প্রধানমন্ত্রীগী লোইশঙ
প্রধান মন্ত্রীদা নই দিল্লীদা প্রধানমন্ত্রী সংগ্রালয়া শঙ্গাবদা থমখিবা ৱারোল
Posted On:
14 APR 2022 5:21PM by PIB Imphal
কেন্দ্রগী কেবিনেত্তা লৈরিবা ঐহাক্কী মরুপ-মপাং, হাউস্তা লৈরিবা ঐহাক্কী অতোপ্পা মরুপ, তোঙানবা রাজনিতী দলশিংগী মরুপ, অতোপ্পা মীথুংলেনশিং!
ঙসি অসি লৈবাক্কী তোঙান-তোঙানবা মফমশিংদা হরাও কুমহৈ কয়া পাংথোকপা নুমিৎনি। ঙসি অসি বৈশাখী, বিহু, ওরিয়াগী অনৌবা চহি হৌবা নুমিৎ ওইবগা লোয়ননা তমিল নাদুগী ইচিল ইনাওশিংগী অনৌবা চহি হৌবগী নুমিৎসু ওইরি, ঐহাক্না মখোয়গী ‘পুথন্দু’গীদমক্তা য়াইফ পাউজেল পীজরি। মসিদা নত্তনা, অতোপ্পা মফম কয়াদসু অনৌবা চহি হৌবগী তরাম্না ওক্নরি, কুমহৈ কয়া পাংথোক্নরি। ঐহাক্না লৈবাক মীয়াম খুদিংবু কুমহৈশিং অসিগীদমক্তা য়াইফ পাউজেল পীজরি। অদোম খুদিংবু ভগবা মহাবীরগী জয়ন্তীগীদমক্তসু য়াইফ পাউজেল পীজরি।
মরুপশিং,
ঙসিগী থৌরম অসিদি অতোপ্পা ময়ামদগী খ্বাইদগী তোপ তোপ্পনি। ঙসিদি লৈবাক শিনবা থুংবনা বাবাসাহেব ভীমরাও অম্বেদকরগী মপোক কুমওন অসিদা মহাক্কী মফমদা ইকায় খুম্নবা উৎনরি। বাবাসাহেবনা মরু ওইবা আর্কিতেক্ত ওইরিবা ভারতকী সংবিধান অসিনা ঐখোয়দা পার্লিয়ামেন্তকী পথাপ অমা পীবিরি। মসিগী পথাপ অসিগী খ্বাইদগী মরু ওইবা থৌদাংদি লৈবাক্কী প্রধান মন্ত্রীগী লোইশঙদা লৈ। ঐহাক্না ঙসি লৈবাক্কী মফমদা প্রধান মন্ত্রীশিংগী ম্যুজিয়ম অমা কত্থোকপা ফংবা অসি ঐহাক্কী ওইনা য়াম্না লাইবক ফবনি। লৈবাক অসিনা নীংতম্বগী অমৃত মহোৎসব পাংথোক্লিবা মতমসিদা মসিগী ম্যুজিয়ম অসিনা অচৌবা ইথিল পীবা থৌওং অমা ওইরি। মসিগী চহি ৭৫ অসিদা, লৈবাক অসিনা চাউথোকচনীংঙাই ওইরবা মিৎকুপ কয়া উবা ফংখ্রে। মিৎকুপশিং অসিনা পুৱারীদা মরু ওইবা ফম অমা কল্লিবা অসিগা চাংদম্ননীংঙাই ওইবা অমত্তা লৈত্রি। অসিগুম্বা মিৎকুপ কয়া অমগী মমি প্রধানমন্ত্রী সংগ্রালয়দা উবা ফংগনি। ঐহাক্না লৈবাক মীয়াম খুদিংবু হন্না হন্না থাগৎচরি। ঐহাক্না প্রোজেক্ত অসিগা মরী লৈনবা মীওইশিংবু মতম খরগী মমাংদা উন্নবগী খুদোংচাবা ফংজখি। মীওই খুদিংনা থাগৎনীংঙাই ওইবা মওংদা মথৌদাং পাংথোক্নখি। মরম অদুনা, ঐহাক্না মখোয়গী কাংবুবু থাগৎচরি। ঐহাক্না ঙসি মফমসিদা, হান্নগী প্রধান মন্ত্রীশিংগী ইমুং মনুংগী মীওইশিংসু উবা ফংজরি। অদোম খুদিংবু ঐহাক্না নোলুকচরি। প্রধান মন্ত্রী সংগ্রালয় শঙ্গাবদা অদোম পুম্নমক্না শরুক য়াবীদুনা থৌরম অসিবু হেন্না মায় পাকহল্লে। অদোম্না মফমসিদা লৈবনা প্রধান মন্ত্রী সংগ্রালয়গী মগুন হেন্না হাপ্পীরে।
