মে ১৪,২০২২দা উত্তর প্রদেসকী লখনৌদা ইন্দিয়ান ইন্সতিতুৎ ওফ চার্তর একাউন্তেন্তস ওফ ইন্দিয়া(আই সি এ আই)গী সেন্ত্রেল ইন্দিয়া রিজনেল কাউন্সিল(সি আই আর সি)গী লখনৌ ব্রাঞ্জনা শীনবা ফাইনান্সিএল মার্কেতকী ৱার্কশোপ অমদা রাক্ষ মন্ত্রী শ্রী রাজনাথ সিংহ ৱা ঙাংখ্রে। শরুক য়ারিবশিংদা শেন-থুমগা মরী লৈনবা অনৌবা ৱাফমশিং খঙহন্নবা অমসুং হীরম অসিগা মরী লৈনবা তুংদা লাক্কদবা শিংনবশিং থেংন্নবা ত্রেনিং পীনবা অমসুং পুক্নিং থৌগৎনবা ৱার্কশোপ অসিদা পাংথোকপনি।

লৈবাক অসিগী ললোন-ইতিক্কী থবকশিং মমাই চুম্বগীদমক শ্রী রাজনাথ সিংহনা চার্তর একাউন্তেন্তশিং থাগৎখি, মখোয় শেন-থুমগী থবকশিংগী অমসুং শেন-থুমগী থবকশিং ওদিৎ তৌবগী য়াংলেন শরুনি হায়না ফোঙদোকখি। মহাক্না হায়খি থৌনা অমসুং কৎথোকপদা লোয়ন্না ঐখোয়গী লান্মীশিংনা লৈবাক্কী ঙমখৈশিং ঙাকপগুম, ঐখোয়গী সি.এশিংনা শেন-থুমগী থবকশিংগী অচুম-অরানশিং তাক্লি। শেন-থুমগী লোয়শঙশিংদা, মখোয়দা মীয়াম্না থাজবা থম্বা মরম্না সি.এশিংনা মখোয়গী মথৌশিং পুকচেল শেংনা পাংথোক্কদবনি।  

মহাক্না হায়খি কোবিদ-১৯ লায়চৎ অমসুং হৌজিক শোক্নরিবা রুসিয়া-য়ুক্রেনগী লালনা মরম ওইদুনা পোৎ-চৈ পুথোক-পুশিন্দা অকায়বা কয়া পীবদগী মালেমগী শেন-থুমগী ফিবম অসি অচৌবা খুদোংচাদবা তাঙ্কক অমদা লৈরি। রুসিয়া অমসুং য়ুক্রেন অসি পোৎ-চৈ কয়া পুথোকপা অচৌবা লৈবাকশিংনি। রুসিয়ানা মহৈ-মরোংশিং অমসুং হায়দ্রোকার্বোনশিং পুথোক্লি অমসুং য়ুক্রেন অসি গেহু পুথোকপা লৈবাক অমনি। মরম অসিনা হৌজিক লৈরিবা উংখৎনবা অসিনা মালেমদা অৱাবা চৈথেং পীরে। ঐখোয়না হায়দ্রো-কার্বোন অমসুং থাউ থোকপা মরুশিং য়াম্না পুশিল্লকপা মরম্না, মখোয়গী মমল হেনগৎলকপা অসিনা ঐখোয়গী লৈবাক্তা শোকহল্লে। চিঞ্জাক অমসুং থাউগী মমল হেনগৎলে। মালেমগী ওইনা পোৎ-চৈ পুথোক-পুশিন্দা খুদোংচাদবা কয়া থোকপদগী পোৎ-চৈগী মমলশু হেনগৎলে।

শ্রী রাজনাথ সিংহনা হায়খি, কোবিদ-১৯না মরম ওইদুনা তম্বা ঙমদবা ফিবমশিং থোকহনবদগী লনাই মীওই কয়া পোৎ-চৈ লৈবা হন্থখি। হায়রিবা অৱাবশিং অসি থেংন্নবা সরকারনা থবক কয়া পায়খৎলে অমসুং ফলশিং উবা ফংলে। এজেন্সি কয়ানা থিজিনবগী মতুংইন্না, মালেমদা য়াংনা শেন-থুমগী ফিবম চাউখৎলক্লিবা লৈবাকশিংগী মনুংদা লৈবাক অমা ওইনা মখা তানা ভারতকী শেন-থুমগী ফিবম ফগৎলি। অনৌবা রেকোর্দশিং থম্নবা ঐখোয় মখা তানা মপান্দা পোৎ-চৈ থাদোক্লি অমসুং মথা তানা হেনগৎলকপা য়ারি। অস্ত্রেলিয়াগা লোয়ন্না মরুওইবা ফ্রি ত্রেদ এগ্রিমেন্ত অমা খুৎয়েক পীনখ্রে অমসুং অসিগুম্বা য়ানচে কয়া অতোপ্পা লৈবাকশিংগশু খুৎয়েক পীনখ্রে।

