কেন্দ্রগী পোর্তস, শিপ্পিং অমসুং ৱাতরৱেজ অমসুং আয়ুশকী মন্ত্রী, শ্রী সর্বানন্দা সোনোৱালনা ঙসি অসামগী ঈশিং-ঈচাউনা শোকহল্লবা লমদম অসিগী মীশিংগীদমক্তা নাগাওনগী ফুলাগিরি হায়র সেকেন্দরী স্কুলদা থম্লিবা রিলীফ কেম্পতা চৎখ্রে। মন্ত্রী অসিনা মখোয়দা পীরিবা তেংবাং অদুবু য়েংশিন্নবা চৎখি অমসুং শোকহল্লবা মীশিং অদুগা ৱারি শানরকখি। শ্রী সোনোৱালনা অমাং-অতা থোকহল্লিবা ঈশিং-ঈচাউ অসিদা পুনশি মাংখিবশিং অদুগী নক্নবা ইমুং-মনুংগী মীওইশিংগীদমক্তা অৱাবা ফোংদোকখি।

অমাং-অতা থোকহল্লিবা ঈশিং-ঈচাউ অসিনা মরম ওইরগা থোকহল্লিবা অতেক-অকাই অমসুং মাংহন-তাকহল্লিবা অদুবু য়েংশিনখ্রে, কেন্দ্রগী তীম অমনা য়াম্না থুনমক মফম অদুদা লাক্লগনি হায়না কেন্দ্রগী মন্ত্রী অসিনা খঙহনখি। খোংচৎ অসিগী মতুংদা, তীম অদুনা মীশিং অদুগীদমক্তা অঙম্বা মতেং পীনবা  রিপোর্ত অমা শেম্লগা সরকারদা থাগৎলগনি অমসুং মতেং পীরগনি।

ফ্লদ রিলীফ কেম্প অদু চৎলুরবা মতুংদা ৱা ঙাংলদুনা, শ্রী সোনোৱালনা হায়খি মদুদি অসামদা লৈরিবা ঈশিং-ঈচাউগী ফিভম অসি য়াম্না শোকচিল্লে অমসুং সরকার অসিনা মসিগী ঈশিং-ঈচাউ অসিদা শোকহল্লবা মীশিংদা রিলীফ অমসুং সপোর্ত পীনবগীদমক্তা হোৎনরি। প্রধান মন্ত্রী শ্রী নরেন্দ্র মোদী অমসুং কেন্দ্রগী হোমগী মন্ত্রী, শ্রী অমিত শাহনা মফম অদুদা লৈরিবা ফিভম অদুগী মতাংদা হংখি হায়না মহাক্না হায়খি। মখোয়না মহৌশাগী ওইবা তমথিরবা চাউরবা অমাং-অতা থোকহল্লিবা লাইবক থিবা থৌদোক অসিগী মতাংদা অৱাবা ফোংদোকখি অমসুং কেন্দ্রগী মাইকৈদগী অঙম্বা মতেং পাংগনি হায়না মহাক্না হায়খি।

মন্ত্রী অসিনা ওফিসিয়েলশিংগা ৱারি শানবা মতমদা ঈশিং-ঈচাউনা শোকহল্লবা মীশিংদা অঙম্বা মতেং পুম্নমক পাংবগীদমক্তা থাগৎখি অমসুং মখোয়দা মীশিং অদুগী য়াইফনবগী মাইকৈদা লেপ্তনা থবক তৌনবা হায়খি।

মন্ত্রী অসিনা মখা তারকখি মদুদি মুখ্য মন্ত্রী, শ্রী হিমন্তা বিস্বা সর্মাগী মখাদা তীম অসামনা ফিভম আসিবু লাকশিন্নাব কন্না হোৎরি অমসুং মহাক্না য়াম্না তোইনা মসিগী মতাংদা মুখ্য মন্ত্রীগা ৱারী শানৈ হায়না হায়খি।

কেন্দ্রগী মন্ত্রী অসিনা গুৱাহাতি অমসুং রাহাগী মরক্তা লৈরিবা নেস্নেল হাইৱেগী নাকল অনিমক্তা লৈরিবা ঈশিং-ঈচাউগী ফিভম অদুবুসু য়েংশিনখি। মন্ত্রী অসিদা লমদম অসিদা চত্থরিবা রেসক্যু অমসুং পীরিবা রিলীফ সপোর্তকী মতাংদসু শম্লপনা খঙহনখি।

**********