પ્રધાનમંત્રી શ્રી નરેન્દ્ર મોદીએ આજે ​​ટોક્યોમાં ઈન્ડો-પેસિફિક ઈકોનોમિક ફ્રેમવર્ક ફોર પ્રોસ્પરિટી (IPEF) માટે ચર્ચાઓ શરૂ કરવા માટે એક કાર્યક્રમમાં ભાગ લીધો હતો. આ કાર્યક્રમમાં યુએસએના રાષ્ટ્રપતિ મહામહિમ જોસેફ આર. બિડેન અને જાપાનના પ્રધાનમંત્રી મહામહિમ શ્રી કિશિદા ફ્યુમિયો, તેમજ અન્ય ભાગીદાર દેશો  જેમ કે. ઓસ્ટ્રેલિયા, બ્રુનેઇ, ઇન્ડોનેશિયા, કોરિયા પ્રજાસત્તાક, મલેશિયા, ન્યુઝીલેન્ડ, ફિલિપાઇન્સ, સિંગાપોર, થાઇલેન્ડ અને વિયેતનામના નેતાઓની હાજરી જોવા મળી હતી. 

એક સંયુક્ત નિવેદન બહાર પાડવામાં આવ્યું હતું, જે IPEFની અંદર પરિકલ્પિત મુખ્ય ઘટકોને પ્રકાશિત કરે છે.

IPEF હિંદ-પેસિફિક ક્ષેત્રમાં સ્થિતિસ્થાપકતા, ટકાઉપણું, સર્વસમાવેશકતા, આર્થિક વૃદ્ધિ, ન્યાયીપણું અને સ્પર્ધાત્મકતા વધારવાના ઉદ્દેશ્ય સાથે સહભાગી દેશો વચ્ચે આર્થિક ભાગીદારીને મજબૂત બનાવવા માગે છે.

લોકાર્પણ સમારોહ દરમિયાન તેમની ટિપ્પણીઓમાં, પ્રધાનમંત્રી શ્રી જણાવ્યું હતું કે IPEF ની જાહેરાત એ ઈન્ડો-પેસિફિક ક્ષેત્રને વૈશ્વિક આર્થિક વૃદ્ધિનું એન્જિન બનાવવાની સામૂહિક ઇચ્છાની ઘોષણા છે. ભારત ઐતિહાસિક રીતે ઈન્ડો-પેસિફિક ક્ષેત્રમાં વેપાર પ્રવાહના કેન્દ્રમાં રહ્યું છે, જેમાં ગુજરાતના લોથલમાં વિશ્વનું સૌથી જૂનું વ્યાપારી બંદર છે. પ્રધાનમંત્રીએ ઈન્ડો-પેસિફિક ક્ષેત્રના આર્થિક પડકારોનો સામનો કરવા માટે સામાન્ય અને રચનાત્મક ઉકેલો શોધવાનું આહ્વાન કર્યું હતું.

તેમણે IPEF માટે તમામ ઈન્ડો-પેસિફિક દેશો સાથે કામ કરવા તરફ ભારતની પ્રતિબદ્ધતા વ્યક્ત કરી હતી જે સમાવેશી અને લવચીક બંને છે. તેમણે રેખાંકિત કર્યું કે સ્થિતિસ્થાપક પુરવઠા શૃંખલાનો પાયો 3T એટલે કે ટ્રસ્ટ, ટ્રાન્સપરન્સી અને ટાઈમલીનેસનો હોવો જોઈએ.

ભારત એક મુક્ત, ખુલ્લા અને સર્વસમાવેશક ઈન્ડો-પેસિફિક ક્ષેત્ર માટે પ્રતિબદ્ધ છે અને માને છે કે ભાગીદારો વચ્ચે આર્થિક જોડાણને ગાઢ બનાવવું સતત વિકાસ, શાંતિ અને સમૃદ્ધિ માટે મહત્વપૂર્ણ છે. ભારત IPEF હેઠળ ભાગીદાર દેશો સાથે સહયોગ કરવા અને પ્રાદેશિક આર્થિક જોડાણ, એકીકરણ અને ક્ષેત્રની અંદર વેપાર અને રોકાણને વધારવા માટે કામ કરવા આતુર છે.

IPEFની સ્થાપના માટે આજે પ્રક્રિયાની શરૂઆત સાથે, ભાગીદાર દેશો આર્થિક સહયોગને મજબૂત કરવા અને સહિયારા ધ્યેયો હાંસલ કરવા પર ધ્યાન કેન્દ્રિત કરતી ચર્ચાઓ શરૂ કરશે.

SD/GP/JD