মরুপশিং,
নীংতম্বা ভারত্তা শেমখিবা সরকার খুদিংনা লৈবাক অসিনা ঙসি লৈরিবা থাক অসিদা য়ৌনবা শরুক তম্লমখি। ৱাফম অসি ঐহাক্না লাল কিলাদা কয়ারক হন্না হায়খ্রবনি। ম্যুজিয়ম অসি সরকার অমমমগী অপুনবা হেরিতেজকী অহিংবা মমি অমনি। লৈবাক্কী প্রধান মন্ত্রীশিংনা তোঙান-তোঙানবা শিংনবা কয়া মাইয়োক্নদুনা লৈবাকপু তুংলমচত্তা পুনবা থৌরাং কয়া পাংথোকখি। মখোয় খুদিংগী মশাগী ওইবা মগুন, লুচিংবা ওইবগী তোঙান তোঙানবা মগুন লৈনখি। মখোয়শিং অসি মীয়াম্না অদুমক নীংশিংদুনা লৈনরগদবনি। লৈবাক্কী মীয়াম, মরু ওইনা, নহারোলশিংনা মখোয়গী মরমদা খঙবা মতমদা মখোয়দা ইথিল ফংগনি।
মরুপশিং,
মীয়মগী থবক্কী ফম অৱাংবা পায়বা মীওইশিংগী পুন্সি ঐখোয়না নৈনবসি ঐখোয়না পুৱারী নৈনবগী মওংদা থোকই। মখোয়গী পুন্সিদা থোকখিবা থৌদোক, মখোয়না থেংনখিবা খুদোংচাদবা, মখোয়না লৌখিবা ৱারেপ, মসিনা ঐখোয়দা পারা কয়া অমা তম্বী। হায়বদি, মখোয়গী পুন্দিনা মহৌশাগুম্না অদুমক হিংই অদুগা নাকল অমদনা পুৱারী শেম্মি। মখোয়গী পুন্সিবু নৈনবা হায়বসি পুৱারী পাবগা মান্নৈ। মসিগী ম্যুজিয়ম অসিদগী নীংতম্বা ভারতকী পুৱারী খঙবা ঙমগনি। ঐখোয়না চহি খরগী মমাংমক্তদা সংবিধানগী নুমিৎ পাংথোক্তুনা লৈবাক নীংবগী ৱাখল্লোন অমুক্কা হন্না য়াকাইহন্নবা থৌদাং লৌখৎখি। ঙসিগী থৌওং অসিসু মাইকৈদা অসিদা পায়খৎপা খোঙথাং অমসুং য়াম্না মরু ওইবা তাঙ্কক অমনি।
মরুপশিং,
লৈবাক্কী প্রধান মন্ত্রী খুদিংনা গনতন্ত্রা চৎপা লৈবাক অমগী পান্দম খুদিং ফংনবা মশক থোক্না তেংবাংলমখি। মখোয়বু নীংশিংবা হায়বসিনা নীংতম্বা ভারতকী খোঙচৎ খঙবা হায়বনি। মফমসিদা লাকপা মীওই খুদিংনা লৈবাক্কী মমাংগী প্রধান মন্ত্রীশিংনা লৈবাক্কীদমক্তা শরুক তম্লম্বা খুদিংমক খঙবা ঙমগনি, মখোয়গী হৌরকফম, মখোয়না থেংনখিবা অৱাবশিং অমসুং মখোয়না শেম্লম্বা খুদিংমক খঙবা ঙমগনি। তোঙান-তোঙানবা