ঙাকশেল মন্ত্রী শ্রী রাজনাথ সিংহনা প্রধান মন্ত্রী শ্রী নরেন্দ্র মোদীনা পাম্লিবা ‘আত্মনির্ভর ভারত’ ওইবা ঙম্নবা নহারোলশিংদা ৱাখল্লোন পুথোক্নবা, ইনোবেৎ তৌনবা অমসুং অনৌবা তেক্নোলোজীশিং ইন্দিজিনাইজ তৌনবা হায়খ্রে। ঙাকশেল মন্ত্রীনা মে ২০, ২০২০দা দা. দি.ৱাই. পতিল বিদ্যাপীথ, পুনেগী ১৩শুবা কনভোকেসনগী থৌরমদা মহৈরোয়শিংদা ৱা ঙাংখি। য়ুনিভর্সিতী অসিনা মেদিসিন, দেন্তিস্ত্রী, নর্সিং, ফিজিওথেরাপী, ওপতোমিত্রী, আয়ুর্বেদ, হোমিওপেথী, বাইতেক্নোলোজী লোয়ননা বিজিনেস মেনেজমেন্ত অসিগুম্বা লমশিংদা ত্রেনিং পীরি।

শ্রী রাজনাথ সিংহনা নহাশিং অসিবু লৈবাক অমা হেক্তগী খ্বাইদগী চাউবা মপাঙ্গল, কেতলিস্ত অমসুং অওনবা পুরক্নবগী হৌরকফমনি হায়না ফোঙদোকখি। “নহারোলশিংনা শীংনবা অমা হেক্তা থেংনবা ঙম্বা অমদি খুদোংচাবা অমদা ওন্থোকপা ঙম্বগী মতিক ময়াই চেল্লি। মখোয়না অনৌবা তেক্নোলোজীশিং পুথোক্নবা অমসুং অনৌবা কম্পনী অমদি রিসর্চ এস্তাব্লিশমেন্তশিং লিংখৎপা ঙম্বগী মতিক-ময়াই চেল্লি,” হায়না মহাক্না ফোঙদোকখি।

ঙাকশেল মন্ত্রীনা ‘আত্মনির্ভর ভারত’ ওইবা ঙম্নবা দিফেন্স ইক্বিপমেন্তগী দোমেস্তিক প্রোক্যুর্মেন্ত তৌনবা সরকারগী ফিরেপ নৌহৌনা ফোঙদোক্লদুনা ভারতনা মাগী তঙাই ফদবশিংগীদমক অতোপ্পা লৈবাকশিংগী মীপাল তাংলোইদবনি হায়খি। সরকার অসিনা নহারোলশিংদা থাজবা থম্মি অমসুং মখোয়গী চাউখৎনবা লোয়ননা লৈবাক অসিগী অপুনবা চাউখৎ-থৌরাংগীদমক মখোয়দা খুদোংচাবা মরাং কাইনা পীনবা হোৎনগনি হায়না মহাক্না ফোঙদোকখি। প্রধান মন্ত্রীগী ‘ভোকেল ফোর লোকেল’গী অপীল অসিগী মতাংদা মহাক্না মসিনা লৈবাক অসিদা লৈরিবা হৌগৎলক্লিবা নহারোলশিংগীদমক থবক্কী খুদোংচাবা পীবা হেনগৎলনি হায়না ফোঙদোকখি।

শ্রী রাজনাথ সিংহনা সরকারগী খোঙথাংশিং অসিনা মরম ওইরগা লৈবাক অসিদা অচৌবা স্তার্ত-অপ ইকোসিস্তেম অমা শেমগৎপা ঙমখি, মসিনা বাইও-তেক্নোলোজী, বিজিনেস এদমিনিস্ত্রেসন অমসুং হেল্থ প্রোফেস্নেলশিংদা মখোয়গী ইনোবেতিব ওইবা মঙলানশিং থুংহন্নবা তেংবাং পীরগনি হায়না ফোঙদোকখি। “স্তার্ত-অপ ইন্দিয়া স্কিম অসি নহারোলশিংগীদমক য়াম্না কান্নরি। ঐখোয়না স্তার্ত-অপশিংগীদমক ভেঞ্চর কেপিতেল ফন্দিংগী কলচর অমা শেমগৎলি হায়রিবা অসি অঙনবা মতমদা মখোয়গী হেন্দ-হোল্দিং তৌবদা য়াম্না মরু ওই। লৈবাক অসিগী য়ুনিকোর্নশিংগী মশিং ১০০ হেনখ্রে। মসিনা ঐখোয়গী স্তার্ত-অপ বেজ ইনোবেতিব ইকোসিস্তেম অসিগী মাইপাকপগী খুদম ওইরি,” হায়না মহাক্না হায়খি।

শ্রী রাজনাথ সিংহনা সরকারনা নহারোলশিংবু মখোয়গী আউত-ওফ-দি-বোক্স আইদিয়াশিং পুথোকপদা মপুং ফানা মতেং পীগনি হায়না থাজবা পীখি। মহাক্না মেদিকেল অমসুং বাইও-তেক্নোলোজী মহৈরোয়শিংদা মখোয়গী আইদিয়াদা য়ুম্ফম ওইরগা বিজিনেস হৌদোক্নবা প্লান তৌবা ঙম্বা বিজিনেস তম্লিবা মহৈরোয়শিংদা মখোয়গী আইদিয়া শিয়র তৌনবা হায়খি। মসিনা লৈবাক অসিগী য়াইফনবা মপাঙ্গল কনবা তুংগী পার্তনরশিপ অমা শেমগৎপা ঙমগনি হায়না মহাক্না ফোঙদোকখি।

ঙাকশেল মন্ত্রীনা অফবা এজুকেসন্না লায়রবা মুত্থৎপদা কান্নরবা খুৎলাই অমা ওইগনি হায়না ফোঙদোকখি। মহাক্না মহৈরোয়শিংনা মখোয়গী এজুকেসন অদু কান্নবদা শীজিন্নবা অমসুং খুন্নাইদা অফবা অওনবা পুরকপা অসি মখোয়গী থৌদাং অমনি হায়খি।

শ্রী রাজনাথ সিংহনা মহৈরোয়শিংদা পুন্সিগী মপানথোং অমসুং নুংগী ওইবা অপাম্বশিং অসিগী মরক্তা খল মান্ননা থম্নবা হোৎনৌ হায়খি। মহাক্না মখোয়দা খুন্নাইগী অপুনবগী য়াইফনবা পোজিতিব ইনর্জী অমসুং ৱাখল্লোন শন্দোক্নবা হায়খি। মহাক্না অতোপ্পা তঙাই ফদবশিংদা অকাইবা পীরোইদবা ভেল্যু সিস্তেম শেমগৎপগী মথৌ তাবা অমসুং শান্তি ওইনা পুন্না হিংমিন্ননবগী মতাংদা ফোঙদোকখি।

****