নমস্কার!

কেন্দ্রগী মন্ত্রী-মন্দলদা লৈরিবা ঐহাক্কী মরুপ্লোই, এজুকেসন, স্কিল দিভেলপমেন্ত, সাইন্স অমসুং তেক্নোলোজী অমসুং রিসর্চকা মরী লৈনবা স্তেকহোলদর অমসুং মীপুম খুদিংমক!

ঐখোয়গী সরকারনা বজেৎকী মমাং অমসুং মতুংদা স্তেকহোলদরশিংগা ৱারী শাবা, নৈনবগী অনৌবা থৌওং অমা হৌদোকখি। ঙসিগী থৌরম অসি মদুগী শরুক অমনি। মসিগী মনুং চনবা ওইনা, ঐখোয়না এজুকেসন অমসুং স্কিল দিভেলপমেন্তকী মতাংদা বজেত্তা পুথোকখিবা ৱাফমশিংগা মরী লৈননা, অদোম স্তেকহোলদরশিংগা লোয়ননা তোঙান-তোঙানবা হীরম কয়াগী মতাংদা ঐখোয়না কুপ্না নৈনগনি।

মরুপশিং,

ঙসিগী ঐখোয়গী নহারোলগী চারোন শুরোনশিং অসিনা লৈবাক্কী তুংগী মতম লেপকদৌরিবনি, শেমগদৌরিবনি, মখোয় অসিনা লৈবাক্কী তুংগী মতম শেমগদবা মীওইশিংসু ওইরিবনি। মরম অদুনা, তুংগী মতমদা লৈবাকপু শেমগদৌরিবা নহাশিংবু মপাঙ্গল হাপ্পা অসিনা ভারতকী তুংগী মতম্বু মপাঙ্গল লৈহনবনি। ৱাখল্লোন অসিগা লোয়ননা, ইং ২০২২গী বজেত্তা এজুকেসনগা মরী লৈনবা ৱাফম মঙাদা ঐখোয়না অহেনবা মিৎয়েং চঙখি।

অহানবা-

ক্বালিতী এজুকেসনবু য়ুনিভর্সেলাইজ তৌবাঃ ঐখোয়গী মহৈ-মশিং তম্বীবগী পথাপ্পু হেন্না পাকথোক চাউথোকহন্নবা, মগুন হেন্না ফগৎহন্নবা অমসুং মসিগী মতিক হেনগৎহন্নবা মরু ওইবা ৱারেপ কয়া লৌখ্রে। 

অনিশুবা-

স্কিল দিভেলপমেন্তঃ লৈবাক অসিদা দিজিতেল স্কিলিং ইকোসীস্তেম লৈহন্নবা, ইন্দস্ত্রী ৪.০গী ৱা খন্নবা মতমদা ইন্দস্ত্রীগী অপাম্বগী মখা পোন্না স্কিল দিভেলপমেন্ত তৌনবা, ইন্দস্ত্রীগা মরী লৈনরিবশিংবু হেন্না ফগৎহন্নবা ঐখোয়না অহেনবা মিৎয়েং চঙলে। 

য়াম্না মরু ওইবা অহুমশুবা ৱাফম-

অর্বান প্লান্নিং অমসুং দিজাইনঃ মসিগী মতাংদা ভারতনা মতম শাংবদগী লৈরক্লবা লৌশিং অমসুং এক্সপেরিএন্স অসিবু এজুকেসনগী মনুং চলহনবা হায়বসি য়াম্না তঙাই ফদবনি।

মরিশুবা মরু ওইবা ৱাফম –

মালেমগী থাক্তা পুখৎপাঃ  মালেমগী থাক্তা লৈবা মীরমগী য়ুনিভর্সিতীশিং ভারত্তা য়ৌরকপা অমসুং ফিন্তেক্কা মরী লৈনবা ইন্সতিত্যুৎ ফংলিবা গিফৎ সিতীগী ইন্সতিত্যুসনশিংবু পুক্নিং থৌগৎপগী থৌওং য়াওরি।

