ಹರ್ ಹರ್ ಮಹಾದೇವ್! ಹರ್ ಹರ್ ಮಹಾದೇವ್! ನಮಃ ಪಾರ್ವತಿ ಪತಯೇ!.ಹರ್ ಹರ್ ಮಹಾದೇವ್! ಮಾತಾ ಅನ್ನಪೂರ್ಣ ಕೀ ಜೈ! ಗಂಗಾ ಮಾಯೀ ಕೀ ಜೈ!.ಈ ಚಾರಿತ್ರಿಕ ಕಾರ್ಯಕ್ರಮದಲ್ಲಿ ಹಾಜರಿರುವ ಉತ್ತರ ಪ್ರದೇಶ ರಾಜ್ಯಪಾಲರಾದ ಶ್ರೀಮತಿ ಆನಂದಿ ಬೆನ್ ಪಟೇಲ್ ಜೀ, ಉತ್ತರಪ್ರದೇಶದ ಕರ್ಮಯೋಗೀ ಮುಖ್ಯಮಂತ್ರಿ ಯೋಗೀ ಆದಿತ್ಯನಾಥ ಜೀ, ಭಾರತೀಯ ಜನತಾ ಪಾರ್ಟಿಯ ರಾಷ್ಟ್ರೀಯ ಅಧ್ಯಕ್ಷ ಮತ್ತು ನಮ್ಮೆಲ್ಲರ ಮಾರ್ಗದರ್ಶಕರಾಗಿರುವ ಜೆ.ಪಿ.ನಡ್ಡಾ ಜೀ, ಉಪ ಮುಖ್ಯಮಂತ್ರಿಗಳಾದ ಕೇಶವ ಪ್ರಸಾದ್ ಮೌರ್ಯಾ ಜೀ, ಮತ್ತು ದಿನೇಶ್ ಶರ್ಮಾ ಜೀ, ಸಚಿವ ಸಂಪುಟದಲ್ಲಿ ನನ್ನ ಸಹೋದ್ಯೋಗಿಯಾಗಿರುವ ಮಹೇಂದ್ರ ನಾಥ್ ಪಾಂಡೇ ಜೀ, ಉತ್ತರ ಪ್ರದೇಶ ಭಾರತೀಯ ಜನತಾ ಪಾರ್ಟಿಯ ಅಧ್ಯಕ್ಷ ಸ್ವತಂತ್ರ ದೇವ್ ಸಿಂಗ್ ಜೀ, ಕಾಶಿಯನ್ನು ಪ್ರತಿನಿಧಿಸುತ್ತಿರುವ ಸಚಿವರಾದ ನೀಲಕಂಠ ತೀವಾರಿ ಜೀ, ದೇಶದ ಮೂಲೆ ಮೂಲೆಗಳಿಂದ ಬಂದಿರುವ ಪೂಜ್ಯ ಸಂತರೇ, ಕಾಶಿಯ ನನ್ನ ಪ್ರೀತಿಯ ನಿವಾಸಿಗಳೇ ಮತ್ತು ಈ ಕಾರ್ಯಕ್ರಮವನ್ನು ವಿದೇಶಗಳಿಂದ ವೀಕ್ಷಿಸುತ್ತಿರುವ ಈ ದೇಶದ ನಿಷ್ಟಾವಂತರೇ!. ಕಾಶಿಯ ಎಲ್ಲ ಸಹೋದರರ ಜೊತೆ ನಾನು ಬಾಬಾ ವಿಶ್ವನಾಥ ಮತ್ತು ಮಾ ಅನ್ನಪೂರ್ಣ ದೇವರ ಪದತಲದಲ್ಲಿ ಶಿರಬಾಗಿ ನಮಿಸುತ್ತೇನೆ. ನಾನು ಈಗಷ್ಟೇ ಕಾಶಿಯ ಕಾಳಭೈರವಾ ಜೀ  “ಕೊತ್ವಾಲ”ರನ್ನು ಭೇಟಿಯಾಗಿ ದೇಶವಾಸಿಗಳಿಗಾಗಿ ಅವರ ಆಶೀರ್ವಾದಗಳನ್ನು ಬೇಡಿದೆ. ಕಾಶಿಯಲ್ಲಿ ಹೊಸತೇನಾದರೂ ಆಗುತ್ತಿದ್ದರೆ ಅಥವಾ ಏನಾದರೂ ವಿಶೇಷವಿದ್ದರೆ ಅವರ ಅನುಮತಿಯನ್ನು ಕೋರುವುದು ಅವಶ್ಯ. ನಾನು ಕಾಶಿಯ ಕೊತ್ವಾಲರ ಪಾದಕ್ಕೆ ಶಿರಬಾಗಿ ನಮಿಸುತ್ತೇನೆ. गंगा तरंग रमणीय जटा-कलापम्, गौरी निरंतर विभूषित वाम-भागम्नारायण प्रिय-मनंग-मदाप-हारम्, वाराणसी पुर-पतिम् भज विश्वनाथम्। ನಾನು ಬಾಬಾ ವಿಶ್ವನಾಥರ ಆಲಯದಿಂದ ದೇಶದ ಜನತೆಗೆ ಮತ್ತು ಜಗತ್ತಿನ ವಿವಿಧೆಡೆಗಳಲ್ಲಿ ಅವರವರ ಸ್ಥಳಗಳಿಂದ ಈ “ಮಾಹಾಯಜ್ಞ” ವನ್ನು ವೀಕ್ಷಿಸುತ್ತಿರುವ ಜನರಿಗೆ ನಮಸ್ಕಾರಗಳನ್ನು ಹೇಳುತ್ತೇನೆ. ಈ ಪವಿತ್ರ ಸಂದರ್ಭಕ್ಕಾಗಿ ತಮ್ಮ ಸಹಕಾರವನ್ನು ನೀಡಿದ ಕಾಶಿಯ ಜನತೆಗೂ ನನ್ನ ನಮಸ್ಕಾರಗಳು. ನಾನು ಬಹಳ ಸಂತೋಷ ಅನುಭವಿಸುತ್ತಿದ್ದೇನೆ. ನಿಮ್ಮೆಲ್ಲರಿಗೂ ಬಹಳ ಅಭಿನಂದನೆಗಳು.

ಸ್ನೇಹಿತರೇ,

ಪುರಾಣಗಳ ಪ್ರಕಾರ ಯಾವುದೇ ವ್ಯಕ್ತಿ ಕಾಶಿಯನ್ನು ಪ್ರವೇಶಿಸಿದಾಕ್ಷಣ ಎಲ್ಲಾ ಬಂಧನಗಳಿಂದ ಮುಕ್ತನಾಗುತ್ತಾನೆ. ನಾವಿಲ್ಲಿಗೆ ಬಂದಾಕ್ಷಣವೇ ವಿಶ್ವನಾಥ ದೇವರ ಆಶೀರ್ವಾದದೊಂದಿಗೆ ಅಲೌಕಿಕ ಶಕ್ತಿಯು ನಮ್ಮ ಅಂತರಾತ್ಮವನ್ನು ಜಾಗೃತಗೊಳಿಸುತ್ತದೆ. ಮತ್ತು ಇಂದು ಈ ಅನಂತ ಅಚಲ ಕಾಶಿಯ ಪ್ರಜ್ಞೆಯಲ್ಲಿ ಒಟ್ಟಾರೆಯಾಗಿ ಬೇರೆಯದೇ ಆದ ಕಂಪನಗಳು ಮೂಡಿವೆ.  ಇಂದು ಆದಿ ಕಾಶಿಯ ಅಲೌಕಿಕತೆಯಲ್ಲಿ ಬೇರೆಯದೇ ಆದ ತೇಜಸ್ಸು ಮೂಡಿದೆ!. ಇಂದು ಅಚಲ, ಚಿರಂತನವಾದ  ಬನಾರಸಿಯಲ್ಲಿ ವಿಶಿಷ್ಟ ಶಕ್ತಿಯೊಂದು ಗೋಚರಿಸುತ್ತಿದೆ!.  ಬನಾರಸಿಯಲ್ಲಿ ಪವಿತ್ರ ಸಂದರ್ಭಗಳಲ್ಲಿ ಬಾಬಾ ಎದುರು ದೈವಿಕ ಶಕ್ತಿಗಳು ಹಾಜರಾಗುತ್ತವೆ ಎಂಬುದನ್ನು ನಾವು ಯಾತ್ರಿಕರ ಗ್ರಂಥಗಳಲ್ಲಿ, ಧರ್ಮಗ್ರಂಥಗಳಲ್ಲಿ  ಕೇಳಿದ್ದೇವೆ. ಇಂದು ಬಾಬಾ ಆಸ್ಥಾನಕ್ಕೆ ಹೋದಾಗ ನನಗೂ ಇಂತಹ ಅನುಭವ ಆಗಿದೆ. ನಮ್ಮ ಇಡೀ ಅಂತರಾತ್ಮ, ಪ್ರಜ್ಞೆ ಅದಕ್ಕೆ ಜೋಡಿಸಲ್ಪಟ್ಟಂತಿದೆ. ಬಾಬಾರಿಗೆ ಮಾತ್ರ ಗೊತ್ತು ಅವರ ಮಾಯೆಯ ಶಕ್ತಿ, ಆದರೆ ನಮ್ಮ ದೃಷ್ಟಿಗೆ ಗೋಚರವಾಗುವಂತೆ ಹೇಳುವುದಾದರೆ, ಇಡೀ ವಿಶ್ವವೇ ’ವಿಶ್ವನಾಥ ಧಾಮ”ದ ಈ ಪವಿತ್ರ ಕಾರ್ಯಕ್ರಮದ ಜೊತೆ ಬೆಸೆದಿದೆ.

