উপ রাস্ত্রপতি, শ্রী এম. ভেঙ্কাইয়া নাইদুনা ঙসি অৱাং-নোংপোক্কী রাজ্যশিং য়াওনা, হেন্না তোইনা উননবা অমসুং মতম শাংনা লৌনবা হায়রিবা অসিনা লো শেম্বদা, অহেনবা মীয়ামগী অপাম্বা ইসু খন্নবা অমসুং একজেক্যুতিবকী মথৌদাংশিং শোইদনা তৌননবা মতিক চাবা মতম অমা পীনবা, লেজিসলেচরশিংগী তঙাইফদবা মরুওইবা পীখ্রে।   

মিজোরম লেজিসলেতিব এসেমব্লীগী মেম্বরশিংদা ৱা ঙাংলদুনা, উপ রাস্ত্রপতিনা অনিং অপাম্বা ফোংদোকখি মদুদি এসেমব্লী সেসনশিং চপ চাবা মতম লৌদুনা হায়রিবা অসিনা খন্নবগী মতম, খন্ন-নৈনবা, য়েৎনবা অমসুং কাইনথংদা, ৱারেপ লৌননবগী মতম চপ চানা ফংহন্নবা থৌরাং তৌগদবনি। “ঐখোয়না সেসন খুদিংগী লেজিসলেচরশিং হেন্না মীফম ফম্বা অমসুং হেন্না কান্নবা দিবেৎশিং থমগদবনি”, হায়না মহাক্না মখা তাখি।  

নিং-খা তম্বগী ৭৫শুবা চহি মপুং ফারকপগী পাংথোক্লিবা অজাদী কা অমৃত মহোৎসবতা  ৱাফম থম্লদুনা, শ্রী নাইদুনা হায়খি “ঐখোয়গী লৈবাক্কী চাউরবা দেমোক্রেতিক্কী চৎনবী মপাঙ্গল কনখৎননবা ঐখোয়না শোইদনা ৱারেপ লৌগদবনি, মহা সংকল্প অমা লৌগদবনি। ঐখোয় পুম্বনা মংলান তৌরিবা অনৌবা ভারত অমা শেম্বদা রাজ্য এসেমব্লীশিং অমসুং পার্লিয়ামেন্তনা মতিক চাবা খুলায় অমা ওইহন্নবা ঐখোয়না শোইদনা হোৎনগদবনি। ঐখোয়গী দেমোক্রেসী অসি মালেম অসিগী খ্বায়দগী লিরবা অমসুং খ্বায়দগী চাউবা দেমোক্রেসীনি। ঐখোয়না মসিবু খ্বায়দগী ফবা ওইহনসি”, হায়না মহাক্না হায়খি।  

শ্রী নাইদুনা হন্দক্তা রাজ্য লেজিসলেচর খরদা থোকখিবগী মরমদা মরী লৈননা ৱাফম খরা ফোংদোকখি অমসুং হায়খি মদুদি কন্সতিত্যুসনেল ওফিসশিং মতম লৈবা খিবিক্তা ইকাই খুম্নগদবনি। মহাক্না হায়খি লেজিসলেচরশিংনা ৱাহন্থোক লৈনা য়েৎনগদবনি অমসুং হাউসকী প্রোসিদিংশিংদা অকাইবা পীরোইদবনি। ‘মীয়ামগী অনিং অপাম্বশিং তাগদবনি অমসুং ইকাই খুম্নগদবনি” হায়না উপ রাস্ত্রপতিনা মখা তাখি।  

অৱাং-নোংপোক রাজ্যশিং য়াওনা, লৈবাক অসিগী পার্লিয়ামেন্ত অমসুং রাজ্য লেজিসলেচরশিংদা নুপীগী মতিক চাবা মীহুৎকী অৱাৎপা ইসু অসি পুথোক্লদুনা, উপ রাস্ত্রপতিনা হায়খি লো শেম্বদা নুপীগী মেম্বরশিং শরুক য়াহনবগী য়াম্না তঙাইফদবা লৈ। মিজোরম অমসুং নাগালেন্দগী এসেমব্লীদা নুপী মেম্বর অমফাওবা লৈতবা অসি পল্লদুনা, মহাক্না হায়খি মনিপুর অমসুং ত্রিপুরা এসেমব্লীদা মেম্বর অনি অমসুং মঙা মথংশিৎনা লৈরি। মফম অসিগী লেজিসলেতিব এসেমব্লীশিং নিপালগী অপুনবা মেম্বর ৪৯৮গী মনুংদা, শুপ্নতগী মেম্বর ৪% ওইদুনা নুপী ২০ খক্তমক লৈরি। পার্লিয়ামেন্ত ফাওবদা নুপী চাওরাক্না ১১% ওইরি, হায়না শ্রী নাইদুনা নুঙাইতবা ফোংদোকখি।

ইন্তর্নেস্নেল ৱুমেন্স দেবু ঐখোয়গী চাউখৎ থৌরাংগী লালোংদা মপুং ফানা নুপী য়াওহনগদবনি হায়বগী শকখঙনবা থৌরম অমনি হায়রদুনা, মহাক্না হায়খি মখোয়না পুন্সিগী লম্বী খুদিংদা শরুক য়ারকপা অসিনা চাউখৎ থৌরাং হেন্না য়াংশিল্লক্কনি অমসুং চাউখৎ থৌরাংগী থৌওংশিং হেন্না মপুং ফাহনগনি।

