উত্তরাখন্দ কা সভী দানা সয়ানৌ, দীদী-ভুলিয়ৌং, চচ্চী-বোদিয়ৌং ঔর ভৈ-বৈনো। আপ সবু থৈং, ম্যারু প্রনাম! মিথৈ ভরোসা ছ, কি আপ লোগ কুশল মঙ্গল হোলা! মী আপ লোগোং থে সেৱা লগৌন ছু, আপ স্বীকার করা!

উত্তরাখন্দগী রাজ্যপাল শ্রীমান গুরমীত সিংহজী, মফম অসিগী মীয়াম্না খংনরবা, থৌনা লৈরবা মুখ্য মন্ত্রী শ্রীমান পুস্কর সিংহ ধামী জী, কেন্দ্রগী মন্ত্রীমন্দলদা লৈবিরিবা ঐহাক্কী খোংবুরোই প্রহলাদ জৌশীজী, অজয় ভত্তজী, উত্তরাখন্দগী মন্ত্রী সতপাল মহারাজজী, হরক সিংহ, রাৱতজী, রাজ্যগী মন্ত্রীমন্দলগী অতৈ মীহৎশিং, সংসদতা ঐহাক্কী খোংবুরোই নিশঙ্কজী, তীরথ সিংহ রাৱতজী, অতৈ এম.পি. শিং, ইনাও ত্রিবেদী সিংহ রাৱতজী, বিধানসভাগী অতৈ মীহুৎশিং, মেয়র শ্রী, জিলা পঞ্চায়েৎকী মীহুৎশিং, ইনাও মদন কৌশিকজী অমসুং ঐহাক্কী নুংশিরবা ইচিল-ইনাওশা,

অসুক য়াম্লবা অদোম ময়াম অমনা ঐহাকপু য়াইফ-থৌজাল পীবা লাকপিরি। অদোমগী মীনুংশি, অদোমগী য়াইফ-থৌজালগী প্রসাদ ফংজবা অসিদা ঐহাক্কী পুক্নিং শুমহৎলে।  উত্তরাখন্দ অসি লৈবাক পুম্বগী লাইনিংফমদা নত্তনা থবক অমসুং হৈশিংনা থবক তৌবগী লমসুনি। মরম অসিনা মফম অসি চাউখৎহনবা, মফম অসি নিংথিবা শক্তম ওইহনবা অসি দবল ইঞ্জিনগী সরকারগী খ্বাইদগী মরুওইবা থৌদাংনি। ৱাখল্লোন অসিগা শুপ্নতগী চহী ৫ সিদা উত্তরাখন্দ অসি চাউখৎহন্নবগীদমক্তা কেন্দ্র সরকারনা লুপা করোর লাথ ১ দগী হেনবা  প্রোজেক্তশিংগী অয়াবা পীখ্রে। মফমসিগী সরকারনা মসিবু থুনা-য়াংনা মায় পাক্না পাংথোক্তুনা ঙসি লুপা করোর ১৮ দগী হেনবা প্রোজেক্তশিং মায়খুম হাংদোকখ্রে অমসুং উরেপ-উয়ুং তমখ্রে। মসিদা কনেক্তিবিতী ওইরো, হকশেলগী ওইরো, ইনাৎকী ওইরো, তুরিজমগী ওইরো, মৈগী ওইরো, অঙাংশিংগীদমক্তা অখন্ননা শাবা চাইল্দ ফ্রেন্দলী সিতি প্রোজেক্ত ওইরো চাউরাক্না সেক্তর খুদিংমক্কা মরি লৈনবা প্রোজেক্তশিং য়াওরি। হৌখিবা চহীশিংদা কন্না হোৎনরবা মতুংদা মথৌ তাবা প্রোসেস কয়া অমা তৌরবা মতুংদা ঙসিগী নুমীৎ অসি লাক্লিবনি। মসিগী প্রোজেক্তশিং অসি ঐহাক্না কেদারপুরীগী শেংলবা লমদমদা হায়খিবা অদু ঙসি ঐহাক্না দেহরাদুন্দা অমুক্কা হন্না হায়রি। মসিগী প্রোজেক্তশিং অসি মসিগী চহী তরা অসি উত্তরাখন্দগী চহী তরা ওইহনবদা অথোইবা থৌদাং লৌগনি। প্রোজেক্ত পুম্নমক অসিগীদমক্তা উত্তরাখন্দগী মীয়াম্বু হন্না-হন্না থাগৎচরি, য়াইফ-পাওজেল পীজরি। দবল ইঞ্জিনগী সরকার অসিগী কান্নবা অসি করি-করিনো হায়না হংলিবশিংনা ঙসি দবল ইঞ্জিনগী সরকার অসিনা মতৌ করম্না উত্তরাখন্দদা চাউখৎপগী গঙ্গা চেলহল্লিবনো হায়বদু য়েংবা য়াগনি।  

ইচিল-ইনাওশা,

মসিগী চহী চা অসি হৌরকপদা চহী চা অসি হৌরকপদা অতলজীনা ভারত্তা কন্নেক্তিবতী ফগৎহন্নবা কেম্পেনসু হৌদোকখি।  অদুবু মদুগী মতুং চহী ১০ অসিদা লৈবাক অসিদা লৈবাক অসিগী, উত্তরখন্দগী তাংলবা মতম মাংহনখিবা সরকার লাকখি।  চহী ১০ ফাওবা ইনফ্রাস্ত্রকচরগী মিংদা স্কেম কয়া অমা তৌখ্রে। মসিনা মরম ওইদুনা লৈবাক অসিনা নংখিবা মাংজবা কয়া মেনখৎনবা ঐখোয়না শরুক অনি কন্না হোৎনখি অদুগা ঙসিসু হোৎনরি। ঙসি ভারত অসিদা অনৌবা অনৌবা ইনফ্রাস্ত্রকচরদা লুপা করোর লাখতগী হেন্না শেল থাদনবগী ৱাখলদা মাংলোমদা চংশিল্লি।  