ಸ್ನೇಹಿತರೇ,

ಇಂದು, ಅಂದರೆ ಸೋಮವಾರ ಭಗವಾನ್ ಶಿವನಿಗೆ ಬಹಳ ಪ್ರೀತಿಯ ದಿನ. ಇಂದು ವಿಕ್ರಮ ಸಂವತ್ಸರ 2078, ಮಾರ್ಗಶಿರ್ಷ ಶುಕ್ಲ ಪಕ್ಷ, ದಶಮಿ ತಿಥಿ,  ಹೊಸ ಚರಿತ್ರೆಯನ್ನು ನಿರ್ಮಾಣ ಮಾಡುತ್ತಿದೆ. ಮತ್ತು ಈ ಸಮಯದ, ಕ್ಷಣಗಳನ್ನು  ಸಾಕ್ಷೀಕರಿಸುವ ಅದೃಷ್ಟ ನಮ್ಮದಾಗಿದೆ. ಇಂದು ವಿಶ್ವನಾಥ ಧಾಮ ಕಲ್ಪಿಸಿಕೊಳ್ಳಲಾರದಂತಹ ಮತ್ತು ಮಿತಿ ಇಲ್ಲದಂತಹ ಶಕ್ತಿಯನ್ನು ತುಂಬಿಕೊಂಡಿದೆ. ಅದರ ಕಾಂತಿ, ಪ್ರಕಾಶ ವಿಸ್ತಾರವಾಗುತ್ತಿದೆ. ಅದರ ಮಹತ್ವ ಆಕಾಶವನ್ನು ತಲುಪುತ್ತಿದೆ. ಇಲ್ಲಿ ವಿನಾಶ ಸ್ಥಿತಿಯಲ್ಲಿದ್ದ, ಕಣ್ಮರೆಯಾಗಿದ್ದ ಹಲವಾರು ಪ್ರಾಚೀನ ದೇವಾಲಯಗಳನ್ನು ಮರು ಸ್ಥಾಪನೆ ಮಾಡಲಾಗಿದೆ. ಬಾಬಾ ಅವರು ಶತಮಾನಗಳಿಂದ ತಮ್ಮ ಭಕ್ತಾದಿಗಳ ಈ ಸೇವೆಯಿಂದ ಸಂತುಷ್ಟರಾಗಿದ್ದಾರೆ ಮತ್ತು ಅದರಿಂದಾಗಿ ಅವರು ನಮಗೆ ಈ ದಿನವನ್ನು ಕರುಣಿಸಿದ್ದಾರೆ. ವಿಶ್ವನಾಥ ಧಾಮದ ಈ ಸಂಕೀರ್ಣ ಬರೇ ಬೃಹತ್, ವೈಭವದ ಕಟ್ಟಡ ಮಾತ್ರವಲ್ಲ, ಅದು ಭಾರತದ ಸನಾತನ ಸಂಸ್ಕೃತಿಯ ಪ್ರತೀಕ!. ಇದು ನಮ್ಮ ಆಧ್ಯಾತ್ಮಿಕ ಪ್ರಜ್ಞೆಯ, ಅಂತರಾತ್ಮದ ಸಂಕೇತ. ಇದು ಭಾರತದ ಪ್ರಾಚೀನತೆ, ಸಂಪ್ರದಾಯಗಳು, ಶಕ್ತಿ, ಮತ್ತು ಕ್ರಿಯಾಶೀಲತೆಯ ಸಂಕೇತ. ನೀವಿಲ್ಲಿಗೆ ಬರುವಾಗ ನೀವು ನಂಬಿಕೆಯೊಂದಿಗೆ ಮಾತ್ರ ಬರುವುದಲ್ಲ, ನಿಮಗೆ ಇಲ್ಲಿ ನಮ್ಮ ಹಿಂದಿನ ವೈಭವದ ಅನುಭವ ಕೂಡಾ ಆಗುತ್ತದೆ. ವಿಶ್ವನಾಥ ಧಾಮ ಸಂಕೀರ್ಣದಲ್ಲಿ ಹೇಗೆ ಪ್ರಾಚೀನತೆ ಮತ್ತು ನವೀನತೆ ಒಗ್ಗೂಡಿ ಜೀವಕಳೆ ಪಡೆದಿವೆ ಎಂಬುದನ್ನು ನಾವು ಕಾಣಬಹುದು. ಪ್ರಾಚೀನ ಪ್ರೇರಣೆಗಳು ಭವಿಷ್ಯಕ್ಕೆ ಹೇಗೆ ದಿಕ್ಕು ತೋರಿಸಬಲ್ಲವು ಎಂಬುದರ ಇಣುಕು ನೋಟವೂ ಇಲ್ಲಿ ಲಭಿಸುತ್ತದೆ.

ಸ್ನೇಹಿತರೇ,

ಉತ್ತರಾಭಿಮುಖವಾಗಿ ಹರಿಯುವ ಗಂಗಾ ಮಾತೆ ಕಾಶಿಗೆ ಬಂದು ಬಾಬಾರ ಪಾದ ತೊಳೆಯುತ್ತಾಳೆ. ಆಕೆ ಕೂಡಾ ಇಂದು ಸಂತುಷ್ಟಳಾಗಿದ್ದಾಳೆ. ಕಾಶಿ ವಿಶ್ವನಾಥ ಭಗವಾನರ ಪಾದಗಳಿಗೆ ಶಿರಬಾಗಿ ನಮಿಸುವಾಗ, ಪ್ರಾರ್ಥಿಸುವಾಗ ಗಂಗಾ ಮಾತೆಯ ತಂಗಾಳಿ ನಮಗೆ ಆಶೀರ್ವಾದಗಳನ್ನು ಕರುಣಿಸುತ್ತದೆ. ಗಂಗಾ ಮಾತೆ ಸಂತುಷ್ಟಳಾಗಿರುವಾಗ ನಮಗೂ ಗಂಗಾ ಮಾತೆಯ ಅಲೌಕಿಕವಾದಂತಹ ಅಲೆಗಳ ದೈವಿಕ ಅನುಭವ  ಬಾಬಾನಲ್ಲಿ ಪ್ರಾರ್ಥನೆ ಸಲ್ಲಿಸುವಾಗ, ಧ್ಯಾನಿಸುವಾಗಲೂ ಲಭಿಸುತ್ತದೆ. ಬಾಬಾ ವಿಶ್ವನಾಥ ಎಲ್ಲರಿಗೂ ಸೇರಿದವರು. ಗಂಗಾ ಮಾತೆ ಕೂಡಾ ಎಲ್ಲರಿಗೂ ಸೇರಿದವರು. ಅವರ ಆಶೀರ್ವಾದ ಎಲ್ಲರಿಗೂ ಲಭಿಸುತ್ತದೆ. ಆದರೆ ಸಮಯದ ನಿರ್ಬಂಧದಿಂದಾಗಿ ಮತ್ತು ಪರಿಸ್ಥಿತಿಗಳಿಂದಾಗಿ ಬಾಬಾ ಮತ್ತು ಗಂಗಾ ಮಾತೆಯ ಸೇವೆಯ ಲಭ್ಯತೆ ಬಹಳ ಕಷ್ಟಸಾಧ್ಯವಾಗಿತ್ತು. ಪ್ರತಿಯೊಬ್ಬರೂ ಇಲ್ಲಿಗೆ ಬರಲಿಚ್ಛಿಸುತ್ತಿದ್ದರು. ಆದರೆ ಇಲ್ಲಿ ಸೂಕ್ತವಾದ ರಸ್ತೆಗಳಿರಲಿಲ್ಲ. ಸಾಕಷ್ಟು ಸ್ಥಳಾವಕಾಶ ಇರಲಿಲ್ಲ. ಇಲ್ಲಿಗೆ ಬರುವುದು ಹಿರಿಯರಿಗೆ ಮತ್ತು ದಿವ್ಯಾಂಗರಿಗೆ ಬಹಳ ಕಷ್ಟದ ಕೆಲಸವಾಗಿತ್ತು. ಆದರೆ ಈಗ ವಿಶ್ವನಾಥ ಧಾಮ ಪೂರ್ಣಗೊಂಡಿರುವುದರಿಂದ ಇಲ್ಲಿಗೆ ತಲುಪುವುದು ಪ್ರತಿಯೊಬ್ಬರಿಗೂ ಸುಲಭವಾಗಿದೆ. ನಮ್ಮ ದಿವ್ಯಾಂಗ ಸಹೋದರರು ಮತ್ತು ಸಹೋದರಿಯರು ಹಾಗು ಹಿರಿಯ ಪೋಷಕರು ಈಗ ದೋಣಿಯಿಂದ ನೇರ ಜೆಟ್ಟಿಗೆ ಬರಬಹುದು. ಘಾಟ್ ಗಳಿಂದ ಜೆಟ್ಟಿಗಳನ್ನು ತಲುಪಲು ಎಸ್ಕಲೇಟರುಗಳನ್ನು ಕೂಡಾ  ಸ್ಥಾಪಿಸಲಾಗಿದೆ. ಅಲ್ಲಿಂದ ಜನರು ನೇರವಾಗಿ ದೇವಾಲಯಕ್ಕೆ ಬರಬಹುದು. ಈ ಮೊದಲು ಕಿರಿದಾದ ರಸ್ತೆಗಳು ಬಹಳ ದೀರ್ಘ ಕಾಲ ಕಾಯುವಂತಹ ಸ್ಥಿತಿಯನ್ನು ನಿರ್ಮಾಣ ಮಾಡಿದ್ದವು. ಇದು ಕಿರಿಕಿರಿಯ ಸಂಗತಿಯಾಗಿತ್ತು. ಈಗ ಬಹಳ ದೀರ್ಘ ಅವಧಿಯ ಕಾಯುವಿಕೆ ಕಡಿಮೆಯಾಗಲಿದೆ. ದೇವಾಲಯ ಸಂಕೀರ್ಣ ಈ ಮೊದಲು ಬರೇ ಬರೇ 3,000 ಚದರ ಅಡಿ ವಿಸ್ತೀರ್ಣವಿತ್ತು, ಈಗ ಅದು ಐದು ಲಕ್ಷ ಚದರ ಅಡಿ ವಿಸ್ತೀರ್ಣವಾಗಿದೆ. ಈಗ 50 ಸಾವಿರದಿಂದ 70 ಸಾವಿರ  ಭಕ್ತಾದಿಗಳು ದೇವಾಲಯ ಮತ್ತು ಅದರ ಸಂಕೀರ್ಣಕ್ಕೆ ಭೇಟಿ ನೀಡಬಹುದು. ಈಗ ಗಂಗಾ ಮಾತೆಯಲ್ಲಿ ಪುಣ್ಯಸ್ನಾನ ಮಾಡಬಹುದು ಮತ್ತು ಅಲ್ಲಿಂದ ನೇರವಾಗಿ ವಿಶ್ವನಾಥ ಧಾಮಕ್ಕೆ ಹೋಗಬಹುದು!. ಹರ್ ಹರ್ ಮಹಾದೇವ್!