মঙাশুবা মরু ওইবা ৱাফম –

এ.ভি.জি.সি. হায়বদি এনিমেসন ভিজুএল ইফেক্ত গেমিং কোমিকঃ হায়রিবশিং অসিদা থবক পীবা ঙম্বগী অচৌবা মতিক অমসুং অচৌবা মালেমগী মার্কেত লৈ। কান্নবশিং অসি মপুং ফানা লৌবা ঙম্নবগীদমক্তা, ভারতকী তেলেন্তশিংবু মতৌ করম্না শিজিন্নবা য়াগনি হায়বসিদা ঐখোয়না অহেনবা মিৎয়েং চঙলি। মসিগী বজেৎ অসিনা নেস্নেল এজুকেসন পোলিসীগী পান্দম ফংহনবদা য়াম্না মতেং পাংগনি।

মরুপশিং,

কোরোনানা লৈবাক অসিদা য়ৌরক্ত্রিঙৈ মমাংদগী ঐহাক্না দিজিতেল ফ্যুচরগী মতাংদা ৱাফম থমখ্রে। ঐখোয়গী লৈবাক্কী খুঙ্গংশিংবু ওপ্তিকেল ফাইবরনা শম্নহল্লিঙৈ মতম, দেতাগী মমলদা খ্বাইদগী তানা থম্নবা কন্না হোৎনরিঙৈ মতম, কন্নেক্তিবিতীগা মরী লৈনবা ইনফ্রাস্ত্রকচরশিংবু হেন্না ফগৎহন্নবা হোৎনরিঙৈ মতমদা মীওই খরনা ৱাহং কয়া হংখি। মসিনা করি কান্নগদোইনা হায়না হংখি। অদুবু, লাইচৎ মনুংদা ঐখোয়না হোৎনখিবশিংগী কান্নববু মীওই খুদিংনা উবা ফংখি। লাইচৎ মনুংদা লৈবাক্কী মহৈ-মশিং তম্বীবগী পথাপ্পু লেপ্তনা মখা চত্থহনখিবা অসিদি মসিগী দিজিতেল কন্নেক্তিবিতীননি।

দিজিতেল দিভাইদকী থৌওংনা ভারত্তা মতৌ করম্না খোঙজেল য়াঙনা হন্থরকপগী থৌওং ঐখোয়না উরি। ইন্নোভেসন্না ঐখোয়গী লৈবাক অসিদা হীরম খুদিংবু মনুং চলহনবগী থৌওং ওইথোকহল্লি। মসিদগী মখা তানা চঙশিনবা ওইনা, লৈবাক অসিনা পুন্সিন্নবগী মাইকৈদা খোঙদারি।

হৌজিক্কী দিকেদ অসিদা এজুকেসনগী হীরমদা মতমগা চুন্নবা খুদোংচাবা কয়া ঐখোয়না পুরকপা পাম্লিবশিং অসিগী য়ুম্ফমবু হেন্না মরা চেৎহন্নবগীদমক্তা ঐখোয়না হন্দক্কী চহিগী বজেত্তা হীরম কয়া অমা লাউথোকখ্রে।  দিজিতেল এজুকেসন হায়বসি ভারতনা দিজিতেল ফ্যুচরগী মাইকৈদা য়েংলিবা মঙলান অসিগী শরুক অমনি। মরম অদুনা, ই-বিদ্যা, ৱান ক্লাস ৱান চেনেল, দিজিতেল লেব, দিজিতেল য়ুনিভর্সিতীশিংগুম্বা থৌওং ওইরো, মখোয়শিং অসিনা নহাশিংদা মশক থোক্না তেংবাংগনি। থৌওং অসিদি লৈবাক্কী সোসিও-ইকোনোমিক সেৎ-অপকী মনুং চল্লিবা খুঙ্গং, লাইরবা, দলিৎ, শোত্থরবা অমসুং ত্রাইবেল মীওইশিংদা এজুকেসনগী হেন্না ফবা ৱারোইশিন পীনবা হোৎনবা থৌওং অমনি।

