সাইন্স অমসুং তেক্নোলোজীগী কেন্দ্রগী রাজ্য মন্ত্রী (ইন্দিপেন্দেন্ত চার্জ); আর্থ সাইন্সকী কেন্দ্রগী রাজ্য মন্ত্রী (ইন্দিপেন্দেন্ত চার্জ); এম.ও.এস. পি.এম.ও., পর্সোন্নেল, পব্লিক গ্রাইভেন্স, পেন্সন, এতোমিক ইনর্জী অমসুং স্পেস, দাঃ জিতেন্দ্র সিংহনা ভারতকী ন্যুক্লিয়র প্রোগ্রাম অসি পুন্সি মহিংগী মগুন হেনগৎহন্নবা অমসুং মীওইবগী পুন্সিদা অমাঙ-অতা থোকহন্দনবনি হায়না ঙসি হায়খ্রে।

ন্যুক্লিয়র ইনর্জীবু শান্তি পুরক্নবগীদমক্তা শিজিন্নবদা য়ুম্ফম ওইদুনা দাঃ হোমি ভাভানা এতোমিক ইনর্জী প্রোগ্রাম হেক হৌদোকখিবদগী ভারতনা শাংলবা খোঙচৎ অমা চৎলক্লি হায়না দাঃ জিতেন্দ্র সিংহনা ফোংদোকখি। দাঃ ভাভাগী ফজরবা ৱারেপ্পু ‘সঙ্কল্প সে সিধী’ হায়না অমুক হন্না শেমদোকপগী মতম লাক্লে হায়না মহাক্না মখা তাখি।

দাঃ জিতেন্দ্র সিংহনা লুচিংদুনা নই দিল্লীগী বিগ্যান ভবন্দা এতোমিক ইনর্জী বিভাগ অমসুং স্পেস বিভাগকী নৌহৌননা অমুক শেম্লবা হিন্দি সলাহকার সমিতীগী অহানবা মীফম ফমখিবনি।

মৈ পুথোকপা, লৌউ-শিংউ, হিদাক লাংথক, হকশেল, চিঞ্জাক লীদুনা থম্বা, চারা মরু হেন্না ফগৎহনবা, ঈশিং শেংদোকপগী তেক্নোলোজী, শহরগী ফত্ত-হৌদী শেন্নবগী তেক্নোলোজী, পেত্রোলয়ম ইন্দস্ত্রীদা মরু ওইনা রেদিওআইসোতোপ অমসুং রেদিএসন ইনর্জীবু ইন্দস্ত্রীগী ওইনা শিজিন্নবগী লমদা ন্যুক্লিয়র ইনর্জী অমসুং রেদিএসন শিজিন্নবনা মশক থোকাপ থৌদাং য়াদুনা লাক্লি হায়না দাঃ জিতেন্দ্র সিংহনা পাউদমখি। ন্যুক্লিয়র ইনর্জীবু খুন্নাইগীদমক্তা শিজিন্নবগী মতাংদা মীওই অয়াম্বনা খঙনদবা অসিদা মহাক্না নুংঙাইতবা ফোংদোকখি।

গাম্মা রেদিএসন তেক্নোলোজী অসি বল্ব অমসুং ত্যুবতা স্প্রৌতিং তৌবা থিংবা, সিরিএল, হৱাই-চেংৱাইশিংদগী তিন-কাঙ হাৎপা, অকঙবা মরু-মরাংনচিংবদগী মাইক্রোব লৌথোকপগা (হাইজীনাইজেসন) লোয়ননা হান্ননা খঙদোক্লবা রেদিএসন দোজ শিজিন্নদুনা মখোয়বু লীদুনা থম্বা/শেল্ফ লাইফ শাংদোকহনবদসু শিজিন্নৈ হায়না দাঃ জিতেন্দ্র সিংহনা হায়খি। এতোমিক ইনর্জী বিভাগ (দি.এ.ই.)না কোবিদ লাইচৎ মনুংদা ফাওবা কোবিদ-১৯গী অনাবশিংবু শেন্নবগী লমদম অসিদা অহানবা ওইনা পুথোকচব, শেল চঙদবা, ৱাইয়র্লেস ফিজিওলোজিকেল পেরামীতর সীস্তেম ওইরিবা কোবিদ বীপ কৌবা য়াম্না অনৌবা থৌওং অমা পুথোকখি।

লৈবাক শিনবা থুংবদা লৈবা কেন্সর হোস্পিতাল কয়া চলায়রিবা তাতা সেন্তর মুম্বাইনা এতোমিক ইনর্জী বিভাগকী লমজিং মখাদা থবক তৌরিবনি হায়না দাঃ জিতেন্দ্র সিংহনা হায়খি। এতোমিক ইনর্জী বিভাগ অমসুং তাতা মেমোরিএল সেন্তরনা তাতা ত্রস্ততগী তেংবাং ফংদুনা বিহার, অসম অমসুং উত্তরাখন্দদা অহেনবা য়ুনিৎ শাগৎলি হায়না মহাক্না মখা তানা পাউদমখি।