ಸ್ನೇಹಿತರೇ,

ನಾನು ನಂಬಿಕೆಯೊಂದಿಗೆ, ವಿಶ್ವಾಸದೊಂದಿಗೆ  ಬನಾರಸ್ಸಿಗೆ ಬಂದೆ. ಬನಾರಸ್ಸಿನ ಜನತೆಯಲ್ಲಿ ನನಗೆ ನನ್ನ ಮೇಲಿರುವುದಕ್ಕಿಂತ ಹೆಚ್ಚು ನಂಬಿಕೆ, ವಿಶ್ವಾಸ  ಇದೆ. ಇಂದಿನ ಸಂದರ್ಭ ತೀರ್ಪು ನೀಡುವಂತಹ  ಸಂದರ್ಭ ಅಲ್ಲ, ಆದರೆ ನಾನು ನೆನಪಿಸಿಕ್ಕೊಳ್ಳುತ್ತೇನೆ, ಕೆಲವು ಜನರು ಬನಾರಸ್ಸಿನ ಜನರಲ್ಲಿ ಸಂಶಯ ತಾಳಿದರು. ಈ ಕಾರಿಡಾರ್ ಹೇಗೆ ಆಗುತ್ತದೆ? ಅದು ಆಗುವುದಿಲ್ಲ!. ಮೋದಿಯಂತಹ ಅನೇಕ ಜನರು ಬಂದಿದ್ದಾರೆ ಮತ್ತು ಹೋಗಿದ್ದಾರೆ. ಇಂತಹ ಊಹೆಗಳನ್ನು ಬನಾರಸ್ಸಿನ ಕುರಿತಂತೆ ಮಾಡಿರುವುದು ನನಗೆ ಆಶ್ಚರ್ಯದ ಸಂಗತಿಯಾಗಿದೆ. ಇಂತಹ ವಾದಗಳನ್ನು ಮುಂದಿಡಲಾಯಿತು. ಬನಾರಸ್ಸಿಗೆ ಇಂತಹ ಜಡತ್ವ ಇರಲಿಲ್ಲ ಮತ್ತು ಅದು ಹಾಗಿರುವುದೂ ಸಾಧ್ಯವಿಲ್ಲ!. ವಿಸ್ತರಿತ ರಾಜಕೀಯ ಮತ್ತು ಅಲ್ಲಿ ಕೆಲವು ಸ್ಥಾಪಿತ ಹಿತಾಸಕ್ತಿಗಳು ಇದ್ದವು. ಆದುದರಿಂದ ಬನಾರಸ್ಸಿನ ಬಗ್ಗೆ ಆಪಾದನೆಗಳನ್ನು ಮಾಡಲಾಯಿತು. ಆದರೆ ಕಾಶಿ ಎಂದರೆ ಕಾಶಿಯೇ!. ಅದು ಹಾಳಾಗುವಂತಹದಲ್ಲ. ಕಾಶಿಯಲ್ಲಿ ಒಂದೇ ಒಂದು ಸರಕಾರವಿದೆ ಮತ್ತು ಅವರ ಕೈಯಲ್ಲಿ ಡಮರು ಇದೆ. ಗಂಗಾ ತನ್ನ ಪ್ರವಾಹವನ್ನು ಬದಲಾಯಿಸಿ ಹರಿಯುವಲ್ಲಿ ಕಾಶಿಯನ್ನು ಯಾರು ನಿಲ್ಲಿಸಲು ಸಾಧ್ಯ?. ಭಗವಾನ್ ಶಂಕರರೇ ಕಾಶಿಖಂಡದಲ್ಲಿ ಹೇಳಿದ್ದಾರೆ-“विना मम प्रसादम् वै, कः काशी प्रति-पद्यते” ಅಂದರೆ ಮಹಾದೇವನ ಕೃಪೆ ಇಲ್ಲದಿದ್ದರೆ ಕಾಶಿಗೆ ಯಾರೂ ಬರುವುದಿಲ್ಲ ಮತ್ತು ಅಲ್ಲಿ ಏನೂ ಆಗುವುದಿಲ್ಲ. ಇಲ್ಲಿ ಏನೇನು ಆಗುತ್ತದೋ ಅದು ಮಹಾದೇವನ ಇಚ್ಛೆಯಂತೆ ಆಗುತ್ತದೆ. ಇಲ್ಲಿ ಏನಾದರೂ ಆಗಿದ್ದರೆ ಅದನ್ನು ಮಹಾದೇವ ಮಾಡಿದ್ದಾರೆ. ಈ ವಿಶ್ವನಾಥ ಧಾಮ ಬಾಬಾ ಅವರ ಆಶೀರ್ವಾದದಿಂದಾಗಿ ತಲೆ ಎತ್ತಿದೆ. ಅವರ ಇಚ್ಛೆ ಇಲ್ಲದಿದ್ದರೆ ಯಾವುದಾದರೂ ಎಲೆ ಚಲಿಸುವುದು ಸಾಧ್ಯವೇ?. ಎಷ್ಟೇ ಪ್ರಭಾವಿ ವ್ಯಕ್ತಿಯಾಗಿದ್ದರೂ ಸಹ, ಅವರು ಇಲ್ಲಿಗೆ ಬರುವುದು ಬಾಬಾ ಆವರು ಇಚ್ಛಿಸಿದರೆ ಮಾತ್ರ ಸಾಧ್ಯ.

ಸ್ನೇಹಿತರೇ,

ಇಲ್ಲಿ ಬಾಬಾ ಅವರ ಹೊರತಾಗಿ ಬೇರೆ ಯಾರದಾದರೂ ಕೊಡುಗೆ ಇದ್ದರೆ ಅದು ಬಾಬಾ ಅವರ ಅನುಯಾಯಿಗಳದ್ದು. ಕಾಶಿಯ ಜನತೆಯೇ ಮಹಾದೇವನ ರೂಪದಲ್ಲಿದ್ದಾರೆ. ಬಾಬಾ ತನ್ನ ಶಕ್ತಿಯನ್ನು ತೋರಿಸಲು ಆಶಿಸಿದಾಗ, ಬಾಬಾ ಕಾಶಿ ಜನರನ್ನು ತಮ್ಮ ಮಾಧ್ಯಮವನ್ನಾಗಿಸುತ್ತಾರೆ. ಆಗ ಕಾಶಿಯು ಕಾರ್ಯಾಚರಿಸಿ ತನ್ನ ಶಕ್ತಿಯನ್ನು ತೋರಿಸುತ್ತದೆ ಮತ್ತು  ಜಗತ್ತು ಅದನ್ನು ನೋಡುತ್ತದೆ. “इदम् शिवाय, इदम् न मम्”

ಸಹೋದರರೇ ಮತ್ತು ಸಹೋದರಿಯರೇ,

ಇಂದು ನಾನು,  ಈ ಬೃಹತ್, ಭವ್ಯವಾದಂತಹ ಸಂಕೀರ್ಣವನ್ನು ನಿರ್ಮಾಣ ಮಾಡಲು ತಮ್ಮ ಬೆವರನ್ನು ಸುರಿಸಿದ ನಮ್ಮ ಕಾರ್ಮಿಕ ಸಹೋದರರು ಮತ್ತು ಸಹೋದರಿಯರಿಗೆ ನನ್ನ ಕೃತಜ್ಞತೆಗಳನ್ನು ಸಲ್ಲಿಸಲು ಇಚ್ಛಿಸುತ್ತೇನೆ. ಕೊರೊನಾದಂತಹ ಪ್ರತಿಕೂಲ ಪರಿಸ್ಥಿತಿಯಲ್ಲಿಯೂ ಅವರು ಇಲ್ಲಿ ಕೆಲಸ ಸ್ಥಗಿತಗೊಳಿಸಲಿಲ್ಲ. ನನಗೆ ಈಗಷ್ಟೇ ಈ ಕಾರ್ಮಿಕ ಸಹೋದ್ಯೋಗಿಗಳನ್ನು ಭೇಟಿಯಾಗುವ ಮತ್ತು ಆಶೀರ್ವಾದಗಳನ್ನು ಪಡೆಯುವ ಅವಕಾಶ ಲಭಿಸಿತು. ನಾನು ಎಲ್ಲಾ ಕರಕುಶಲಕರ್ಮಿಗಳನ್ನು, ಸಿವಿಲ್ ಇಂಜಿನಿಯರಿಂಗ್ ಮತ್ತು ಆಡಳಿತದಲ್ಲಿ ಕೈಜೋಡಿಸಿದ ಜನರನ್ನು ಮತ್ತು ಇಲ್ಲಿ ಮನೆಗಳನ್ನು ಹೊಂದಿದ್ದ ಕುಟುಂಬದವರನ್ನು ಅಭಿನಂದಿಸುತ್ತೇನೆ. ಕಾಶಿ ವಿಶ್ವನಾಥ ಧಾಮ ಯೋಜನೆಯನ್ನು ಪೂರ್ಣಗೊಳಿಸಲು ಹಗಲು ರಾತ್ರಿ ಶ್ರಮಿಸಿದ ಉತ್ತರ ಪ್ರದೇಶದ ಸರಕಾರವನ್ನು, ನಮ್ಮ ಕರ್ಮಯೋಗಿ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ ಜೀ ಮತ್ತು ಅವರ ಇಡೀ ತಂಡವನ್ನು ನಾನು ಅಭಿನಂದಿಸುತ್ತೇನೆ.

