প্রধান মন্ত্রী শ্রী নরেন্দ্র মোদীনা লুচিংবা কেন্দ্র লৈঙাক্না ওগস্ত ২০১৯দগী হৌরগা স্তেতশিংগা খোঙবু ওইদুনা জল জীবন মিসন পায়খত্তুনা লৈবাক শিনবা থুংনা খুঙ্গঙগী য়ুমথোঙ খুদিংদা তোতি ঈশিং কন্নেক্সন পীননবা মাঙজিল থানা থবক পায়খৎলি‍। মনিপুরদা জল জীবন মিসন পায়খৎপগী খোঙজেল হেনগৎহন্নবা অকনবা মীৎয়েঙ চঙদুনা ভারত লৈঙাক্না স্তেত অসিদা লুকা করোর ১২০গী কেন্দ্রগী শেন্থং পীথখ্রে‍। স্তেত অসিদা ২০২১-২২দা জল জীবন মিসন পায়খৎনবগীদমক ২০২০-২১দা থাদখিবা শেনফমগী শরুক মরিরোম ওইগদবা লুপা করোর ৪৮১গী কেন্দ্রগী শেন্থঙ খাক্তুনা থম্লে‍।

মনিপুরনা সেপ্তেমবর ২০২২ ফাওবদা খুঙ্গঙগী য়ুমথোঙ খুদিংদা তোতি ঈশিং য়ৌহন্নবা থৌরাং তৌরি‍। ঙসি ফাওবদা, স্তেত অসিগী খুঙ্গঙগী য়ুমথোঙ লাখ ৪.৫১গী মনুংদা লাখ ২.৬৭ (৫৯.২%)দা তোতি ঈশিং শমখ্রে‍। জল জীবন মিসন ২০১৯দা লাউথোকখিবদগী হৌরগা য়ুমথোঙ লাখ ২.৪১দা তোতি ঈশিং ফংহনখ্রে‍। ২০২১-২২দা স্তেত অসিনা খুঙ্গঙগী য়ুমথোঙ লাখ ২.২৬তা তোতি ঈশিং য়ৌহন্নবা থৌরাং তৌরি‍।

মখা তানা ২০২১-২২দা খুঙ্গঙগী লোকেল বোদীশিং/পি.আর.আই.শিংদা ঈশিং অমসুং সেনিতেসনগী ১৫শুবা ফাইনান্স কম্মিসন শেন্থং ওইবা লুপা করোর ৭৮ শরুক থুংলি অমদি খুঙ্গঙগী লোকে বোদীশিংদা লাক্কদৌরিবা চহি মঙাগী হায়বদি ২০২৫-২৬ ফাওবগী লুপা করোর ৪১৪গী শেনফম শোয়দনা থাদনবা ৱাফম লৈরি‍। খুঙ্গঙগী য়ুমশিংদা ঈশিং য়ৌহনবদা ফন্দগী অহোবা লৈহন্দনবা কেন্দ্র লৈঙাক্না য়েংশিল্লি‍। মনিপুরগী খুঙ্গঙগী মফমশিংদা য়াম্লবা শেনফম থাদরিবসিনা শেন্মিৎলোনগী থবক থৌরম য়াঙখৎহন্দুনা খুঙ্গঙগী শেন্মিৎলোন ফগৎহনগনি‍। মসিনা খুঙ্গঙশিংদা শেন্থোক লৈনবা খুদোংচাবশিং শেমগৎলগনি‍।

জল জীবন মিসন অসি ‘মমৈদগী মকোক্তা’ হায়বা থৌওং ইন্দুনা দিসেন্ত্রেলাইজ ওইবা মওং অমদা পায়খত্তুনা খুঙ্গঙগী মীয়াম্না খুজিন থৌরাং য়াৎপা অমদি থবক পায়খৎপদগী হৌরগা মথৌ তৌহনবা অমদি য়েংশিনবগী থবক ফাওবদা মরুওইবা থৌদাং লৌরি‍। মসিগীদমক স্তেত অসিনা ভিলেস ৱাতর এন্দ সেনিতেসন কম্মিতী (ভি.দব্লিউ.এস.সি.)/ঈশিং লুপ মপাঙ্গল কনখৎহনবাচহি ৫গী ভিলেজ এক্সন প্লান শেমবগা লোয়ননা মীয়াম্না গ্রাম সভাদা মখোয়গীদমক পায়খৎকদৌরিবা ৱাতর সপ্লাই স্কিমশিংগী মতাঙদা শুগাইনা পাউদমদুনা এক্সন প্লান অদুবু অয়াবা পীননবা থবক থৌরমশিং লৌখৎলি‍। নুপীশিংনা ইমুং অমা হেক্তগী ঈশিং শোকপগী থবক্তা মায়পুননা হোৎনবা মরম্না থৌরাং অসিনা নুপীশিং শরুক য়াহন্নবা পুক্নিং থৌগৎলি‍। মিসন অসিগী মতাঙদা মীয়ামদা ৱাখল তাহন্নবা, অফবা ঈশিংগী মরুওইবশিং খঙহন্নবা, মীয়ামগা পুন্না চৎমিন্ননবা অমদি থৌরাং অসি পায়খৎপদা ভি.দব্লিউ.এস.সি.শিংদা নৎত্রগা ঈশিং লূপশিংদা ঙাক্লৌ পীননবা স্তেত অসিনা ভোলুন্তরী ওর্গনাইজেসন, সেল্ফ হেল্প গ্রুপশিং, লম-লমদুগী ঐন.জি.ও.নচিংবশিং ইম্প্লিকেন্তেসন সপ্পোর্ত এজেন্সীশিং (আই.এস.এ.) ওইনা শরুক য়াহল্লি‍।

মীয়ামগী হকশেলদা মীৎয়েঙ থমদুনা মীয়াম্না মখোয়গী ঈশিংগী সেম্পলশিং মখোয়না অপামবা মতমদা অপীকপা মমলদা চাংয়েং তৌবা য়ানবগীদমক লৈবাক পুমবদা ঈশিংগী ক্বালিতী তেস্তিং লেবোরেতরী ২,০০০ হেন্না মীয়াম্না শীজিন্নবা য়াহল্লে‍। মনিপুরদা ঈশিংগী তেস্তিং লেবোরেতরী ১৩ লৈ‍।

মীয়ামদা ৱাখল তাহনবা অমদি ফীল্দ তেস্তিং কিতশিং (এফ.তি.কে.) শীজিন্নদুনা ঈশিংগী ক্বালিতী চাংয়েং তৌবা

মহৈশঙ অমসুং অঙ্গনৱাদি সেন্তর খুদিংমক্তা থক্ননবা, মীদ-দে মিল থোংনবা, খুৎ হাম্নবা অমদি তোইলেত্তা শীজিন্ননবা তোতি ঈশিং ফংহন্নবা থৌরাং পায়খৎলি‍। ঙসি ফাওবদা মনিপুরগী মহৈশঙ ৩,২৬৫ (৯৪.৫%) অমসুং এ.দব্লিউ.সি. ৭,৫৯১ (৯৫.২%)দা তোতি ঈশিং ফংহনখ্রে‍। স্তেত অসিনা হায়রিবা ইন্সতিত্যুসনশিং অসিদা অথুবা মতমদা পাইপ ৱাতর সপ্লাই ফংহল্লগনি‍।

ওগস্ত ২০১৯দা মিসন অসি হৌরকপা মতমদা, লৈবাকসিগী খুঙ্গঙগী য়ুমথোঙ করোর ১৮.৯৩গী মনুংদা শুপ্নতগী য়ুমথোঙ কর.র ৩.২৩ (১৭%)দা তোতি ঈশিং ফংলম্মি‍। কোবিদ-১৯ লাইচৎ অমসুং লোকদাউনগী শীংনবশিং থেংনজরবসু, মিসন অসি হেক হৌবদগী হৌজিক ফাওবদা য়ুমথোঙ করোর ৫.৩৯ (২৮%)দা তোতি ঈশিং য়ৌহনখ্রে‍। হৌজিক হৌজিক খুঙ্গঙগী য়ুমথোঙ করোর ৮.৬৩দা য়ুম-য়ুমগী ওইনা তোতি পুশিন্দুনা ঈশিং য়ৌহল্লে‍। গোৱাও তেলঙ্গনা, হরিয়ানা, অন্দমান অমসুং নিকোবর ঈথৎ, দদ্রা অমসুং নগর হবেলি অমদি দামন অমসুং দিউ, পুদিচেরীদা য়ুমথোঙ খুদিংদা তোতি ঈশিং ফংলি‍।

প্রধান মন্ত্রীগী ‘সবকা সাথ, সবকা বিকাস, সবকা বিস্বাস, সবকা প্রয়াস’ হায়বা মীৎয়েঙ মখাদা মিসন অসিগী পান্দমদি ‘কনাগুম্বা অমত্তা চিত্থহন্দবা’ অমদি খুঙ্গঙগী য়ুমথোঙ খুদিংমক তোতি ঈশিং য়ৌহনবনি‍। হৌজিক হৌজিক লৈবাকসিগী দিস্ত্রিক্ত ৮৩ অমদি খুঙ্গঙ লাখ ১.২৭ হেনবদা লৈবা য়ুমথোঙ খুদিংমক তোতি ঈশিং ফংলি‍।

*****