পুন্সিগী ফিভমদগী লাকপা মীওই কয়ানা প্রধান মন্ত্রী ওইখি হায়বসি নহারোলশিংনা খঙবা ঙমগনি। অচম্বা ইমুংদা পোকপা মীওই অমসু ভারতকী গনতন্ত্রগী পথাপকী খ্বাইদগী ৱাংবা থাক্তা য়ৌবা ঙম্মি হায়বসিনা লৈবাক্কী নহাশিংদা মশাদা থাজহল্লি। অথাপ্পা লমদমদগী লাক্তুনা, লাইরবা ইমুংদগী লাক্তুনা, লৌমীগী ইমুংদগী লাক্তুনা প্রধান মন্ত্রীগী ফম য়ৌবা হায়বসি ভারতকী গনতন্ত্রগী পথাপ্তা থম্নরিবা থাজববু হান্নদগী হেন্না হেনগৎহল্লি। অচম্বা ইমুংদগী লাক্তুনা প্রধান মন্ত্রী ওইবা য়াই হায়বসি খঙবদা নহারোলশিংনা মশাদা থাজবগী চাংসু হেনগৎকনি।
মরুপশিং,
সংগ্রালয় অসিগী হৌখিবা মতমগী পুৱারী লৈবগী মতিক মসিদা তুংগী মতমসু লৈ। সংগ্রালয় অসিনা হৌখ্রবা মতমগী খোঙচত্তা পুদুনা মীয়ামদা অনৌবা থাজবা, অনৌবা থৌওং অমগা লোয়ননা ভারতকী চাউখৎ-থৌরাংগী লম্বীদা পুগনি। অনৌবা ভারতকী মঙলানবু চাউখৎপগী লম্বীদা চৎপগী থৌওংবু অদোম্না য়াম্না নক্না উবা ফংগনি। বিলদিং অসিদা গেলরী ৪০দগী হেন্না লৈ, অমসুং য়ামদ্রবদা মীওই লিশিং ৪ চনবা য়াই। ভর্চুএল রীএলিতী, রোবোৎ অমসুং মতমগা চুনবা অতোপ্পা তেক্নোলোজীগী খুত্থাংদা অহোংবা নাইরিবা ভারতকী শক্তমবু সংগ্রালয় অসিনা মালেমদা উহনগনি। ঐখোয়না উরিবা মতমদুদা তসেংনা হিংলিবা মালহনবা তেক্নোলোজীগী খুত্থাংদা ঐখোয়দা তোঙানবা এক্সপেরিএন্স অমা পীগনি, ঐখোয়না প্রধান মন্ত্রীশিংগা সেলফী লৌবগুম খনগনি, মখোয়গা তসেংনা ৱারী শাবগুম্না ফাওগনি।
মরুপশিং,
ঐখোয়না ঐখোয়গী নহারোলশিংবু ম্যুজিয়ম অসিদা য়ারিবমখৈ চৎনবা পুক্নিং থৌগৎকদবনি। ম্যুজিয়ম অসিনা মখোয়গী এক্সপেরিএন্সপু হেন্না পাকথোক চাউথোকহনগনি। ঐখোয়গী নহারোলশিংনা মপাঙ্গল লৈবা মতমদা, লৈবাকপু চাউখৎপগী অৱাংবা থাক্তা পুবা ঙম্বগী মতিক লৈগনি। মখোয়না লৈবাক্কী মরমদা, নীংতম লানগী শক্নাইরবা মীওইশিংগী মরমদা নীংথিনা খঙলিবমখৈ, মখোয়না লৈবাক্কা চুনবা ৱারেপ লৌবা ঙমগনি। সংগ্রালয় অসিনা লাক্কদৌরিবা মতমগী চারোন শুরোনগী লৌশিং, ৱাখল্লোন, এক্সপেরিএন্সকী অনৌবা থোঙ হাংবগী থবক পাংথোক্কনি। মসিদা লাক্তুনা মখোয়না লৌশিং তানগনি। মখোয়না মসিদগী খঙখিবশিংনা মখোয়গী তুংগী পুন্সিগী ৱারেপ লৌবদা তেংবাংগনি। রিসর্চ তৌনীংবা হিস্তরীগী মহৈরোইশিংনা মফমসিদা লাকপদা কান্নবা য়াম্না ফংগনি।
