প্রধানমন্ত্রীগী লোইশঙ
প্রধান মন্ত্রীনা দীফলিম্পিক্স কন্তিঞ্জেন্তকা মহাক্কী ময়ুমদা উন্নখ্রে
ভারতকী দীফলিম্পিক্স কন্তিঞ্জেন্তনা হৌজিক ফাওবগী খ্বাইদগী অঙম্বা মেদল মশিং লৌদুনা পুৱারী শেমখ্রে
“দিব্যাং শান্নরোই অমনা মালেমগী শান্ন-খোৎনবগী ফম্বাক্তা মীথোই মীহেনবা মতমদা মখোয়গী মায় পাকপনা শান্ন-খোৎনবদগী হেন্দোক্লি”
“লৈবাক্কী অফবা শক্তাক অমা শেম্বদা অদোম্না শরুক তম্লিবা অসি অতোপ্পা শান্নরোইনা তম্বদগী য়াম্না হেল্লি”
“অদোমগী থৱাই য়াওবা অমসুং পুক্নিং চঙবগী মতৌ ঙাক্তুনা থমসি। মসিনা লৈবাক্কী চাউখৎ-থৌরাংগীদমক্তা অনৌবা খুদোংচাবা কয়া হাংগনি”
Posted On:
21 MAY 2022 5:27PM by PIB Imphal
প্রধান মন্ত্রী, শ্রী নরেন্দ্র মোদীনা হন্দক্তা পাংথোকখিবা দীফলিম্পিক্সতা শরুক য়াখিবা ভারতকী কন্তিঞ্জেন্তকা ঙসি মহাক্কী ময়ুমদা উন্নদুনা ৱারী শাখি। সনাগী তকমান ৮ য়াওনা পুন্না মেদল ১৬ লৌদুনা ব্রাজিলদা পাংথোকখিবা দীফলিম্পিক্স অসিদা ভারতকী তীম্না হৌজিক ফাওবগী ওইনা খ্বাইদগী নীংথিজবা পর্ফোরমেন্স উৎখি। কেন্দ্র মন্ত্রী, শ্রী অনুরাগ সিংহ থাকুর অমসুং শ্রী নিসিথ প্রমানিকসু থৌরম অসিদা শরুক য়াখি।
কন্তিঞ্জেন্ত অসিগী সেনিয়র মেম্বর ওইরিবা রোহিত ভাকেরগা ৱারী শাবদা, প্রধান মন্ত্রীনা মহাক্না খুদোংচাবা কয়াগা মাইয়োক্নবগী মহাক্কী থৌওং অমসুং মহাক্কী মাইয়োক্তা লৈবা মীওইবু মতৌ করম্না খঙদোকই হায়বগী মতাংদা ৱারী শাখি। রোহিতনা প্রধান মন্ত্রীদা মহাক্কী পুন্সিগী ৱারী অমসুং শান্ন-খোৎনবদা চঙবগী ইথিল অমসুং খ্বাইদগী অৱাংবা থাক্তা মতম শাংনা লৈবা ঙম্বগী মতাংদা তমখি। প্রধান মন্ত্রীনা শক্নাইরবা বেদমিন্তন শান্নরোই অসিদা মহাক্কী মরন্নাই পুন্সি অমসুং শান্নরোই অমা ওইবগী পুন্সিনা অতোপ্পদা ইথিল পীরি হায়না পাউদমখি। প্রধান মন্ত্রীনা মহাক্কী খাঙবা কনবা অমসুং পুন্সিগী শিংনবা কয়াগী মমাংদা মাইথীরে হায়না লৌদবগী মতাংদা থাগৎখি। শ্রী মোদীনা শান্নরোই অসিগী লেপ্তনা লৈরিবা থৌনা অমসুং চহি য়াম্লকপগা লোয়ননা পর্ফোরমেন্স হেন্না ফগৎলকপগী মতৌবুসু শকখঙখি। “মিংচৎ কয়া ফংবদা লেপথোক্তবা অমসুং পেনবা নাইদবা হায়বসিনা শান্নরোই অমগী মরু ওইবা মগুন্নি। শান্নরোই অমনা হেন্না ৱাংবা পান্দম থম্মি অমসুং মদু ফংনবা অঙম্বা থাদুনা হোৎনৈ”, হায়না প্রধান মন্ত্রীনা মখা তাখি।
রেস্তলর বিরেন্দর সিংহনা মহাক্কী ইমুং মনুংগী রেস্তলিংগী চৎনবীগী মতাংদা পাউদমখি। না পঙবা খুন্নাইগী মরক্তা কম্পিতিসন তৌবা ঙম্বগী খুদোংচাবা ফংবসিদা মহাক্না য়াম্না নুংঙাইবগী ৱারোলসু মহাক্না ফোংদোকখি। মহাক্না ইং ২০০৫দগী হৌদুনা দীফলিম্পিক্সতা মেদল লেপ্তনা লৌবা ঙম্বগী নীংথিরবা পর্ফোরমেন্সপু শকখঙলদুনা মহাক্না মীথোই মীহেনবা পাম্লিবা অসিবুসু প্রধান মন্ত্রীনা থাগৎখি। প্রধান মন্ত্রীনা মহাক্না ভেতেরেন ওইনা লৈরিবা থাক অসুং মশানা অসিবু থৱাই য়াওনা খঙবা পাম্লিবা অসিবুসু থাগৎখি। “অদোমগী ৱাখল চেৎপগী মতৌনা মীয়ামদা ইথিল পীরি। লৈবাক্কী শান্নরোই অমসুং নহারোলশিংনা অদোমগী নীংহন্নদবা মতৌদগী তমজবা য়াগনি। খ্বাইদগী মথক্তা য়ৌবা হায়বসি য়াম্না লুবনি, অদুবু মতোন্দা অদুমক লৈদুনা মীথোই মীহেনবা ঙম্নবা হোৎনবনা হেন্না লুই”, হায়না প্রধান মন্ত্রীনা হায়খি।