ಸ್ನೇಹಿತರೇ,

ನಮ್ಮ ವಾರಾಣಸಿ ಚರಿತ್ರೆ ನಿರ್ಮಾಣ ಆಗುವುದನ್ನೂ ನೋಡಿದೆ,  ಅದೇ ರೀತಿ ನಾಶವಾಗುವುದನ್ನೂ ನೋಡಿದೆ. ಹಲವು ಶಕೆಗಳು ಬಂದಿವೆ ಮತ್ತು ಹೋಗಿವೆ!. ಅಲ್ಲಿ ಅನೇಕ ಸುಲ್ತಾನರು ಅಧಿಕಾರ ನಡೆಸಿದ್ದಾರೆ ಮತ್ತು ಪತನಗೊಂಡಿದ್ದಾರೆ. ಆದರೆ ಬನಾರಸ್ ತನ್ನ ವೈಭವವನ್ನು ಹರಡುತ್ತ ಬೃಹದಾಕಾರಾವಾಗಿ ನಿಂತಿದೆ. ಬಾಬಾನ ಈ ದೈವಿಕ ನೆಲೆ ಶಾಶ್ವತ ಮಾತ್ರವಲ್ಲ ಅದರ ಸೌಂದರ್ಯ ಸದಾ ವಿಸ್ಮಯಕರವಾಗಿದ್ದು ಜಗತ್ತನ್ನು ಆಕರ್ಷಿಸುತ್ತಿದೆ. ನಮ್ಮ ಪುರಾಣಗಳು ಕೂಡಾ ಕಾಶಿಯ ದೈವಿಕ ರೂಪವನ್ನು ವರ್ಣಿಸುತ್ತವೆ. ಇತಿಹಾಸಕಾರರೂ ಮರಗಿಡಗಳು, ಕೊಳಗಳು, ಕೆರೆಗಳನ್ನು ಒಳಗೊಂಡ  ಕಾಶಿಯ ಅದ್ಭುತ ಪ್ರಕೃತಿಯನ್ನು ವರ್ಣಿಸಿದ್ದಾರೆ. ಆದರೆ ಕಾಲ ಒಂದೇ ರೀತಿ ಇರುವುದಿಲ್ಲ. ಆಕ್ರಮಣಕಾರರು ಈ ನಗರದ ಮೇಲೆ ದಾಳಿ ಮಾಡಿದರು. ಇದನ್ನು ನಾಶ ಮಾಡಲು ಪ್ರಯತ್ನಿಸಿದರು!.ಔರಂಗಜೇಬನ ದೌರ್ಜನ್ಯ ಮತ್ತು ಆತನ ಕ್ರೌರ್ಯವನ್ನು ಚರಿತ್ರೆ ನೋಡಿದೆ. ಆತ ಖಡ್ಗದಿಂದ ನಾಗರಿಕತೆಯನ್ನು ಬದಲಾಯಿಸಲು ಪ್ರಯತ್ನಿಸಿದ ಮತ್ತು ಮತಾಂಧತೆಯಿಂದ  ಸಂಸ್ಕೃತಿಯನ್ನು ದಮನಿಸಲು ಪ್ರಯತ್ನಿಸಿದ. ಆದರೆ ಈ ದೇಶದ ಮಣ್ಣು ಜಗತ್ತಿನ ಇತರ ಕಡೆಗಳದಕ್ಕಿಂತ ಭಿನ್ನ. ಓರ್ವ ಔರಂಗಜೇಬ್ ಇಲ್ಲಿಗೆ ಬಂದರೆ, ಓರ್ವ ಶಿವಾಜಿ ಕೂಡಾ ರೂಪುಗೊಳ್ಳುತ್ತಾನೆ!.ಯಾವುದೇ ಸಲಾರ್ ಮಸೂದ್ ಬಂದರೆ ದೊರೆ ಸುಹೇಲ್ ದೇವ್ ಅವರಂತಹ ವೀರರು ಆತನಿಗೆ ನಮ್ಮ ಏಕತೆಯ ರುಚಿ ತೋರಿಸುತ್ತಾರೆ. ಬ್ರಿಟಿಷ್ ಆಡಳಿತದ ಕಾಲದಲ್ಲಿಯೂ ಕಾಶಿಯ ಜನತೆ ವಾರನ್ ಹೇಸ್ಟಿಂಗ್ ಅವರಿಗೆ ಏನಾಗಿದೆ ಎಂಬುದನ್ನು ನೋಡಿದ್ದಾರೆ. ಅವರು ಹೇಗೆ ಪಾರಾದರು ಎಂಬುದನ್ನೂ ನೋಡಿದ್ದಾರೆ.

ಸ್ನೇಹಿತರೇ,

ಕಾಲಚಕ್ರದತ್ತ ಒಮ್ಮೆ ನೋಡಿ!. ಇಂದು ಭಯೋತ್ಪಾದನೆಗೆ ಅನ್ವರ್ಥವಾದವರು ಚರಿತ್ರೆಯ ಕರಾಳ ಪುಟಗಳಿಗೆ ಸೇರಿ ಹೋಗಿದ್ದಾರೆ!.ಮತ್ತು ನನ್ನ ಕಾಶಿ ಮುನ್ನಡೆಯುತ್ತಿದೆ, ಅದರ ವೈಭವಕ್ಕೆ ಇನ್ನಷ್ಟು ಅದ್ದೂರಿಯನ್ನು ಸೇರಿಸುತ್ತ.

ಸ್ನೇಹಿತರೇ,

ಕಾಶಿಯ ಬಗ್ಗೆ ನಾನು ಹೆಚ್ಚು ಮಾತನಾಡಿದಂತೆ, ನಾನು ಹೆಚ್ಚು ಭಾವುಕನಾಗುತ್ತೇನೆ. ಕಾಶಿ ಶಬ್ದಕ್ಕೆ ನಿಲುಕುವ ಸಂಗತಿಯಲ್ಲ; ಅದು ರೋಮಾಂಚಕತೆಯ, ಭಾವುಕತೆಯ, ಸಂವೇದನೆಯ   ನಿರ್ಮಾಣ. ಅಲ್ಲಿ  ಜಾಗೃತಿಯೇ ಬದುಕು; ಕಾಶಿಯಲ್ಲಿ ಸಾವು ಕೂಡಾ ಆನಂದ! ಕಾಶಿಯಲ್ಲಿ ಸತ್ಯವೇ ಸಂಸ್ಕಾರ!. ಕಾಶಿ ಎಂದರೆ ಅದು ಪ್ರೀತಿಯ ಸಂಪ್ರದಾಯ.

ಸಹೋದರರೇ ಮತ್ತು ಸಹೋದರಿಯರೇ,

ಕಾಶಿಯ ಭವ್ಯತೆಯನ್ನು ಶ್ಲಾಘಿಸುವಾಗ ನಮ್ಮ ಧರ್ಮಗ್ರಂಥಗಳು ಹೇಳುತ್ತವೆ ‘नेति-नेति’(ಇದೂ ಅಲ್ಲ, ಅದೂ ಅಲ್ಲ). ಅಂದರೆ ಏನು ಹೇಳಲಾಗಿದೆಯೋ ಅದು ಅಷ್ಟು ಮಾತ್ರ ಅಲ್ಲ; ಅಲ್ಲಿ ಅದಕ್ಕಿಂತ ಹೆಚ್ಚಿನದು ಬಹಳಷ್ಟಿದೆ!. ನಮ್ಮ ಧರ್ಮಗ್ರಂಥಗಳು ಹೇಳಿವೆ-“शिवम् ज्ञानम् इति ब्रयुः, शिव शब्दार्थ चिंतकाः” ಅಂದರೆ ಶಿವನನ್ನು ಆರಾಧಿಸುವವರು ಆತನನ್ನು ಜ್ಞಾನ ಎಂದು ಪರಿಗಣಿಸುತ್ತಾರೆ. ಆದುದರಿಂದ ಈ ಕಾಶಿಯು ಶಿವ ಮತ್ತು ಜ್ಞಾನದ ಸಮ್ಮಿಳನ. ಆದುದರಿಂದ ಜ್ಞಾನ, ಸಂಶೋಧನೆ, ಮತ್ತು ಜ್ಞಾನದ ಹಸಿವು ಕಾಶಿಗೆ ಮತ್ತು ಭಾರತಕ್ಕೆ ಸಹಜವಾದುದು. ಭಗವಾನ್ ಶಿವ ಸ್ವಯಂ ಹೇಳಿದ್ದಾನೆ-“सर्व क्षेत्रेषु भू पृष्ठे, काशी क्षेत्रम् च मे वपु:”. ಅಂದರೆ ಇಡೀ ಭೂಮಿಯಲ್ಲಿ ಕಾಶಿ ನನ್ನ ದೇಹ. ಆದುದರಿಂದ ಇಲ್ಲಿಯ ಪ್ರತಿಯೊಂದು ಕಣವೂ ಶಂಕರ. ಆದುದರಿಂದ ನಾವು ಕಾಶಿಯನ್ನು ಜೀವಂತ ಎಂದು ಪರಿಗಣಿಸುತ್ತೇವೆ ಮತ್ತು ನಮ್ಮ ದೇಶದ ಪ್ರತೀ ಕಣದಲ್ಲಿಯೂ ಮಾತೃತ್ವದ ಭಾವನೆಯು ನಮ್ಮಲ್ಲಿ ಮೂಡುತ್ತದೆ.ನಮ್ಮ ಧರ್ಮಗ್ರಂಥಗಳಲ್ಲಿ ಬರೆಯಲಾಗಿದೆ-“दृश्यते सवर्ग सर्वै:, काश्याम् विश्वेश्वरः तथा” ಅಂದರೆ ಕಾಶಿಯಲ್ಲಿರುವ ಪ್ರತೀ ಜೀವಿಯಲ್ಲಿಯೂ ಭಗವಾನ್ ವಿಶ್ವೇಶ್ವರರ ಚಿಂತನೆ, ದೂರದೃಷ್ಟಿ ಇರುತ್ತದೆ. ಆದುದರಿಂದ ಕಾಶಿಯು ಜೀವಿಗಳನ್ನು ನೇರವಾಗಿ ಶಿವನೊಂದಿಗೆ ಬೆಸೆಯುತ್ತದೆ. ನಮ್ಮ ಋಷಿ ಮುನಿಗಳೂ ಹೇಳಿದ್ದಾರೆ- “विश्वेशं शरणं, यायां, समे बुद्धिं प्रदास्यति” ಅಂದರೆ ಭಗವಾನ್ ವಿಶ್ವೇಶನಿಗೆ ಶರಣಾದರೆ ಬುದ್ಧಿಶಕ್ತಿಯೂ ವರ್ಧಿಸುತ್ತದೆ ಎಂದು. ಜಗದ್ಗುರು ಶಂಕರಾಚಾರ್ಯರು  ಶ್ರೀದೋಮ್ ರಾಜಾ ಅವರ ಸದ್ಗುಣಗಳಿಂದ ಪ್ರೇರಣೆ ಪಡೆದ ನಗರ ಬನಾರಾಸ್ ಮತ್ತು ಅವರು ದೇಶದ ಏಕತೆಯನ್ನು ಪ್ರತಿಪಾದಿಸಿದರು. ಗೋಸ್ವಾಮಿ ತುಲಸೀದಾಸ್ ಜೀ ಅವರು ಭಗವಾನ್ ಶಂಕರರಿಂದ ಪ್ರೇರಣೆ ಪಡೆದು ರಾಮಚರಿತ ಮಾನಸ ರಚಿಸಿದ ಸ್ಥಳ ಇದು.