মরুপশিং,
ভারত অসি গনতন্ত্রগী হৌরকফম্নি, গনতন্ত্রগী মমানি। ভারতকী গনতন্ত্রনা মতমগা লোয়ননা লেপ্তনা অহোংবা লৈদুনা লাক্লি হাবসিনা মসিগী য়াম্না মশক থোকপা মগুন অমনি। য়ূগ খুদিং, চারোন খুদিংদা গনতন্ত্রগী পথাপ অসিবু হেন্না মপাঙ্গল লৈহন্নবা অমসুং মতমগা হেন্না চুনহন্নবা হোৎনদুনা লাক্লি। খুন্নাই অমদা মতমগী মতুং ইন্না অৱাৎপা লৈরকপগুম্না, গনতন্ত্রদসু মতমগী মতুং ইন্না শিংনবা কয়া থেংনরকই। শিংনবা অসিবু থেংনবা ঙম্নবগীদমক্তা ইশাবু মতমগা চুনহন্দুনা লৈবসিনা ভারতকী গনতন্ত্রগী তোপ তোপ্পা মগুন্নি। মসিদা মীওই খুদিংনা মশা মশাগী থৌদাং য়ারি। অখন্নবা থৌওং খরা য়াওদনা, ভারত্তা গনতন্ত্রবু গনতন্ত্রগী মওংদা মপাঙ্গল হেন্না কলহনবগী চাউথোকচনীংঙাই ওইরবা চৎনবী অমা লৈ। ঙসি, ঐখোয়গী গনতন্ত্রনা থেংনরিবা খুদোংচাদবা, মতমগী মতুং ইন্না লাকপা অৱাৎপশিংবু মেনখত্তুনা অমসুং শিংনবশিংগী ৱারোইশিন পীন-পীনা ঐখোয়না মাং থানা চৎলি। মসিমক গনতন্ত্রদগী থাজবা থম্নরিবনি অমসুং লৈবাক্নসু ঐখোয় পুম্নমক্তগী মান্নবা থাজবা লৈরি। ঙসিগী পুৱারী ওইরবা থৌদোক অসিনা গনতন্ত্রবু হেন্না মপাঙ্গল লৈহন্নবা ঐখোয়গী ৱারেপ্পু নৌহৌননা অমুক্কা নীংশিংবগী য়াম্না ফরবা খুদোংচাবা অমনি। ঐখোয়গী ভারত অসিদা তোঙানবা ৱাখল্লোন অমসুং চৎনবী কয়া অমত্তা ওইনা পুল্লি। ৱাখল্লোন অমখক্তনা খ্বাইদগী ফবা ওইগনি হায়বসি অশেংবা নত্তে হায়বসি ঐখোয়না গনতন্ত্রনা ঐখোয়দা তাকপীদুনা লাক্লি। ঐখোয়দি মখাদা পীরিবা অসিবু হায়দুনা লাক্লবা সিভিলাইজেসন অমদা চাউরকপনি।
আ নো ভদ্রাঃ
কৃত্বো য়ন্তু বিস্বাথঃ
মসিনা হায়বদি, অফবা ৱাখল হায়বসি ঐখোয়দা মাইকৈ খুদিংদগী লাক্কদবনি। ঐখোয়গী গনতন্ত্রনা অনৌবা থৌওংবু লৌশিনবগী অমসুং অনৌবা ৱাখল্লোনবু লৌশিনবগী ঐখোয়দা ইথিল পী। প্রধান মন্ত্রী সংগ্রালয়দা লাকপা মীওই খুদিংনা গনতন্ত্রগী অসিগুম্বা পাঙ্গল অসিবুসু উবা ফংগনি। ৱাখল্লোনশিংগী মতাংদা য়ানীংবা য়ানীংদবা খন্ন-নৈনবা য়াই, রাজনিতী দল তোঙাল্লম্বা য়াই অদুবু গনতন্ত্রদা মখোয়না তম্লিবা শরুক্ত অমা খক্তনি – লৈবাক্কী কান্নবা অমসুং চাউখৎপা। মরম