প্রধান মন্ত্রী, শ্রী নরেন্দ্র মোদীনা কর্নাতকাগী মৈসুরু পেলেস গ্রাউন্দদা মীওই লিংশিং কয়ানা শরুক য়াদুনা পাংথোকপা মাস য়োগ দেমোনস্ত্রেসন অমদা শরুক য়াদুনা ৮শুবা মালেমগী য়োগ নুমিৎ পাঙথোকখ্রে।

থৌরম অদুদা ৱা ঙাংলদুনা ইকাই খুম্নরবা প্রধান মন্ত্রীনা হায়খি, “য়োগনা ঐখোয়গী খুন্নাইদা, লৈবাকশিং অমসুং মালেমদা শান্তি পুরকই। য়োগনা ঐখোয়গী তাইবংপালদা শান্তি পুরকই। ঐহাক্না ৮শুবা মালেমগী য়োগগী নুমিৎ অসিদা মীয়াম পুম্নক্তা য়াইফ-পাউজেল পীরি। ঙসিদি, য়োগ অসি মালেমগী মফম খুদিংমক্তা প্রক্তিস তৌনরি।  য়োগদগী ফংবা শান্তি অসি লনাই মীওই খর খক্তগী নত্তে, মসিনা ঐখোয়গী লৈবাকশিং অমসুং মালেমদা শান্তি পুরকই।”

থৌরম অদুদা ৱা ঙাংলদুনা, প্রধান মন্ত্রীনা হায়খি মদুদি য়োগ অসি হৌজিক মালেমগী কুহ্মৈ অমা ওইরে। য়োগ অসি লনাই মীওই অমত্তগী নত্তে, মসি অপুনবা মীওইবা জাতিগীদমক্তনি। মরম অদুনা হন্দক্তি মালেমগী য়োগ নুমিৎকী থীম অসি  ‘য়োগ ফোর হ্যুমেনিতী’ ওইরিবনি। প্রধান মন্ত্রীনা মখা তারকখি মদুদি মৈসুরুগুম্বা ভারতকী আধ্যাত্মিককী মফমশিংদা চহিচা কয়া শেমগৎলকপা য়োগগী শক্তি অসিনা ঙসিদি মালেমগী ওইনা হকচাং ফনা লৈনবা লম্বী তাক্লে। ঙসিদি য়োগনা মালেমগী মতেং পাংনবগী য়ুম্ফম অমা ওইরে অমসুং মীওইবা খুন্নাইদা হকচাং ফবা পুন্সি মহিং অমা লৈনবা থাজবা অমা পীবীরে।

মরক অসিদা, কেন্দ্রগী কেমিকেল অমসুং ফর্তিলাইজরগী রাজ্য মন্ত্রী, শ্রী ভগৱন্থ খুবানা কর্নাতকাগী ৱিজয়াপুরাদা গোল গুম্বাজদগী য়োগ নুমিৎকী থৌরম লমজিংখি। মালেমগী য়োগ নুমিৎকী থৌরমদা ৱা ঙাংবা মতমদা, কেন্দ্রগী ‌এম.ও.এস.না হায়খি মদুদি য়োগ অসি ৱাখল অমসুং হকচাংগী শাজেলনি। মসিদা ৱাখল অমসুং হকচাংগী হকশেল ফগৎহন্নবা মুভমেন্ত, মেদিতেশন অমসুং ব্রীদিং তেক্নিকশিং য়াওরি। মহাক্না মখাতানা হায়খি মদুদি য়োগ অসি মতম চুপ্পদা ঐখোয়গী কলচরেল-স্পিরিচুৱল কন্সিয়সনেসকী শরুক ওইদুনা লাক্লি।  মহাক্না মীয়ামদা য়োগ তৌনবা অমসুং মসিদা অতোপ্পশিংবুসু থৌগৎনবা হায়খি। ৱিজয়াপুরাগী গোল গুমাজ অসি লৈবাক অসিগী মরু ওইবা মফম ৭৫গী মনুংদা চনখিবা অসি ঐখোয়গী ওইনা য়াম্না লাইবক ফবনি হায়না মহাক্না মখা তাখিরম্মি।

লৈবাক অসিনা নিংখা তমখিবগী চহি ৭৫ শুবা কুমওন পাংথোকপা অসিদা অজাদি কা অমৃত মাহোতসবকী ৱাখল্লোনদা, মালেমগী য়োগগী নুমিৎ অসি লৈবাক অসি শিনবা থুংনা মরু ওইবা হেরিতেজ স্পোতশিংদা পাংথোকখি।

খ্বাইদগী অহানবা মালেমগী য়োগগী নুমিৎ অসি ২০১৫গী জুন ২১দা পাংথোকখি। জুন ২১ অসিবু  আই.দি.ৱাই. ওইনা য়ুনাইতেদ নেসন্সনা মশক খঙবীবগী মরু ওইবা মরম অসি মালেমগী থাক্তা মীয়ামগী হকশেলদা য়োগগী মতিক অদুবু মশক তাক্নবনি। ২০১৪দা য়ুনাইতেদ নেসন্স জেনরেল এসেমব্লী  (য়ু.এন.জি.এ.)গী আই.দি.ৱাই.গী ফিরেপ অসি প্রধান মন্ত্রী, শ্রী নরেন্দ্র মোদীনা হৌদোকপদগী ওইরকখিবনি অমসুং মসি ময়াম্না য়ানরবা মতুংদা পাস তৌখিবনি। ২০১৫দগী, আই.দি.ৱাই অসি মালেম মফম কয়াদা হকশেলগীদমক্তা মীয়ামগী ওইবা ঈহৌ অমা ওইনা ওইরকখি। 

****