ಭಗವಾನ್ ಬುದ್ಧರ ಅಸ್ತಿತ್ವವು ಜಗತ್ತಿಗೆ ಗೋಚರವಾದುದು ಸಾರಾನಾಥದಿಂದ. ಸಂತ ಕಬೀರದಾಸರು ಸಮಾಜವನ್ನು ಸುಧಾರಿಸುವುದಕ್ಕಾಗಿ ಇಲ್ಲಿ ಜನಿಸಿದರು. ಸಮಾಜವನ್ನು ಏಕತ್ರಗೊಳಿಸುವ ಅಗತ್ಯ ಇದ್ದಾಗ ಕಾಶಿಯು ಸಂತ ರೈದಾಸ್ ಜೀ ಅವರ ದೈವಿಕ, ಭಕ್ತಿ ಶಕ್ತಿಯ ಕೇಂದ್ರವಾಗುತ್ತದೆ. ಕಾಶಿಯು ನಾಲ್ಕು ಜೈನ ತೀರ್ಥಂಕರರ ಭೂಮಿ, ಅಹಿಂಸೆ ಮತ್ತು ಸಂಯಮದ ಸಾರಬಿಂದು.  ಅನೇಕ ಸಂತರು ಮತ್ತು ಆಚಾರ್ಯರು, ಹರಿಶ್ಚಂದ್ರ ದೊರೆ, ವಲ್ಲಭಾಚಾರ್ಯ, ರಮಾನಂದ ಜೀ, ಚೈತನ್ಯ ಮಹಾಪ್ರಭು, ಸಮರ್ಥಗುರು ರಾಮದಾಸ್, ಸ್ವಾಮಿ ವಿವೇಕಾನಂದ ಮತ್ತು ಮದನ್ ಮೋಹನ್ ಮಾಳವೀಯ ಅವರು ಕಾಶಿಯ ಈ ಪುಣ್ಯ ಭೂಮಿಗೆ ಸಂಬಂಧಿಸಿದವರು. ಛತ್ರಪತಿ ಶಿವಾಜಿ ಮಹಾರಾಜರು ಇಲ್ಲಿಂದ ಪ್ರೇರಣೆ ಪಡೆದಿದ್ದಾರೆ. ಕಾಶಿಯು ರಾಣಿ ಲಕ್ಷ್ಮೀಬಾಯಿ ಮತ್ತು ಚಂದ್ರಶೇಖರ ಆಜಾದ್ ಸೇರಿದಂತೆ ಅನೇಕ ಹೋರಾಟಗಾರರ ಜನ್ಮಭೂಮಿ. ಭರತೇಂದು ಹರಿಶ್ಚಂದ್ರ, ಜೈಶಂಖರ ಪ್ರಸಾದ್, ಮುನ್ಷಿ ಪ್ರೇಮಚಂದ್, ಪಂಡಿತ್ ರವಿಶಂಕರ್ ಮತ್ತು ಭಿಸ್ಮಿಲ್ಲಾ ಖಾನ್ ಅವರಂತಹ ಪ್ರತಿಭೆಗಳ ಭಂಡಾರ. ಕಾಶಿಗೆ ಮಿತಿ ಎಂಬುದಿಲ್ಲ, ಅದರಂತೆ ಕಾಶಿಯ ಕೊಡುಗೆ ಕೂಡಾ ಅಗಣಿತ. ಕಾಶಿಯ ಅಭಿವೃದ್ಧಿ ಈ ಅಗಣಿತ ಪುಣ್ಯಕರ ಆತ್ಮಗಳ ಶಕ್ತಿಯನ್ನು ಒಳಗೊಂಡಿದೆ. ಈ ಅಭಿವೃದ್ಧಿ ಭಾರತದ ಅಗಣಿತ ಸಂಪ್ರದಾಯಗಳ ಪರಂಪರೆಯನ್ನು ಒಳಗೊಂಡಿದೆ. ಆದುದರಿಂದ ಪ್ರತೀ ಪಂಥ, ಭಾಷೆ, ಮತ್ತು ವರ್ಗದ ಜನರು ಇಲ್ಲಿಗೆ ಬರುತ್ತಾರೆ ಮತ್ತು ಇಲ್ಲಿ ಪರಸ್ಪರ ಜೋಡಿಸಲ್ಪಟ್ಟಂತಹ ಭಾವನೆಯನ್ನು ಪಡೆಯುತ್ತಾರೆ.

ಸ್ನೇಹಿತರೇ,

ಕಾಶಿಯು ಭಾರತದ ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ನಗರ ಮಾತ್ರವಲ್ಲ ಅದು ಭಾರತದ ಜೀವಂತ ಆತ್ಮ. ಕಾಶಿಯ ವಿಶ್ವನಾಥ ದೇವಾಲಯ ಪೂರ್ವ ಮತ್ತು ಉತ್ತರವನ್ನು ಬೆಸೆಯುತ್ತದೆ, ಅದನ್ನು ಹಾಳುಗೆಡವಲಾಗಿತ್ತು, ಆದರೆ ಅದನ್ನು ಮಾತಾ ಅಹಿಲ್ಯಾಬಾಯಿ ಹೋಳ್ಕರ್ ಅವರು ಮರು ನಿರ್ಮಾಣ ಮಾಡಿದರು. ಅವರ ಜನ್ಮಸ್ಥಳ ಮಹಾರಾಷ್ಟ್ರ ಆದರೆ ಕರ್ಮಭೂಮಿ ಇಂದೋರ್-ಮಹೇಶ್ವರ ಮತ್ತು ಇತರ ಹಲವು ಪ್ರದೇಶಗಳಾಗಿದ್ದವು. ಇಂದು ನಾನು ಮಾತಾ ಅಹಿಲ್ಯಾ ಬಾಯಿ ಹೋಳ್ಕರ್ ಅವರಿಗೆ ಈ ಸಂದರ್ಭದಲ್ಲಿ ಶಿರಬಾಗುತ್ತೇನೆ. ಅವರು ಸುಮಾರು 200-250 ವರ್ಷಗಳ ಹಿಂದೆ ಕಾಶಿಗೆ ಬಹಳಷ್ಟನ್ನು ಮಾಡಿದ್ದಾರೆ. ಆ ಬಳಿಕ ಈಗ ಕಾಶಿಗೆ ಬಹಳಷ್ಟನ್ನು  ಮಾಡಲಾಗಿದೆ.

ಸ್ನೇಹಿತರೇ,

ಪಂಜಾಬಿನ ಮಹಾರಾಜಾ ರಂಜಿತ್ ಸಿಂಗ್ ಅವರು ಬಾಬಾ ವಿಶ್ವನಾಥ ದೇವಾಲಯದ ಆಕರ್ಷಣೆಯನ್ನು  ಹೆಚ್ಚಿಸಲು 23 ಮಣ ಚಿನ್ನವನ್ನು ನೀಡಿದ್ದಾರೆ. ಪೂಜ್ಯ ಗುರು ನಾನಕ್ ದೇವ್ ಜೀ, ಅವರೂ ಪಂಜಾಬಿನವರು,  ಕಾಶಿಗೆ ಬಂದಿದ್ದರು ಮತ್ತು ಇಲ್ಲಿ ಆಧ್ಯಾತ್ಮಿಕ ಸಭೆಯನ್ನು ಆಯೋಜಿಸಿದ್ದರು. ಇತರ ಸಿಖ್ ಗುರುಗಳು ಕೂಡಾ ಕಾಶಿಯ ಜೊತೆ ವಿಶೇಷ ಸಂಬಂಧ ಹೊಂದಿದ್ದರು. ಪಂಜಾಬಿನ ಜನತೆ ಕಾಶಿಯ ಪುನರ್ನಿರ್ಮಾಣಕ್ಕೆ ಧಾರಾಳವಾಗಿ ದೇಣಿಗೆ ನೀಡಿದ್ದಾರೆ. ಪೂರ್ವದಲ್ಲಿ ಬಂಗಾಳದ ರಾಣಿ ಭವಾನಿ ಬನಾರಸ್ಸಿನ ಅಭಿವೃದ್ಧಿಗೆ ಎಲ್ಲವನ್ನೂ ಧಾರೆ ಎರೆದಿದ್ದಾರೆ. ಮೈಸೂರಿನ ಅರಸರು ಮತ್ತು ಇತರ ದಕ್ಷಿಣ ಭಾರತದ ರಾಜಮನೆತನಗಳು, ಪ್ರಾಂತ್ರ್ಯಗಳು ಬನಾರಸ್ಸಿಗೆ ಬಹಳ ದೊಡ್ಡ ಕೊಡುಗೆಯನ್ನು ನೀಡಿವೆ. ಉತ್ತರ, ದಕ್ಷಿಣ ಮತ್ತು ನೇಪಾಳದ ಛಾಯೆ ಇರುವ ದೇವಾಲಯಗಳು  ಈ ನಗರದಲ್ಲಿರುವುದನ್ನು ನೀವು ಕಾಣಬಹುದು. ವಿಶ್ವನಾಥ ದೇವಾಲಯವು ಈ ಆಧ್ಯಾತ್ಮಿಕ ಪ್ರಜ್ಞೆಯ ಕೇಂದ್ರ ಬಿಂದು. ಮತ್ತು ಈಗ ಈ ವಿಶ್ವನಾಥ ಧಾಮ ಸಂಕೀರ್ಣ ತನ್ನ ವೈಭವದ ರೂಪದಲ್ಲಿ ಈ ಪ್ರಜ್ಞೆಗೆ ಇನ್ನಷ್ಟು ಶಕ್ತಿಯನ್ನು ತುಂಬಲಿದೆ.

ಸ್ನೇಹಿತರೇ,

ಕಾಶಿಯನ್ನು ಕುರಿತ ದಕ್ಷಿಣ ಭಾರತೀಯರ ನಂಬಿಕೆ , ಕಾಶಿಯ ಮೇಲೆ ದಕ್ಷಿಣ ಭಾರತದ ಪ್ರಭಾವ ನಮಗೆಲ್ಲ ತಿಳಿದಿದೆ. ಕನ್ನಡ ಭಾಷೆಯ ಪಠ್ಯವೊಂದರಲ್ಲಿ ಹೀಗೆ ಬರೆಯಲಾಗಿದೆ- तेनो-पयाथेन कदा-चनात्, वाराणसिम पाप-निवारणन। आवादी वाणी बलिनाह, स्वशिष्यन, विलोक्य लीला-वासरे, वलिप्तान, ಅಂದರೆ ಜಗದ್ಗುರು ಮಧ್ವಾಚಾರ್ಯ ಅವರು ತಮ್ಮ ಶಿಷ್ಯರೊಂದಿಗೆ ಸಂಚಾರದಲ್ಲಿದ್ದಾಗ ಅವರು ಕಾಶಿಯ ವಿಶ್ವನಾಥ ಪಾಪಗಳನ್ನು ಕಳೆಯುತ್ತಾನೆ ಎಂದಿದ್ದರು. ಅವರು ಕಾಶಿಯ ಭವ್ಯತೆ ಮತ್ತು ವೈಭವವನ್ನು ತಮ್ಮ ಶಿಷ್ಯರಿಗೆ ವಿವರಿಸಿದ್ದರು.