অদুনা, ম্যুজিয়ম অসি প্রধান মন্ত্রীশিংগী মায় পাকপা অমসুং মখোয়গী থৌদাং খক্তদা অকক্নবা লৈগদবা নত্তে। থেংনখিবা ফিভম অমসুং তাঞ্জানা তোঙান-তোঙানবা ওইখ্রবসু, লৈবাক অসিদা মরা চেৎশিল্লক্লিবা গনতন্ত্র, ঐখোয়গী চৎনবীদা চহি লিশিং-লিশিং কয়াদগী নীংথিনা লৈদুনা লাক্লিবা গনতন্ত্রগী ৱাখল্লোনগী মপাঙ্গল লৈবা অমসুং সংবিধান্দা থম্লিবা ঐখোয়গী থাজবগী খুদম অমসু ওইবা য়াই।
মরুপশিং,
ঐখোয়বু চৎনবীবু ফজহনবা, মসিবু লাক্কদৌরিবা চারোন-শুরোন্দা য়ৌহনবা হায়বসি লৈবাক্কী থৌদাং অমনি। ঐখোয়গী সরকারনা ঐখোয়গী নীংতম ইহৌগী শক্নাইরবা অমসুং ইথিল পীবা মীওই, থৌদোক অমসুং ঐখোয়গী নাৎকী ওইরবা ফজরবা মতৌশিংবু মীয়াম মাঙদা পুরক্নবা লেপ্তনা হোৎনদুনা লাক্লি। লৈবাক অসিদগী হুরানখিবা মুর্তী অমসুং কলাগা মরী লৈনবা পোৎলম কয়াবু অমুক্কা হন্না পুরকপা ওইরো, অরিবা ম্যুজিয়মশিংবু নৌহৌননা শেমগৎ-শাগৎপা ওইরো, অনৌবা সংগ্রালয় শাবা ওইরো, ঐখোয়গী সরকারনা মমাংগী চহি ৭-৮দগী চাউরবা খোঙথাং অমা পায়খত্তুনা লাক্লি। খোঙথাং অসিগী মরুমদা য়াম্না চাউরবা পান্দম অমা লৈ। ঐখোয়গী নহারোলশিংনা অসিগুম্বা অহিংবা খুদম অসিবু উজবা মতমদা, মখোয়না অশেংবা করিনো হায়বা খঙবা ঙম্মি। মীওই অমনা জালিয়ানৱালা বাঘকী নীংশিং খুভম্ব উবা মতমদা, মখোয়না হৌজিক নুংঙাইবা ফংলিবা নীংতম্বগী মরু ওইবা করিনো খঙবা ঙম্মি। ত্রাইবেল নীংতম লান্মীগী ম্যুজিয়ম্বু কনাগুম্বা অমনা য়েংলুবা মতমদা, নীংৎম্বগী ইহৌগীদমক্তা থাপ্ল-থাপ্লবা উমংদগী ঐখোয়গী ত্রাইবেল ইচিল ইনাওশিংনা হীরম কয়াগীদমক্তা মশাগী পুন্সি করম্না কত্থোকখিবগে হায়বা খঙবা ঙমগনি। নীংতম য়াওল্লোইশিংগী ম্যুজিয়ম্বু কনাগুম্বা অমনা ইয়েংলুবা মতমদা, লৈবাক্কীদমক্তা থৱাই কৎপা হায়বগী ৱাহন্থোক করিনো হায়বা খঙবা ঙমগনি। ঐখোয়না নই দিল্লীদা বাবা সাহেবকী মহাপরিনির্ভানাগী মফম, অলিপুর রোদতা বাবাসাহেবকী নীংশিং খুভম শাখিবা অসি ঐখোয়গী সরকারগী লাইবক ফবনি। বাবাসাহেবকী পাঞ্চতীর্থ শাখ্রিবা অসিদি খুন্নাইদা অচুম্বা ৱায়েল পীনবা ইথিল পীবা অমসুং নীংহন্নবা লৈতনা লৈবাক নীংবগী ময়োল ওইবা মফম অমনি।
মরুপশিং,