মেদা মপুং ফারগদবা গোল্দন জুবিলী থৌরমগা লোয়ননা মিজোরম লেজিসলেতিব এসেমব্লীগী ৫০শুবা কুমওন্দা মেম্বরশিংদা হরাও তয়াম্বা ফোংদোক্লদুনা, মহাক্না হায়খি মদুদি মসি য়াম্না নুঙাইবা থৌদোক অমনি মদুদি লৈবাক অসিনা  নিং-তম্বা লৈবাক অমা ওইনা চাউখৎ থৌরাংগী ৭৫শুবা চহিসু পাংথোক্লি। “অদোমগী এসেমব্লীগী স্বার্না মহোৎসব অমসুং লৈবাক্কী অজাদি কা মহোৎসবনা মসিগী দেমোক্রেতিক্কী ওইবা খোঙচৎতা ভারতকী শিংথানিঙাই ওইরবা প্রোগ্রেস পাংথোক্লি” হায়না মহাক্না মখা তাখি।   

মিজোরম্না হৌখিবা চহি মঙাদা শান্তি ওইনা মীখল পাংথোকপা, এসেমব্লীদা লেজিসলেচরশিংনা চিং-লেম্না পাংথোকপা অমসুং ঙাক্তুনা থম্দুনা ঐখোয়গী লৈবাক্কী দেমোক্রেসীগী হৌরকফম হেন্না লুনা চংশিনবা অসিদা হরাওবা ফোংদোক্লদুনা উপ রাস্ত্রপতিনা হায়খি “মসি খঙবদা য়াম্না অপেনবা ওই মদুদি হাউসকী সেসনশিং অসি ঙম্নমক দিসিপ্লিন, দিলিজেন্স অমসুং দেকোরমগা লোয়ননা পাংথোক্লি। অদোম্না, মতিক চানা, থাজবা, আসা অমসুং মংলানশিং ফংবা ঙম্লে মদুদি মীয়াম্না অদোম্বু মখোয়গী মীহুৎ ওইনা খল্লি। ঐহাক্না অদোম পুম্ববু অৱাংবা বেঞ্চমার্ক অমদা থম্লি মদুদি অতোপ্পা রাজ্যগী লেজিসলেচরশিং অমসুং পার্লিয়ামেন্ত ফাওবনা তমজনিঙাই ওইরি”, হায়না মহাক্না লেজিসলেচরশিংদা হায়খি।  

১৯৮৬তা ভারত সরকার, মিজোরম সরকার অমসুং মিজো নেস্নেল ফ্রন্তকী মরক্তা পুৱারী ওইরবা সেতলমেন্তগী মেমোরেন্দম সহী তৌনখিবা, হায়রিবা অসিনা দিকেৎ অনি হেন্না তংদু-লৈতাদনা লৈরকখিবশিং লোইশিনখিবা অমসুং ইং-তপ্না অমসুং থবক থৌরম কয়া খুমাং চাউশিল্লকপা পল্লদুনা, শ্রী নাইদুনা হায়খি মদুদি মিজোরম্না দেমোক্রেসীদা য়াম্না তঙাইফদনা চংলিবা চয়েৎনবশিংদা ৱারী শান্নবগী শক্তি অমসুং ইংনা চিক্না লোইশিনবগী মতৌ অদু উৎলি।  

মহাক্না হায়খি পিস একোর্দ অসিনা অৱাং-নোংপোক মফমগী অতৈ শরুকশিংদা অশেংবা অমা ওহন্দুনা হায়রিবা মান্নবা শান্তিগী য়ান্নবগী খুদম অমা ওইরে।

মিজোরম্বু লৈবাক অসিগী খ্বায়দগী ইংনা-চিক্না লৈবা রাজ্য অমা ওইনা মশিং থাবতা নত্তনা পুকচেল শেংবা অমগা লোয়ননা চাউখৎপগী লম্বীদা চংশিল্লবা অমনি হায়না থাগৎপা ফোংদোক্লদুনা, মহাক্না হায়খি “মসিমক্নি ঐখোয়গী কন্সতিত্যুসন শেম্বশিংনা মংলান তৌরিবা অসি। মখোয়না মীয়ামগী তঙাইফদবা অমসুং আসাশিংদা থৌদাং লৌবা অমসুং খেন্নবশিং ইং-চিক্না, দেমোক্রেতিক ওইবা ৱারী শাদুনা লোইশিনবদা ঐখোয়গী লৈবাক্কী লৈঙাক অসি পাম্লি” হায়না মহাক্না মখা তাখি।

মিজোরম্বু খ্বায়দগী অরোইবা সস্তেনেবল দিবলপমেন্তগী পান্দমশিং– এস.দি.জি. ইন্দিয়া ইন্দেক্সতা ২০২১না ২০১৯-২০দা ২১শুবা পোজিসন্দগী ১২শুবা পোজিসন্দা লৈদুনা, রেঙ্কিংদা হেন্না ফগৎলকপগীদংক থাগৎপা ফোংদোক্তুনা, উপ রাস্ত্রপতিনা হায়খি মদুদি রাজ্য সরকারনা লৌউ-শিংউবা অমসুং মরী লৈনবা থবকশিং হায়বদি হোর্তিকলচর অমসুং ফ্লোরিকলচরগী মথক্তা ইনফ্রাস্ত্রকচরগী চাউখৎ থৌরাংদা মিৎয়েং থম্লি।

প্রধান মন্ত্রী নরেন্দ্র মোদীনা মফম অসিগী তৌবা ঙম্বা অমসুং ওইথোকপা য়াবশিং অমসুং মসিদা লৈরিবা অপুনবা ওইথোকপা য়াবগী মরমদা তোইনা ঙাংখিবশিং অমুক হন্না নিংশিংলদুনা, উপ রাস্ত্রপতিনা হায়খি মদুদি ভারত সরকারগী এক্ত ইস্ত পোলিসী রিন্যু তৌরিঙৈগী মনুংদা, মিজোরম্না মফম অসিগী অমসুং লৈবাক্কী ওইনা সাউত এসিয়ন ইকোনোমীশিংগী য়াম্না মরুওইবা গেতৱে অমা ওইনা থবক তৌদুনা সেন্তর স্তেজগী মফম কল্লগনি।