ಸ್ನೇಹಿತರೇ,

ಶತಮಾನಗಳ ಹಿಂದಿನ ಈ ಭಾವುಕತೆ ಈಗಲೂ ಮುಂದುವರೆದಿದೆ. ಮಹಾಕವಿ ಸುಬ್ರಮಣ್ಯ ಭಾರತಿ ಅವರು ಕಾಶಿಯಲ್ಲಿ ತಂಗಿದ್ದರು, ಇದು ಅವರ ಜೀವನದ ದಿಕ್ಕನ್ನೇ ಬದಲಾಯಿಸಿತು. ಅವರು ತಮಿಳಿನಲ್ಲಿ ಬರೆದಿದ್ದಾರೆ-–"कासी नगर पुलवर पेसुम उरई दान, कान्जिइल के-पदर्कोर, खरुवि सेवोम" ಅಂದರೆ ನಾನು ಕಾಶಿಯ ಸಂತರ ಭಾಷಣಗಳನ್ನು ಮತ್ತು ಕವಿಗಳ ವಾಣಿಯನ್ನು ಕಾಂಚಿಪುರದಲ್ಲಿ ಲಭ್ಯ ಇರುವಂತೆ ಮಾಡುತ್ತೇನೆ. ಕಾಶಿಯಿಂದ ಉದ್ಭವಿಸುವ ಪ್ರತೀ ಸಂದೇಶಗಳೂ ದೇಶದ ದಿಕ್ಕನ್ನು ಬದಲಾಯಿಸುವಷ್ಟು ಸಾರಸಂಗ್ರಹಿತವಾದಂತಹವು. ನಾನು ಇನ್ನೊಂದು ಸಂಗತಿಯನ್ನು ಹೇಳಲು ಇಚ್ಛಿಸುತ್ತೇನೆ. ನನಗೆ ಇದೊಂದು ಹಿಂದಿನ ಅನುಭವ. ಹಲವಾರು ಬನರಾಸೀ ಜನರು, ಘಾಟ್ ಗಳಲ್ಲಿ ವಾಸಿಸುತ್ತಿರುವವರು ಮತ್ತು ದೋಣಿಗಳನ್ನು ನಡೆಸುವವರು ನಿರರ್ಗಳವಾಗಿ ತಮಿಳು, ಕನ್ನಡ, ತೆಲುಗು ಮತ್ತು ಮಲಯಾಳಂ ಮಾತನಾಡುತ್ತಾರೆ, ಇಲ್ಲಿ ನಾವು  ಕೇರಳ, ತಮಿಳುನಾಡು ಅಥವಾ ಕರ್ನಾಟಕದಲ್ಲಿದ್ದಂತೆ ಭಾಸವಾಗುತ್ತದೆ. 

ಸ್ನೇಹಿತರೇ,

ಸಾವಿರಾರು ವರ್ಷಗಳಿಂದ ಭಾರತದ ಶಕ್ತಿಯನ್ನು ಈ ರೀತಿಯಲ್ಲಿ ಸಂರಕ್ಷಿಸಿಡಲಾಗಿದೆ. ವಿವಿಧ ಸ್ಥಳಗಳು, ಪ್ರದೇಶಗಳು ಏಕಸೂತ್ರದಿಂದ ಬಂಧಿಸಲ್ಪಟ್ಟಂತೆ ಗೋಚರಿಸುವಾಗ ಭಾರತವು “ಏಕ ಭಾರತ್, ಶ್ರೇಷ್ಟ ಭಾರತ್” ಪ್ರಜ್ಞೆಯನ್ನು ಉದ್ದೀಪಿಸುತ್ತದೆ. ಅದರಿಂದಾಗಿ ನಮಗೆ “ಸೌರಾಷ್ಟ್ರ ಸೋಮನಾಥ, ಅಯೋಧ್ಯಾ, ಮಥುರಾ, ಮಯಂದ್ ಕಾಶಿ ಕಂಚಿ ಅವಂತಿಕಾ”ಗಳನ್ನು ದಿನ ನಿತ್ಯ ಸ್ಮರಿಸಲು ಕಲಿಸಲಾಗಿದೆ. ಸೋಮನಾಥದಿಂದ ವಿಶ್ವನಾಥನವರೆಗೆ ಬರೇ ಹನ್ನೆರಡು ಜ್ಯೋತಿರ್ಲಿಂಗಗಳನ್ನು ನೆನಪಿಟ್ಟರೆ ಅದರಿಂದ ಇಷ್ಟಾರ್ಥ ಸಿದ್ದಿಯಾಗುತ್ತದೆ. ಅದರಲ್ಲಿ ಯಾವುದೇ ಸಂಶಯ ಬೇಡ. ಇಡೀ ಭಾರತದ ಉತ್ಸಾಹ, ಶಕ್ತಿಗಳು ಇವುಗಳನ್ನು ಸ್ಮರಿಸಿದರೆ ಒಗ್ಗೂಡುತ್ತವೆ. ಮತ್ತು ಅಲ್ಲಿ ಭಾರತದ ಉತ್ಸಾಹ, ಶಕ್ತಿ, ಸ್ಪೂರ್ತಿಗಳು ಇದ್ದಾಗ, ಅಲ್ಲಿ ಸಂಶಯಕ್ಕೆ ಸ್ಥಳ ಎಲ್ಲಿದೆ?

ಸ್ನೇಹಿತರೇ,

ಕಾಶಿಯು ಒಂದು ತಿರುವು ತೆಗೆದುಕೊಂಡಾಗೆಲ್ಲ ಹೊಸತಾದುದೇನನ್ನಾದರೂ ಮಾಡಿರುವುದು, ದೇಶದ ಗತಿ ಬದಲಾಗಿರುವುದು ಕಾಕತಾಳೀಯ ಸಂಗತಿ ಮಾತ್ರವಲ್ಲ. ಕಳೆದ ಏಳು ವರ್ಷಗಳಿಂದ ಕಾಶಿಯಲ್ಲಿ ನಡೆಯುತ್ತಿರುವ ಅಭಿವೃದ್ಧಿಯ ಮಹಾಯಾಗ್ಯ ಹೊಸ ಶಕ್ತಿಯನ್ನು ತಂದಿದೆ.ಕಾಶಿ ವಿಶ್ವನಾಥ ಧಾಮದ ಉದ್ಘಾಟನೆ ಭಾರತಕ್ಕೆ ನಿರ್ಣಾಯಕವಾದಂತಹ ದಿಕ್ಕನ್ನು ತೋರಿಸಲಿದೆ ಮತ್ತು ಭವ್ಯ, ಉಜ್ವಲ ಭವಿತವ್ಯಕ್ಕೆ ಮಾರ್ಗದರ್ಶಿಯಾಗಲಿದೆ. ಈ ಸಂಕೀರ್ಣವು ನಮ್ಮ ಸಾಮರ್ಥ್ಯ ಮತ್ತು ನಮ್ಮ ಕರ್ತವ್ಯಗಳಿಗೆ ಒಂದು ಸಾಕ್ಷಿ. ಏನಾದರೂ ಮಾಡಬೇಕು ಎಂದು ದೃಢ ನಿರ್ಧಾರ ಮಾಡಿದರೆ ಆಗ ಯಾವುದೂ ಅಸಾಧ್ಯವಲ್ಲ. ಪ್ರತೀ ಭಾರತೀಯರ ಕೈಗಳಲ್ಲಿರುವ ಶಕ್ತಿ ಕಲ್ಪನಾತೀತವಾದುದನ್ನು ಸಾಧಿಸುತ್ತದೆ. ನಮ್ಮ ದೇಶಕ್ಕಾಗಿ  ಹೇಗೆ  ವೆಚ್ಚ ಮಾಡಬೇಕು ಎಂಬುದು ನಮಗೆ ತಿಳಿದಿದೆ. ಸವಾಲು ಎಷ್ಟೇ ದೊಡ್ಡದಿರಲಿ, ನಾವು ಭಾರತೀಯರು ಒಗ್ಗಟ್ಟಾಗಿ ಅದನ್ನು ಸೋಲಿಸಬಲ್ಲೆವು. ಹಾನಿ ಮಾಡುವವರ ಶಕ್ತಿ ಎಂದಿಗೂ ಭಾರತದ ಶಕ್ತಿಗಿಂತ ಮತ್ತು ಭಾರತದ ಭಕ್ತಿಗಿಂತ ಹೆಚ್ಚಿನದಾಗಿರದು. ನೆನಪಿಡಿ, ನಾವು ನಮ್ಮನ್ನು ಹೇಗೆ ನೋಡುತ್ತೇವೆಯೋ ಜಗತ್ತೂ ನಮ್ಮನ್ನು ಹಾಗೆಯೇ ನೋಡುತ್ತದೆ. ಇಂದಿನ ಭಾರತ ಶತಮಾನಗಳ ದಾಸ್ಯದ ಪರಿಣಾಮವಾದ ಕೀಳರಿಮೆಯಿಂದ ಹೊರಬರುತ್ತಿದೆ. ಇಂದಿನ ಭಾರತ ಸೋಮನಾಥ ದೇವಾಲಯದ ಸೌಂದರೀಕರಣ ಮಾತ್ರ ಮಾಡುವುದಲ್ಲ, ಅದು ಸಾಗರದಲ್ಲಿ ಸಾವಿರಾರು ಕಿಲೋ ಮೀಟರ್ ಆಪ್ಟಿಕಲ್ ಫೈಬರ್ ಹಾಕುತ್ತದೆ. ಇಂದಿನ ಭಾರತ ಬಾಬಾ ಕೇದಾರನಾಥ ದೇವಾಲಯವನ್ನು ಜೀರ್ಣೋದ್ಧಾರ ಮಾತ್ರ ಮಾಡುವುದಲ್ಲ ಅದು ತನ್ನ ಶಕ್ತಿಯ ಮೇಲೆ ಭಾರತೀಯರನ್ನು ಬಾಹ್ಯಾಕಾಶಕ್ಕೆ ಕಳುಹಿಸಲು ಸಿದ್ಧತೆಗಳನ್ನು ಮಾಡುತ್ತಿದೆ. ಇಂದಿನ ಭಾರತ ಅಯೋಧ್ಯೆಯಲ್ಲಿ ಭಗವಾನ್ ರಾಮನಿಗೆ ದೇವಾಲಯವನ್ನು ಮಾತ್ರ ನಿರ್ಮಿಸುತ್ತಿರುವುದಲ್ಲ, ಅದು ದೇಶದ ಪ್ರತೀ ಜಿಲ್ಲೆಯಲ್ಲಿಯೂ ವೈದ್ಯಕೀಯ ಕಾಲೇಜುಗಳನ್ನು ತೆರೆಯುತ್ತಿದೆ. ಇಂದಿನ ಭಾರತ ಬಾಬಾ ವಿಶ್ವನಾಥ ಧಾಮಕ್ಕೆ ಭವ್ಯತೆಯ ಮೆರುಗು ನೀಡುತ್ತಿರುವುದು ಮಾತ್ರವಲ್ಲ ಅದು ಕೋಟ್ಯಾಂತರ ಪಕ್ಕಾ ಮನೆಗಳನ್ನೂ ಬಡವರಿಗಾಗಿ ನಿರ್ಮಾಣ ಮಾಡುತ್ತಿದೆ.