মসিগী প্রধান মন্ত্রীশিংগী ম্যুজিয়ম অসিনা মীয়াম্না পাম্না খনখিবা প্রধান মন্ত্রীশিংগী মশক থোক্লবা ৱারীশিং তাক্তুনা সবকা সাথ, সবকা প্রয়াসকী ইথিলগী নুংঙাইবা ফোংদোক্লি। মসিগী লোগো অসিদসু অদোম খুদিংনা উরম্লগনি। প্রধান মন্ত্রী ম্যুজিয়মগী লোগো অসিদা ভারত মচা কোতি-কোতিগী মখুৎনা চক্র অমা পায়বগী মওং তৌরি। চক্র অসিনা পুং ২৪ লেপ্তনা চত্থরিবা অমসুং কন্না শু-নোমদুনা য়াইফ-য়ুম্বাল ফংগনি হায়বগী ৱারেপকী খুদম অমনি। মসিগী ৱারেপ, ৱাখল চেনবা অমসুং পাঙ্গল অসিনা লাক্কদৌরিবা চহি ২৫দা ভারতকী চাউখৎ-থৌরাংগী ৱারোল তাক্কনি।
মরুপশিং,
ভারতকী পুৱারীগী মশক নাইবা, ভারতকী য়াইফবা মতমগী মতাংদা ঐখোয় খুদিংনা খঙলবনি। মসিদা ঐখোয়না মতম পুম্বদা চাউথোকচদুনা লাক্লি। মালেম্না ভারতকী হেরিতেজ অমসুং খুদোল কয়াগী মতাংদা খঙবা হায়বসিসু মান্ননা মরু ওই। ঙসি, মালেমগী অনৌবা পথাপ অমা লৈরক্লিবা অসিদা, মালেম্না ভারত্তা থাজবা অমগা লোয়ননা য়েংনরক্লি, অদুগা থাজবা অসিবু থুংহন্নবগীদমক্তা ভারতনা মশাগী হোৎনবা হেনগৎপগী মথৌ তারে। অদুগা নীংতম্বগী চহি ৭৫ মপুং ফাবগী মতমসিদা, ভারতকী প্রধান মন্ত্রীশিংগী লৈঙাক পায়বগী মতম, প্রধান মন্ত্রীগী ম্যুজিয়ম অসিনা ঐখোয়দা লেপ্তনা ইথিল পীগনি। মসিগী ম্যুজিয়ম অসিনা ভারতকীদমক্তা ৱাখল চাউনা খল্লিবা নহারোলশিংগী মফমদা করিগুম্বা শিংথানীংঙাই ওইবা থবক অমা তৌনিংবগী ইথিল পীগনি। লাক্কদৌরিবা মতমশিংদা মফমসিদা হাপ্লক্কদবা মমিংশিং, মখোয়না তৌখিবা থবক্কী মতাংদা হাপ্লক্কদবশিং উবদা ঐখোয়না চাউখৎপা ভারত অমগী মঙলান মঙফাওনবা উবদা হেন্না নুংঙাইবা পোক্কনি। মরম অদুনা, হৌজিক অসি ঐখোয়না হোৎনবগী মতম্নি। নীংতম্বগী অমৃতকী মতমসিদি ঐখোয় ময়াম পুন্না হোৎনমিন্নবগী মতম্নি। ঐহাক্না লৈবাক মীয়ামদা হায়জনীংবদি, অদোমসু মাং থানা থোকপীরকউ, অদোমগী অঙাংশিংবুসু ম্যুজিয়ম অসিবু য়েংনবা শোইদনা পুবীরকউ। অসিগুম্বা পাউজেল অসিগা লোয়ননা, অসিগুম্বা অপাম্বগা লোয়ননা, ঐহাক্না প্রধান মন্ত্রী ম্যুজিয়ম অসিগীদমক্তা য়াইফ পাউজেল পীজরি। মীয়াম্বু অমুক্কা হন্না থাগৎচরি।
*****
(Release ID: 1816980)
Visitor Counter : 110
Read this release in:
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam