ঙাকশেল মন্ত্রী শ্রী রাজনাথ সিংহনা এপ্রিল ২৬, ২০২২দা নই দিল্লীদা তিরঙ্গা মাউন্তেন রেস্ক্যু (তি.এম.আর.) কাঙবু অমগা ৱারী ৱাতায় শানখ্রে‍। শ্রী হেমন্ত সচদেবনা হৌদোকখিবা তি.এম.আর. অসি ২০১৬দগী হৌনা ইন্দিয়ন আর্মীদা এফিলিএত তৌবা নন-প্রোফিৎ ওর্গনাইজেসন অমনি‍। মসিনা নিংথমথাগী মতমদা উন তাবা অমসুং খুদোংচাদ্রবা মফমদা ইচঙ থৌরবা অমসুং মতিক চারবা এভালেঞ্চ রেস্ক্যু প্রোফেস্নেলশিংগী কাঙবু কয়া পীরি‍। কাঙবুশিং অসি কত্থোক্লবা এভেলেঞ্চ রেস্ক্যু অমসুং মাউন্তেন ক্রাফ্তকী লমদা ইন্দিয়ন আর্মীদা ত্রেনিং পীবদা য়াম্না মরুওইবা থৌদাং লৌরি‍।

থৌরমদুদা তি.এম.আর.গী থবক থৌওংশিংগী মরমদা শ্রী রাজনাথ সিংহগী মফমদা পাউদমখি‍। ঙাকশেল মন্ত্রীনা খুৎলায় পায়বা লান্মীশিংগী মফমদা ৱাখল তাহনবা অমদি ত্রেনিং পীবগী মথক্তা উন নীংখায়বনচিংবা খুদোংথিবশিংদগী মখোয়গী পুন্সিবু কনবগীদমক্তা তি.এম.আর.বু থাগৎখি‍। মহাক্না তি.এম.আর.বু খুদোংচাদ্রবা মফমদা মথৌ তৌরিবা অমদি উন নীংখায়বনচিংবা মখল মখা কয়াগী খুদোংথিবা নংলিবা লান্মীশিংগী থৌনাগী হৌরকফম্নি হায়না শিংথাখি‍। তি.এম.আর.না লৈবা মফমদা আর্মী শোকপা পনবা অমত্তা য়াওদে হায়বা ৱাফমদুবু মহাক্না থাগৎখি‍। অইং অশাগী খল কায়থরকপা মরম্না উন নীংখায়বনচিংবা খুদোংথিবশিং লাক্কদৌরিবা মতমশিংদা হেনগৎলকপা য়াবনা তি.এম.আর.না অচৌবা থৌদাং অমা লৌরি হায়না ঙাকশেল মন্ত্রীনা ফোঙদোকখি‍।

তি.এম.আর.না তৌরিবা থবক থৌরমশিংবু লৈঙাক অমসুং খুন্নাইগী লূপশিংগী মরক্তা লৈনরিবা খোঙবু ওইবগী মরিগী অরংবা খুদম অমনি হায়না ঙাকশেল মন্ত্রীনা ফোঙদোকখি‍। লৈঙাক অমসুং খুন্নাইগী লুপশিংনা পুন্না থবক পাঙমিন্নরবখক্তদা লৈবাক অমনা চাওখৎ লম্বীদা মাঙদা চঙশিল্লি হায়না মহাক্না ফোঙদোকখি‍। “লৈঙাক অমসুং খুন্নাইগী লূপশিং অসি লৈবাক অমনা মায়কৈ পুম্নমক্তা তুং কোইগদবা চাওখৎপগী পান্দম ফংনবা চৎকদবা কাঙখোঙশিংনি,” হায়না মহাক্না হায়খি‍।

ভাইস চীফ ওফ দি আর্মী স্তাফ লেফ্তনেন্ত জেনেরেল মনোজ পান্দে, দাইরেক্তর জেনেরেল মিলিতরী ওপরেসন্স লেফ্তনেন্ত জেনেরেল বি.এস. রাজু অমসুং মকোক থোংবা লান্মীগী ওফিসিএলশিং থৌরমদুদা শরুক য়াখি‍।

********