মিজোরমগী রাজ্যপাল, দাঃ হরি বাবু কমভমপতি, মুখ্য মন্ত্রী, শ্রী জোরমথাঙ্গা, এসেমব্লী স্পিকর, শ্রী লালরিনলিয়ানা সাইলো, দিপুতী চীফ মিনিস্তর, মন্ত্রীশিং, এম.এল.এ.শিং অমসুং কম্মিসনর অমসুং মিজোরমগী সেক্রেতরী, লেজিসলেতিব এসেমব্লীনা থৌরম অসিদা শরুক য়াখি।

মখাদা পীরিবা অসি মপুং ফাবা ৱোরোলনি: (এতেচ তৌরিবা অদু চানবিদুনা য়েংবিয়ু)

“ঙসি অদোম পুম্নমক্কী মরক্তা তিনবা ফংজবা, মসিগী চিং-লেম্লবা হাউস্তা অদোমগা উনদুনা ৱা ঙাংবা ফংজবা, অসি অদুক্কী মতিক নুঙাইজৈ, হায়রিবা অসিনা মিজোরম মীয়ামগী অমসুং রাজ্য অসিগী খ্বায়দগী ৱাংবা লো-মেকিং বোদী ওইরিবা অমসুং তশেংনা ঐখোয়গী দেমোক্রেতিক প্রিন্সিপলশিং অমসুং ইথোসকী মপুং ফাবা খুদম অমা ওইরি।

ঐহাক্না মসিগী খুদোংচাবা অসি ঐঙোন্দা পীবিবগীদমক্তা স্পিকর, মুখ্য মন্ত্রী, দিপুতী মুখ্য মন্ত্রী, মন্ত্রীশিং অমসুং মিজোরম লেজিসলেতিব এসেমব্লীগী মেম্বর পুম্ববু থাগৎচবা ফোংদোকচরি।

অহানবদা, ঐহাক্না মিজোরমগী মীয়াম্দা হরাও তয়াম্বা ফোংদোকচরি অমসুং য়াইফ পাউজেল পীজরি। হন্দক্কী চহি অসি মেদা গোল্দন জুবিলী থৌরম তাবগা লোয়ননা মিজোরম লেজিসলেতিব এসেমব্লীগী ৫০শুবা কুমওন্নি হায়না ঐঙোন্দা তাকপিরি।  

ঐহাক্না পুৱারী ওইরবা থৌরম অসিদা চিং-লেম্লবা হাউস অসিগী মমাংদা ওইখিবা অমসুং হৌজিক ওইরিবা মেম্বর পুম্বদা হরাওবা ফোংদোকচরি। মসি নুঙাইবা থৌদোক অমনি মদুদি মসিগী চহি অসি ঐখোয়না নিং-খা তম্বা লৈবাক অমা ওইনা চাউখৎ থৌরাংদা ৭৫শুবা চহিসু পাংথোক্লি। অদোমগী এসেমব্লীগী স্বার্না মহোৎসব অমসুং লৈবাক্কী অজাদি কা অমৃত মহোৎসবনা দেমোক্রেতিক্কী খোঙচৎতা ভারতকী শিংথানিঙাই ওইরবা থবক-থৌরম চংশিল্লিবশিং পাংথোক্লি। চহি ৫০গী মমাংদা, মিজোরম অসি তোঙানবা এন্তিতী অমা ওইরম্মী অমসুং য়ুনিয়ন তেরিতোরী অমা ওইনা খোঙচৎ হৌরকখি অমসুং মতুংদা ১৯৮৭গী ফেব্রুৱারীগী ২০দা ভারত কেন্দ্রগী ২৩শুবা মপুং ফাবা রাজ্য অমা ওইখি।

মিজোরম্না ইংনা-চিক্না মীখল তৌদুনা, এসেমব্লীদা লেজিসলেচরশিং নিংথিনা শিল-লাংদুনা অমসুং ঙাক-শেন্দুনা, হৌখিবা চহি মঙাদা মপুং ফানা চাউখৎতুনা ঐখোয়গী লৈবক্কী দেমোক্রেতিক্কী হৌরকফমদা চৎপা অসিদা অখন্ননা ঐহাক্না নুঙাইবা ফাওজৈ। 

ঐখোয়না মীয়ামগী মিৎয়েং থম্লিবা লো মেকিং বোদীগী অৱাংবা থাক্কী মফম অসি মশক খঙবা অমা মথৌ তাই। মসি মতিক চাই, খ্বায়দগী শেংলবা মফম্নি হায়বদা হায়মনবা থোক্লোই, হায়রিবা অসিদা মীয়ামগী খোলাও য়ৌরিবা অমসুং তারিবা, হায়রিবা অসিদা মখোয়গী আসা অমসুং অকিবশিং য়েৎনরিবা, হায়রিবা অসিদা লোনা মখোয়বু ঙাকথোক্লিবা, মখোয়গী চাউখৎপবু পুক্নিং থৌগৎলিবা অমসুং লৈবাক্কী ফাস্ত-ত্রেক্ত ওইবা চাউখৎ থৌরাংশিং পাংথোক্লি।     

মসি খঙবদা য়াম্না নুঙাইজৈ মদুদি হাউস অসিগী সেসনশিং অসি ঙম্নমক দিসিপ্লিন, দিলিগেন্স অমসুং দেকোরমগা লোয়ননা পাংথোক্লি। অদোম্না, মতিক চানা, থাজবা, আসা অমসুং মংলানশিং ফংবা ঙম্লে মদুদি মীয়াম্না অদোম্বু মখোয়গী মীহুৎ ওইনা খল্লি। ঐহাক্না অদোম পুম্ববু অৱাংবা বেঞ্চমার্ক অমদা থম্লি মদুদি অতোপ্পা রাজ্যগী লেজিসলেচরশিং অমসুং পার্লিয়ামেন্ত ফাওবনা তমজনিঙাই ওইরি।  