ঙসি ভারতকী পোলিসী অসি য়াংনা থবক চংশিনবগী মঙম অসি শরুক অনি-অহুম ওইহন্নবনি। চহী কয়া-কয়া পন্দুনা লৈবা প্রোজেক্তশিং অদু অমত্তা লোইশিন্দনা রিবোন ককপগী মওং অদু তোক্তুনা ঙসি ভারত অসি অনৌবা মওংদা শেমগৎপরোমদা চংশিল্লি। ২১ শুবা চহী চা অসিগী ৱানরবা মতম অসিদা ভারত অসি চাউখৎলবা লৈবাকশিংগী মনুং চলহনগদবা য়াম্না চাউবা থৌদাং লৌগদবা ভারত্তা কনেক্তিবিতীগী অসিগুম্না চাউরবা জৈগ্য কয়া অমা চত্থরি।  মসিগী অচৌবা জৈগ্য অসিগী জৈগ্য অমা ঙসি লাইগী লৈবাক অসিদা তৌরি।

ইচিল-ইনাওশা,

লাইগী লৈবাক অসিদা লাইনিংবসু লাকই, ওন্তর্প্রিন্যুরসু লাকই, মহৌশাবু নুংশিজবা লমকোয়বশিংসু লাকই।  লমদম অসিদা লৈরিবা মতিক-ময়াইশিং অসি হেনগৎহন্নবগীদমক্তা অনৌবা ইনফ্রাস্ত্রকচরদা হান্না অমুক্তা ওইখিদ্রিবা মওংদা থবক পাংথোক্লি।  চারধাম ওল ৱেদর রোদ প্রোজেক্তকী মখাদা ঙসি দেবপ্রয়াগতগী শ্রীকোত অমসুং ব্রহ্মপুরীদগী কৌরিয়ালাফাওবা, মফমদুগী প্রোজেক্তশিং মায়খুম হাংদোকখ্রে।  ভগৱান বদ্রীনাথফাওবা য়ৌবা লাম-বগর লেন্দ স্লাইদকী মওংদা লৈরম্বা অপনবশিং অদুসু হৌজিক্তি লৈত্রে। মসিগী লেন্দ স্লাইদ অসিনা লৈবাক পুম্বদগী লাকপা লাইনিংবশিংশিং অদু বদ্রীনাথজীগী খোংচৎ চৎপদা থিংজিনবা অমা নত্রগা পুং কয়া অমা ঙায়হনবা অমদি মীওই খরনা ৱাদুনা হন্নখিরম্মি। হৌজিক্তি বদ্রীনাথকী খোংচৎ অসি হান্নদগী হেন্না শোয়-ঙামদবা অমদি নুংঙাইবা ওইহল্লগনি। ঙসি বদ্রীনাথজী, গঙ্গোত্রী অমসুং য়মুনোত্রী ধামদা খুদোংচাবা কয়াগা মরি লৈনবা  অনৌবা প্রোজেক্তশিংদসু থবক হৌখ্রে।

ইচিল-ইনাওশা,

হেন্না ফবা কনেক্তিবিতী অমসুং খুদোংচাবশিংনা  অমসুং পিলগ্রিমেজশিংদা অদুক্কী মতিক কান্নহল্লে, হৌখিবা চহীশিংদা করাধামদা ঐখোয়না উবা ফংখি। কেদরনাথকী অৱাবা নংবগী থৌদোক থোক্ত্রিঙৈগী মমাংদা ২০১২ দা মীওই লাখ ৫ লিশিং ৭০ না লাই খুরুমখি। মদুগী মতম অদুগী রেকোর্দ ওইখি। অদুবু কোরোনা থোরক্ত্রিঙৈগী মমাংদা লাখ ১০ দগী হেন্না কেদরনাথজী খুরুম্বা লাক্নখি। হায়বদি কেদার ধাম অসি অমুক হন্না শেমগৎপা অসিনা লাইনিংবশিংগী মশিং অসি হেনগৎহনবদা নত্তনা মফম অদুদা লৈরিবা মীশিংদা থবক-মশানা তৌজবা থবক কয়া ফংহনবগী খুদোংচাবসু ফংহল্লি

মরূপশা,

হান্না মমাংদা ঐহাক্না উত্তরাখন্দা লাকপা মতমদা নত্রগা উত্তরাখন্দ চত্থোক-চৎশিন তৌবশিংগা উন্নরম্মি, মখোয়না হায়রম্মি-মোদীজী দিল্লীদগী দেহরাদুনফাওবগী খোংচৎ অসিদা গনেশপুরফাওবদা য়াম্না লাই অদুবু গনেশপুরদগী দেহরাদুনফাওবগীদি য়াম্না লুই।  দিল্লী-দেহরাদুনগী কোরিদোর অসি উরেপ-উয়ুং তমখিবা অসিদা ঐহাক য়াম্না নুংঙাই। মসি শাবা লোইরবদি দিল্লী-দেহরাদুনা চত্থোক-চৎশিন্দা চংবা অদু তংখাইমুক হন্থরগনি।  মসিনা দোহরাদুনগী মীশিংদখক্তা নত্তনা হরিদ্বার, মুজফরনগর, শামলী, বাগপত অমসুং মীরুত্তা চউপশিংনসু খুদোং চাহনগনি। মসিগী ইকোনোমিক কোরিদোর অসি হৌজিক দিল্লীদগী হরিদ্বারদা চত্থোক-চৎশিন তৌবদা চংবা মতম অদু হন্থহল্লগনি। হরিদ্বার রিঙ্গ রোদ প্রোজেক্তনা  হরিদ্বার শহরদা লৈরম্বা মতম কুইরবা খুদোংচাদবা অদু লৈহল্লরোই। মসিনা কুমাউগী মফমগা শম্নবসু হেন্না লাইহল্লগনি। মসিদা নত্তনা ঋশিকেসকী শক্তম ওইরিবা ঐখোয়গী লক্ষমনগী থোং অহায়বীগা নক্ননা অনৌবা থোং অমসু ঙসি উরেপ-উয়ুং তমখ্রে। 