ಸ್ನೇಹಿತರೇ,

ನವಭಾರತವು ತನ್ನ ಸಂಸ್ಕೃತಿಯ ಬಗ್ಗೆ ಹೆಮ್ಮೆ ಹೊಂದಿದೆ ಮತ್ತು ಅಷ್ಟೇ ಪ್ರಮಾಣದಲ್ಲಿ ತನ್ನ ಸಾಮರ್ಥ್ಯದಲ್ಲಿ ವಿಶ್ವಾಸ, ಭರವಸೆಯನ್ನು ಹೊಂದಿದೆ. ನವಭಾರತ ಪರಂಪರೆಯ ಜೊತೆ ಅಭಿವೃದ್ಧಿಯನ್ನೂ ಸಮ್ಮಿಳಿತಗೊಳಿಸಿಕೊಂಡಿದೆ. ರಾಮ-ಜಾನಕಿ ರಸ್ತೆಯನ್ನು ಅಯೋಧ್ಯೆಯಿಂದ ಜನಕಪುರಕ್ಕೆ ಸುಲಭದಲ್ಲಿ ಪ್ರಯಾಣಿಸಲು ಅನುಕೂಲವಾಗುವಂತೆ ನಿರ್ಮಾಣ ಮಾಡಲಾಗುತ್ತಿದೆ. ಇಂದು  ಭಗವಾನ್ ರಾಮನಿಗೆ ಸಂಬಂಧಿಸಿದ ಸ್ಥಳಗಳು ರಾಮಾಯಣ ಸರ್ಕ್ಯೂಟ್ ನಲ್ಲಿ ಜೋಡಿಸಲ್ಪಡುತ್ತಿವೆ. ಮತ್ತು ರಾಮಾಯಣ ರೈಲನ್ನೂ ಓಡಿಸಲಾಗುತ್ತಿದೆ. ಬುದ್ಧ ಸರ್ಕ್ಯೂಟ್ ಕಾಮಗಾರಿ ನಡೆಯುತ್ತಿದೆ ಮತ್ತು ಕುಶಿನಗರದಲ್ಲಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ನಿರ್ಮಾಣ ಮಾಡಲಾಗಿದೆ. ಕರ್ತಾರ್ಪುರ ಸಾಹೀಬ್ ಕಾರಿಡಾರ್ ನಿರ್ಮಾಣ ಮಾಡಲಾಗಿದೆ ಮತ್ತು ಹೇಮಕುಂಡ ಸಾಹೀಬ್ ಗೆ ಭೇಟಿ ನೀಡುವುದನ್ನು ಸುಲಭ ಮಾಡಲು ರೋಪ್ ವೇ ನಿರ್ಮಾಣಕ್ಕೆ ಸಿದ್ಧತೆಗಳನ್ನು ಮಾಡಲಾಗುತ್ತಿದೆ. ಉತ್ತರಾಖಂಡದಲ್ಲಿ ಚಾರ್ ಧಾಮ್ ರಸ್ತೆ ಯೋಜನೆಯ ಕಾರ್ಯ ತ್ವರಿತಗತಿಯಿಂದ ಸಾಗುತ್ತಿದೆ. ಭಗವಾನ್ ವಿಟ್ಟಲನ ಕೋಟ್ಯಾಂತರ ಭಕ್ತರ ಆಶೀರ್ವಾದದೊಂದಿಗೆ ಶ್ರೀ ಸಂತ ಧ್ಯಾನೇಶ್ವರ ಮಹಾರಾಜ್ ಪಾಲ್ಕಿ ಮಾರ್ಗ ಮತ್ತು ಸಂತ ತುಕಾರಾಂ ಮಹಾರಾಜ್ ಪಾಲ್ಕಿ ಮಾರ್ಗಗಳ ಕೆಲಸ ಕೆಲವು ವಾರಗಳ ಹಿಂದೆ ಆರಂಭಗೊಂಡಿದೆ.

ಸ್ನೇಹಿತರೇ,

ಕೇರಳದಲ್ಲಿರುವ ಗುರುವಾಯೂರು ದೇವಾಲಯವಿರಲಿ ಅಥವಾ ತಮಿಳುನಾಡಿನ ಕಾಂಚಿಪುರಂ-ವೆಲಂಕಣಿ ಇರಲಿ, ತೆಲಂಗಾಣದ ಜೋಗುಲಾಂಬಾ ದೇವಿ ದೇವಾಲಯ ಇರಲಿ, ಅಥವಾ ಬಂಗಾಳದ ಬೇಲೂರು ಮಠ ಇರಲಿ, ಗುಜರಾತಿನ ದ್ವಾರಕಾ ಜೀ, ಅರುಣಾಚಲ ಪ್ರದೇಶದ ಪರಶುರಾಮ ಕುಂಡ ಇರಲಿ ದೇಶದ ವಿವಿಧ ರಾಜ್ಯಗಳಲ್ಲಿ ಇರುವ ಇಂತಹ ಹಲವು ನಂಬಿಕೆಯ ಮತ್ತು ಸಂಸ್ಕೃತಿಯ ಪವಿತ್ರ ಸ್ಥಳಗಳಲ್ಲಿ ಕಾಮಗಾರಿಗಳು ಒಂದೋ ಪೂರ್ಣಗೊಂದಿವೆ ಇಲ್ಲವೇ ಪ್ರಗತಿಯಲ್ಲಿವೆ. ಅಲ್ಲಿ ಸಂಪೂರ್ಣ ಭಕ್ತಿ ಭಾವದಿಂದ ಕಾಮಗಾರಿಗಳು ನಡೆಯುತ್ತಿವೆ.

ಸಹೋದರರೇ ಮತ್ತು ಸಹೋದರಿಯರೇ,

ಇಂದು ಭಾರತವು ತನ್ನ ಕಳೆದು ಹೋದ, ಗತಿಸಿದ ಪರಂಪರೆಯನ್ನು ಪುನರುತ್ಥಾನ ಮಾಡುತ್ತಿದೆ. ಕಾಶಿಯಲ್ಲಿ ಮಾತಾ ಅನ್ನಪೂರ್ಣ ತಾನೇ ವಾಸವಾಗಿದ್ದಾಳೆ. ಕಾಶಿಯಿಂದ ಕಳವು ಮಾಡಲಾಗಿದ್ದ ಅನ್ನಪೂರ್ಣ ಮಾತೆಯ ವಿಗ್ರಹ ಈಗ ನೂರು ವರ್ಷಗಳ ಕಾಯುವಿಕೆಯ ಬಳಿಕ ಮರುಸ್ಥಾಪನೆಯಾಗಿರುವುದು ನನಗೆ ಬಹಳ ಸಂತೋಷ ತಂದಿದೆ. ಅನ್ನಪೂರ್ಣ ಮಾತೆಯ ಕೃಪೆಯಿಂದ ಕೊರೊನಾದ ಕಠಿಣ ಪರಿಸ್ಥಿತಿಯಲ್ಲಿ ದೇಶವು ತನ್ನ ದವಸ ಧಾನ್ಯಗಳ ಉಗ್ರಾಣವನ್ನು ತೆರೆದು, ಬಡವರು ಹಸಿವೆಯಿಂದ ಮಲಗಬಾರದು ಎಂಬುದನ್ನು ಖಾತ್ರಿಪಡಿಸುವುದಕ್ಕಾಗಿ ಉಚಿತ ಪಡಿತರವನ್ನು ವ್ಯವಸ್ಥೆ ಮಾಡಿತು.

ಸ್ನೇಹಿತರೇ,

ನಾವು ದೇವಾಲಯಗಳಿಗೆ ಭೇಟಿ ಕೊಟ್ಟಾಗೆಲ್ಲ, ನಾವು ದೇವರಲ್ಲಿ ಏನನ್ನಾದರೂ ಬೇಡುತ್ತೇವೆ. ಮತ್ತು ಕೆಲವು ನಿರ್ಧಾರಗಳೊಂದಿಗೆ ಹಿಂತಿರುಗಿ ಹೋಗುತ್ತೇವೆ. ನನಗೆ, ಸಾರ್ವಜನಿಕರೇ ದೇವರು. ನನಗೆ ಪ್ರತೀ ಭಾರತೀಯರೂ ಭಗವಂತನ ಭಾಗ. ಜನರು ದೇವರ ಬಳಿಗೆ ಹೋಗುವಂತೆ ಮತ್ತು ಏನನ್ನಾದರೂ ಬೇಡುವಂತೆ, ನಾನು ನಿಮ್ಮನ್ನು ದೇವರಂತೆ ಪರಿಗಣಿಸುತ್ತೇನೆ. ಮತ್ತು ಅದರಿಂದಾಗಿ ನಾನು ನಿಮ್ಮಿಂದ ಏನನ್ನೋ ಕೇಳಲು ಇಚ್ಛಿಸಿದ್ದೇನೆ. ನಾನು ನಿಮ್ಮಿಂದ ಮೂರು ನಿರ್ಧಾರಗಳನ್ನು ನಿರೀಕ್ಷಿಸುತ್ತೇನೆ. ಅವು ನನಗಾಗಿ ಅಲ್ಲ, ಆದರೆ ನಮ್ಮ ದೇಶಕ್ಕಾಗಿ.ನಾನಿದನ್ನು ಬಾಬಾ ಅವರ ಪವಿತ್ರ ಭೂಮಿಯಿಂದ ಕೋರಿಕೊಳ್ಳುತ್ತಿದ್ದೇನೆ. –ಮೊದಲು ಸ್ವಚ್ಛತೆ, ಎರಡನೆಯದ್ದು ಸೃಜನ್ ಮತ್ತು ಮೂರನೇ ನಿರ್ಧಾರ ಆತ್ಮನಿರ್ಭರ ಭಾರತಕ್ಕಾಗಿ ನಿರಂತರ ಪ್ರಯತ್ನಗಳು. ಸ್ವಚ್ಛತೆ ಜೀವನ ವಿಧಾನ,  ಸ್ವಚ್ಛತೆ ಒಂದು ಶಿಸ್ತು. ಅದು ತನ್ನೊಂದಿಗೆ ಬಹಳಷ್ಟು ಕರ್ತವ್ಯಗಳನ್ನೂ ತರುತ್ತದೆ. ಭಾರತ ಎಷ್ಟು ಅಭಿವೃದ್ಧಿಗೊಂಡರೂ ಭಾರತ ಸ್ವಚ್ಛವಾಗಿರದಿದ್ದರೆ ನಮಗೆ ಮುನ್ನಡೆ ಸಾಧಿಸಲು ಕಷ್ಟವಾಗಬಹುದು. ನಾವು ಈ ದಿಕ್ಕಿನಲ್ಲಿ ಬಹಳಷ್ಟನ್ನು ಮಾಡಿದ್ದೇವೆ. ಆದರೂ ನಾವು ನಮ್ಮ ಪ್ರಯತ್ನಗಳನ್ನು ಹೆಚ್ಚಿಸಬೇಕು. ಕರ್ತವ್ಯದಿಂದ ಕೂಡಿದ ನಿಮ್ಮ ಸಣ್ಣ ಪ್ರಯತ್ನ ಕೂಡಾ ದೇಶಕ್ಕೆ ಬಹಳಷ್ಟು ದೊಡ್ಡ ಸಹಾಯ ಮಾಡಬಹುದು. ಇಲ್ಲಿ ಬನಾರಾಸ್ ಕೂಡಾ, ನಾವು ನಗರದಲ್ಲಿ ಮತ್ತು ಘಾಟ್ ಗಳಲ್ಲಿ ಸ್ವಚ್ಛತೆಯನ್ನು  ಹೊಸ ಎತ್ತರಕ್ಕೆ ಕೊಂಡೊಯ್ಯಬೇಕು. ಉತ್ತರಾಖಂಡದಿಂದ ಬಂಗಾಳದವರೆಗೆ ಗಂಗಾಜೀ ಯನ್ನು ಸ್ವಚ್ಛಗೊಳಿಸಲು ಹಲವು ಪ್ರಯತ್ನಗಳು ನಡೆಯುತ್ತಿವೆ. ನಮಾಮಿ ಗಂಗೆ ಆಂದೋಲನದ ಯಶಸ್ಸಿಗೆ ನಾವು ಪ್ರಜ್ಞಾಪೂರ್ವಕವಾಗಿ ಕೆಲಸ ಮಾಡುತ್ತಿರಬೇಕು.