মরুপশিং,

নেস্নেল দিজিতেল য়ুনিভর্সিতী অসিদি ভারতকী এজুকেসনগী পথাপ্তা মশাগী ওইবা তোপ-তোপ্পা অমসুং মরু ওইরবা খোঙথাং অমনি। ঐখোয়গী লৈবাক অসিদা য়ুনিভর্সিতীগী সীতকী মতাংদা লৈরিবা খুদোংচাদবশিংগী ৱারোইশিন পুরকপা ঙমগদবা দিজিতেল য়ুনিভর্সিতীনি অমসুং মসিগী অসিগুম্বা পাঙ্গলবু ঐহাক্না উবা ফংলি। সবজেক্ত খুদিংগী মশিং নাইদবা সীত লৈরকপা মতমদা, এজুকেসনগী হীরমদা কয়া য়াম্না চাউবা অহোংবা অমা লাক্কনি হায়বা অদোমসু অমুক্তা খন্থবীয়ু। মসিগী য়ুনিভর্সিতী অসিনা লর্নিং অমসুং রি-লর্নিংগী খুদোংচাবগা লোয়ননা তুংদা লাক্কদবা তঙাই ফদবা কয়াগীদমক্তা নহাশিংবু শেম-শাবা ঙমগনি। এজুকেসন মন্ত্রালয়, য়ু.জি.সি., এ.আই.সি.তি.ই. অমসুং মরী লীনবা স্তেকহোলদরশিংদা দিজিতেল য়ুনিভর্সিতীগী মরী লৈনবা থবকশিংবু খোঙজেল য়াঙনা পায়খৎনবা ঐহাক্না হায়জনীংই। মসি শোইদনা পাংথোক্তবা য়াদবনি। দিজিতেল য়ুনিভর্সিতী অসিবু হৌবদগী হৌনা ইন্তর্নেস্নেল স্তেন্দর্দকা লোয়ননা মখা তানা চত্থহনবা হায়বসি ঐখোয় খুদিংগী থৌদাং ওইগদবনি।

মরুপশিং,

লৈবাক অসিমক্তদা মালেমগী থাক্কী ইন্সতিত্যুৎ লৈহন্নবা সরকারনা অপাম্বা লৈরিবা অমসুং মসিগীদমক্তা তঙাই ফদবা ফ্রেমৱর্ক শেম্লিবা অসি অদোম মীয়ামগী মাংদা উদুনা লৈরবনি। হৌজিক্তি, অদোমগী হোৎনজমনগা লোয়ননা ঐখোয়গী অপাম্বা অসিবু থবক্তা ওন্থোক্কদবনি। ঙসি অসি মালেমগী ইমালোলগী নুমিৎনি। ইমালোদা মহৈ তম্বগা অঙাংগী মেন্তেল দিভেলপমেন্তকা মরী লৈনৈ। তোঙানবা রাজ্য কয়াদদি, মেদিকেল অমসুং তেক্নিকেল এজুকেসনশিং অসি লোকেলগী লোলশিংদা তাকপীবা হৌরে।

ভারতকী লোকেলগী লোলশিংদা খ্বাইদগী ফবা কন্তেন্তপু দিজিতেল ফোর্মেত্তা শেম্বগী থৌওং অসিবু ঐখোয়না খুমাং চাউশিলহনসি । অসিগুম্বা কন্তেন্তশিং অসি ইন্তর্নেত, মোবাইল ফোন, তি.ভি. অমসুং রেদিগী খুত্থাংদা ফংহনবগী মথৌ য়াম্না তারে অমসুং ঐখোয়না মসিদা থবক তৌগদবনি।

ভারতকী সাইন লেংগ্বেজতসু অসিগুম্বা মরী লৈনবা কন্তেন্ত শেম্বগী থৌওংবুসু অহেনবা মিৎয়েং চঙলি। মসিনা নাম্মা শোইরবা নহাশিংদা তেংবাংগনি। থৌওং অসিদসু ঐখোয়না লেপ্তনা অহোংবা পুরকপগী মথৌ তারি। দিজিতেল তুল্স, দিজিতেল কন্তেন্তপু করম্না ফগৎহন্দুনা মীয়ামদা ফংহনগনি হায়বগী মতাংদা ঐখোয়না ওজশিংবুসু ওনলাইনগী খুত্থাংদা ত্রেনিং পীদুনা হোৎনবদা মিৎয়েং চঙফম থোক্লবনি।

