ঙসি মে ২৬ ২০২২দা ভারতকী রাস্ত্রপতি শ্রী রাম নাথ কোবিন্দনা তিরুভানন্থপুরমদা নেন্সেল ৱুমেন লেজিসলেচর্স কনফরেন্স-২০২২ হৌদোকখ্রে। মীফম অসি ‘অজাদি কা অমৃত মহোৎসব’কা মরী লৈন্না কেরলা লেজিসলেতিপ এশেমব্লিনা য়ুম্বু ওইদুনা পাংথোকপনি।

থৌরম অদুদা রাস্ত্রপতিনা হায়খি লৈবাক অনিনা নিংতম্বা ফংখিবা চহি ৭৫শুরকপগী থৌরম পাংথোক্নবা থৌরাং তৌরিঙৈদা নেন্সেল ৱুমেন লেজিসলেচর্স কনফরেন্স পাংথোকপা অসি মতাং য়াম্না চাই। ‘অজাদি অমৃত মহোৎসব’কী মখাদা ঐখোয়না চহি অমা হেন্না নিংশিং থৌরম কয়া পাংথোক্কনি। তোঙান-তোঙানবা থৌরমশিংদা মীয়াম্না থৱায় য়াওনা শরুক য়াবা অসিনা মখোয়না হৌখ্রবা থৌদোকশিংগা শম্নবদা অমসুং ঐখোয়গী লৈবাক অসিগী হৌরকফম মখোয় মশামক অমুক হন্না খঙলকপদা মখোয়গী হরাও-তয়াম্বা অদু উৎথোকলে।

রাস্ত্রপতিনা হায়খি ঐখোয়গী নিংতম লালহৌগী মতমদা নুপীশিংনা মরুওইবা থৌদাং অমা লৌখি। চহি কয়াগী মমাঙদগী লোইলম লৈঙাক্তগী নান্থোক্নবা ভারতনা কন্না হোৎনদুনা লাকখি অমসুং মসিগী অঙনবা মশক অদু ১৮৫৭ দা উৎথোকখি। ১৯শুবা চহিচাগী ময়াই থংবা শরুক্তা, অতোপ্পগী নাকলদা নুপা ঙাক্তা ওইরবশু, ভারতকী মাইকৈদা নুপী কয়া য়াওখি। মখোয়গী মরক্তা রানি লক্সমিবাই খ্বাইদগী শিংথাবা য়াবনি, অরানবা লৈঙাক্কী মায়োক্তা মহাকগুম্বা নুপী কয়ানা থৌনা ফংনা লান্থেংনখি।

নন-কোওপরেসন মুভমেন্তদগী হৌরগা ভারত থাদোকউ ইহৌ য়াওনা গান্ধীজিনা লুচিংবা সত্যগ্রহগী খোঙজংশিংদা নুপী কয়া শরুক য়াখি। অহানবা নুপী সত্যগ্রহিশিংগী মনুংদা কসতুরবা য়াওখি। গান্ধীজি ফাখিবা মতমদা, দান্দি ফাওবা চৎকদবা থুমগী খোঙচৎকী লুচিংবা মহাক্না সোরোজিনি নাইদুদা শীন্নখি। মীখল থেংনখিবা অহানবা নুপীশিংগী মনুংদা কমালাদেবী চত্তোপধ্যয়া য়াওরি। নেতাজি সুভাস চন্দ্র বোসনা লুচিংবা ইন্দিয়ান নেন্সেল আর্মিদা কেপ্তেন লাক্সমি সেগাল অমসুং মহাক্কা লোয়নবশিং শরুক য়াখি অমসুং মেদাম বিকাজি কামাগী থৌনা ফারবা কৎথোকপশিং কাউবা ঙম্লোই। ঐখোয়গী নিংতম ইহৌদা নুপীশিংনা শরুক য়াবগী খুদম পীবা হৌরকপা মতমদা, ৱাখলদা মীওই কয়াগী মমিংশিং নিংশিংলক্কনি অমসুং কনাগুম্বা অমনা মখোয়গী মরক্তগী মমিং কয়া হায়বা ঙমগনি হায়না রাস্ত্রপতিনা ফোঙদোকখি।

খেন্নবা কয়া থমদনা অঙনবা মতমদগী হৌনা লৈবাক অসিগী চহি মপুংফারবা নাগরিক খুদিংমক ভোৎ থাদবা য়াবগী হক ফংহনবগী মতাংদা রাস্ত্রপতিনা হায়খি মালেমদা খ্বাইদগী লিরবা অনৌবা মতমগী গনতন্ত্র চৎপা লৈবাক অমা ওইরিবা য়ুনাইতেদ স্তেৎকী নুপীশিং লৈবাক অদুনা নিংতম্বা ফংলবা চহি ১০০ হেল্লবা মতুংদা নুপীশিং ভোৎ থাদবগী হক ফংখি। য়ুনাইতেদ কিংদমগী নুপীশিংশু চহি কয়া ভোৎ থাদবগী হক ফংনবা ঙাইখি। মসিগী মতুংদা ফাওবা, শেন-থুমগী ফিবম ফরবা য়ুরোপকী লৈবাক কয়া নুপীশিংদা ভোৎ থাদবগী হক ফংহনখিদে। অদুবু ভারতকী ওইনা নুপাশিং খক ভোৎ থাদবা য়াহনবা অদুগা নুপীশিং য়াহন্দবা মতম অমতা লৈখিদে। মসিনা পোৎশক অনি খক উৎলে। অহানবদা, সংবিধান শেমখিবশিংনা গনতন্ত্র অমসুং মীয়ামগী লৌশিংদা অচেৎপা থাজবা লৈখি। মখোয়না নাগরিক খুদিংমক নাগরিক অমা ওইনা লৌখি অমসুং নুপী অমা ওইনা নত্ত্রগা কাংলুপ নত্ত্রগা ত্রাইব অমা ওইনা লৌখিদে অমসুং ঐখোয়গী মান্নবা পান্দম অমা ফংনবা মখোয় খুদিংমক্কী মফম লৈ হায়না লৌখি। অনিশুবদা , অরিবা মতমদগী হৌনা লৈবাক অসি নুপা অমসুং নুপী থোঙ মান্নদুনা লাকখি, নুপা নত্ত্রগা নুপী য়াওদ্রবদি তশেংনা মপুং ফাদে।