মিজোরম্না দেমোক্রেসীদা য়াম্না তঙাইফদনা চংলিবা চয়েৎনবশিংদা ৱারী শান্নবগী শক্তি অমসুং ইংনা চিক্না লোইশিনবগী মতৌ অদু উৎলি। ১৯৮৬তা ভারত সরকার, মিজোরম সরকার অমসুং মিজো নেস্নেল ফ্রন্তকী মরক্তা পুৱারী ওইরবা সেতলমেন্তগী মেমোরেন্দম সহী তৌনখিবা, হায়রিবা অসিনা দিকেৎ অনি হেন্না তংদু-লৈতাদবা লোইশিনখিবা অমসুং ইং-তপ্না অমসুং থবক থৌরম কয়া খুমাং চাউশিল্লক্লি। মসিগী পিস একোর্দ অসিনা অৱাং-নোংপোক্কী মফমশিংগী অতোপ্পা শরুকশিংদা অশেংবা অমা ওইনা থোকহন্দুনা মান্নবা পিস এগ্রিমেন্তকী খুদম অমা ওইরি।

অদোম্না চাউথোকচনিঙাই ওই মদুদি ঙসি মিজোরম অসি লৈবাক অসিগী খ্বায়দগী ইংনা-চিক্না লৈবা রাজ্য অমা খক্তা নত্তনা তাংনা থোকপা পুকচেল শেংবা অমগা লোয়ননা চাউখৎ থৌরাংগী খোঙচৎতা লৈরবা অমনি। মসিমক্নি ঐখোয়গী কন্সতিত্যুসন শেম্বশিংনা মংলান তৌরিবা অসি। মখোয়না মীয়ামগী তঙাইফদবা অমসুং আসাশিংদা থৌদাং লৌবা অমসুং খেন্নবশিং ইং-চিক্না, দেমোক্রেতিক ওইবা ৱারী শাদুনা লোইশিনবদা ঐখোয়গী লৈবাক্কী লৈঙাক অসি পাম্লি।

ঐহাক্না মিজোরমগী মীয়াম্বু মখোয়না পোলিতিকেলগী থৌওংদা থোইদোক হেন্দোকপা শাফু পীদুনা মখোয়না শরুক য়াবা হায়রিবা অসিনা মরম ওইদুনা রাজ্য অসিদা শান্তি অমসুং ওর্দর হঞ্জিল্লকপা অসিদা থাগৎফম থোকই।

মসি য়াম্না শিংথানিঙাই ওইবা অমনি মদুদি অদোমগী রাজ্য অসি ১৯৮৭গী অহানবা রাজ্যগী এসেমব্লী ইলেক্সনগী হৌরগা হন্দক্তা পাংথোকখিবা ২০১৮গী ইলেক্সন ফাওবা য়াম্না ইং-চিক্না পাংথোকপা মীখল ওইখি। মরুওইনা, ঐঙোন্দা হায়খি মদুদি মিজোরমগী পুৱারীদা নম্ফু-শাফু অমসুং বুথ লাকপগী থৌদোক মচেৎ অমা ফাওবা উখিদ্রি।   

ঐহাক্না মসি খঙবদা নুঙাইবা ফাওই মদুদি রাজ্য অসি মখোঙদগী হৌনা দেমোক্রেসীগী মপাঙ্গল কনখৎহন্নবগী থাগৎনিঙাই ওইবা খোঙথাং কয়াসু লৌখৎখি। ইকাই খুম্নজরিবা রাজ্যপাল দাঃ হরি বাবু কমভমপতিনা ঐঙোন্দা পাউদমখি মদুদি রাজ্য অসিদা লোকেলগী থাক্তা রিগুলার ইলেক্সনশিং চর্চ, নন-গবর্নমেন্তেল ওর্গানাইজেসনশিং অমসুং সিবিল সোসাইতীশিং য়াওনা ইং-চিক্না পাংথোকই।    

মসি ঐখোয়গী লৈবাক্কী দেমোক্রেতিক ওইবা ইথোসতা হেন্না মগুন হাপ্নবা হোৎনরিবা মীয়ামদা তশেংনা ইকাই খুম্নবা উৎপনি।

মিজোরম্না ঐহাক্কী থম্মোয়দা অখন্নবা মফম অমা কল্লি – মসিগী মরাং কাইনা লৈরবা পুৱারী অমসুং শিংথানিঙাই ওইরবা চৎনবী কয়া, মসিগী চিংলোন নাপোম, পাৎশিং অমসুং তুরেলশিং অমসুং থম্মোয় হুনিংঙাই ওইরবা মহৌশাগী ফজবা, অসিনা মতম চুপ্পগী ওইনা ঐহাক্কী ইফমদা লৈরি। মসি তশেংনা থাগৎনিঙাই ওই মদুদি অদোম্না চহিচা কয়া ইথনিক অমসুং কলচরেলগী চৎনবীশিংগী য়াম্না ফজরবা মশকশিং  য়াম্না চেকশিন্না য়োকখৎতুনা থম্লি। মরুপ- মপাং ওইবা, পুকচেল চাওবা, ইং-তপ্পা, থৌজাল হৈবা অমসুং মিনুংশি লৈবা অসিনা মিজো মীয়ামগী মশক তাক্লি।      