ইচিল-ইনাওশা,

দিল্লী-দেহরাদুন এক্সপ্রেসৱেনা অকোয়বগী ফীভম ঙাক-শেনবগা লোয়ন-লোয়ননা চাউখৎপগী ওইবা ঐখোয়গী মোদেলগী খুদমসু ওইগনি। মসিদা মায়কৈ অমদা ইন্দস্ত্রীশিংগী কোরিদোর ওইগদৌরিবনি অদুগা মসিনা এসিয়াগী খ্বাইদগী চাউবা ইল্লিভেতেদ ৱাইল্দলাইফ কোরিদোরসু ওইগদৌরিবনি। মসিগী কোরিদোর অসিনা চত্থোক-চৎশিন তৌবা লাইহল্লগনি অদুগা উমংগী শাশিংনা তেক্ত-কায়দনা  চত্থোক-চৎশিন তৌবদা মতেং ওইহল্লগনি।

মরূপশা,

উত্তরাখন্দদা হীদাক্কী মতিক-ময়াই চেনবা মহৌশাগী ওইবা পোত্থোক ওইবা নাপী-শিংবীগী দিমান্দসু মালেম পুম্বনা তৌনরি। হৌজিক উত্তরাখন্দগী মসিগী মতিক-ময়াই অসি মপুং ফানা শিজিন্নবা ঙমদ্রি।  হৌজিক শেমগৎলিবা অনৌবা পর্ফ্যুম অমসুং মনম নুংশিবগী লেবোরেতরীশিং অসিনা উত্তরাখন্দগী মতিক-ময়াই অসি হেন্না হেনগৎহল্লগনি।

ইচিল-ইনাওশা,

ঐখোয়গী চিং, ঐখোয়গী ইনাৎ অসি লাইদা থাজনবগী মরুনি, মসি ঐখোয়গী লৈবাক অসিবু ঙাক-শেন্নবগী লানবনসুনি। চিংদা লৈরিবশিংগী পুন্সি মহিং অসি হেন্না লায়থোকহনবা অসিনা লৈবাক অসিগী খ্বাইদগী মরুওইবা থবকশিংগী মনুংদা অমনি। লাইবক থিবনা চহী তরাফাওবা পাল্লম্বা সরকার অদুনা মখোয়গী থৌশিল-থৌরাংদা মখোয়গীদমক্তা করিসু খনবিরমখিদে। মখোয়গী ওইনদি উত্তরাখন্দ ওইরো নত্রগা হিন্দুস্তান অতৈ মফম ওইরো মখোয়না খল্লিবসি মখোয়গী শেঙ্গাও থনবা, মখোয়গী ময়ুম থলহনবা, মখোয়য়গী মীশিংগীখক্তা খনবনি।

ইচিল-ইনাওশা,

ঐখোয়গী ওইনদি উত্তরাখন্দ অসি লেংদনা লেপ্পা অমসুং কত্থোকপগী লম্বিনি।  ২০০৭ দগী ২০১৪ ফাওবগী মনুংদা লৈরম্বা কেন্দ্র সরকার অদুনা চহী তরেৎ অসিদা করি থবক তৌরম্বগে? ২০০৭ দগীনা ২০১৪ ফাওবগী মরক্তা কেন্দ্রদা পাল্লম্বা সরকার অসিনা চহী তরেৎ অসিদা উত্তরখন্দা শুপ্নতগী কিলোমিতর ২৮৮ শাংবা নেস্নেল হাইৱে শেম্বিরমখি। অদুবু ঐখোয়গী সরকারনা চহী তরেৎ অসিদা উত্তরখন্দদা কিলোমিতর লিশিং ২ দগী হেন্না শাংবা নেস্নেল হাইৱে শেমখি। ঙসি ইচিল-ইনাওশিংনা হায়বীয়ু, মসি অদোম্না থবক্নি হায়না লৌবিবরা নত্রগা লৌবিদবরা? মসিনা উত্তরাখন্দ অসিগী অফবা ওইহনগরা নত্রগা ওইহল্লোইদবরা? উত্তরাখন্দগী নহারোলশিংগী মরাইবক ফহনগদরা নত্রগা ফহল্লোইদরা? মসিদা নত্তনা হান্নগী সরকারনা উত্তরাখন্দা নেস্নেল হাইৱেদা চহী তরেৎ অসিদা লুপা করোর ৬০০ মুক চাদিং তৌখ্রে।।  হৌজিক তাবিরো মদুদি ঐখোয়গী সরকারনা চহী তরেৎ-তরেৎ মখাই অসিদা লুপা করোর লিশিং ১২ দগী হেন্না চাদিং তৌখ্রে, লুপা করোর ৬০০না কদাইনো অদুগা লুপা করোর ১২০০০ না কদাইনো।  অদোম্না ঐঙোন্দা হায়বীয়ু, ঐখোয়গী ওইনদি উত্তরাখন্দ অসি হেন্না মরুওইবা নৎপরা নত্রগা নত্তবরা? অদোম্না থাজবিবরা নত্রগা থাজবিদবরা? ঐখোয়না পাংথোক্তুনা উৎত্রিবরা নত্রগা উত্তবরা? ঐখোয়না থৱায়-হকচাং য়াওনা উত্তরাখন্দগীদমক্তা থবক তৌবরা তৌদবরা?

