আয়ুশ মন্ত্রালয় অমসুং কর্নাতকা সরকারনা মৈসুরুগী মৈসুরু পেলেস্তা ৮শুবা মালেমগী য়োগ নুমিৎ (আই.দি.ৱাই.) ২০২২গী মপুং ওইবা থৌরম শীন লাঙখ্রে। নাম্ম শোইবা অঙাং ২০০ হেনবা, মমা-মপা লৈত্রবা অঙাং ১১, ত্রান্সজেন্দর ১৫, ঐচ.আই.ভি. পোজিতিব ওইবা মীওই অমসুং আশাগী থৌমীশিং য়াওবা মীওই ১৫,০০০ হেনবনা শরুক য়াদুনা মৈসুরু পেলেস্তা পাংথোকখিবা মাস য়োগ দিমোন্সত্রেসন্দা প্রধান মন্ত্রীনা লুচিংখি।

কর্নাতকাগী রাজ্যপাল, শ্রী থাৱর্চান্দ গেহলোত, কর্নাতকাগী মুখ্য মন্ত্রী, শ্রী বাসবরাজ এস. বোনমাই, আয়ুশ, পোর্ত, শিপ্পিং অমসুং ৱাতরৱেজকী  কেন্দ্র মন্ত্রী, শ্রী সর্বানন্দ সোনোৱাল, আয়ুশ মন্ত্রালয় অমসুং কর্নাতকা সরকারগী ওফিসিএল অমসুং অতোপ্পা মীথুংলেনশিংনা ঙসিগী মাস য়োগ দিমোন্সত্রেসন্দা শরুক য়াখি।

হন্দক্কী চহিগী থীম্না য়োগনা কোবিদ-১৯ লাইচৎ মনুংদা অৱা-অনা কয়া হন্থহনবদা মীওইবা খুন্নাইগী মতেং করম্না পাংখিবগে হায়বা নীংথিনা তাক্লি হায়না প্রধান মন্ত্রীনা থৌরম অসিদা ফোংদোকখি। ঙসিদি, য়োগনা মালেমগী ওইবা তেংবাংনবগী য়ুম্ফম অমা ওইরক্লি অমসুং মীওইবা খুন্নাইদা হকশেল ফনা হিংবা ঙমগনি হায়বগী থাজবসু পীরি। য়োগনা ইমুং-মনুংদগী থোক্লক্তুনা মালেমগী মফম খুদিংদা শন্দোকপা ঐখোয়না উরে অমসুং স্পিরিচুএল রিএলাইজেসন অমসুং মহৌশাগী ওইবা অমসুং লান্নবা য়াবা মীওইবগী ৱাখল তাবগী, মরু ওইনা মমাংদা অমুক্তা থোকখিদ্রিবা লাইচৎকী অরোইবা চহি অনিগী মনুংদা, শক্তম অমা ওইরি হায়না মহাক্না মখা তাখি।

ঙসিগী নুমিৎ অসিদি য়োগগী মরী লৈনবা মশিং থীঙমদ্রবা ওইথোকপা য়াবা কয়াবু নীংথিনা শকখঙবগী নুমিৎনি হায়না প্রধান মন্ত্রীনা হায়খি। ঙসিদি, ঐখোয়গী নহারোলশিংনা য়োগগী লমদা অনৌবা ৱাখল্লোন কয়াগা লোয়ননা মশিং য়াম্না থোক্নরক্লি। আয়ুশ মন্ত্রালয়গী স্তার্তঅপ য়োগ চেলেঞ্জনা হৌজিক্কী চারোন শুরোনশিংদা ইথিল পীবা অনৌবা ৱাখল্লোন অমসুং ইন্নোভেসন কয়া অমত্তা ওইনা পুশিল্লক্লি।

তিল্লিবা মীয়ামদা ৱা ঙাঙবদা, আয়ুশ, পোর্ত, শিপ্পিং অমসুং ৱাতরৱেজকী কেন্দ্র মন্ত্রী, শ্রী সর্বানন্দ সোনোৱালনা মীওই অমমম, খুন্নাই, লৈবাক অমসুং মালেমগী হকশেল অমসুং নুংঙাই য়াইফবদা মিৎয়েং চঙদুনা তংদু লৈতাবা অমসুং শান্তি পুরকপা হায়বসি প্রধান মন্ত্রীগী মঙলান্নি হায়না পাউদমখি। য়োগনা মালেম্বু অমত্তা ওইনা পুরক্লে, গ্লোবেল ভেল্যুবু নৌহৌননা মওং শেম্লে, অমসুং তোঙান-তোঙানবা হেল্থকেয়র পথাপশিংবু নকশিন্নহল্লে হায়না মহাক্না মখা তাখি।

হেল্থ অমসুং হেতেরোজেনিতী সেলেব্রেত তৌনবগীদমক্তা খুন্নাইগী তোঙানবা কাঙলুপ কয়া মনুং চলহন্দুনা তোপ তোপ্পা থৌরাং অমা আয়ুশ মন্ত্রালয়না শেম শারে হায়না মন্ত্রীনা ফোংদোকখি। শ্রী সোনোৱালনা মখা তানা হায়খিবদা, য়োগগী খুত্থাংদা মীয়ামগী হকশেল অমসুং য়াইফ য়ুম্বালগী থাক ৱাংখৎহন্নবা মন্ত্রালয়না তোঙানবা খোঙথাং কয়া পায়খৎখ্রে হায়রি।

হন্দক্কী চহিগী মালেমগী য়োগ নুমিৎ ২০২২না অনৌবা খোঙথাং কয়া উরি, লৈবাক ৭৯ অমসুং য়ুনাইতেদ নেসন্স ওর্গনাইজেসনগা লোয়ননা মীরমদা লৈরিবা ভারতকী মিসনশিংগী মরক্তা খুৎশম্নদুনা লৈবাক্কী ঙমখৈ লান্না য়োগনা পুম্নমকপু অমত্তা ওইহনবা ঙম্বগী পাঙ্গল উৎপা, ‘গারজিয়ন রিং’সু য়াওরি। নীংতম্বগী অমৃত মহোৎসবকা ৮শুবা মালেমগী য়োগ নুমিৎকা পুন্সিন্নদুনা, কেন্দ্রগী মন্ত্রালয় ৭৫না লুচিংদুনা লৈবাক্কী আইকোনিক ওইবা মফম ৭৫দা মাস য়োগ দিমোন্সত্রেসন পাংথোক্লি।

য়োগগী পুৱারী অমসুং লৌশিং তাক্নবগীদমক্তা ভর্চুএল রিএলিতীগুম্বা খ্বাইদগী নৌবা তেক্নোলোজী উৎলিবা দিজিতেল য়োগ এগজিবিসন অমসু প্রধান মন্ত্রীনা শঙ্গাখি। প্রধান মন্ত্রীনা স্তোল ১৪৬ লৈবা স্তেতিক ওইবা আয়ুশ এগজিবিসন্দসু চৎখি, মসিদা কর্নাতকা অমদি ভারত সরকারগী মখাদা লৈবা য়োগ ইন্সতিত্যুসন, আয়ুশ ইন্সতিত্যুসনশিংনা শরুক য়ারি।

****