মরুপশিং,

আত্মানির্ভর ভারতকীদমক্তা গ্লোবেল তেলেন্তকী মথৌ তারিবা অসিগী মিৎয়েংদগী য়েংবদা দাইনামিক স্কিলিং অসি য়াম্না মরু ওইবনি । অরিবা জোব রোলশিংসু য়াম্না থুনা অহোংবা লাক্লি, অহোংবা নাইবা থবক্কী থৌদাংশিংগী অপাম্বগী মতুং ইন্না লৈবাক অসিগী ‘দেমোগ্রাফিক দিভিদেন্দ’ শেম-শাবগী মরু ওইবা তঙাই ফদবা লৈরি। মরম অদুনা, একাদমিয়া অমসুং ইন্দস্ত্রীনা পুন্দুনা হোৎনবগী মথৌ তারে। দিজিতেল ইকোসীস্তেম ফোর স্কিলিং এন্দ লাইবলিহুদ (দেশ স্তেক ই-পোর্তেল) অমসুং ই-স্কিলিং লেব হৌদোকপগী ৱাফমসু বজেত্তা লাউথোকখ্রবনি, অমসুং মসিগী পান্দমসু ঐহাক্না পনখ্রিবশিং অসিনি।

মরুপশিং,

ঙসিদি তুরিজম ইন্দস্ত্রী, দ্রোন ইন্দস্ত্রী, এনিমেসন অমসুং কার্তুন ইন্দস্ত্রী, দিফেন্স ইন্দস্ত্রীনচিংবা অসিগুম্বা ইন্দস্ত্রী কয়াদা ঐখোয়না অহেনবা মিৎয়েং চঙলি। সেক্তরশিং অসিগা মরী লৈনবা হৌজিক লৈরিবা ইন্দস্ত্রী অমসুং স্তার্ত-অপশিংগীদমক্তা নীংথিনা ত্রেন তৌরবা মেনপাৱরগী মথৌ য়াম্না তাই। এনিমেসন, ভিজুএল ইফেক্ত, গেমিং অমসুং কোমিক সেক্তরগী চাউখৎ-থৌরাংগীদমক্তা তাস্ক ফোর্স শেম্বনা হীরম অসিদা য়াম্না তেংবাংগনি। মতৌ অসুম্না, অর্বান প্লান্নিং অমসুং দিজাইনগীসু মান্নবা তঙাই ফদবা লৈ অমসুং মসিনা নহাশিংগী খুদোংচাবা অমসু ওইরিবনি। নীংতম্বগী অমৃতকী মতমসিদা ভারতনা মশাগী অরবান লেন্দস্কেপ্পু শেমদোকপগী মাইকৈদা খোঙজেল য়াঙনা চঙশিল্লি। মরম অদুনা, এ.আই.সি.তি.ই.গুম্বা লুপশিংনা হায়রিবশিং অসিগা মরী লৈনবা হীরমশিংদা তাকপী তম্নীবা অমসুং ত্রেনিং পাংথোকপদা লেপ্তনা শেমদোক্নবগীদমক্তা লৈবাক্না থাজবা কয়া থম্লি।