অমসুং ইচিল-ইনাওশা,

মসিগী শুপ্নতগী মশিং য়াম্বগী ৱাখক্তা নত্তে। ইনফ্রাস্ত্রকচরগী অসুক চাউবা  প্রোজেক্তশিংগী থবক তৌবদা পোৎ কয়া অমগীসু মথৌ তারিবনি।  সিমেন্ত, য়োৎ, উ, চেক, নুং, থবক শুনবা শিন্মী, ওন্তরপ্রিন্যুরগী মীশিং লোইনা চংই, মফমদুগী নহারোলশিংদা মখল কয়াগী থবক ফংনবগী খুদোংচাবা ফংহল্লি। মসিগী থবকশিং অসিদা চংলিবা শিন্মীশিং, মেনেজমেন্ত অসিসু অনম্বনা মফমসিগী ঙাক্তনি। মরম অসিনা ইনফ্রাস্ত্রকচরগী মসিগী প্রোজেক্ত অসিনা উত্তরাখন্দদা থবক ফংবগী অনৌবা ইকোসিস্তেম ওইহল্লি, নহারোল লিশিং কয়াদা থবক ফংহল্লি। ঙসি ঐহাক্না চাউথোক্না হায়বা ঙম্মি মদুদি চহী মঙাগী মমাংদা ঐহাক্না হায়খিবশিং অদুগুম্না অমুক হন্না হায়বা ঙম্বগী থৌনা লৈবা লুচিংবশিং খরা ৱাৎনা থোক্কনি। ঐহাক্না হায়খিবা অদু নিংশিংবীয়ু অদুগা অমুক হন্না ঙসিসু ঐহাক্না চাউথোক্না হায়বা ঙম্মি মদুদি উত্তরাখন্দ ক পানী জৱনী ক কাম হী আলী!

মরূপশা,

ঙমখৈদা লৈরিবা চিংগী মফমশিংগী ইনফ্রাস্ত্রকচরদসু হান্নগী সরকারনা লুনা খনবিরমগদবা অদু খনবিরমদে। বোর্দরগী মনাক্তা লম্বি শেম্নবা, থোং শানবগী মায়কৈরোমদা মখোয়না খনবিরমদে। । ৱান রেঙ্ক ৱান পেন্সন ওইহন্নবা অনৌবা খুৎশু-খুৎলাই ওইহন্নবা, তেরোরিস্তশিংবু মমু থুদেক্নববু ওইরো মসি পুম্নমক অসিদা মখোয়না লান্মীশিংগী থৌনা হাৎকনি হায়না ৱাশক্তুনা লৈখিরম্মি।

ঙসি পাল্লিবা সরকার অসিদা মালেম অসিগী কনাগুম্বা  অমত্তনা নম্ফু-শাফু তৌরক্লরোই।

ঐখোয় অসি লৈবাক্কীনা খ্বাইদগী হান্না, মতম পুম্নমক্তা খ্বাইদগী হান্না তৌবগী লাইশোনগা লোয়ননা চৎপশিংনি। ঐখোয়না ঙমখৈদা লৈরিবা চিংগী মফমশিংদা কিলোমিতর কয়া অমগী অনৌবা লম্বিশিং শেম্লে।  অইং-অশা অমদি ভুগোলগী ফীভমশিং লৈদুনসু ্সিগী থবক অসি থুনা-য়াংনা চত্থরি। অদুগা মসিগী থবক অসি অদুক্কী মতিক মরু ওই, মসি উত্তরাখন্দগী ইমুং খুদিং, লান্মীদা মখোয়গী মচাশিং অদু থাজিনবা ইমুংনা য়াম্না নিংথিনা খংবা ঙম্লমগনি।

মরূপশা,

মতম অমদদি চিংদা লৈরিবশিং অসি চাউখৎপগী মেন স্ত্রীমগা শম্নহন্নবা মংলান মংদুনা লৈবা তানরমখি। মীরোল কয়া হৌখিবা তারগসু করম্বা মতমদা মৈ অসি কোন্ননবা ফংগদগে, করম্বা মতমদা অফবা য়ুম শাবা ঙমগদগে হায়বগী মংলান্দু অদুম্মক মংদুনা লৈখিবা তারম্মী। ঐখোয়গী খুঙ্গংফাওবা লম্বি য়ৌরক্কদরা নত্রগা য়ৌরোইদরা? অফবা হকশেলগী খুদোংচাবা ফংগদরে ফংলোইদরা অমসুং অসুম মথং-মথং শুম কোমথোকপগী মওং অসি করম্বা মতমদা লোইগদগে? মীশিংগী ৱাহং কয়া মপুক্নিংদা খঞ্জরম্মি। 