ঐহাক্না অৱাং-নোংপোক্কী মফমশিং লাকপদা য়াম্না নুঙাইবা অমসুং লাংতক্নবা অমা ঐঙোন্দা কন্না ফাওজৈ। প্রধান মন্ত্রী মোদীনা মফম অসিগী তৌবা ঙম্বা অমসুং ওইথোকপা য়াবা অমসুং মসিদা লৈরিবা অপুনবা ওইরকপা য়াবশিং ঐঙোন্দা তৎতনা ৱারী শাখি। তশেংনা, রাজ্যশিং নিপাল – কনাগুম্বা খরনা মখোয়বু অস্থা লক্সমী কৌরিবা – অসি ঐখোয়গী চাউরবা লৈবাক্কী চাউথোকচনিঙাইনি। প্রধান মন্ত্রী শ্রী নরেন্দ্র মোদীনা, ২০১৪দা এক্ত ইস্ত পোলিসী লাওথোকপদা মরুওইবা পীখি মদুদি অৱাং-নোংপোক্কী মফম অসি কান্নবা পীনবগী মতিক চাবা চাউখৎলক্লিবা ইঞ্জিন অমা ওইনা ফাওগৎলকপগী মখাদা মরুওইনা থৌদাং লৌবা ওইরগনি। মহাক্না মখা তানা মরুওইবা পীখি মদুদি কলচর, কম্মর্স, কন্নেক্তিবিতী অমসুং কেপাসিতী বিল্দিংনা মসিগী পোলিসী অসি মাংলোমদা ইনখৎলগনি।   

মিজোরম অসি নোংপোক অমসুং খাদনা ম্যানমার অমসুং নোংচুপ থংবদনা বঙ্গলাদেশ অনিগী মরক্তা লৈদুনা ঐখোয়গী চাওরবা লৈবাক্কী অৱাং-নোংপোক্কী কাচিন্দা মরুওইবা লালোংগী মফম অমা ওইনা কল্লি। ভারত সরকারগী রিন্যু তৌরবা এক্ত ইস্ত পোলিসীগী মনুংদা, মফম অসিদা লোয়ন-লোয়ননা লৈবাক অসিদা খা নোংপোক এসিয়ন ইকোনোমীশিংগী মরুওইবা গেতৱে অমা ওইনা মথৌ তৌদুনা সেন্তর স্তেজ ওইনা মফম কনগনি।  ঐহাক্না থাজৈ মদুদি লাক্কদৌরিবা চহিশিংদা মিজোরম্না মরুওইবা কালাদান মল্তি মোদাল প্রোজেক্তকী খুত্থাংদা মফম অসিগী চাউখৎ থৌরাংদা মরুওইবা থৌদাং অমা লৌরগনি, হায়রিবা অসিদা মসিনা লোইশিল্লকপদা মিজোরম খক্তগী শেন্মিৎলোন্দা অওনবা পুরকপা নত্তনা অৱাং নোংপোক্কী মফম খুদিংদসু পীরগনি অমসুং শেন্মিৎলোনগী চাউখৎ থৌরাংদা হেন্না খোঙজেল য়াংশিনবদা মতেং পাংলগনি।   

চাউখৎ থৌরাংগী থবকশিংদা অতৈ অতোপ্পা অৱাং-নোংপোক্কী রাজ্যশিংগা চাংদম্নবদা মিজোরম্না থেংনা হৌবা অমা ওইজরবসু, মসিগী মরুওইরবা রাজ্য অসিনা ইনফ্রাস্ত্রকচর প্রোজেক্তশিং কয়া অমগা লোয়ননা সোসিও-ইকোনোমিক্কী ওইবা চাউখৎ থৌরাংদা য়াম্না থুনা চংশিল্লিবা অসি খঙবদা ঐহাক্না হায়নিংঙাই লৈতনা নুঙাইবা ফাওজৈ। মসিগী অহোংবা অসি ঐহাক্না হান্না হায়রম্বা ‘এন.ই.আর. ইন এন.ই.আর.’ মসিনা হায়বদি ‘দ ন্যু এরা ওফ রিসর্জেন্স ইন দ নোর্থ-ইস্তর্ন রিজন’ অসিগী অশেংবা খুদম্নি।      

কোবিদ-১৯গী লায়চৎ অসিনা ঐখোয়গী লৈবাক্কী মপাঙ্গল অমসুং তৌবা ঙম্বশিং চাংয়েং তৌখ্রে। ঐঙোন্দা তমখি মদুদি মিজোরম অসি খ্বায়দগী শাফু পীবা রাজ্যশিংগী মরক্তা অমা ওইগনি হায়না। ঐহাক্না মসি খঙবদা নুঙাইজৈ মদুদি মিজোরম্না কম্ম্যুনিতীশিং, চর্চশিং অমসুং কম্ম্যুনিতীদা য়ুম্ফম ওইবা ওর্গানাইজেসনশিংনা চোকথবা নাইদনা হোৎনবনা লায়চৎ অসিবু মতিক চানা লান্থেংনবা ঙম্লিবনি হায়বা অসিনি। মসিগী অখন্নবা মোদেলদা য়ুম্ফম ওইবা ‘তলাউমঙাইনা’ – গাইদিং প্রিন্সিপল অমা ওইনা মিজোগী ইথিক্স অমসুং পুন্সিগী কোদ অসিনা লায়চৎ অসিবু লান্থেংনবদা মিজোরমগী মন্ত্র অমা ওইরি। ময়াম পু্ন্না হোৎনমিন্নবা অসিনা অশি-অনা নেম্না লৈবা অমসুং হোস্পিতালাইজসনগী চাং নেম্না লৈরি। 

খুমাং চাউশিনবা রাজ্য অমগী খ্বায়দগী চুম্বা খোঙথাং অসি মখোয়গী মীয়ামগী য়াইফনবা অমসুং চাউখৎনবা তৌবনি। সমাজগী সেক্সন পুম্বা চাউখৎপগী কান্নবা য়ৌহনবা অসি সরকারনা হোৎনবা ওইগদবনি। ঐহাক্না রাজ্য সরকারগী মরুওইবা প্রোগ্রাম ওইরিবা, সোসিও-ইকোনোমিক দিবলপমেন্ত প্রোগ্রাম (এস.ই.দি.পি.)গী মরমদা খঙবদা নুঙাইজৈ, হায়রিবা অসিনা ইনক্লুসিব অমসুং পিপল সেন্ত্রিক ওইবা সোসিও ইকোনোমিক্কী ওইবা চাউখৎ থৌরাংগী মরমদা পুরক্নবা হোৎনরি।

