা থৌশিল থৌরাং শেমখ্রে অমসুং অখঙ-অহৈশিংনা মখোয়গী পাউতাক কয়াগী খুত্থাংদা সরকারগী তেংবাংলি, পুম্নমক অসিনা লৌউ-শিংউ সেক্তরদা কান্নবা য়াম্না পীরি। লৌউ-শিংউ চাউখৎহন্নবা অমসুং শেন্ননবগীদমক্তা প্রধান মন্ত্রী, শ্রী নরেন্দ্র মোদীগী লুচিং মখাদা লৈবাক অসিদা মমাংগী চহি ৮দা তোঙানবা খোঙথাং কয়া পায়খৎখ্রে। লৈবাক শিনবা থুংবগী মন্দি ১০০০বু নেস্নেল এগ্রিকলচরেল মার্কেতপ্লেস (ই-নাম)গা শম্নহনখি অমসুং অতোপ্পা মন্দিশিংবুসু শম্নহন্নবা হৌজিক থবক পায়খৎলি। লৌমীশিংনা মখোয়গী পোত্থোকশিংগী চুনবা মমল ফংহন্নবা অমসুং লৌউবগী থৌওংদা তেক্নোলোজী শিজিন্নহন্নবা কেন্দ্র সরকারনা থবক কয়া পায়খৎলি”, হায়না মহাক্না হায়খি।

লৈবাক অসিদা ফার্মর প্রদ্যুসর ওর্গনাইজেসন (এফ.পি.ও.) ১০,০০০ শেমগৎপগী থবকসু লুপা করোর ৬৮৫৬ থাদদুনা হৌখ্রে হায়না শ্রী তোমারনা হায়খি।

“লৈবাক্কী অপীকপা লৌমীগী চাউরাকপা ৮৫%না এফ.পিপ.ও.শিংগী শরুক ওইরি। এফ.পি.ও.শিংগী মিৎয়েং মখাদা লৌমীশিংনা মখোয়গী লৌ-উবা লমগী পাক-চাউবা হেনগৎহনবনা মরম ওইরগা অহেনবা লৌরোক ফংদুনা কান্নবা কয়া ফংলি। মখোয়না মগুন হেন্না লৈবা মরূ অমসুং হারগা ফংবগা লোয়ননা লোন লৌবদসু মতেং কয়া ফংলি, পুম্নমক অসিনা মরম ওইরগা মখোয়গী অপুনবা শেন্থোক হেনগৎহনবদসু তেংবাংলি অমসুং লৌবগী থৌওংবু হেন্না ফগৎহনবা ঙম্লি। সরকারনা তোঙানবা মফমশিংদা কস্তম হাইরিং সেন্তর কয়া শীন-লাঙলে অমসুং লৌমী কয়াদা এগ্রিকলচরেল ইমপ্লিমেন্তশিংগীদমক্তা সবসিদীসু পীরি। মমাংদদি, লন্নাই ইনভেস্তরশিংগী মফমদা লৌউ-শিংউ সেক্তরদা ইনভেস্ত তৌবগী খুদোংচাবা লৈরমদে, অদুবু হৌজিক্তি, ৱেয়র্হাউস, কোল্দ স্তোরেজ, পেকেজিং মেছিনগুম্বা ফেসিলিতী কয়া খুঙ্গংশিংদা য়ৌহল্লক্নবা কন্না হোৎনরি অমসুং মসিগীদমক্তা কেন্দ্র সরকারনা লৌউ-শিংউ অমসুং মরী লৈনবা সেক্তরশিংগী ওইনা লুপা করোর ১.৫ খাক্তুনা থম্লে। লুপা করোর লাখ ১ হেন্না থাদদুনা এগ্রিকলচরেল ইনভেস্তমেন্ত ফন্দ (এ.আই.এফ.) শেমখ্রে, মসিগী মনুংদগী, চাউরাকপা প্রোজেক্ত ১৩,০০০গীদমক্তা লুপা করোর লিশিং ৯.৫গী চাউরাকপা শেনফমগী লোন কয়াগী অয়াবা হৌজিক ফাওবগী ওইনা পীখ্রে, মসিনা লৌমীশিংদা কান্নবা য়াম্না পীগনি”, হায়না মহাক্না হায়খি।