মরুপশিং,

এজুকেসন সেক্তরগী খুত্থাংদা ভারতকী মরোমদোম লেপচবা ঙম্নবা হোৎনরিবা অসিবু করম্বা মপাঙ্গল হাপকনি হায়বসিদা অদোমগী ইনপুৎনা লৈবাক্কী মফমদা য়াম্না কান্নবা পীগনি। ঐখোয়না পুন্না হোৎনমিন্নদুনা বজেত্তা য়াওরিবা ৱারেপশিংবু য়াম্না থুনা ফংবা ঙমগনি হায়বগী ঐহাক্না থাজবা লৈ। ঐখোয়গী প্রাইমরী এজুকেসন অসি খুঙ্গং ফাওবতং লৈ হায়বসি ঐহাক্না মতাং অসিদা পঞ্জনীংই। হীরম অসিগা মরী লৈননা, স্মার্ত ক্লাসরুম, এনিমেসন, লোং-দিস্তেন্স এজুকেসন, ঐখোয়না মঙলিবা ৱান ক্লাসরুম, ৱান চেনেলগী খুত্থাংদা ঐখোয়না খুঙ্গংশিংদা ক্বালিতী লৈবা এজুকেসন ফংহনবা ঙমগনি হায়বসি ঐখোয়না থেংনরকপা এক্সপেরিএন্সশিংদগী খঙবা ঙম্লবনি। বজেত্তা থৌওং অসিগী ৱাফম য়াওরি। মসিবু ঐখোয়না মতৌ করম্না থবক্তা ওন্থোকসিগে?

ঐখোয়না ঙসি বজেৎকী মতাংদা ৱারী শারি, বজেৎ অসি করিনো হায়বসিদি ঐখোয়না ৱারী শাদে, মরমদি বজেত্তি হাননা লানথোকখ্রে। হৌজিক ঐখোয়না খন্নগদবদি, বজেত্তা য়াওরিবশিংবু মতৌ করম্না খোঙজেল য়াঙনা থবক্তা ওন্থোক্কদগে হায়বসিনি। অদোম্না বজেৎ অসিবু নৈনরম্লগনি, অদোম্না ফিল্দদা থবক তৌই, বজেৎ অমসুং অদোমগী থবক, এজুকেসন বিভাগ, স্কিল বিভাগকী মতাংদা অদোম্না খঙই। ঐখোয়না হীরম অহুম অসিবু পুন্সিন্নদুনা মরী লৈনবা মশক থোকপা রোদেমেপ অমা শেম্লবদি অকক্নবা মতমগী মনুংদা থবকশিং অসি পাংথোকপা য়াগনি। অদুগা, ঐখোয়না বজেৎ অসিবু থা অমা ঙনখৎনা পুথোকখি হায়বসু অদোম্না খঙলবনি।

মমাংদদি, বজেৎ অসি ফেব্রুৱারী ২৮দা পুথোকপনি, হন্দক্তি ফেব্রুৱারী ১দা পুথোকখি। করিগীনো? মরমদি, এপ্রিল ১দগী বজেৎ চৎনবা হৌদ্রিঙৈগী মমাংদা অকুপ্পা মরোল খুদিংমক শেম শাদুনা লৈবা য়াহন্নবনি। অদু ওইরবদি, ঐখোয়না এপ্রিল ১দগী বজেৎ অসিগী তসেংবা থবক হৌবা য়ারগনি। ঐখোয়গী মতম মাঙলরোই। বজেৎ অসিদা এজুকেসন সেক্তরগা মরী লৈনদবা হীরম কয়া য়াওই হায়বসু অদোম্না খঙই। সাইনিক স্কুল মশিং য়াম্লবা অমবু ঐখোয়না পব্লিক-প্রাইভেৎ পার্ত্নরশিপ মোদেলগী মখাদা চলায়গনি হায়না হৌজিক লৈবাক্না খল্লে। হৌজিক্তি সাইনিক স্কুলগী করি ওইরগনি, পব্লিক-প্রাইভেৎ পার্ত্নরশিপ মোদেল অসিনা করি ওইগনি, দিফেন্স মন্ত্রালয়না মদুগী বজেৎ পীরগনি, অদুগা মতুংদা লৈরক্কদৌরিবা সাইনিক স্কুলশিংগী ওজাশিংগী অখন্নবা ত্রেনিংনা করম্না পাংথোক্কনি, ঐখোয়গী ওজাশিংবু ত্রেনিং তৌবগী খুদোংচাবা লৈরিবশিংগী মনুং চন্না সাইনিক স্কুলগী ওজাশিংগী অখনবা ত্রেনিং তৌগনি, মসিদা মখোয়গী ফিজিকেলগী ৱাফম হায়বা অমসু য়াওরি, মদু ঐখোয়না করম্না পাংথোক্কনি হায়বা কয়া লৈবাক্না খল্লি।