মসিদা নুঙাইবা ফাওই মদুদি খ্বায়দগী অরোইবা সস্তেনেবল দিবলপমেন্ত গোল – এস.দি.জি. ইন্দিয়া ইন্দেক্স ২০২১, মিজোরম্না ২০১৯-২০দা ২১শুবা মফম কনবদগী ২০২০-২১ ইন্দেক্সতা ১২শুবা মফম কন্দুনা রেঙ্কিং হেন্না ফগৎখি। রিসোর্স অমসুং এসেতশিং, মসিদা – এগ্রো-ফোরেস্ত্রীদা য়ুম্ফম ওইবা রিসোর্সশিং, মরুওইনা রাজ্য অসিগী মরাং কাইবা রিসোর্স ওইরিবা ৱা, তুরেলগী রিসোর্সশিং, চাং নাইবা অইং অশানা লেঙদবা চাউখৎ থৌরাং মংফাওনবদা মাইকৈ খুদিংদা মতেং ওইরি। তৌবা ঙম্বা মুখ্য মন্ত্রীগী লুচিং মখাদা, ঐহাক্না থাজৈ মদুদি রাজ্য সরকার অসিনা মসিগী এস.দি.জি.শিং অসি ফংবা ঙমগনি।  

মিজোরমগী ফজরবা ত্রেক্ত রেকোর্দনা চাউখৎ থৌরাংগী পান্দম ফংনবা হোৎনবদা কেন্দ্র সরকার অমসুং এজেন্সী কয়া অমগী চাউরবা মতেং অমা ফংনবগী পুক্নিং চিংশিনবা ঙম্লি। হায়রিবা অসি নৌনা লাওথোকখিবা প্রাইম মিনিস্তরস দিবলপমেন্ত ইনিসিএতিব ফোর নোর্থ-ইস্ত (পি.এম.-দিবাইন)স্কীমগী মখাদা হন্দক্কী তহিগী কেন্দ্রগী বজেৎতা প্রোজেক্ত অনিগী লুপা করোর ৬০০ পীথখিবা অসিনা খুমদম্নি। প্রোজেক্তশিং অনি অদুদি - লুপা করোর ৫০০গী নোংচুপ থংবা নাকন্দা আইজোল বাই-পাস (সিহমুইদগীনা মুৱালুংথু ফাওবা) শেমগৎপা অমসুং লুপা করোর ১০০গী রাজ্য অসিদা লৈরিবা দিস্ত্রীক্ত কয়াদা বেম্বু লিঙ্ক রোদ শেমগৎপা অসিনা রাজ্য অসিদা শেন্মিৎলোন ফগৎহল্লগনি অমসুং মীওই কয়াগী পুন্সি মহিং কল্লগনি।       

ঐহাক্না ইকোনোমিক চাউখৎনবগী মরুওইবা হেন্না ফবা পোৎশক অমা ওইনবা, ফিজিকেল ইনফ্রাস্ত্রকচর, মরুওইনা ত্রান্সপোর্ত ইনফ্রাস্ত্রকচরদা য়াম্না হেন্না মরুওইবা ওইনা পীবা পাম্মী। রাজ্য সরকারনা মসিদা মিৎয়েং থম্লি হায়বা ঐহাক্না খঙজৈ অমসুং মখা তানা হোৎননবা ঐহাক্না মখোয়বু পুক্নিং থৌগৎচরি। ঐহাক্না নুঙাইবা ফাওজৈ মদুদি ৱার্ল্দ বেঙ্ক ফন্দগা লোয়ননা শাগৎলিবা অখন্নবা প্রোজেক্তশিং হায়বদি চম্ফাই-জোখাওথার লম্বী, ত্লাবুং-কাউপুইচুৱা অমসুং ছুমখুম-চ্বাংতে লম্বী অমসুং এসিয়ন দিবলপমেন্ত বেঙ্কগী মখাদা সের্ছিপ-বুৱার্পুই লম্বী শেমগৎপা মমাং চহিদা লোইশিনখিবা অসিনি। ঐঙোন্দা তাকপিখি মদুদি আইজোল মনাক্তা লৈবা বাইরাবিদগীনা সিহমুইগী অপাকপা গৌজ লাইন য়াম্না ফজনা থবকশিং চংশিল্লি। মসিনা হেক লোইশিনবগা, মসিনা অনৌবা এবেন্যুগী চাউখৎপা অমা ওইরগনি অমসুং খুমাং চাউশিনবা অমসুং চাউখৎ থৌরাংগী অনৌবা এরা অমা পীরগনি।   

ইনফ্রাস্ত্রকচরগী চাউখৎ থৌরাংগা লোয়ননা, অদোম্না লৌউ শিংউবা অমসুং মসিগা মরী লৈনবা থবকশিং হায়বদি হোর্তিকলচর অমসুং ফ্লোরিকলচরদা পুক্নিং চংবগী চপ চাবা মিৎয়েং থম্লি। মিজোরমদা, লৈবক অসিগী অতৈ মফমশিংগা মান্ননা, লৌউ-শিংউবা অসি মরুওইবা শিনফম অমনি অমসুং মিজোরমদা মরুওইবা কুমহৈ ওইরিবা খরা হায়বদি মিম কুত, চপচার কুত অমসুং পাউল কুত অসি লৌউ শিংউবগা মরী লৈনৈ। লৌউ শিংউবা চাউখৎপা হায়বা অসিনা পুম্নক্কী ওইনা য়াইফবা অমসুং ফুদ সেক্যুরিতী থম্বদা য়াম্না তঙাইফদবা অমনি। লেঙদবা লৌউ শিংউবগী থবকশিং পুখৎকদবনি অমসুং পুক্নিং থৌগৎকদবনি।

