ওল্দ তুপি অরুনাচল প্রদেশকী তিরাপ দিস্ত্রিক্তা লৈবা নোক্তে ত্রাইবশিংনা খুন্দাবা খুঙ্গঙনি, অমদি মসিদা য়ুমথোঙ ১২০ লৈ‍। খুঙ্গঙ অসি খোন্সা অমসুং লোঙদিং দিস্ত্রিক্ত শম্নহল্লিবা হায়ৱেদা লৈ‍। মমাঙদা খুলদুদা লৈরমবা চৎনবী অমগী মতুং ইন্না নুপীশিং মীয়ামগী ওইবা মীফমদা ৱা ঙাঙবা য়াহল্লমদে‍। স্তেত অসিগী লৈঙাক্না নুপীশিংগী পঞ্চায়তকী সীত রিজর্বেসন পীবগী লো অমা চৎনহনখিবগা লোয়ননা মখোয়না মীখলগীদমক কেম্পেন তৌখি, অদুবু মখোয়না মায় পাক্লবা মতুংদা মখোয়গী মপুরোয়বশিংগী ঙাক্লৌ মতম পুম্নমক্তা মথৌ তাররম্মি‍।

নোর্থ ইস্তর্ন রিজন কম্ম্যুনিতী রিসোর্স মেনেজমেন্ত সোসাইতী (এন.ই.আর.সি.আর.এম.এস.)না খুঙ্গঙদুদা ২০১৪দা চঙশিল্লক্লবা মতুংদা, খুঙ্গঙদুগী নুপীশিংবু এন.এ.আর.এম.জি.গী মীফমদা মখোয়গী ৱাখল্লোনশিং ফোঙদোক্নবা পুক্নিং থৌগৎলম্মি‍। খুঙ্গঙ অদুনা এস.ঐচ.জি. মঙা লিংখৎলম্মি অমদি লুপ্লোয় পুম্নমক মখোয়না খুঙ্গঙদুগী তুংগী মীরোলগীদমক কমদৌনা অফবা ফীভম পুরক্কদগে হায়বদু খন্ননবা ৱাফম থমখি‍।

মমাঙদা, খুঙ্গঙদুগী মীওইগী চাদা ৮০দি য়ু অমসুং কানিদা লায়চুদুনা লৈরম্মি‍। য়ুম খুদিংদা দোমেস্তিক ভাইওলেন্স অমসুং ইমুং মহি লাংবগী মতৌ লৈরম্মি‍। এন.ই.আর.সি.আর.এম.এস.না চঙশিল্লক্লবা মতুংদা মশক থোকপা অহোংবা অমা লাক্লম্মি‍। সেল্ফ-হেল্প গ্রুপ (এস.ঐচ.জি.) শেমগৎলকপগী ৱাফম নুপীশিংনা খঙলক্লম্মি‍। এস.ঐচ.জি. মঙা: মোসোম, রঙ্গো, বিয়াং, খুয়াতে অমসুং কাসিক শেমখি‍। এস.ঐচ.জি.শিংদুনা পুন্না মীফম পাঙথোক্তুনা য়ু অমসুং কানি য়োনবা থিংননবা ফিরেপ লৌখি‍। মদুগী মহৈনা কনাগুম্বা মীওই অমনা করিগুম্বা য়ু অমসুং কানি লৈবা নৎত্রগা য়োনবগী থবক চত্থরম্লবদি লুপা ৫০০০গী য়াম্লবা ৱাকোঙশেল লৌগনি হায়না চৎন-কাঙলোন অমা শেম্লম্মি‍। হৌজিক্তি দোমেস্তিক ভাইওলেন্স অয়ামবনা লোইখ্রে অমদি নুপাশিং মখোয় মখোয়গী থবকশিংদা মায় ওনশিন্নখ্রে‍।

অওনবা অসিদা নুপীশিং অসিবু খুঙ্গঙদুগী ঐহলশিং অমদি লৈঙাক্কী মখাদা থবক তৌবা লাইরিক লাইশু হৈরবা অহলশিংনা মতেং পাংলি‍। হৌরকপদা, থৌওং অদু নুপাশিংনা য়ারমদে, অমদি মরৈ য়েৎনবা অমসুং খৎন-চৈনবা থোক্লম্মি, অদুবু অকনবা ঙাক্লৌ অমসুং অফবা লমজিংনা মখোয়গী তুংদা লেপ্তুনা খুঙ্গঙ শিনবা থুংনা খুন্নাই চাওখৎলোনগী মায়কৈদা মায় ওনশিল্লক্লি‍।

***