ਰਾਸ਼ਟਰੀ ਸੁਰੱਖਿਆ ਪਰਿਸ਼ਦ ਸਕੱਤਰੇਤ (ਐੱਨਐੱਸਸੀਐੱਸ), ਭਾਰਤ ਸਰਕਾਰ ਦੁਆਰਾ ਰਾਸ਼ਟਰੀ ਫੋਰੈਂਸਿਕ ਸਾਇੰਸ ਯੂਨੀਵਰਸਿਟੀ, ਗਾਂਧੀਨਗਰ (ਗੁਜਰਾਤ) ਦੇ ਸਕੱਤਰੇਤ ਦੇ ਸਹਿਯੋਗ ਨਾਲ "ਰੱਖਿਆਤਮਕ ਸੰਚਾਲਨ, ਡੀਪ/ਡਾਰਕ ਵੈੱਬ ਹੈਂਡਲਿੰਗ ਅਤੇ ਡਿਜੀਟਲ ਫੋਰੈਂਸਿਕਸ ਨਾਲ ਸਬੰਧਿਤ ਖੇਤਰੀ ਸਾਈਬਰ ਸੁਰੱਖਿਆ ਸਮਰੱਥਾਵਾਂ ਦਾ ਵਿਕਾਸ" ਵਿਸ਼ੇ 'ਤੇ 10-11 ਜਨਵਰੀ, 2022 ਨੂੰ ਦੋ-ਰੋਜ਼ਾ ਪਹਿਲੀ ਕੋਲੰਬੋ ਸੁਰੱਖਿਆ ਕਨਕਲੇਵ ਵਰਚੁਅਲ ਵਰਕਸ਼ਾਪ ਦਾ ਆਯੋਜਨ ਕੀਤਾ ਗਿਆ।

ਕੋਲੰਬੋ ਸਕਿਓਰਿਟੀ ਕਨਕਲੇਵ (ਸੀਐੱਸਸੀ) ਦੇ ਮੈਂਬਰ ਅਤੇ ਨਿਗਰਾਨ ਦੇਸ਼ਾਂ ਦੇ ਪ੍ਰਤੀਨਿਧਾਂ ਨੇ ਵਰਕਸ਼ਾਪ ਵਿੱਚ ਹਿੱਸਾ ਲਿਆ, ਜਿਸ ਵਿੱਚ ਸ੍ਰੀਲੰਕਾ, ਮਾਲਦੀਵ, ਭਾਰਤ, ਮਾਰੀਸ਼ਸ, ਸੇਸ਼ੇਲਸ ਅਤੇ ਬੰਗਲਾਦੇਸ਼ ਸ਼ਾਮਲ ਹਨ।

04 ਅਗਸਤ, 2021 ਨੂੰ ਆਯੋਜਿਤ ਕੋਲੰਬੋ ਸੁਰੱਖਿਆ ਕਨਕਲੇਵ ਦੀ ਪੰਜਵੀਂ ਉਪ-ਐੱਨਐੱਸਏ ਪੱਧਰੀ ਮੀਟਿੰਗ ਵਿੱਚ, ਮੈਂਬਰ ਅਤੇ ਨਿਗਰਾਨ ਦੇਸ਼ਾਂ ਨੇ ਸਮੁੰਦਰੀ ਸੁਰੱਖਿਆ ਅਤੇ ਸੁਰੱਖਿਆ, ਅੱਤਵਾਦ ਅਤੇ ਕੱਟੜਵਾਦ, ਤਸਕਰੀ ਅਤੇ ਸੰਗਠਿਤ ਅਪਰਾਧ ਅਤੇ ਸਾਈਬਰ ਸੁਰੱਖਿਆ ਅਤੇ ਮਹੱਤਵਪੂਰਨ ਬੁਨਿਆਦੀ ਢਾਂਚੇ ਦੀ ਸੁਰੱਖਿਆ ਸਮੇਤ ਸਹਿਯੋਗ ਦੇ ਚਾਰ ਥੰਮ੍ਹਾਂ 'ਤੇ ਸਹਿਮਤੀ ਬਣੀ ਸੀ। ਇਹ ਵਰਕਸ਼ਾਪ ਚੌਥੇ ਥੰਮ੍ਹ ਅਧੀਨ ਪਹਿਲੀ ਗਤੀਵਿਧੀ ਸੀ। ਇਹ ਵਰਕਸ਼ਾਪ ਵਿੱਚ ਡੀਪ ਵੈੱਬ ਅਤੇ ਡਾਰਕ ਨੈੱਟ ਜਾਂਚਾਂ ਅਤੇ ਚੁਣੌਤੀਆਂ; ਡਿਜੀਟਲ ਫੋਰੈਂਸਿਕ; ਸਾਈਬਰ ਖ਼ਤਰਿਆਂ ਨਾਲ ਸਬੰਧਿਤ ਖੁਫੀਆ ਜਾਣਕਾਰੀ; ਅਤੇ ਸਾਈਬਰ ਡੋਮੇਨ ਵਿੱਚ ਰੱਖਿਆਤਮਕ ਕਾਰਵਾਈਆਂ ਜਿਹੇ ਪ੍ਰਮੁੱਖ ਖੇਤਰਾਂ 'ਤੇ ਚਰਚਾ ਕੀਤੀ ਗਈ। ਚਰਚਾ ਇਨ੍ਹਾਂ ਖੇਤਰਾਂ ਵਿੱਚ ਤਕਨੀਕੀ ਤਰੱਕੀ, ਚੁਣੌਤੀਆਂ ਅਤੇ ਖੋਜ ਲਈ ਪਹੁੰਚ 'ਤੇ ਕੇਂਦ੍ਰਿਤ ਸੀ। ਭਾਗੀਦਾਰਾਂ ਨੇ ਸਾਈਬਰ ਸੁਰੱਖਿਆ ਖਤਰਿਆਂ ਨਾਲ ਨਜਿੱਠਣ ਲਈ ਆਪਣੇ ਅਨੁਭਵ ਵੀ ਸਾਂਝੇ ਕੀਤੇ ਅਤੇ ਖਾਸ ਸਾਈਬਰ ਸੁਰੱਖਿਆ ਚੁਣੌਤੀਆਂ ਦੇ ਹੱਲ ਬਾਰੇ ਚਰਚਾ ਕੀਤੀ।

ਭਾਗੀਦਾਰਾਂ ਨੇ ਸਹਿਯੋਗ ਦੇ ਪ੍ਰਮੁੱਖ ਖੇਤਰਾਂ ਦੀ ਪਹਿਚਾਣ ਕਰਨ ਅਤੇ ਕੋਲੰਬੋ ਸੁਰੱਖਿਆ ਕਨਕਲੇਵ ਦੇ ਤਹਿਤ ਸਾਈਬਰ ਸੁਰੱਖਿਆ 'ਤੇ ਅੱਗੇ ਕੰਮ ਕਰਨਾ ਜਾਰੀ ਰੱਖਣ ਲਈ ਸਹਿਮਤ ਹੋਏ।

 **********

ਡੀਐੱਸ