وزیر اعظم جناب نریندر مودی 29 اپریل 2022 کو صبح 11:00 بجے بنگلورو میں پہلی سیمیکان انڈیا 2022 کانفرنس کا افتتاح کریں گے، یہ اعلان مسٹر راجیو چندر شیکھر، الیکٹرانکس اور انفارمیشن ٹکنالوجی اور ہنر مندی کی ترقی اور انٹرپرینیورشپ کے وزیر مملکت نے کیا۔ سیمیکان انڈیا – 2022، ایک سہ روزہ کانفرنس کا انعقاد وزیر اعظم نریندر مودی کے وژن کو آگے بڑھانے کے لیے کیا جا رہا ہے جس کا مقصد ہندوستان کو الیکٹرانکس مینوفیکچرنگ، سیمی کنڈکٹر ڈیزائن، مینوفیکچرنگ اور اختراع میں ایک رہنما بنانا ہے۔

تقریب میں انڈیا سیمیکان مشن کے بارے میں بات کرتے ہوئے، جناب راجیو چندر شیکھر نے کہا کہ پی ایم کا وژن ہندوستان کو گلوبل سیمی کنڈکٹر ویلیو چین میں ایک اہم کھلاڑی بنانا ہے۔ انھوں نے مزید کہا کہ گزشتہ 75 سالوں میں پہلی بار اس میدان میں تیزی سے فیصلہ کن پیش قدمی کی گئی ہے۔ سیمیکان انڈیا 2022 کانفرنس سیمی کنڈکٹر انڈسٹری، تحقیق اور اکیڈمی سے دنیا بھر کے بہترین ذہنوں کو راغب کرے گی اور ہندوستان کو الیکٹرانکس مینوفیکچرنگ اور سیمی کنڈکٹر انڈسٹری کا عالمی مرکز بنانے کے وزیر اعظم کے وژن کو پورا کرنے میں ایک بڑے قدم کے طور پر کام کرے گی۔

جناب پراگ نائک، سی ای او سانکھیا لیبز پرائیویٹ لمیٹڈ، پروفیسر کاما کوٹی ڈائریکٹر، آئی آئی ٹی دہلی اور محترمہ نیروتی رائے، کنٹری ہیڈ انٹیل انڈیا نے اس موقع پر اپنے خیالات کا اظہار کیا اور سیمیکان انڈیا کانفرنس کے اعلان کا خیر مقدم کیا۔

اسٹیئرنگ کمیٹی میں اسٹارٹ اپس، اکیڈمیا اور عالمی صنعت کے رہنماؤں کا ایک مرکب شامل ہے جو ہندوستان کے سیمی کنڈکٹر اور الیکٹرانکس مینوفیکچرنگ کے عزائم کو تقویت دینے کے لیے حکومت کے باہمی تعاون کے انداز کو ظاہر کرتا ہے۔

سیمیکان انڈیا 2022 کانفرنس کا انعقاد الیکٹرانکس اور انفارمیشن ٹیکنالوجی کی وزارت کے ذریعے 29 اپریل سے 01 مئی 2022 تک آئی ٹی سی گارڈینیا، بنگلورو میں کیا جائے گا جس کا موضوع - ہندوستان میں ڈیزائن اور مینوفیکچرنگ، دنیا کے لیے: ہندوستان کو ایک ”سیمی کنڈکٹر نیشن“ بنانا ہے۔ اس کانفرنس میں جن چند ناموں کی شرکت متوقع ہے ان میں سنجے مہروترا، سی ای او مائکرو انیردھ دیوگن، سی ای او کیڈینس، ونود دھام، بانی انڈو-یو ایس وینچر پارٹنرز، اجیت منوچا، صدر، SEMI، پروفیسر آروگیا سوامی پالراج، پروفیسر ایمریٹس، اسٹینفورڈ شامل ہیں۔ جناب چندر شیکھر نے یہ بھی بتایا کہ وزارت سیمی کنڈکٹر کے میدان میں شراکت داری اور اتحاد قائم کرنے والی تین روزہ کانفرنس کے دوران کئی مفاہمت ناموں پر دستخط کرنے کی منتظر ہے۔

انڈیا سیمی کنڈکٹر مشن (ISM) کو زیادہ سے زیادہ مرئیت، طاقت اور کامیابی دینے کے لیے، جناب راجیو چندر شیکھر نے تقریب کے دوران اسٹیئرنگ کمیٹی کے اراکین کی موجودگی میں اپنے لوگو کی نقاب کشائی کی جو ورچوئل طور پر شامل ہوئے تھے۔ لوگو وارانسی کے جناب پرشانت مشرا نے بنایا ہے جنھوں نے MyGov کے ذریعہ منعقدہ کراؤڈ سورسنگ مقابلے میں حصہ لیا تھا۔ لوگو ہاتھ ملانے کی نشاندہی کرتا ہے - باہمی تعاون کے نقطہ نظر کی نشاندہی کرتا ہے اور ایک 'S' کی شکل بناتا ہے جس کا مطلب سیمی کنڈکٹر ہے۔

انڈیا سیمی کنڈکٹر مشن (ISM) کو ڈجیٹل انڈیا کارپوریشن کے اندر ایک آزاد بزنس ڈویژن کے طور پر قائم کیا گیا ہے جس میں سیمی کنڈکٹرز اور ڈسپلے مینوفیکچرنگ کی سہولیات اور سیمی کنڈکٹر ڈیزائن ماحولیاتی نظام کی ترقی کے لیے ہندوستان کی طویل مدتی حکمت عملیوں کو تشکیل دینے اور چلانے کے لیے انتظامی اور مالی خود مختاری ہے۔ سیمی کنڈکٹر اور ڈسپلے انڈسٹری میں عالمی ماہرین کی قیادت میں آئی ایس ایم اسکیموں کے مؤثر، مربوط اور ہموار نفاذ کے لیے نوڈل ایجنسی کے طور پر کام کرے گا۔

**************

ش ح۔ ف ش ع- ج

U: 4404