ಸ್ನೇಹಿತರೇ,

ಬಹಳ ದೀರ್ಘ ಕಾಲದ ಗುಲಾಮಗಿರಿಯು  ಭಾರತೀಯರ ವಿಶ್ವಾಸವನ್ನು ದ್ವಂಸಗೊಳಿಸಿದೆ. ನಾವು ನಮ್ಮ ಸೃಜನಶೀಲತೆಯಲ್ಲಿಯೇ ವಿಶ್ವಾಸ, ನಂಬಿಕೆ ಕಳೆದುಕೊಂಡಿದ್ದೇವೆ. ಇಂದು ಈ ಸಾವಿರ ವರ್ಷ ಹಳೆಯ ಕಾಶಿಯಿಂದ, ನಾನು ಪ್ರತಿಯೊಬ್ಬ ದೇಶವಾಸಿಗೂ ಕರೆಯನ್ನು ನೀಡುತ್ತಿದ್ದೇನೆ-ಪೂರ್ಣ ವಿಶ್ವಾಸದಿಂದ ನಿರ್ಮಾಣ ಮಾಡಿ ಮತ್ತು ಅನ್ವೇಷಣೆ ನಡೆಸಿ ಎಂದು. ಭಾರತದ ಯುವಜನತೆ ಕೊರೊನಾದ ಈ ಸಂಕಷ್ಟದ ಕಾಲಘಟ್ಟದಲ್ಲಿ ನೂರಾರು ನವೋದ್ಯಮಗಳನ್ನು ನಿರ್ಮಾಣ ಮಾಡಿದಾಗ, ಹಲವಾರು ಸವಾಲುಗಳ ನಡುವೆ 40 ಯೂನಿಕಾರ್ನ್ ಗಳನ್ನು ರೂಪಿಸಿದಾಗ ಅದು ಅವರು ಏನನ್ನಾದರೂ ಮಾಡಬಲ್ಲರು ಎಂಬುದನ್ನು ತೋರಿಸುತ್ತದೆ.  ಒಂದು ಯೂನಿಕಾರ್ನ್ ಅಂದರೆ ಸುಮಾರು 7,000 ಕೋ.ರೂ.ಗಳಿಗೂ ಅಧಿಕ ಮೊತ್ತದ ಒಂದು ಸ್ಟಾರ್ಟ್ ಅಪ್, ಮತ್ತು ಈ ಎಲ್ಲಾ ಯೂನಿಕಾರ್ನ್ ಗಳನ್ನು ಕಳೆದ ಒಂದೂವರೆ ವರ್ಷಗಳಲ್ಲಿ ನಿರ್ಮಾಣ ಮಾಡಲಾಗಿದೆ. ಇದು ಅಭೂತಪೂರ್ವ. ಪ್ರತಿಯೊಬ್ಬ ಭಾರತೀಯರೂ, ಅವರು ಯಾವುದೇ ಕ್ಷೇತ್ರದಲ್ಲಿರಲಿ, ದೇಶಕ್ಕಾಗಿ ಹೊಸತೇನನ್ನಾದರೂ ಮಾಡಲು ಪ್ರಯತ್ನಿಸಬೇಕು, ಆಗ ಮಾತ್ರ ಹೊಸ ದಾರಿಗಳು ಗೋಚರಿಸುತ್ತವೆ ಮತ್ತು ಪ್ರತಿಯೊಂದು ಗುರಿಯನ್ನೂ ಸಾಧಿಸಬಹುದಾಗಿರುತ್ತದೆ.

ಸಹೋದರರೇ ಮತ್ತು ಸಹೋದರಿಯರೇ,

ಇಂದು ನಾವು ಕೈಗೊಳ್ಳಬೇಕಾದ ಮೂರನೆಯ ನಿರ್ಧಾರ ಎಂದರೆ ಸ್ವಾವಲಂಬಿ ಭಾರತಕ್ಕಾಗಿ ನಮ್ಮ ಪ್ರಯತ್ನಗಳನ್ನು ಹೆಚ್ಚಿಸುವುದು. ಇದು ಸ್ವಾತಂತ್ರ್ಯದ ಪುಣ್ಯಕರ ಕಾಲ. ನಾವು ಸ್ವಾತಂತ್ರ್ಯದ 75 ನೇ ವರ್ಷದಲ್ಲಿದ್ದೇವೆ. ಭಾರತವು ಸ್ವಾತಂತ್ರ್ಯದ 100 ವರ್ಷಗಳನ್ನು ಆಚರಿಸುವಾಗ ಭಾರತ ಏನಾಗಿರಬೇಕು ಎಂಬ ನಿಟ್ಟಿನಲ್ಲಿ ನಾವು ಈಗಲೇ ಕಾರ್ಯತತ್ಪರರಾಗಬೇಕು. ಮತ್ತು ಇದಕ್ಕಾಗಿ ನಾವು ಸ್ವಾವಲಂಬನೆಯನ್ನು ಸಾಧಿಸಬೇಕಾದುದು ಅತ್ಯವಶ್ಯ. ದೇಶದಲ್ಲಿ ಉತ್ಪಾದನೆ ಆಗುವ ವಸ್ತುಗಳ ಬಗ್ಗೆ ನಾವು ಹೆಮ್ಮೆಯನ್ನು ತಾಳಿದರೆ ಈ ಆಂದೋಲನಕ್ಕೆ ಸಹಾಯವಾಗುತ್ತದೆ. ಸ್ಥಳೀಯ ಉತ್ಪನ್ನಗಳನ್ನು ಖರೀದಿಸಿದರೆ ಮತ್ತು ಪ್ರಚುರಪಡಿಸಿದರೆ ಅದರಿಂದ  ಈ ಆಂದೋಲನಕ್ಕೆ ನೆರವಾಗುತ್ತದೆ. ಈ ಪುಣ್ಯಕರ ಕಾಲಘಟ್ಟದಲ್ಲಿ ಭಾರತವು 130 ಕೋಟಿ ದೇಶವಾಸಿಗಳ ಪ್ರಯತ್ನಗಳ ಫಲವಾಗಿ ಮುನ್ನಡೆಯುತ್ತಿದೆ. ಮಹಾದೇವರ ಕೃಪೆಯಿಂದ,  ಪ್ರತಿಯೊಬ್ಬ ಭಾರತೀಯರ ಪ್ರಯತ್ನದಿಂದ ಆತ್ಮನಿರ್ಭರ ಭಾರತದ ಕನಸು ನನಸಾಗುವುದನ್ನು ನಾವು ಕಾಣಲಿದ್ದೇವೆ. ಈ ನಂಬಿಕೆಯೊಂದಿಗೆ ನಾನು ಮತ್ತೊಮ್ಮೆ ಬಾಬಾ ವಿಶ್ವನಾಥ, ಮಾತಾ ಅನ್ನಪೂರ್ಣ, ಕಾಶಿ-ಕೊತ್ವಾಲ ಮತ್ತು ಎಲ್ಲಾ ಇತರ ದೇವತೆಗಳಿಗೆ ಶಿರಬಾಗಿ ಪಾದಾಭಿವಂದನೆ ಸಲ್ಲಿಸುತ್ತೇನೆ. ವಿವಿಧ ಭಾಗಗಳಿಂದ ಪೂಜ್ಯ ಸಂತರು ಬಹಳ ದೊಡ್ಡ ಸಂಖ್ಯೆಯಲ್ಲಿ ಬಂದಿರುವುದು ನನ್ನಂತಹ ಸಾಮಾನ್ಯ ನಾಗರಿಕರಿಗೆ ಬಹಳ ಅದೃಷ್ಟದ ಅವಕಾಶ ಪ್ರಾಪ್ತವಾದ ಸಂಗತಿ. ಎಲ್ಲಾ ಸಂತರಿಗೆ ನಾನು ಶಿರಬಾಗಿ ನಮಿಸುತ್ತೇನೆ ಮತ್ತು ನನ್ನ ಹೃದಯಸ್ಪರ್ಶೀ ನಮಸ್ಕಾರಗಳನ್ನು ಸಲ್ಲಿಸುತ್ತೇನೆ. ಕಾಶಿಯ ಎಲ್ಲ ಜನತೆಗೆ ಮತ್ತು ದೇಶದ ಜನತೆಗೆ ನಾನು ಮತ್ತೊಮ್ಮೆ ಅಭಿನಂದನೆಗಳನ್ನು, ಶುಭಾಶಯಗಳನ್ನು ತಿಳಿಸುತ್ತೇನೆ. ಹರ್ ಹರ್ ಮಹಾದೇವ್!.

ಘೋಷಣೆ: ಇದು ಪ್ರಧಾನ ಮಂತ್ರಿ ಅವರ ಭಾಷಣದ ಸರಿಸುಮಾರಾದ ಭಾಷಾಂತರ. ಮೂಲ ಭಾಷಣವನ್ನು ಹಿಂದಿಯಲ್ಲಿ ಮಾಡಲಾಗಿದೆ.

***