মখা তানা, মিজোরম অসি হোর্তিকলচর অমসুং ফ্লোরিকলচর চাওথোকহনবগী ওইথোকপা য়াবা য়াম্না চাউনা লৈরি।  ওর্কিদশিং অমসুং এন্থুরিয়মশিং, খুদম ওইনা, লৌমীশিংদা ইনকম পীবা খক্তা নত্তনা মিজোরম্বু লমকোইবশিংগী অপাম্বা মফম অমা ওইহল্লি। হৌখিবা চয়োলমক্তদা অদোম্না পাংথোকখিবা এন্থুরিয়ম ফেস্তিবেল অমসুং চাপচার কুতকী ত্রেদিস্নেল ফেস্তিবেলনা লমকোইবা কয়াগী পুক্নিং চিংশিনবদা মতেং ওইখি। 

মিজোরম অসি য়োকখৎপা অমসুং ঙাক-শেন্দুনা থম্বগী তঙাইফদবা লৈবা উমংগী পোৎথোক মরাং কাইনা লৈজৈ। ঐখোয়দা নিংথিরবা গ্রহ অমা খুৎশিন্নবিরম্লে অমসুং মসিবু তুংগী মীরোলগীদমক মতিক চাবা রিসোর্স থম্লম্বা হায়বা অসি ঐখোয়গী তৌফদ্রবা ইথৌনি। হায়রিবা অসিদা মহৌশাবু তেক্ত কাইদনা থম্বা, কান্নফম খঙদনা শিজিন্নবা তোকপা অমসুং ইনর্জীগী রিনেৱেবল রিসোর্সশিং মিং ওইনা হায়রবদা হায়দ্রোইলেক্ত্রিসিতী, সোলার, ৱিন্দ অমসুং বাইওমাস অসিবু হেন্না শিজিন্নবগী ৱাখল্লোন অমা চংই।

মিজোরম অসি ৱা অমসুং উগী পোত্থোকশিং, এগ্রো-ইন্দস্ত্রী, হেন্দলুম অমসুং হেন্দিক্রাফ, লোয়ন-লোয়ননা হিদাক লাংথক অমসুং মনম নুংশিবা পাম্বীশিংদা য়ুম্ফম ওইবা শ্মাল স্কেল ইন্দস্ত্রীশিংগী চাউরবা স্কোপ লৈরি। দিজাইন কয়াগী ফজরবা মিজো শোলশিং অমসুং পুৱানশিংদা মিজো নুপীশিংগী হৈ-শিংবা ফিশা-লোনশাগী মমি তারি।  

অদোমগী রাজ্য অসি মতিক চানা মহৌশাগী রিসোর্সশিং মরাং কাইনা ফংলি অমসুং অদোম্না মহৈ-মশিং অমসুং হকশেলগী খুত্থাংদা হ্যুমেন রিসোর্সশিং য়োকখৎলি।

মিজোরম্না রাজ্যশিংগী মরক্তা কেরলা খক্তা নত্তনা লিতরেসী চাংদা অনিশুবা লৈরি হায়বা খঙবদা ঐহাক্না নুঙাইবা ফাওজৈ। মখোয়গী অৱাংবা লিতরেসীগী থাক অমসুং ইংলিস লোলগী হৈ-শিংবা, অসিনা মিজোরমগী নহাশিংনা ময়েক লাবা খুদোংচাবা অমা ফংলি। মসিগী হৈ-শিংলবা হ্যুমেন রিসোর্সকী চাউরবা পুল অসিনা, ঙসিদি, মিজোরমগী চাউখৎপগী লম্বী খোঙচৎ ইরি অমসুং লৈবাক অসিগী ওইনসুনি। 

অদোম্না ঐখোয়গী লৈবাক্কী দেমোক্রেতিক ফেব্রিক অসিবু মপাঙ্গল কলহনলিঙৈ অমসুং তমজনিংঙাই ওইরবা দেমোক্রেসীগী চৎনবীগী খুদম অমা ওইনা ঙালহল্লিঙৈ, অদোম্না খঙবা পামগদবা মফম খরদা অমুক হেন্না ফগৎহনগদবা লৈ হায়না ঐহাক্না খঞ্জৈ। 

নুমিৎ অনিগী মমাংদা, মার্চকী ৮দা, মালেম অসিনা ইন্তর্নেস্নেল ৱুমেন্স দে পাংথোক্নখ্রে। মসি মশক তাক্কদবা থৌরম অমনি মদুদি ঐখোয়গী চাউখৎ থৌরাংগী লালোংদা নুপী মপুং ফানা য়াওহনগদবনি। পুন্সিগী খোঙচৎ কয়াদা মখোয়না শরুক য়াবনা চাউখৎবদা খোঙজেল য়াংবা ঙমগনি অমসুং ঐখোয়গী চাউখৎপগী থৌওংদা হেন্না মপুং ফাগনি। হায়রিবা অসিসু মীপুম খুদিংমক চাউখৎপগী মান্নবা খুদোংচাবা ফংহনবা অমসুং লৈবাক অসিগী চাউখৎপদা থৌদাং লৌনবগী বাইব্রেন্ত দেমোক্রেসী অমগী সেন্ত্রেল প্রিন্সিপলদা থম্লি।   

ইসু অমা ঐহাক্না মরুওইনা পীবা পাম্লিবা অসি ঐখোয়গী লৈবাক্কী লেজিসলেচরদা লৈরিবা নুপীগী মশিং অসিনি। মীয়াম্না উরিবদি নুপীনা মফম অসিগী কলচরেল ইথোস পীদুনা সোসিও-কলচরেল অমসুং পোলিতিকেল মেত্রিক্সতা হেন্না ফবা মফম অমা কল্লি হায়বা অসিনি। অদুবু অৱাং-নোংপোক্কী রাজ্যশিংদা লৈরিবা লেজিসলেতিব এসেমব্লীশিংদা নুপীগী মশিং য়াম্না নেম্না লৈবা ঐহাক্না উবা ফংলি। মিজোরম অমসুং নাগালেনগী এসেমব্লীদা নুপী মেম্বর অমফাওবা লৈতবা মতমদা, মনিপুরদা অনিদগীনা ত্রিপুরা লেজিসলেতিব এসেমব্লীদা মঙা লৈরি। মফম অসিগী  লেজিসলেতিব এসেমব্লী নিপালদা অপুনবা মেম্বর ৪৯৮ লৈবগী মনুংদা নুপীগী মেম্বর ৪% ওইদুনা ২০ খক্তমক ওইরি। মফম অসিদা লো শেম্বদা নুপী মেম্বর হেন্না য়াওবনবগী য়াম্না কনবা কেস লৈরি। পার্লিয়ামেন্ত ফাওবদা নুপীনা ১১% খক্তমক ওইরি।   