রাস্ত্রপতিনা হায়খি হিরম অমগী মতুংদা অতোপ্পা হিরম অমা নুপীশিংনা ঙম্লোই খল্লম্বা থবক কয়া পাংথোক্তুনা লাক্লি। খ্বাইদগী নৌবা থবক্তি লান্মীদা মখোয়না শরুক য়াবা হেনগৎলকপা অসিনি। মহৌশাদা নুপীশিংনা হেন্না শরুক য়াদুনা লাকখিবা সাইন্স, তেক্নোলোজি, ইঞ্জিনিয়ারিং, মেথেমেতিক্স অমসুং মেনেজমেন্ত(এস তি ই এম এম)দা নুপীশিংনা শরুক য়াবা হেনগৎলক্লি। কোরোনা লাইচৎকী অৱাবা তারিঙৈ থা কয়া লৈবাক অসি শেন্নখিবা কোরোনা লান্মীশিংগী মনুংদা নুপাশিংদগী নুপীশিংনা মশিং হেনখি। অনা-লায়য়েংগী লমদা থবক তৌবা মীওইশিংগী ওইনা মতম পুম্নমক্তা কেরলানা মসিগী মীওই কয়া পুথোক্লি অমসুং লাইচৎকী অৱাবা মতম অদুদা রাজ্য অসিগী নুপীশিংনা মশাগী ওইজবা থাদোক্তুনা মীয়ামগী থবক তৌবগী খুদম অমা ওইখি।

রাস্ত্রপতিনা হায়খি অসিগুম্বা মাইপাকপশিং অসি লৈবাক অসিগী অপুনবা মীশিংগী তঙ্খাই অমা ওইরিবা নুপীশিংনা পুরকখি। লাইবক থিবদি, খুন্নাইদা মরা তারবা অরানবা থাজবগী কয়াগী চৈথেং মখোয়না ফংলি হায়বা ঐখোয় খঙলে। থবক শুবা নুপীশিংগী মশিং মখোয়না থবক তৌবা ঙম্বগা য়েংনবদা মশিং য়াম্না ৱাৎলি। মসিগী অরুবা ফিবম অসি তশেংনা মালেমগী ওইনা থেংনরিবা শক্তম অমনি। ভারতকী নুপী প্রধান মন্ত্রী অমা লৈখ্রে অমসুং রাস্ত্রপতি ভাবন্দা মহাক্কী মমাঙদা নুপী রাস্ত্রপতি অমা লৈখ্রে। অদুবু লৈবাক কয়া মখোয়গী অহানবা লৈবাক নত্ত্রগা সরকারগী মকোক নুপীশিংনা ওইবা ঙমদ্রি। মালেমগী ওইনা য়েংবদা ঐখোয়গী মাঙদা লৈরিবা শিংনবা অসি ৱাখল্লোল হোংদোকপনি-মসি অরাইবা থবক অমদি নত্তে। মসি খাংবা কনবা অমসুং মতম য়াম্না চংগনি। নিংতম ইহৌনা ভারত্তা নুপা-নুপী থোঙ মান্নবগী য়ুম্ফম থোনখিবনি।

রাস্ত্রপতিনা হায়খি ৱাখল্লোন হোংবা হৌরে অমসুং থার্দ জেন্দর অমসুং অতোপ্পা জেন্দরশিং য়াওনা জেন্দরগী মতাংদা ৱাখল তাবা হৌরে। ‘বেতি বচাউ, বেতি পরাউ’ গুম্বা থবকশিংদা অকনবা মীৎয়েং থমদুনা হিরম অসিদা খোঙজেল য়াংনা থবক পায়খৎনবা সরকারনা থবক মপুংফানা পায়খৎলি। হৌখিবা চহি কয়া অসিদা, নুপীশিংগী চাউখৎ লম্বীদা খুরৌ থাংবশিং লৌথোক্তুনা, কেরলা রাজ্য অসি ময়েক লারবা খুদম অমা ওইদুনা লাক্লি। হকশেল, লাইরিক-লাইশু অমসুং থবক ফংবদা মখোয়গী শক্তি মপুংফানা ফুদোকপা ঙম্নবা নুপীশিং মতেং পাংনবা রাজ্য অসিনা অনৌবা লম্বী কয়া শেম্লে। রাজ্য অসিদগী ভারতকী অহানবা সুপ্রিম কোর্তকী নুপী জজ, জজতিস্ত এম.ফাতিমা বিবি পুথোকখি। কেরলানা নেস্নেল ৱুমেন লেজিসলেচর্স কনফরেন্স য়ুম্বু ওইবা অসি মতিক চাই। ‘গনতন্ত্রগী শক্তি’গী মখাদা মসিগী মীফম অসি পাংথোকপা অসি অচৌবা মাইপাকপা অমা ওইগনি হায়না মহাক্না থাজৈ। মসিগী কনফরেন্স অসি শীনবগীদমক মহাক্না কেরলা লেজিসলেতিপ এশেমব্লি অমসুং মসিগী সেক্রেতরিয়েদ থাগৎপা ফোঙদোকখি।

*****