দাঃ জিতেন্দ্র সিংহনা কম্মিতী অমসুং রাজভাশা বিভাগকী মেম্বরশিংদা স্পেস অমসুং ন্যুক্লিয়র তেক্নোলোজীদা মশক থোক্না মায় পাকপশিংবু প্রোফেস্নেল ত্রান্সলেতরশিংনা হিন্দি অমসুং অতোপ্পা মফম-মফমগী লোলশিংদা নীংথিজনা ৱাহন্থোক পীদুনা মীচম মীয়ামদা য়ৌহন্নবা হায়খি। সাইন্সকী তেক্সবুক অমসুং লিতরেচরশিংবু হিন্দি অমসুং লম-লমগী লোলশিংদা নীংথিজনা ৱাহন্থোক পীবদা মহাক্না অহেনবা মিৎয়েং চঙখি।

প্রধান মন্ত্রী নরেন্দ্র মোদীগী মখাদা অমিৎ শাহনা লুচিংবা গৃহ মন্ত্রালয়গী শরুক অমা ওইরিবা রাজভাশা বিভাগনা কেন্দ্রগী মন্ত্রালয় অমসুং বিভাগশিংগী ওফিসিএল ওইবা থবক অয়াম্ববু হিন্দিদা পাংথোকপগী অচৌবা অহোংবা অমা উরি হায়না দাঃ জিতেন্দ্র সিংহনা হায়খি। নহারোলশিংগী মরক্তা ‘সাইন্সপু নুংশিবা’ হায়বসি লৈহন্নবগীদমক্তা ঙাংনরিবা লোল কয়া শিজিন্নদুনা সাইন্সকী মতাংদা পাউ ফাওনববু ‘য়াম্না চাউবা’ মওংদা মতম পুম্বদা পুক্নিং থৌগত্তুনা লাক্লি হায়বা ৱাফম অসিদা মহাক্না মীয়ামগী মিৎয়েং চিংশিনখিবগা লোয়ননা লোল হায়বসিনা অয়েৎপা ওইগদবা নত্তে, তেংবাংবা ওইগদবনি হায়না পনখি।

স্পেস তেক্নোলোজীবু হৌজিক তোঙানবা হীরম অমসুং সেক্তরশিংদা মীচম মীয়ামগী পুন্সিবু লাইথোকহন্নবা শিজিন্নরি হায়না দাঃ জিতেন্দ্র সিংহনা ফোংদোকখি। আই.এস.আর.ও.গী সাইন্তিস্তশিংনা কম্মিতীগী মীফম অসিদা স্পেস তেক্নোলোজীবু লৌউ-শিংউ, লৈহাও, ঈশিংগী রিসোর্স, লম শিজিন্নবা/লেন্দ কবর, খুঙ্গং চাউখৎহনবা, পৃথিবী অমসুং অইং-অশাগী ফিভম নৈনবা, জিওসাইন্স, অর্বান অমসুং ইনফ্রাস্ত্রকচর, দিজাজতর মেনেজমেন্ত সপ্পোর্ত, ফোরেস্ত্রী অমসুং ইকোলোজীগুম্বা হীরমশিংদা পাক শন্না শিজিন্নরিবা অমসুং দিসিসন সপ্পোর্ত সীস্তেমদা তেংবাংনবগীদমক্তা জিওস্পেসিএল তেক্নোলোজী শিজিন্নবগী মতাংদা শম্লপ্না পাউদমখি। ইকুই কুইদ্রিবা মতমশিংদা লৌউ-শিংউগী লমদা অনৌবা ইহৌ অমা পুরক্নবগীদমক্তা দ্রোন তেক্নোলোজী শিজিন্নখ্রে হায়না মন্ত্রীনা ফোংদোকখি।

হন্দক্কী চহিগী মেদগী হৌদুনা ভোপালগী গান্ধী মেদিকেল কোলেজকী এম.বি.বি.এস. সীলেবস খরদি হিন্দিদা তম্বীবা হৌরগনি অমসুং মেদিকেল অমসুং সাইন্তিফিক প্রোফেস্নেল এক্সপর্তশিংগী মতেং লৌদুনা করিক্যুলম অপুনববুসু হিন্দিদা ৱাহন্থোক পীনবা হোৎনরি হায়না এদভাইজরী কম্মিতীগী মেম্বরনা দাঃ জিতেন্দ্র সিংহদা পাউদমখি।

<><><><><>