অদুবু মরূপশা,

করিগুম্বা খরা তৌদবা য়াদে হায়না খল্লবদি মওংসু অদুমক অদুম হোংজরকপনি। অদুগা অদোম্না মসিগী মংলান অসি মপুং ফানবগীদমক্তা অহিং-নুংথীল খংদনা কন্না হোৎনরি। ঙসি সরকার অসিনা মীয়াম্না মহাক্কী মনাক্তা ৱাকৎপা লাকপা মতমদুদা মসিগী ৱাফম অসি খন্নগনি অমদি থবক পায়খৎকনি হায়না ঙাইদুনা লৈথোক্তে।  হৌজিক সরকার অসি মীয়াম্না চুমদ্রিংনা চৎপা য়াবা ওইরে। অদোম নিংশিংবীয়ু, উত্তরাখন্দদা য়ুম লাখ অমগা লিশিং কুনমঙামুক্তা তোতী ঈশীং ফংনরমদে।  হৌজিক্তি য়ুম খুদিং চাকখুম য়ৌনা তোতী ঈশিং ফংলবদি ইমা-ইচনশিংনা য়াইফ-থৌজাল পীগদরা পীরোইদরা? ঐখোয় পুম্বদা য়াইফ-থৌজাল পীগদরা পীরোইদরা? তোতীনা ঈশিং ফংহল্লবদি ইমা-ইচলশিংগী অৱাবা কোকহগদরা কোকহল্লোইদরা? মখোয়দা খুদোং চাহনগদরা চাহল্লোইদরা? অদুগা মসিগী থবক অসি জল জীবন মিশন হৌদোকপা চহী অনীগী মনুংদা ঐখোয়না থবক অসি পাংথোকখিবনি। মসিনা ত্তরাখন্দগী ইমাশিংদা, ইচল-ইচেশিংদা, মফম অসিগী নুপীশিংদা খুদোং চাহল্লগনি।  উত্তরাখন্দগী ইমাশিং-ইচল-ইচাশিংনা মতম পুম্নমক্তা ঐখোয় পুম্নমক্তা মীনুংশি অদুক্কী মতিক উৎপীরি। ঐখোয় পুম্বনা অহিং-নুংথিল খংদনা কন্না হোৎনদুনা পুকচেল শেংনা থবক তৌদুনা ঐখোয়গী ইমা-ইচলশিংগী পুন্সি মহিং অসি লায়হন্দদুনা মখোয়গী লমন শিংনবা কন্না লেপ্তনা হোৎনরি।  

মরূপশা,

দবল ইঞ্জিনগী সরকার অসিনা উত্তরাখন্দগী হকশেলগী ইনফ্রাস্ত্রকচরদসু অঙকপা মওংদা থবক চত্থরি।  উত্তরাখন্দদা  অনৌবা মেদিকেল কোলেজ ৩ গী অয়াবা পীখ্রে। অসুক পীকখ্রবা রাজ্য অসিদা  অনৌবা মেদিকেল কোলেজ ৩ অসিদা ঙসি  হরিদ্বার মেদিকেল কোলেজগী উরেপ-উয়ুংসু তমখ্রে। ঋশিকেস এম্স অসি সর্ভিশশিং ফংহল্লি, কুমাউদা সেতলাইত সেন্তরসু থুনা সর্ভিশ হৌরগনি। ভেক্সিনেসনগী মতাংদসু উত্তরাখন্দ অসি ঙসি লৈবাক অসিগী মাংজিল থারিবা রাজ্যশিংগী মরক্তা অমনি অমসুং মসিগীদমক্তা ঐহাক্না ধামীজীবু, মহাক্কী খোংলোয়শিংবু উত্তরাখন্দপুম্বগী সরকারদা হরাও-নুংঙাইবা ফোংদোকচরি।  অদুগা মসিগী মরুমদসু অফবা মেদিকেল ইনফ্রাস্ত্রকচরগীসু য়াম্না চাউবা থৌদাং লৈরি। কোরোনাগী মতম অসিদা উত্তরাখন্দ অনৌবা ওক্সিজেন প্লান্ত ৫০ দগী হেনবসু শেমগৎখ্রে।

মরূপশা,

মীওই কয়া অমনা পাম্লি, অদোম ময়াম্নসু খনবিরমগনি, মীপুম খুদিংমক্না মহাক্কী মচা দোক্তর ওইহবা, ইঞ্জীনিয়র ওইহনবা, মেনেজমেন্তকী লমদা চৎহনবা পাম্লমগনি। অদুবু অনৌবা ইন্সতিত্যুৎ অমা লিংখৎত্রবদি, সীৎ মশিং হেনগৎত্রবদি অদোমগী মংলান অদু মতৌ করম্না মংফাওনবা য়াদোইনো, অদোমগী ইচানুপা অদু দোক্তর ওইবা য়াগদরা, অদোমগী ইচানুপী অদু দোক্তর ওইবা য়াগদরা? ঙসি লৈবাক অসিদা শারিবা অনৌবা মেদিকেল কোলেজ, অনৌবা আই.আই.তি.,অনৌবা আই.আই.এম., কোলেজশিংগীদমক্তা ওইবা প্রোফেস্নেল কোর্সকী হেনগৎলিবা সীৎ মশিং অসি লৈবাক অসিগী হৌজিক্কী মতমগী অমসুং তুংদা লাক্কদবা মীরোলশিংগী তুংলমচৎ ফগৎহন্নবগীদমক্তা থবক তৌরি। ঐখোয় মীয়াম মীচম অসি মতিক-ময়াই হেনগৎহন্দুনা থৌনা হাপকত্তুনা মপাঙ্গল কনখৎহন্দুনা ইকাই খুম্ননা হিংনবগী অনৌবা তাঞ্জা অমা ফংহল্লি। 