খ্বাইদগী য়াম্বা ওইনা এপ্রিল ২০২২দা লুপা কোতি লাখ ১.৬৮গী জি.এস.তি খোমগৎখিবগী মতাংদা ৱাফম থম্লদুনা মহাক্না হায়খি মীয়ামগী য়াইফনবা থবকশিং পাংথোক্নবা তেক্স খোমগৎপা অসি পাম্বৈ অমনি অমসুং খোমগৎলিবা তেক্স অসি কোবিদ-১৯ মনুংদা ‘প্রধান মন্ত্রী গরিব কলয়ান অন্না য়োজনা’গী খুৎথাংদা মীয়ামদা লেম্না চানবা পোৎলমশিং ফংহল্লি। সপ্লাই চেন্দা চৈথেং পীবা হন্থহন্নবা মালেমগী থাক্তা অমসুং লৈবাক মনুংগী ওইনা অনৌবা শেনফম কয়া থাদরে।

প্রধান মন্ত্রী শ্রী নরেন্দ্র মোদীনা হৌদোকখিবা লম্বী-থোঙ শম্ননবগী নেস্নেল মাস্তর প্লান-পি.এম গাতিশক্তিগী মতাংদা শ্রী রাজনাথ সিংহনা হায়খি মসি পোৎ-চৈ পুথোক-পুশিন্দা থেংনরিবা অৱাবশিং কোকহন্নবা তুংকোইনা চৎনগদবা সরকারগী থৌরাংনি। মসিগী মাস্তর প্লান অসি থবক ওইনা পাংথোক্নবা লুপা কোতি লাখ ১০০ রোম চাদিং তৌগনি।

রাক্ষ মন্ত্রীনা হায়খি লম্বীশিং, রেলৱেজশিং, এয়রপোর্তশিং, হিথাংফমশিং অমসুং জহাজগী থবকশিং য়াওনা মরুওইবা প্রোজেকশিংদা সরকারনা মীৎয়েং চংলি। প্রদক্সন লিঙ্ক ইন্সেন্তিপ স্কিম্না লনাই মীওইশিং শেন থাদবা হেনগৎহন্দুনা শেন-থুমগী ফিবমদা দিমান্দ হেনগৎহনগনি। লৌমীশিংদা হকথেংন্না শেন্থং পীবা, পি.এম কিষান অমসুং অতোপ্পা শেন্থং পীবগী থবকশিংনা লনাই মীওইশিং পোৎ-চৈ লৈবগী চাং হেনগৎহন্নবা পান্দম থম্লি।

শ্রী রাজনাথ সিংহনা হায়খি, হায়রিবা থবকশিং অসিনা লৈবাক অসিদা পোৎ-চৈ শীজিন্নবা, শেন থাদবা হেনগৎলে। লায়চৎ মতুংদা শেন-থুমগী ফিবম য়াংনা ফগৎলকপা ঐখোয়না উরে। পোৎ-চৈ ফংহনবদা থেংনরিবা খুদোংচাদবশিং কোকহন্নবা মচাক-মথুমশিং শেমগৎনবা ঐখোয়না মিৎয়েং চংলে। কোবিদ-১৯ তিকা থাবগী ঐখোয়গী থবকশিং মাইপাকপদগী হকথেংন্না উনবা থবকশিং পাংথোকপা হেনগৎলক্লে। মসি ঐখোয়গী শেন-থুমগী ফিবম ফগৎলকপগী অফবা খুদম অমনি।

মহাক্না হায়খি শেন-থুমগী ফিবম ফগৎনবা খুৎশা-হৈবা মীওইশিং, কেপিতেল, তেক্নোলোজি, কৈথেল, লোয়শঙশিং হায়বদি রুল ওফ লো, মনিংতম্বা কোর্তশিং, মনিংতম্বা প্রেস অমসুং রিগুলেতোরি সিস্তেম মথৌ তাই। হায়রিবশিং অসি ফগৎনবা সরকারনা থৌরাং কয়া পায়খৎলে। অফবা মীওই কয়া শেমগৎনবা নেসনেল ইজুকেসন পোলিসি ২০২০ হৌদোক্লে অমসুং অনৌবা আই.আই.তিশিং, আই.আই.এমশিং, পোলিতেক্নিক কোলেজশিং, মেদিকেল কোলেজশিং লিংখৎলে অমসুং মেদিকেল সিতশিং মশিং হেনগৎহল্লে।

