প্রধানমন্ত্রীগী লোইশঙ
azadi ka amrit mahotsav

প্রধান মন্ত্রীনা মালেমগী অনিশুবা কোবিদ ভর্চুএল সম্মিত্তা শরুক য়াখ্রে

Posted On: 12 MAY 2022 8:19PM by PIB Imphal

প্রধান মন্ত্রী, শ্রী নরেন্দ্র মোদীনা মালেমগী অনিশুবা কোবিদ ভর্চুএল সম্মিত্তা য়ু.এস.এ.গী রাস্ত্রপতি, জোসেফ আর. বাইদেন জুনিয়রনা পাউজেল পীরকপদগী ঙসিগী অঙনবদা শরুক য়াখ্রে। প্রধান মন্ত্রীনা ‘লাইচৎনা নংহনবা অৱাবদগী ঙাকথোকপা অমসুং শেম-শাবগী থৌওংদা মিৎয়েং চঙবা’ হায়বা থীমদা পাংথোকপা সম্মিৎ হৌদোকপগী থৌরমদা ৱা ঙাংখি।

ভারতনা লাইচৎ অসিগা মাইয়োক্নবা মীয়ামদা হেন্না মরু ওইবা পীবা থৌরাং য়াৎখি অমসুং হন্দক্কী চহিসিদা হকশেলদা খ্বাইদগী চাউবা শেনফম কাইথোকখি হায়না প্রধান মন্ত্রীনা ফোংদোকখি। ভারতনা মালেমগী খ্বাইদগী চাউবা তীকা থাবগী খোঙথাং পায়খৎখি অমসুং মসিগী অহলগী মীশিংগী চাউরাকপা ৯০% অমসুং অঙাংগী মীশিংগী ৫০%দগী হেনবদা ভেক্সিন কাপ্পা ঙমখ্রে হায়না প্রধান মন্ত্রীনা পাউদমখি।

ভারতনা মালেমগী খুন্নাইগী মথৌদাং খঙবা মেম্বর অমা ওইনা কোবিদকী শাফু হন্থহন্নবা হোৎনবদা শিজিন্নবা শেল চঙদবা তেক্নোলোজী, ভেক্সিন অমসুং লাইয়েংবগী থৌওং কয়া মীয়ামদা পীদুনা চাউরবা থৌদাং লৌবগী থৌওং মখা তানা চত্থখিগনি হায়না প্রধান মন্ত্রীনা ফোংদোকখি। ভারতনা মশাগী জীনোমিক সর্বেলিএন্স কন্সোর্তিয়ম হেন্না শন্দোক্নবা কন্না হোৎনরি। ভারতনা নাৎকী ওইবা হিদাক লাংথক পাক শন্না শিজিন্নরি অমসুং দবল্যু.ঐচ.ও. সেন্তর ফোর ত্রেদিস্নেল মেদিসিনগী উরেপ উয়ুং ভারত্তা তমদুনা লৌশিং অসিবু মালেমদা পীনবা কন্না হোৎনরি।

দবল্যু.ঐচ.ও.বু নৌনা শেমদোক্তুনা মপাঙ্গল হেন্না লৈবা অমসুং নীংহন্নবা নাইদবা মালেমগী হেল্থ সেক্যুরিতী আর্কিতেকচর অমা শেম্নবা ৱাফমসু প্রধান মন্ত্রীনা থমখি।

থৌরম অসিদা শরুক য়াখিবশিংগী মনুংদা থৌরম অসিবু পুন্না য়ুম্বু ওইরিবা – সি.এ.আর.আই.সি.ও.এম.গী থৌ পুবা ওইনা মথৌ পাংথোক্লিবা বেলিজ সরকার/লৈবাক্কী মকোক, অফ্রিকা য়ুনিয়নগী লুচিংবা ওইরিবা সেনেগল, জি.২০গী প্রসিদেন্ত ওইরিবা ইন্দোনেসিয়া অমসুং জি.৭কী প্রসিদেন্ত ওইরিবা জর্মনী য়াওরি। য়ুনাইতেদ নেসন্সকী সেক্রেতরী জেনেরেল, ৱর্ল্দ হেল্থ ওর্গনাইজেসনগী দাইরেক্তর জেনেরেল অমসুং অতোপ্পা মীথুংলেন কয়াসু থৌরম অসিদা শরুক য়াখি।

রাস্ত্রপতি বাইদেন্না সেপ্তেম্বর ২২, ২০২১দা য়ুম্বু ওইখিবা মালেমগী অহানবা কোবিদ ভর্চুএল সম্মিত্তসু প্রধান মন্ত্রীনা শরুক য়াখি।

 

***



(Release ID: 1824933) Visitor Counter : 22