মতৌ অসুম্না শান্ন-খোৎনবা অমুক খন্নসি। হন্দক্কী ওলিম্পিক্সকী মতুংদা ঐখোয়গী লৈবাক অসিদা শান্ন-খোৎনবগী মতাংদা অনৌবা থৱাই য়াওবগী মতৌ অমা লৈরক্লে। স্কিলগী হীরম্বুদি হান্ননা লৈরে, হৌজিক্তি, শান্ন-খোৎনবগী হীরম অমসু অমুক লৈরক্লে। মসিদা তেক্নিক, তেক্নোলোজীনা শান্ন-খোৎনবগী মালেমদা অচৌবা ফম অমা কল্লক্লে। অদুনা ঐখোয় হৌজিক খল্লিবদি, মসিদা ঐখোয়না করি থৌদাং য়াবা য়াগনি হায়বসিনি।

নলান্দা, তকশিলা, বল্লভীগুম্বা অসুক য়াম্না চাউরবা এজুকেসনগী লুপ কয়া লৈরিবা লৈবাক অসিগী অঙাংশিংনা মীরমদা মহৈ তম্বা করিগীদমক্তা চৎপা তারিবনো হায়না ঐখোয়না খনবরা? মসিবু চুম্বরা হায়না ঐখোয়না খনবরা? ঐখোয়গী লৈবাক্কী অঙাংশিংনা মীরমদা মহৈ তম্বা চৎলি, শেল কয়া অমা তিংলি, ইমুং কয়ানা মসিগীদমক্তা শেল পুরী। ঐখোয়গী লৈবাক অসিদা মালেমগী অফবা য়ুনিভর্সিতীশিং পুরক্তুনা ইশাগী অঙাংশিংবু ইরমদম অসিদা মহৈ তমহন্দুনা শেল কনবা য়াই হায়বসিদা ঐখোয়না করিমত্তা খন্দবরা? প্রী-প্রাইমরীদগী হৌদুনা পোস্ত গ্রেজুএৎ ফাওবা লৈহন্দুনা ২১শুবা চহি-চাগী মপুং ওইবা ব্লুপ্রিন্তপু ঐখোয়গী লৈবাক্কা চান্নহনবা য়াদবরা?

ঐখোয়গী বজেৎ অসিদা য়াওরিবশিং অসি লোইনা ফজরে, অদু ওইরবা ফাওবদা মীওই খরনা পেনবা লৈত্রি। মসিগী মতাংদা মথংগী চহিদা, মথংগী বজেত্তা খন্নরগে। হৌজিক্কী ওইনদি, ঐখোয়গী হৌজিক লৈরিবা বজেৎ অসিবু মতৌ করম্না থবক্তা ওন্থোকসিগে, পরিং চুম্না করম্না মথৌ তৌহনসিগে, খ্বাইদগী কান্নবা মহৈ করম্না ফংহনসিগে হায়বা খন্নসি। অতল তিঙ্করিং লেবকী মতাংদা নৈনসি। মসিবু য়েংশিনবা মীওই তোঙান-তোঙাল্লি, অদুবু মখোয় খুদিংমক এজুকেসন সীস্তেমগা মরীদি লোইনা লৈনৈ। করিগুম্বা ঐখোয়না ইন্নোভেসনগী ৱারী শাগদবা ওইরবদি, অতল তিঙ্করিং লেবপু মতমগা করম্না চুন্নহনসিগে হায়বা খন্নবা য়াই। বজেত অমসুং নেস্নেল এজুকেসন পোলিসী অসিদা য়াওরিবা হীরমশিং অসিদি মসিবু ঐখোয়না মতৌ করম্না নীংথিনা থবক্তা ওন্থোক্তুনা হৌজিক্কী অমৃত মহোৎসবকী মতমসিদা লাক্কদৌরিবা অমৃত কালগী মতমগী মপাঙ্গল লৈবা য়ুম্বী অমা মতৌ করম্না শেমশিগে হায়বা অসিনি।