রাক্ষ মন্ত্রীনা মখা তানা হায়খি বেঙ্কশিং পুনশিনবা অমসুং লনাই ওন্থোকপগী থবকশিং পাংথোক্লে, নন-পর্ফোমিং এসেতশিং নত্ত্রগা অতোপ্পা মরমশিংনা শেন মাঙলবা সরকারগী বেঙ্কশিংদা শেন থাদবদগী হৌজিক লোন পীবা ঙম্বগী থাক্তা লৈরে। মকোক্তগী হৌনা মখোয়গা খুৎশম্নদুনা চৎমিন্ননবা স্তার্দ-অপশিংগীদমক ঐখোয়না ভেঞ্জর কেপিতেল ফন্দিং শেমগৎলে। স্তার্দতা য়ুম্ফম ওইবা থবকশিং মাইপাকপগী খুদম ওইনা লৈবাক অসিদা য়ুনিকোর্ন মশিং ১০০ হেল্লে। ঐখোয়না রিতেল ইভেস্তরশিং পুক্নিং থৌগৎলে। অরোন-অথুপ লৈতনবা ত্রেদিংগী থবকশিংদা তেক্নোলোজি অমসুং দিজিতেলগী থবকশিং শীজিন্নবা পুক্নিং থৌগৎলে।

তেক্নোলোজি চাউখৎহন্নবগী মতাংদা রাক্ষ মন্ত্রীনা হায়খি দিফেন্স রিছার্স এন্দ দিবলপমেন্ত ওর্গনাইজেসন(দি আর দি ও) অমসুং কাউন্সিল ওফ সাইন্তিফিক এন্দ ইন্দস্ত্রিএল রিছার্স(সি এস আই আর)গী আর অমসুং দিগী থবকশিংদা অওনবা পুরক্নবা সরকারনা থবক পায়খৎলি। কোলেজশিং/য়ুনিভর্সিতিশিংদা পাংথোক্লিবা রিছার্সশিং ইন্দস্ত্রি য়ৌনবা অমসুং নাকল অনিমক কান্নবা ফংনবা হৌজিক মহৈলোয়শঙ অমসুং ইন্দস্ত্রিগী মরক্তা মরী অমা শেমগৎলে।

স্তার্দ-অপশিং অসি অনৌবা পুথোক্নবগী মরুওইবা গারি অমনি হায়না ফোঙদোক্লদুনা রাক্ষ মন্ত্রীনা হায়খি মখোয়গা চৎমিন্নবা অমসুং মখোয় চাউখৎহনবা অসি সরকারগী থৌদাংনি। ইন্নোবেসন ফোর দিফেন্স এক্সলেন্স(আইদেক্স)না অনৌবা পুথোকপশিং অমসুং স্তার্দ-অপশিং য়োকখৎকনি অমসুং হায়রিবা থবকশিং অসিনা মখোয়দা খুদোংচাবা কয়া ফংহনগনি।

উদোগশিংগী কৈথেল অমা ফংহনবা হায়বসি প্রধান মন্ত্রীগী পান্দম ‘অত্মানির্ভর ভারত’কী মরুওইবা অমনি হায়না ফোঙদোক্লদুনা শ্রী রাজনাথ সিংহনা হায়খি, লৈবাক অসিগী কম্পেনিশিংদগী পোৎ-চৈ লৈনবা থবক কয়া পায়খৎলে। মসিগী লৈবাক অসিগী দরকার ওইবশিং ফংহনবা খক নত্তনা ‘মেক ইন ইন্দিয়া, মেদ ফোর ৱার্ল্দ’গী পান্দমগী মখাদা মালেমগী দরকার ওইবশিং ফংহনবা ঙমগনি। লৈবাক অসিগী কম্পেনিশিং মপান লৈবাকশিংগী কৈথেলশিং য়ৌবা ঙম্নবা থবক কয়া পায়খৎলে।

মহৈলোয়শঙ কয়া ফগৎহন্নবা অমসু মখোয়না ললোন-ইতিক্কী থবকশিংদা মতেং পীনবা পায়খৎলিবা থবকশিংগী মতাংদা শ্রী রাজনাথ সিংহনা ফোংদোকখি। পায়খৎলিবা থবকশিংগী মনুংদা অৱাবা তারবা ললোন-ইতিক্কী থবকশিং লাইনা তোকপা য়ানবা অমসুং ফাজিন্দুনা থমখ্রবা লন-থুমশিং লৌথোকপা য়ানবা অমসুং শেন-থুমগী ফিবম নৌনা হিঙ্গৎহনবা য়ানবা শেমখিবা ইন্সোলভেন্সি এন্দ বেঙ্করপসি কোদ য়াওরি।

*****