কল্চর, তুরিজম অমসুং দোনরগী কেন্দ্র মন্ত্রী শ্রী জি কিসন রেদ্দীনা ঙসি নই দিল্লীদা লৈবা ইন্দিরা গান্ধী নেস্নেল সেন্তর ফোর আর্তসতা নুমিৎ হুম্নি চুপ্না চত্থগদবা ‘ইসা মন্থন’ কৌবা নোর্থ-ইস্ত ফেস্তিবেল হৌদোকখ্রে‍। আই.জি.এন.সি.এ.গী মেমবর সেক্রেতরী দোক্তর সচিদানন্দ জোসি, জে.এন.য়ু. ভাইস চাঞ্ছেলর প্রোফেসর সান্তিশ্রী ধুলিপুদি পন্দিৎ অমসুং প্রজ্ঞা প্রভাহগী নেস্নেল কনভেনর শ্রী জে. নন্দকুমারসু থৌরমদুদা শরুক য়াখি‍। নুমিৎ হুম্নি চত্থগদবা থৌরমদুনা মার্চ ২৫দগী ২৭ ফাওবদা ৱেস্তর্ন কোর্ত মনাক্কী কলা কেন্দ্রদা অৱাংনোংপোক ভারতকী নাৎ, কলা, ঈশৈ, জগোয়, হেন্দিক্রাফ্ত অমসুং ত্রেদিস্নেল মথেলশিং খঙননবা খুদোংচাবা অমা পীগনি‍। থৌরম অসি অয়ুক পুং ১০দগী নুমিদাং পুং ১০ ফাওবা চত্থগনি‍। মফমসিদা লাকপশিংনা তোঙান তোঙানবা নাৎকী ওইবা থৌরমশিং য়েংবা ফংগনি অমদি হেন্দিক্রাফ্ত, ফিরোল অমদি অতৈ পোৎলমশিং অৱাং নোংপোক্কী খুৎহৈবশিংদগী হকথেংননা লৈবা য়াগনি‍।

থৌরমদুদা ৱা ঙাঙলদুনা শ্রী জি কিসন রেদ্দীনা হায়খিবদা, “ইসান মন্থন থৌরম অসি অৱাং নোংপোক্কী য়াম্লবা মীওই কাঙলুপশিংগী নাৎ অমসুং ফজববু পুথোক্তুনা পাঙথোকপা নুমিৎ হুম্নিগী ওইবা কুমহৈনি অমদি মসিনা এক ভারত শ্রেস্থ ভারতকী খোঙফম চেৎশিনহনবদা মতেং ওইগনি‍। অৱাং নোংপোক লমদমদা কাঙলুপ ৪০০রোম অমদি লোল ২০০রোম লৈ‍। অৱাং নোংপোক লমদমগী মীওইশিংগী ইচম চমজবা অমদি নোল্লুকপা মতৌনা মখোয়গী তোপ তোপ্পা শক্তম অমা পী‍।”

শ্রী রেদ্দীনা মখা তাখিবদা, “নরেন্দ্র মোদী লৈঙাক্না লমদম অসিগী য়াইফনবগীদমক অমদি চাওখৎনবগীদমক থবক পায়খৎলি‍। ঐখোয়না লম্বী থোংগী ফীভমদা রেল, লম্বী, নোংথক অমসুং ঈশিং লম্বীগী পাম্বৈ মরিমক্তা অহেনবা মীৎয়েঙ চঙলি‍। হৌখিবা চহি তরেৎ মখায়সিদা লমদম অসোমগী বজেৎ ১১০% হেনগৎহন্দুনা মফম অসিবু মালেমগী থাক্তা থাঙ্গৎনবা ঐখোয়গী খোঙফম উৎলি‍।”

হৌদোকপগী থৌরমদুদা মখা তারকপদা অৱাং নোংপোক ভারতকী মশাগী লাইনীংগী মরমদা খন্ন-নৈনবা, অসাম অমসুং মিথিলাঞ্চলগী লুহোংবগী ঈশৈ, অৱাং নোংপোক্কী মীথানবিদ্রবা নীংতম লান্মীশিংগী মরমদা খন্ন-নৈনবা অমদি নাৎকী ওইবা থৌরমশিং পাঙথোকখি‍। থৌরম অসিনা অৱাং নোংপোক্কী ফিল্ম, আর্ত অমসুং হেন্দিক্রাফ্তকী মরমদা ঈ-পাউ কয়াসু ফংহনগনি‍। নুমিৎ খুদিংগী তোঙান তোঙানবা স্তেতশিংদগী নাৎকী জগোয় অমসুং ঈশৈগী থৌরম লৈগনি‍। অহানবা নুমিত্তা সিক্কিমগী সোফিয়াম বেন্দনা ঈশৈ লান্থোকখি অদুগা অনিসুবা নুমিত্তা অরুনাচলগী “করপক করদং’না অমদি অহুমসুবা নুমিত্তা নাগালেন্দগী ‘তেতেসিও সিস্তের্স বেন্দ’কী নুংঙাইরবা পর্ফোর্মেন্সশিং য়েংবা ফংগনি‍। কোহিমাদা বেজ তৌবা তেতেসিও সিস্তর্স অসি লৈবাকসিদা অমদি মালেমগী মফম কয়াদা মমীং লৈরবা কাঙলুপ অমনি‍। মসিদা য়াওরিবা মচিন মনাওশিং অসি মুৎসেভেলু, অজিন, কুভেলু অমসুং অলুনে কৌই অদুগা মর্সী, অজি, কুকু অমসুং লুলু হায়নসু খঙনৈ‍। ত্রেদিস্নেল ওইনা হায়রিবা শৈশকপশিং অসিনা চোক্রি লোলদা শকপা মখোয়গী নাৎকী ঈশৈ ‘লি’ লৈবাকসিখক্তদা নত্তনা থাইলেন্দ, ম্যান্মার, চাইনা, কোরিয়া, অমসুং য়ু.এস.নচিংবা লৈবাক কয়াদা শকখ্রে‍।

*******