ঙসি তোকিওদা পাংথোকখিবা ইন্দো-পেসিফিক ইকোনোমিক ফ্রেমৱার্ক ফোর প্রোস্পেরিতি(আই পি ই এফ) হৌদোকপা থৌরম অমদা প্রধান মন্ত্রী শ্রী নরেন্দ্র মোদী শরুক য়াখ্রে। থৌরম অদুদা য়ু.এস.এগী প্রসিদেন্ত জোসেফ আর বাইদেন অমসুং জপানগী প্রধান মন্ত্রী কিসিদা ফুমিও শরুক য়াখি অমসুং অস্ত্রেলিয়া, ব্রুনৈ, ইন্দোনেসিয়া, সাউথ কোরিয়া, মালেসিয়া, নিউ জিলেন্দ, ফিলিপ্পিন্স, শিঙ্গাপুর, থাইলেন্দ অমসুং ভিয়েতনামগী লুচিংবশুং ভর্চুএল ওইনা শরুক য়াখি।

আই.পি.ই.এফ মনুংদা পায়খৎকদবা মরুওইবা থবকশিংগী ৱাফমশিং য়াওবা অপুনবা ৱারোল অমা থৌরম অদুদা ফোঙখি।

ইন্দো-পেসিফিক লমদমদা হান্নগী ফিবমদা হঞ্জিল্লকপা য়াংখৎনবা, তুংকোইনা চৎনগদবা চাউখৎ-থৌরাংগী থবক পায়খৎনবা, অপুনবা ওইনা চাউখৎমিন্ননবা, শেন-থুমগী ফিবম ফগৎহন্নবা, নিয়ম চুম্না থবক পাংথোকপা অমসুং চাংদম্নবা হেনগৎহন্নবা পান্দমদা শরুক য়ারিবা লৈবাকশিংগী মনুংদা শেন-থুমগী মতেং পীনবা হেনগৎহন্নবা আই.পি.ই.এফনা পান্দম থম্লি।

হৌদোকপা থৌরমদা মহাক্কী ৱারোলদা প্রধান মন্ত্রীনা হায়খি, আই.পি.ই.এফ হৌদোকপগী ৱাফম লাউথোকপা অসি ইন্দো-পেসিফিক লমদম অসি মালেমগী শেন-থুমগী ফিবম ফগৎনবা ইঞ্জিন অমা ওইনবা অপুনবগী অপাম্বা অমগী লাউথোকপা অমনি। গুজরাতকী লোহতালদা মালেমগী খ্বাইদগী লিরবা ললোন-ইতিক্কী হিথাংফম লৈদুনা, ইন্দো-পেসিফিক লমদা পুৱারিগী মতমদগী হৌরনা ভারত ললোন-ইতিক্কী মরুওইবা মফম অমা ওইদুনা লাক্লি। ইন্দো-পেসিফিক লমদমদা মায়োক্নরিবা শেন-থুমগী খুদোংচাদবশিং থেংন্নবা অপুনবা অমসুং অনৌবা পাম্বৈশিং পুথোক্নবা প্রধান মন্ত্রীনা তকশিনখি।
 

মহাক্না হায়খি অপুনবা অমসুং মনিংতম্বা আই.পি.ই.এফ অমা ওইহন্নবা ইন্দো-পেসিফিক লৈবাকশিংগী থবক তৌমিন্ননবা ভারতনা থাজবা পীরি। মপুংফাবা সপ্লাই চেন অমা লৈহন্নবা য়ুম্ফমদি থ্রি-তি হায়বদি ত্রস্ত, ত্রান্সপেরেন্সি অমসুং তাইমলিনেসনি।

মনিংতম্বা, অথিংবা লৈতবা অমসুং অপুনবা ওইনা চাউখৎমিন্নবা ইন্দো-পেসিফিক লমদম অমা ওইনবা ভারতনা থবক পায়খৎলি আমসুং মখা তানা চাউখৎনবা, শান্তি পুরক্নবা অমসুং নুংঙাই-য়াইফনবা মরুপ ওইরিবা লৈবাকশিংগী মরক্তা শেন-থুমগী মরী চেৎশিনহনবা অসি য়াম্না মরুওই। আই.পি.ই.এফগী মখাদা মরুপ ওইরিবা লৈবাকশিংগী মতেং পাংন্নবা ভারতনা খৌরাংনা ঙাইরি অমসুং লমদম অসিদা শেন-থুমগী মরী, অপুনবা , ললোন-ইতিক অমসুং শেন থাদবা হেনগৎহন্নবা থবক পায়খৎলি।

ঙসি হৌদোকখিবা অসিগা লোয়ন্না, শেন-থুমগী মতেং পাংনবা হেনগৎহন্নবা অমসুং মান্নবা পান্দমশিং ফংনবা থবক পায়খৎনবা লৈবাকশিংগী মরক্তা ৱা খন্নবা হৌরগনি।

***