ঐহাক্না থম্মোয় শেংনা আসা তৌরি মদুদি লাক্কদৌরিবা চহি খরা অসিদা, মসিগী এসেমব্লী অসিদা নুপী মশিং য়াম্না খল্লগনি।

অদোম্নসু য়েংবা পাম্বিরমগনি করিগুম্বা এসেমব্লী সেসনশিং অসিসু মতিক চাবা মতম পীদুনা হায়রিবা অসিনা ৱা খন্নবা, য়েৎনবা অমসুং কাইনথংদা, ৱারেপ লৌনবগী চপ চাবা মতমগী থৌরাং তৌগদবনি হায়না। ঐখোয়না লেজিসলেচরগী মীফম হেন্না ফমগদবনি অমসুং সেসন খুদিংদা হেন্না ফবা দিবেৎশিং থমগদবনি। অৱাং-নোংপোক রাজ্যশিং য়াওনা লেজিসলেচর হেন্না উনবা অমসুং মতম শাংনা লৌবা তঙাইফদে অমসুং মখোয় মশাবু লো শেম্বদা পুক্নিং চংদুনা এজিক্যুতিবশিংগী মথৌ শোইদনা তৌহনবা অমসুং মীয়ামগী অপাম্বগী ইসুদা খন্নবা ঙমহনগদবনি।  

মতিক চাবা মহৌশাগী রিসোর্স অমসুং অফবা এত্মোসফিয়রগা লোয়ননা, মরী চেৎনা লৈরিবা মিজো সমাজনা লৈবাক অসিদা খ্বায়দগী হেন্না ফবা রাজ্য অমা ওইহনবদা পুক্নিং থৌগৎপা য়াই। ঐঙোন্দা ঙসি তরাম্না ওকপিরিবা অমসুং মচু কয়াগা লোয়ননা ওক্লিবা অসিনা ঐঙোন্দা নুঙাইবা ফাওজৈ। ঐহাক্না ইকাই খুম্নজরিবা রাজ্যপাল, ইকাই খুম্নজরিবা মুখ্য মন্ত্রী, ইকাই খুম্নজরিবা স্পিকর, ইকাই খুম্নজরিবা দিপুতী মুখ্য মন্ত্রী, মন্ত্রীশিং অমসুং এম.এল.এ.শিং অমসুং মিজোরমগী সরকারবু থাগৎপা ফোংদোকচরি। ইকাই খুম্নজরিবা মিজোরমগী রাজ্যপাল কুইনা তিন্নরক্লবা মরুপ-মপাংনি অমসুং মীয়ামগী পুন্সিদা পুন্না থবক তৌবদা লোইনরকখি। মহাক্না মফম অসিদা লৈরিদা মিজোরমদা কোইরকপা অসি ঐহাক্না য়াম্না নুঙাইজৈ।    

ঐহাক্না অমুক হন্না অদোম পুম্নমক, চিং-লেম্লবা হাউস অসিগী ইকাই খুম্নরবা মেম্বরশিং, অমসুং মিজোরমগী মীপুম খুদিংমকপু অদোমগী কৎথোকপা, কন্না হোৎনবা অমসুং অদোমগী নিংথিজরবা রাজ্য অসিবু ঐখোয়গী লৈবাক অসিগী খ্বায়দগী য়াইফরবা অমসুং ইং-চিক্লবা রাজ্য অমা ওইহনবদা চোকথবা লৈতনা অদোম্না হোৎনরিবা অসিদা হরাও তয়াম্বা অমসুং য়াইফ পাউজেল পীজরি।

মফম অসিদা লোয়ন-লোয়ননা লৈবাক পুম্বগী ওইনা ঐখোয়গী মীয়ামগী পুন্সিদা অওনবা অমা পুরক্নবগী অমত্তা ঙাইরবা পান্দম অমগা লোয়ননা অমনা অমগী অঙম্বদা মতেং পীনদুনা, ঐখোয়না তীম ইন্দিয়া অমা ওইনা থবক চৎথরশি। নিং-খা তম্বা ভারত্তা ঐখোয়না চাউখৎ থৌরাংগী চহি ৭৫ পাংথোক্তুনা, অজাদি কা অমৃত মহোৎসবা, ঐখোয়গী জাতিগী চাউরবা দেমোক্রেসীগী চৎনবী মপাঙ্গল কনখৎনবা, ঐখোয়না শোইদনা ৱারেপ লৌগদবনি, মহা সংকল্প অমা লৌগদবনি। ঐখোয়না শোইদনা পাংথোক্কদবনি মদুদি ঐখোয়গী রাজ্য এসেমব্লীশিং অমসুং পার্লিয়ামেন্তনা মতিক চাবা খুলায় অমা ওইহন্দুনা ঐখোয় পুম্বনা মংলান তৌরিবা অনৌবা ইন্দিয়া অমা ওইহনগদবনি। ঐখোয়গী দেমোক্রেসী অসি মালেম অসিদা খ্বায়দগী লিরবা অমসুং খ্বায়দগী চাউরবা দেমোক্রেসীনি। ঐখোয়না মসিবু খ্বায়দগী অফবা অমা ওইহল্লসি।

জয় হিন্দ!”

*****