শুতর ধনুশনা মীথোই মীহেন্নবা লেপ্তনা হোৎনবা ঙম্লিবসি মহাক্কী ইমুং মনুংনা শৌগৎপনা মরম ওই হায়না ফোংদোকখি। য়োগ অমসুং মেদিতেসন্না মহাকপু করম্না তেংবাংই হায়বসু মহাক্না তমখি। মহাক্না মহাক্কী মমাবু রোল মোদেলনি হায়না খল্লি হায়না ফোংদোকখি। প্রধান মন্ত্রীনা মহাক্কী মমা অমসুং ইমুং মনুংবু মহাকপু শৌগৎপগীদমক্তা ইকায় খুম্নবা উৎখি। খেলো ইন্দিয়ানা শান্নরোইশিংদা গ্রাসরুত লেভেলদা তেংবাংবা অসিদা নুংঙাইবা ফাওই হায়না প্রধান মন্ত্রীনা ফোংদোকখি।
শুতর প্রিয়েশা দেশমুখনা মহাক্কী খোঙচৎ, ইমুং অমসুং কোচ অঞ্জলী ভাগ্বতনা শৌগৎপগী মতাংদা পাউদমখি। প্রিয়েশা দেশমুখনা মায় পাকপা অসিদা থৌদাং য়াবগীদমক্তা প্রধান মন্ত্রীনা অঞ্জলী ভাগ্বতপু থাগৎখি। শ্রী মোদীনা পুনেকার প্রিয়েশানা হিন্দি নীংথিনা ঙাঙবা ঙম্ববুসু থাগৎখি।
তেন্নিস শান্নরোই, জাফ্রীন শাইক্না মহাক্কী মপাবুং অমসুং ইমুংনা শৌগৎপগী মতাংদা পাউদমখি। মহাক্না প্রধান মন্ত্রীগা ৱারী শাবদা নুংঙাইবা ফাওই হায়না ফোংদোকখি। লৈবাক্কী ইচানুপীশিংগী পাঙ্গল অমসুং তৌবা ঙম্বগা মহাক্কা অমত্তা ওইবগা লোয়ননা, মহাক অসি নহা ওইরিবী নুপীমচাশিংগী রোল মোদেলনি হায়না প্রধান মন্ত্রীনা হায়খি। “ভারতকী নুপীমচাশিংনা করিগুম্বা পান্দম অমা ফংগে খল্লবদি, মখোয়বু কনামত্তনা থিংবা ঙমদে হায়বসি অদোম্না উৎলে”, হায়না প্রধান মন্ত্রীনা মখা তাখি।
মখোয়গী মায় পাকপসি য়াম্না শিংথানীংঙাইনি অমসুং মখোয়গী থৱাই য়াওবগী চাংনা তুংগী মতমদা মখোয়গী মায় পাকপগী মিৎকুপ কয়া লৈরি হায়বসু তাক্লি হায়না প্রধান মন্ত্রীনা ফোংদোকখি। “অদোমগী থৱাই য়াওবা অমসুং পুক্নিং চঙবগী মতৌ ঙাক্তুনা থমসি। মসিনা লৈবাক্কী চাউখৎ-থৌরাংগীদমক্তা অনৌবা খুদোংচাবা কয়া হাংগনি অমসুং য়াইফরবা তুংগী মতম অমা শোইদনা লাকহনগনি”, হায়না মহাক্না হায়খি। “দিব্যাং শান্নরোই অমনা মালেমগী শান্ন-খোৎনবগী ফম্বাক্তা মীথোই মীহেনবা মতমদা মখোয়গী মায় পাকপনা শান্ন-খোৎনবদগী হেন্দোক্লি। মসিনা লৈবাক্কী নাৎকী মতৌ উৎলি অমসুং অতোপ্পগী ৱাখল খঙবগী মতৌ, অমসুং মখোয়গী তৌবা ঙম্বগী মতিকপু লৈবাক অসিদা ইকায় খুম্নবগী মতৌ উৎলি। মরম অদুনা “লৈবাক্কী অফবা শক্তাক অমা শেম্বদা অদোম্না শরুক তম্লিবা অসি অতোপ্পা শান্নরোইনা তম্বদগী য়াম্না হেল্লি””, হায়না প্রধান মন্ত্রীনা মখা তাখি।
প্রধান মন্ত্রীনা মখোয়গা উন্নরবা মতুংদা “ঐহাক্না দীফলিম্পিক্সতা ভারতকী মিংচৎ অমসুং শন-মান পুরক্তুনা মীয়াম পুম্নমকপু চাউথোকহনখিবা ঐখোয়গী চেম্পিয়নশিংগা ৱারী শাখিববু কৈদৌনুংদা কাওবা ঙম্লোই। শান্নরোইশিং অসিনা মখোয়গী এক্সপেরিএন্স তমখি অমসুং ঐহাক্না মখোয়গী মফমদা থৱাই য়াওবা অমসুং খোঙফম চেৎপগী মতৌ উবা ঙম্মি। ঐহাক্না মখোয়বু খ্বাইদগী ফবা য়াইফ পাউজেল পীরি” হায়না ত্বীত তৌখি। প্রধান মন্ত্রীনা “ঐখোয়গী চেম্পিয়নশিংনা মরম ওইরগা হন্দক্কী দীফলিম্পিক্স অসি ভারতকী খ্বাইদগী মায় পাকপা ওইখি” হায়না ফোংদোকখি।
****
(Release ID: 1827295)
Visitor Counter : 140
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam