ইকাই খুমনজরবা রাস্ত্রপতিজী, ইকাই খুমনজরবা উপ রাস্ত্রপতিজী, ইকাই খুমনজরবা স্পীকর ইবুংঙো, ফম্বাক অসিদা ঙান্থোইবীরিবা অখঙ-অহৈ পুম্নমক অমসুং হাউস্তা লেংশিনবীরিবা সংবিধানগী মফমদা কৎথোক্লবা ইচিল-ইনাও, ইচল-ইচে পুম্নমক।

ঙসি অসি বাবা সাহেব অম্বেদকর, দা. রাজেন্দ্র প্রসাদকুম্বা শান্নবা উবা ঙম্বা অখঙ-অহৈশিং অদুগী মফমদা ইকোক নোঞ্জগদবা নুমিৎ অদুনি। ঙসি অসি সদন অসিবু খুরুমজগদবা নুমিৎ অদুনি, মরমদি মসিগী শেংলবা মফম অসিদা থা কয়া ভারতকী অখঙ-অহৈশিংনা, এক্তিবিতিস্তশিংনা লৈবাক অসিগী মঙাল নাইরবা তুংলমচৎ অমগীদমক থৌরাংশিং লেপথোক্নবা খন্ন-নৈনখি। অমসুং মদুদগী ঐখোয়না ফংজখিবা সংবিধানগী মশক ওইরবা অমৃত অদুনা নীংখা তম্বগী শাংলবা মতম অমগী মতুংদা ঐখোয়বু মফম অসিদা য়ৌহল্লরে। ঙসি পুজা তৌনীংঙাইগী মশক ওইরবা বাপুবুসু খুরুমজগনি। নীং খা তম্বগী লানফমদা থৱাই কৎখিবশিং, পুম্নমক অদুবুসু ইকাই খুম্নবা উৎচবগী তাঞ্জানি। ঙসি ২৬/১১ অসি ঐখোয়গীদমক্তদি লৈবাক অসিগী য়েক্নবশিংনা লৈবাক অসিগী মনুংদা চংলক্তুনা মুম্বৈদা তমথিরবা তেরোরিস্তকী থৌওং চৎথখিবা অদুগুম্বা নুমিৎ অদুনি। ভারতকী সংবিধান্দা খঙহল্লিবা লৈবাক অসিগী মীচম মীয়ামগী ঙাক-শেলগীদ থৌদাংগী মখাদা ঐখোয়গী অথৌবা কয়ানা অদুগুম্বা তেরোরিস্তশিং অদুগা মায়োক্নদুনা মশাবু কৎথোকচখি। ঙসি ২৬/১১ অসি অদুগুম্বা কৎথোকপীখ্রবশিং অদুবুসু ইকাই খুম্নবগা লোইননা ইকোক নোঞ্জরি।

ইকাই খুমনজরবা অখঙ-অহৈশিং করিগুম্বদা ঐখোয় খল্লি মদুদি করিগুম্বা ঙসি ঐখোয়না সংবিধান অসি শেম্বা তারবদি করি তৌরমগনি? নীং খা তম্বগী খোঙজংগী মরুম, লৈবাক নীংবগী মঙাল, ভারত খাইদোক্নবগী থমথিবা পুম্নমক অসি লৈজদুনসু লৈবাক্কী কান্নবা অসি পুম্নমক্কী থমোইদা অমত্তা ঙাইরবা লাইশোন ওইখি। খেন্নবা কয়ানা থল্লবা লৈবাক অসি, লোন কয়া, লাইনীং কয়া, লৈঙাক কয়া পুম্নমক অসি লৈজদুনসু সংবিধানগী থোংদা লৈবাক অপুনবা অসিবু কিশি অমনা কিদুনা মাংদা চখৎনবা থৌরাং শেম্বা ঙসিগী ফিভম অসিদা য়েংলুরগদি খঙবা ঙমদে সংবিধানগী লমাই অমা ফাওবা ঐখোয় মপুং ফাহনবা ঙমগদ্রা? মরমদি নেস্নেল ফর্স্তকী মথং মনাও নাইনা চৎথখিবা মতম অদুদগী রাজনীতিনা মদুদা অদুক্কী মতিক শাফু পীখি মদুদি লৈবাক্কী কান্নবা হায়বা ৱাখল্লোন অসিসু করিগুম্বদা মনীংদা লৈথহৌখি। অদুগুম্বা অথোইবশিং অদুবু মসিগীদমক খুরুমজবা পামজরিবনি মদুদি মদুগীদমক্তসু মখোয়গী তোঙানবা ৱাখল্লোন লৈরমগনি। মখোয়গী ৱাখল্লোনশিং অদুগীসু মখোয়গী মচৎ অমা লৈজরমগনি। মচৎ অদুগী ইচেলসু লৈরমগনি। অদুবু অদুমওইনমক লৈবাক্কী কান্নবা অসি সুপ্রীম ওইবনা মরম ওইদুনা পুন্না খন্ন-নৈনদুনা সংবিধান অমা পীবীরে। 

