আয়ুশ
অয়ুস মন্ত্রালয়গা ৱর্ল্দ হেল্থ ওর্গনাইজেসনগা দব্লিউ.ঐচ.ও. গ্লোবেল সেন্তর ওফ ত্রেদিস্নেল মেদিসিনগীদমক হোস্ত কন্ত্রী এগ্রীমেন্ত খুৎয়েক পীনখ্রে
ভারত লৈঙাক্না সেন্তর অসি লিংখৎপগী থবক য়াংশিনহল্লে; অচৌবা থৌরম অমা জামনগর, গুজরাত্তা এপ্রিল ২১, ২০২২দা পাঙথোক্কদৌরি
Posted On:
26 MAR 2022 12:16PM by PIB Imphal
অয়ুস মন্ত্রালয়না ভারকী জামনগর, গুজরাত্তা দব্লিউ.ঐচ.ও. গ্লোবেল সেন্তর ওফ ত্রেদিস্নেল মেদিসিন লিংখৎনবা ৱর্ল্দ হেল্থ ওর্গনাইজেসন (দব্লিউ.ঐচ.ও.)গা হোস্ত কন্ত্রী এগ্রীমেন্ত খুৎয়েক পীনখ্রে অমদি মসিগী মরক্কী ওফিস ইন্সতিত্যুৎ ওফ ত্রেনিং এন্দ রিসর্চ ইন অয়ুর্বেদ (আই.তি.আর.এ.) গুজরাত্তা ওইগদৌরি। সেন্তর অসি ভারত লৈঙাক্তগী য়ু.এস.দি. মিলিয়ন ২৫০রোম থাদদুনা মতেং পাঙগদৌরি। জি.সি.তি.এম.গী মরুওইবা পান্দমদি মালেম পুমবদগী মহৌশাগী ওইবা হিদাক লাংথকশিংগী মতিংবু মোদর্ন সাইন্স অমসুং তেক্নোলোজীগী খুত্থাঙদা লোকশিন্নবা অমদি মালেম পুমবগী মীওই কাঙলুপশিংগী মশা মউ ফবগী চাং হেনগৎহনবনি।
য়ানচে অসি মার্চ ২৫দা জিনেভাদা অয়ুস মন্ত্রালয়গী সেক্রতরী ভৈদ্য রাজেস কোতেচা অমসুং দব্লিউ ঐচ.ও.গী দাইরেক্তর জেনেরেল দোক্তর তেদ্রোস অধানোম ঘেব্রেয়েসসনা খুৎয়েক পীনখিবনি। মমাঙ থাদা কেন্দ্রগী মন্ত্রী মন্দলনা সেন্তর অসি লিংখৎনবা অয়াবা পীখিবনি।
প্রধান মন্ত্রী শ্রী নরেন্দ্র মোদীনা পুৱারী ওইরগদবা তাঙ্কক অসিগী মতাঙদা মহাক্কী পাউজেল পীরদুনা হায়খিবদা, “গ্লোবেল সেন্তর ফোর ত্রেদিস্নেল মেদিসিনগী য়ানচে খুৎয়েক পীনখ্রে হায়বা খঙবদা পুক্নিংদা হরাউবা পোকই। তোঙান তোঙানবা থৌরাং কয়াগী খুত্থাঙদা ঐখোয়গী লৈঙাক্না লায়না তিলনা ঙাকথোক্নবগী অমসুং কোকহন্নবগী হকশেলগী থৌরাংশিং মীপুম খুদিংদা অহোঙবা মমলদা ফংহন্নবগীদমক চোকথবা নাইদনা হোৎনদুনা লাক্লি। জামনগরদা লিংখৎকদৌরিবা মালেমগী সেন্তর অসিনা মালেমসিদা খ্বাইদগী ফবা হকশেলগী পাম্বৈ পীবদা মতেং ওইরগনি।”
ভারত লৈঙাক্কী থৌরাংগী মরুওইবা ৱাফমশিং পল্লদুনা, দব্লিউ.ঐচ.ও.গী দাইরেক্তর জেনেরেল দোক্তর তেদ্রোস অধানোম ঘেব্রেয়েসসনা মোদর্ন সাইন্স অমসুং মান্নবা থাক্তা তুং কোইনা চৎনগদবা কাঙলোন্দা য়ুম্ফম ওইদুনা মহৌশাগী হিদাক লাংথকশিংগী মতিং লোকশিনবসিনা ২১শুবা চহিচাগী হকশেলগী লমদা অহোংবা অমা পুরক্লগনি হায়না ফোঙদোকখি।
জি.সি.তি.এম. অসিনা মালেম পুমবগী ওইনা মহৌশাগী হিদাক লাংথকশিংগী অহানবা অমদি অমত্তা ঙায়রবা মালেমগী সেন্তর (ওফিস) ওইগদৌরি। মসিনা মহৌশাগী হিদাক লাংথক অমসুং মসিবু শীজিন্নবগী খুদম চাংদমদা য়ুম্ফম ওইবা খুজিল থৌরাং অমসুং থাক লেপথোকপদা মীৎয়েঙ থমদুনা লৈবাকশিংদা মসিবু মখোয়গী চুনবা হকশেলগী সিস্তেমগা পুনশিন্নদুনা মতিক লৈনা, শাফনা খ্বাইদগী কান্নগদবা অমদি তুং কোইগদবা মওংদা শীজিন্নবদা মতেং ওইগনি।
মহৌশাগী হিদাক লাংথকশিং অসি হেল্থকেয়র দেলিভরী সিস্তেমগী মরুওইবা য়ুমবী অমনি অদুগা ভারতখক্তদা নত্তনা মালেম পুমবদা হকচাঙ ফনা অমদি তিঞ্জঙ কায়জঙদনা লৈনবা হোৎনবদা মরুওইবা থৌদাংসু লৌরিবনি। হন্দক চহি খরসিদা আর্তিফিসিএল ইন্তলিজেন্স, তেক্নোলোজীগী ইনোভেসনশিং মীয়ামদা লায়না ফংহল্লকপগা লোয়ননা মহৌশাগী হিদাক লাংথক্না লায়েংবগী কাঙলোন্দা অচৌবা অহোংবা অমা উবা ফংলি।
মোদর্ন তেক্নোলোজী শীজিন্নদুনা, আর্তিফিসিএল ইন্তলিজেন্স (এ.আই.)বু মহৌশাগী হিদাক লাংথক্কী লমদা খুদম চাংদম পুথোক্নবা অমদি শীজিন্নবগী পরম য়াত্থোক্নবা অমদি মহৌশাগী পোত্থোকশিংবু ফার্মাকোকাইনেতিক মচাকশিংদগী খন্দোক্নবা শীজিন্নরি। দব্লিউ.ঐচ.ও.-জি.সি.তি.এম. অসি মালেমগী মফম পুমবা শরুক য়ামিন্নদুনা কান্নবা পীননবা শেমখিবনি। মমাঙদা অমুক্তা ওইখিদ্রিবা মওংদা অচৌবা থৌরম অমা এপ্রিল ২১, ২০২২দা প্রধান মন্ত্রী শ্রী নরেন্দ্র মোদী য়াওদুনা পাঙথোক্কনি।
********
(Release ID: 1809970)
Visitor Counter : 156