অদোমা স্তেকহোলদরশিংগা লোয়ননা ঐখোয়না অচৌবা অহোংবা অমা পুরকপা হায়বসি ঐহাক্না পাম্মি। বজেত পুথোক্লবা মতুংদা ব্রেক্কী মতম অমা লৈ, মসিদা এম.পি. খুদিংনা গ্রুপ শেমদুনা বজেৎ অসিবু কুপ্না নৈনৈ হায়বা ঐহাকসু খঙই। মসিদগী কান্নবা ৱাফম কয়া অমসু থোক্লকই। মসিদা ঐখোয়না অহেনবা খোঙ্কাপ অমসু থাংলে। এম.পি.শিংনা খন্নবদি হান্নসু খন্নৈ, হৌজিক্তি ঐখোয়না বিভাগকী মীওইবু স্তেকহোলদর ওইনা হকথেংননা নৈনরে।

‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’ হায়না ঐহাক্না হায়রিবা অসিগা লোয়ননা হন্দক্কী বজেৎ অসিদসু মীওই খুদিংনা হোৎনমিন্নবা হায়বগী ৱাফম অসিবুসু য়াম্না মরু ওই। বজেৎ হায়বসি স্তেতিস্তিক্সকী ৱারোলখক্তমক নত্তে, মসিবু নীংথিনা থবক্তা পাংথোক্লবদি, অকক্নবা রিসোর্স লৈরবা ফাওবদা, মশক থোকপা অহোংবা পুরকপা ঙমগনি। বজেৎ অসিনা করি তৌগনি হায়বসিগী মতাংদা অদোম্না নীংথিনা অমসুং ময়েক শেংনা খঙলবা মতমদতা ঐখোয়গী পান্দম অসি ফংবা ঙমগনি।

ঙসিগী খন্ন-নৈনবা অসিদগী এজুকেসন মন্ত্রালয়, স্কিল মন্ত্রালয়নসু য়াম্না কান্নবা ফংগনি। বজেৎ অসি ফৈ, মসিগী হীরমশিং অসি মনুং চনগদবনি, মসি তৌরবদি লুগনি, মসি তৌরবদি লায়গনি হায়বা ৱাফম কয়া অসি অদোমগী ৱারোলদগী অশেংবা ওইগদৌরিবনি। প্রেক্তিকেল ওইবা ৱারোল কয়া অমা মাঙদা লাক্কনি। অদোম্না ইশাগী অপাম্ববু ফোংনা ফোংদোকপীয়ু। ঐখোয়না মতাং অসিদা ফিলোসোফী নৈনবা নত্তে, থবক করম্না পাংথোকসিগে নৈনবনি। মতাং অসিদা সরকার অমসুং খুন্নাইগী পথাপকী মরক্তা খেন্নবা অমত্তা লৈতে। থৌওংশিং অসিবু মতৌ করম্না নীংথিনা পাংথোকসিগে হায়বসিগীদমক্তা ঐখোয়না ঙসিগী খন্ন-নৈনবা অসি পাংথোক্লিবনি।

ঐহাক্না অদোম খুদিংবু ঙসিগী থৌরম অসিগা মরী লৈনবগীদমক্তা অমুক্কা হন্না থাগৎচরি। নুমিৎ চুপ্পা অমা খন্ন-নৈনরিবা অসিদা কান্নবা মহৈ কয়া ফংগনি অমসুং মসিনা মরম ওইরগা বিভাগশিংনা খোঙজেল য়াঙনা থবক তৌবা হৌবা ঙমগনি। ঐখোয়গী রিসোর্সশিংবু নীংথিনা শিজিন্নদুনা থাজবা মহৈ পুরকপগা লোয়ননা ঐখোয়না মথংগী বজেৎ অমুক শেমগদৌরিবনি। ঐহাক্না খ্বাই পুম্নমকপু য়াইফ মঙ্গোল পীজরি।

মীয়াম্বু অমুক্কা হন্না থাগৎচরি।

***