শ্রী তোমারনা লৌমীশিংনা ওর্গানিক অমসুং নেচরেল ফার্মিংদা মায় ওন্সিন্নবা হায়বগা লোয়ননা মসিগী মগুনশিংনা কস্তমরশিংদা কান্নবা ফংহন্সি হায়খি। কেন্দ্র সরকারনা লৌউ-শিংউগা মরী লৈনহন্দুনা কান্নবা লৌনা হায়বা ৱাফমদা য়ুম্ফম ওইদুনা এনিমেল হসবেন্দরী খুমাং চাউশিলহন্নবা কন্না হোৎনরি হায়না মহাক্না হায়খি। কেন্দ্রগী লৌউ-শিংউ মন্ত্রীনা দ্রোন শিজিন্নবদা পুক্নিং থৌগৎনবা সরকারনা পোলিসী অমা লাউথোকখ্রে অমসুং লৌউ-শিংউ অমসুং লৌমীশিংগী য়াইফ য়ুম্বাল মন্ত্রালয়না হীরম অসিগা মরী লৈননা এস.ও.পি. অমসু ফোঙখ্রে হায়খি।

 “দ্রোন শিজিন্নবা হেনগৎলকপগা লোয়ননা, মসিনা লৌবদা কান্নবা পীবতা নত্তনা লৌমীশিংনা থেংনরিবা কেমিকেলগী সাইদ ইফেক্ত লৈহল্লোই অমসুং থবক্কী অনৌবা খুদোংচাবা কয়াসু লৈহনগনি। লৌমীশিংগী কান্নবগীদমক্তা সরকারনা স্কিম কয়া হৌদোকখ্রে অমসুং অনেম্বা ইন্তরেস্ত লৈবা তান্নবদা লায়বা লোন কয়াসু পীরি অমসুং হৌজিক ফাওবগী ওইনা, হায়রিবা লোনশিংগী শেনফম্না লুপা করোর লাখ ১৬মুক ওইরি। মান্নবা থৌওং ওইনা, প্রধান মন্ত্রী ফসল বীমা য়োজনাগী মখাদা লুপা করোর লাখ ১.১৫গী ক্লেমসু লৌমীশিংদা মখোয়গী লৌরোক মাঙবগী কম্পেন্সেসন ওইনা পীথোকখ্রে। লৌমীশিংগী পোত্থোক হেনগৎকদবনি হায়বসিদা ঐখোয়না অকনবা মিৎয়েং চঙনা হোৎনরি অমসুং সরকারনা মরী লৈনবা খোঙথাং ক্যা লেপ্তনা পায়খৎলি”, হায়না মহাক্না হায়খি।

ঙসিগী কনফরেন্স অসিদা খন্ন-নৈনরিবশিং অসিদগী খ্বাইদগী ফবা ৱাহৌদোক কয়া থোক্লক্কনি অমসুং হায়রিবশিং অসিনা হেন্না ফবা পোলিসী শেম্বদা তেংবাংগনি হায়বগী থাজবা লৈ হায়না শ্রী তোমারনা হায়খি। আই.সি.আর.আই.ই.আর.গী চেয়রমেন, শ্রী প্রমোদ ভসিন অমসুং এন.এস.ই.গী মেনেজিং দাইরেক্তর অমসুং সি.ই.ও., শ্রী বিক্রম লিমায়েনা কনফরেন্স অসিদা ৱা ঙাঙখি। আই.সি.আর.আই.ই.আর.গী এগ্রিকলচরগী চেয়র, প্রোফেসর শ্রী অশোক গুলাতীনা ভোৎ ওফ থেঙ্কস পীখি। কনফরেন্স অসিদা শরুক য়াখিবা পেনেলিস্ত অমসুং দিগ্নিতরীশিংগী মরক্তা এন.এস.ই. দাইরেক্তর অমসুং চীফ একজেক্যুতিব, দাঃ দীপক মিশ্রা, নিতি আয়োগ মেম্বর, প্রোফঃ রমেশ চান্দসু য়াওখি।

*****