মরূপশা,

মতমগী মতুং ইন্না ঐখোয়গী লৈবাক অসিগী রাজনীতিদা মওং তাদবা কয়া অমা থোকখ্রে অদুগা ঙসি মসিগী মতাংদসু ঐহাক্না উত্তরাখন্দগী শেংলবা লমদম অসিদা করিগুম্বা ৱাফম খরা থমজগে।  রাজনীতি দল খরনা খুন্নাই অসিদা খেৎনবা লৈহন্দুনা শুপ্নতগী মীওই কাংলুপ অমবু লাইনিং লিচৎকী ওইরো, মখোয়দা পোৎ খরা পীবদবু ওইরো মখোয়দখক্তমক পীশিন্দুনা মখোয়বু ভোৎবেঙ্ক ওইনা ওন্থোকপীখি। মসি খল্লগা হোৎনরি অমসুং মদুদা মখোয়না ভোৎবেঙ্ক ওইনা উরি।  মসি লৌরো অদুগা ভোৎবেঙ্ক ওইহল্লো, গারীদি অদুম লেপ্তনা চৎকনি হায়না হোৎনরমখি। হায়রিবা রাজনীতি দলশিং অসিনা অতোপ্পা থৌওং অমা চত্থরমখি। মখোয়গী মওং তাদবা মতৌ অসি মীয়াম্বু মপাঙ্গল কনখৎহনবা নত্তবদা নমদুনা মখোয়গী মখাদা লৈহন্নবা তৌখিরম্মি। মসিগী মওং তাদবা রাজনীতি অসিগী য়ুম্ফম অসি মীশিংগী মথৌতাবশিং অদু ফংহন্দবা, মখোয়শিংবু মখোয়দা তাংজবা ওইনা ওইহনবনি। মখোয়না হোৎনরিবা পুম্নমক অসি মীয়াম-মীচমশিং অসি মপাঙ্গল লৈবা ওইহন্দনবগী মায়কৈরোমদনি। লাইবক থিবনা হায়রিবা রাজনীতি দলশিং অসিনা সরকার অসিনা ঐখোয়গী ইপা-ইমানি, সরকারদগী ফংলবতদা ঐখোয় হিংবা ঙমগনি হায়না খল্লহনখি। হায়বদি ইচম চম্বা মী অমা ওইবগী মশাগী ইকাইখুম্নজবা, মখোয়গী চাউথোকচনিংঙাই ওইবশিংদু খোংনেৎনবিখিরম্বগী মওংদা মখোয়বু মীপাল তাংবা ওইহনখি, মসিদা ৱারিবদি মখোয়না করিশু খংলমখিদবা অসিনি। মসিগী ৱাখল্লোন, মসিগী এপ্রোচ অসিদগী তোঙানবা মওংদা অতোপ্পা লম্বেল অমা খনখি। অরুবা লম্বেলনি, লুই, অদুবু লৈবাক্কী য়াইফনবগীনি, লৈবাক অসিদা লৈরিবা মীশিং অসিগী য়াইফনবনি। মসিগী লম্বেল অসিদি সবকা সাথ-সবকা বিকাসনি।  ঐখোয়না হায়রি মদুদি পুরক্কদবা স্কীম পুম্বা মীওই পুম্বগী ওইনা অচান-মীরাই নাইদনা পুরক্কনি। ঐখোয়না ভোৎবেঙ্ক অসি রাজনীতিগী য়ুম্ফম ওইহন্দনা মীয়ামগী থৌগল তৌবদা হেন্না মরুওইনা লৌখি। ঐখোয়গী এপ্রোচ অসি লৈবাক অসি হেন্না মপাঙ্গল কনখৎহনবদুনি।  ঐখোয়গী লৈবাক অসি করম্বা মতমদা মপাঙ্গল লৈদোইনো? ইমুং খুদিং মপাঙ্গল কল্লবতদনি। ভোৎবেঙ্কতা নিংথিনা লৈত্রবসু অচান-মীরাই নাইদনা অদোমগী পুন্সি অদু লায়হন্নবা তৌবিবা, অদোমদা অনৌবা খুদোংচাবশিং পীগদবা, অদোম্বু পাৱর লৈবা ওইহনগদবা থৌরাং অমা য়াত্তুনা ঐখোয়না অসিগুম্বা পাম্বৈ অমা পুথোকখি। অদুগা অদোম্নসু অদোমগী ইচাশিংসু মীপাল তাংদুনা অদুম্মক হিংবা পুন্সি অমা ওইহনবা পাম্বিরম্লোই।  অদোম্না ইপা-ইপুগী হাক্তক্তগী নংলক্লবা অৱাবশিং অদু অদোমগী ইচাশিংনা অমুক মদুদা হিংবা পাম্লোই।  ঐখোয়না অদোম্বু মীপাল তাংদুনা হিংবা নত্তবদা ইরোমদোম হিংজবা ঙম্বা ওইহনবা পাম্মি। ঐখোয়না হায়খিবা অদুগুম্না ঐখোয়দা চাননবা চিঞ্জাক ফংহল্লিবশিং অসি পাঙ্গল হাপ্পসু ওইহনবা পাম্মি। অদুনা মসিগীদমক্তা ঐখোয় লৌবুক মতাই পল্লিদা সোলর পেনেল হাপ্নবগী কুসুম স্কীম পুদুনা লাক্লি। মসিনা  লৌমীনা লৌবুক্তা মৈ পুথোকপগী খুদোংচাবা লৈহনগনি। ঐখোয়না লৌমীবু কনাগীসু মপাল তাংদবা ওইহল্লে অমসুং মপুক্নিংদা ঐহাক্না মৈ অসি লেম্না লৌরিবনি হায়বগী ৱাখলসু পোকহন্দ্রে।  অদুগা মসিগী থৌরাং অসিনা মঙোন্দা মৈসু ফংহল্লে অদুগা লৈবাক অসিদা পোৎলুম ওইহন্দ্রে অমসুং মরোমদোম লেপচবা ঙমহল্লে অদুগা মসিগী স্কীম অসিনা মফম কয়াদা ঐখোয়গী লৌমীশিং অসিনা মসি চৎনহল্লি। মতৌ অসিগুম্না ঐখোয়না লৈবাক পুম্বদা উজালা স্কীম হৌদোকখি। য়ুমথোং খুদিং মৈগী বীল খজিক্তং লাক্নবা হোৎনখিবনি। মসিগীদমক্তা লৈবাক পুম্বদা অসমুং উত্তরাখন্দদা এল.ই.দি. বল্ব ফংহনখি অসুং এল.ই.দি. বল্ব অসি হান্না লুপা ৩০০-৪০০ দা ফংলম্বা অদু হৌজিক্তি লুপা ৪০-৫০ দা ফংহল্লে।  ঙসি চাউরাক্না য়ুম খুদিংদা এল.ই.দি. বল্ব শিজিন্নরি অদুগা মৈগী বীলদু খরখক লাকএ। ময়ায় ওইবা অমসুং অনেম্বা থাক্কী য়ুমশিংদা মৈগী বীল অসি তা অমদা লুপা ৫০০-৬০০ ফাওবা তারে।

মরূপশা,

মতৌ অসিগুম্না ঐখোয়না মোবাইল ফোন হোংহল্লে, ইন্তর্নেৎ হোংহল্লে, খুঙ্গং-খুঙ্গংদা কোমন সর্ভিশ সেন্তর হাংলে, খুদোংচাবা কয়া অমা ফংহল্লে।  হৌজিক খুঙ্গংগী মীনা রেলৱে রিজর্বেসন তৌনবা শহরদা চৎপা তারম্বা, নোংমা অমা মতম মাংনরম্বা, বস ভারা লুপা ১০০-২০০ তিংনরম্বা অদু মশাগী খুঙ্গংদা অদুম্মক কোমন সর্ভিস সেন্তরদা ওনলাইন্দা রেলৱে বুকিং তৌবা য়ারে।  মতৌ অসিগুম্না অদোম্না উবিরম্লগনি হৌজিক উত্তরাখন্দদা হোম স্তে অসি চাউরাকপা খুঙ্গং খুদিংদা মসিগী মতাংদা ৱা য়ৌরে।  হৌজিক মতম খরগী মমাংদা ঐহাক্কা হোম স্তে অসি য়াম্না মায় পাক্না তৌবা উত্তরাখন্দগী মীওই খরগা ৱারী শানখি।  তুরিস্ত য়াম্না লাক্লগদি হান্নগা য়েংনবদা শরুক অনি-অহুম হেন্না লাকপা হৌনরে। তুরিস্ত য়াম্না লাক্লগদি হোতেল ফংহনবগী মথৌ তাবা হায়বসি মশানা তাবনি অমসুং অহিং অমখক্তদা অসুক য়াম্বা হোতেল শাবা ঙম্বা নত্তে। অদুনা ঐহাক্না থাজৈ মদুদি উত্তরাখন্দদা হোম স্তে শাবদা, খুদোংচাবশিং অসি হেন্না পাকথোক-চাউথোকহনবদা, লৈবাক পুম্বদা অনৌবা মায়কৈ তাকপীবা ঙমগনি।

মরূপশা,

অসিগুম্বা অহোংবা অসি ঐখোয়না লৈবাক অসিগী কাচিন-কোয়া শিন-থুংনা পুরক্লি। অসিগুম্বা অহোংবা অসিনা লৈবাক অসি ২১ শুবা চহী চাদা মাংলোমদা চংশিনগনি, অসিগুম্বা অহোংবা অসিনা  উত্তরাখন্দগী মীশিং অসি আত্মনির্ভর ওইহল্লগনি।  মরূপশা,

খুন্নাই অসিগী মথৌ তাবগীদমক্তা করিগুম্বা খরা তৌবা হায়বসিগা ভোৎবেঙ্ককীদমক তৌবা হায়বসিগা য়াম্না খেৎনৈ। ঐখোয়গী সরকারনা  লাইরবশিংদা শেম্না য়ুম শারগা পীবা মতমদা মখওয়গী পুন্সিগী খ্বাইদগী অৱাবা কোকহল্লি। ঐখোয়গী সরকার লাইরবশিংদা লুপা লাখ ৫ ফাওবা লেম্না লায়েংনবগী পীবা মতমদা মখোয়গী লম য়োনগদবদগী কল্লি। ঐখোয়গী সরকার অসিনা কোরোনাগী মতমদা লাইরবা খুদিংদা লেম্না চেং পীবদা মখোয়গী চাক লাম্বগী অনাবা অদু কোকহন্নবগী থবক তৌই। ঐহাক খংই অদুদি লৈবাক অসিগী লাইরবা, লৈবাক অসিগী ময়ায় ওইবা থাক্না মসিগী অচুম্বা অসি খংই। মতমদুদা লম খুদিংদগী, রাজ্য খুদিংদগী ঐখোয়গী থবক অসিগী. স্কীম অসিগীদমক্তা মীয়াম-মচমদগী য়াইফ-থৌজাল পংই অদুগা মতম পুম্নমক্তা ফংগনি।

