লৈবাক অসিদা লিতরেসি লেভেল খ্বাইদগী ৱাংবা অনিশুবদা লৈদুনা, মিজোরম অসি হেন্না মাইপাকপশিং পুরক্নবা থৌরাং তৌরিবা অশেংবা মতমগা চুনরবা রাজ্য অমনি হায়না ভারতকী রাস্ত্রপতি শ্রী রাম নাথ কোবিন্দনা হায়খ্রে। ঙসি মে ০৫, ২০২২দা আইজোলদা মিজোরম য়ুনিভর্সিতিগী ১৬শুবা কনভোকেসন্দা মহাক্না ৱা ঙাংখি।

রাস্ত্রপতিনা হায়খি, মিজোরম মহৌশাগী লনশিং মরাংকাইনা লৈ। মখল কয়াগী পাম্বীশিং অমসুং শা-উচেকশিং মরাংকাইনা লৈবা লমদম অমা ওইদুনা থিজিনবা অমসুং চাউখৎ-থৌরাংগীদমক মখল কয়াগী খুদোংচাবা কয়া পীরি। অদুম ওইনমক, শেমগৎ-শাগৎপা অমসুং তুংগী মীরোলশিংগী য়েংলবা থবক পায়খৎপা অনিগী মরক্তা চপ চাবা খল থম্বা অসি ঐখোয়গী থৌদাংনি। রাজ্য অসিগী অমসুং অতোপ্পা অৱাং-নোংপোক রাজ্যশিংগী অকোয়গী ফিবম চেকশিন্না ঙাক-শেনবা দরকার ওই। ঐখোয় খক নত্তনা মহৌশাশু কান্নবা পীবা থবকশিং ঐখোয়না পায়খৎকদবনি।

নিতি অয়োগকী থিজিনবা অমগী মতুংইন্না প্লাস্তিক্কী অরেমখাকশিং য়ামদনা পুথোকপগীদমক মহাক্না মিজোরম, সিক্কিম অমসুং ত্রিপুরাগী মীয়াম থাগৎখি। মহাক্না হায়খি মসি দাইত্ব লৈনা প্লাস্তিক শীজিন্নবা অমসুং পোৎথোক পুথোকপগী অফবা খুদম অমনি। লম্বী য়াম্না চিল্লবশু, মথৌ মশক খঙবা আইজোলগী মীয়াম্না হোর্ন খোঙদবা অসিদা মহাক্না থাগৎখি। মহাক্না হায়খি মসিগী থবক অসি থাগৎফম থোকই অমসুং অতোপ্পা সহরশিংদশু মীয়াম্না থবক ওইনা পাংথোকপা য়াই।

রাস্ত্রপতিনা হায়খি, মগুন লৈবা ইজুকেসন ফংহন্নবা পান্দম থম্লিবা য়ু.এন স্তেনেবল দিবলপমেন্ত গোলসকী গোল-৪ মাইপাক্না পায়খৎলকপগী মতুংইন্না, নিতি অয়োগকী এস.দি.জি ইন্দিয়া ইন্দেক্স ২০২০-২১তা, নেসনেল এভরেজ ৫৭ ওইবদা মিজোরম্না ৬০ ফংদুনা হেন্না ফিবম ফখি। হেন্না নুংঙাইবা ৱাফম অমনা, গোল-৪গী স্কোরদা অৱাং-নোংপোক্কী রাজ্যশিংগী জিলাশিংগী মরক্তা আইজোলনা খ্বাইদগী মকোক্তা লৈখি। মখোয়গী খুন্নাইগী ফিবমশিং ফগৎনবা অমসুং লৈবাক্কী চাউখৎ-থৌরাংদা শরুক য়ানবা রাজ্য অসিগী অতোপ্পা জিলাশিংগী মীয়ামগা পুন্না চৎমিন্ননবা অমসুং পুক্নিং থৌগৎনবা মহাক্না আইজোলগী মীয়ামদা তকশিনখি।

রাস্ত্রপতিনা হায়খি মহৈলোয়শঙশিং অসি তুংগী ইনকুবেতরশিংনি। মখোয়না মহৈরোয়শিং ত্রেনিং পীবা অমসুং তাকপী-তম্বীবা খক নত্তনা মখোয় অফবা নাগরিকশিং ওইনা শেমগৎলি। মহৈলোয়শঙশিং অমসুং য়ুনিভর্সিতিশিংদা ওজাশিংনা লেপ্তনা মতেং পাংবা অসিনা মহৈরোয়শিংগী পুন্সিদা মরুওইবা থৌদাং লৌরি। মিজোরম য়ুনিভর্সিতিগী ওজাশিং মতিক চাবা খক নত্তনা মগুন লৈবা রিছার্সকী থবকশিং পায়খৎপদা মহাক্না হরাওবা ফোঙদোকখি। মহাক্না হায়খি অফবা রিছার্স তৌবা মীওইশিং অসি মহৌশানা অখন্নবা ওজাশিংশু ওই। মখোয়গী অনৌবা মখলগী তাকপী-তম্বীবগী থবকশিং অসিনা মহৈরোয়শিং হেন্না কান্নবা ফংহল্লি। অসিগুম্বা ওজানা থিজিন্নবা অমসুং অনৌবা থবক পায়খৎনবা থৌনা পী। 

রাস্ত্রপতিনা হায়খি মিজোরম য়ুনিভর্সিতিদা “তেক্নোলোজি ইনকুবেসন সেন্তরশিং” লিংখৎপা অমসুং ওন্ত্রেপ্রেনিউয়রশিপ চাউখৎনবা থবক কয়া পাংথোকপা অসিনা নহা ওইরিবা ওন্ত্রেপ্রেনিউয়রশিং মখোয়গী অনৌবা থবকশিং য়োকখৎনবা মতেং পাংবা অসি অচুম্বা খোঙথাং অমনি। ইন্নোবেসন য়োকখৎনবা অমসুং মসি ইন্তরপ্রাইজ ওন্থোক্নবা য়ুনিভর্সিতিনা পায়খৎলিবা থবকশিং মহাক্না থাগৎখি। মহাক্না হায়খি মসি ঐখোয়গী খুন্নাই অমসুং শেন্মিৎলোনদা অহোংবা পুরক্নবা মরুওইবা অমনি।

*****