মরূপশা,

নিং-খা ত্বগী অমৃতগী মতম অসিদা লৈবাক অসি চাউখৎপগী চেল্লিবা খোংজেল অসি অমুক হন্না লেপ্লরোই, পল্লররোই, চোকথররোই, অহোইনদুম হেন্না থাজরগনি অমদি ৱাশক্কা লোয়ননা চংশিল্লগনি। লাক্কদৌরিবা চহী ৫ সিদা  উত্তরাখন্দ অসিবু রজত জয়েন্তীরোমদা পুরক্লগনি। উত্তরাখন্দনা তানবা ঙমদবা পান্দম অমত্তা লৈতে।  লাইগী লৈবাক অসিদা থুংলোইদবা ৱাশক অমত্তা লৈতে। অদোমগী ইনাক্তা ধীমীজীগী শক্তম ওইনা নহাশিংবু লমজিংবা ঙম্বসু লৈরি, মহাক্কী খং-হৈরবা তীমসু লৈরি। ঐখোয়গী ইনাক্তা সেনিয়র লিদর কয়াগী মশিং কয়া অমসু লৈরি। চহী ৩০-৩০, ৪০-৪০ দগী থোরক্লবা লুচিংবশিংগী তীম্না  উত্তরাখন্দগী নিংথিরবা তুংলমচৎকীদমক্তা কত্থোক্লি।  

অদুগা ঐহাক্কী নুংশিরবা ইচিল-ইনাওশা,

লৈবাক পুম্বনা চাউথরকপদা উত্তরাখন্দনা চাউখৎলকপা য়ারোই। অদোমগী য়াইফ-থৌজালনা চাউখৎপগী দবল ইঞ্জিন অসি উত্তরাখন্দনা য়াংনা চাউখৎহনগনি হায়বগী থাজবগা লোয়ননা  ঐহাক্না অমুক হন্না ময়াম পুম্নমক্তা য়াইফ-পাওজেল পীজরি। ঙসি লাইগী লমদম অসিদা লাকপসিদা থৌনা লৈবী ইমাশিংগী লমদম অসিদা লাকপা মতমদা ৱাখলগী লৈরাং খরা, নিংজবগী লৈরাং খরা কৎচগে,  ঐহাক্না ৱাহৈ পরেং খরা অসিগা লোয়ননা ঐহাক্কী ৱাফম লোইশিঞ্জগে-

ৱাশক শক্তুনা নুংশিৎনা শিৎলিবা মফম

চিংনা চাউথোকচবা তম্বিরিবা মফম, অনেম্বা-অৱাংবা পুম্নমক লম্বিঙাক্তা ওইবা মফম

শুপ্নতগী ভক্তিগী তান্থাদা ইশৈ শক্লিবা মফম

মদুগী লাইগী লৈবাক অদু নিংজবতনা

মদুগী লাইগী লৈবাক অদু নিংজবতনা

ঐহাক মতম পুম্বদা য়াইফবা ওইজৈ

হে ঐহাক্কী লাইবক

ফরবা ইরাইবক

ঐহাক্না নহাকপু খুরুমজরি

য়াইফবা ওইজরি।

ভারত ইমাগী মশাইকোন্দা পুন্সিগী মঙালগী উরুম্নি নহাক্তি

শোকপখক্তনা চোৎলবা

খ্বাইদগী শেংলবা ইচেলনি নহাক্তি

থৱায়-হকচাং য়াওনা কৎচরি ঐহাক্না দেব

ঐহাক লাক্লি

হে ঐগী ইরাইবক 

ঐহাক্কী ফরবা লাইবক

ঐহাক্না নহাকপু খুরুমজরি

ঐহাক্না নহাকপু খুরুমজরি

ঐহাক য়াইফরে।

অঞ্জুলিদা গঙ্গাগী ঈশিং লৈবা মফম অদুদা

থম্মোয় খুদিংদা লৌনম য়াওদ্রবা মফম অদুদা

খুঙ্গং-খুঙ্গং খুদিংদা মরৈবাক নিংবগী মফম ওইরবা

নুপীদা অশেংবা থৌনা লৈবা মফম ওইরবা

মদুগী লমদম অদুদা থৌজাল ফংনবগীদমক্তা ঐহাক চৎলি

মদুগী লাইরৈপাক অদুগী য়াইফ-থৌজালগীদমক্তা

মদুগী লাইগী লৈবাক অসিগী য়াইফ-থৌজাল পুদুনা  

ঐহাক্না চৎলি

মদুগী লাইগী লৈবাক অদুগী য়াইফ-থৌজাল পুদুনা  

ঐহাক্না চৎলি

হে ঐগী ইরাইবক 

ঐহাক্কী ফরবা লাইবক

ঐহাক্না নহাকপু খুরুমজরি

ঐহাক্না নহাকপু খুরুমজরি

ঐহাক য়াইফরে।

মন্দৱেগী তল

হড়কে কী থাপ

মীপুম খুদিংমক্না পাম্নৈ

শিবজীবু শোঞ্জবা

ঋশি মুনিশিংগীনি  

মসি শেংলবা লমদম্নি

অথৌবা কয়াগী

পোক্নফম লমদম্নি

ঐহাক্না নহাকপু খুরুমজরি

অদুগা য়াইফবা ওইজগে।

ঐহাক্কা লোয়ননা হায়মিন্নসি, ভারত ইমানা য়াইফরে!  ভারত ইমানা য়াইফরে!

হন্না-হন্না থাগৎচরি !

*****