মরূপশিং,

ঐখোয়গী সংবিধান অসি শুপ্নগী আর্তিকল কয়া মরুমগী অপুনবা অদুখক্তা নত্তে। ঐখোয়গী সংবিধান চহি চা কয়াগী ভারতকী ফাওরবা চৎনবী, থুগাইবা য়াদ্রবা ইচেল অসি অদুগুম্বা ইচেল অদুগী অনৌবা খুফোংদোক অদুনি। অমসুং মরম অসিনা ঐখোয়গীদমক্তা লেত্তর এন্দ স্পিরিৎতা সংবিধানগী মফমদা কৎথোকপা অমসুং ঐখোয়না সংবিধানগী ওইবা থৌওং অসিদগী মীয়ামগী মীহুৎ ওইনা গ্রাম পঞ্চায়ত্তগী হৌরগা সংসদ ফাওবা থৌদাং অদু য়ারি। ঐখোয় সংবিধানগী লেত্তর এন্দ স্পিরিৎ অসি খৎথোকপগী ৱাখল মক্না ঐখোয় ইশাবু মতম পুম্নমক্তা মতিক চানা থমজগদবনি। অমসুং মসি তৌরকপা মতমদা সংবিধানগী ৱাখল্লোন্দা কদাইদা অশোকপা ওইহনবগে হায়বসুসু ঐখোয় থৌওইদবা তৌরোইদবনি। অমসুং মরম অসিনা সংবিধানগী নুমিৎ অসি ঐখোয় মসিসু য়াজবা তাই মদুদি ঐখোয়না তৌরিবা পুম্নমক অসি সংবিধানগী মশেক-মঙাল অদুদনি। অচুম্বরা অরানবরা। ঐখোয়গী লম্বী চুম্বরা লানবরা। চহি খুদিংগী সংবিধানগী নুমিৎ পাংথোক্তুনা ঐখোয় ইশানা ইশাবু য়েংশিঞ্জবা তাই। লৈবাক অসিনা নীং খা তম্লবা মতুংদা ২৬ জনুৱারী রিপব্লিক্কী থৌরম হৌদোক্লবা মতুংদা ঐখোয়না নবেম্বর ২৬ অসি সংবিধানগী নুমিৎ হায়না লৈবাক অসিদা পাংথোকপগী চৎনবী অমা লৈহল্লবদি ফগনি। মরমদি মদুনা মরম ওইদুনা ঐখোয়গী ঐখোয়গী মীরোল মথং মথংনা সংবিধান করম্না শেমখিবনো? মসি শেম্বদা কনা কনা য়াওখি? করম্বা ফিভমদা শেমখিবগে? করিগী শেমখিবনো? ঐখোয়না সংবিধান অসিদা কদাইদা পুরিবগে? করম্না পুরিবগে? কনাগীদমক্তা পুরিবনো? হায়রিবা ৱাফম পুম্নমক অসিদা চহি খুদিংগী খন্ন-নৈনরবদি মালেম অসিনা অহিংবা য়ুনিৎ অমা ওইনা লৌনরিবা, খুন্নাইগী ওইবা দোক্যুমেন্ত অমা ওইনা লৌনরিবা সংবিধান অসি, খেন্নবতনা থল্লবা লৈবাক অসিগীদমক্তা মসি য়াম্না চাউবা থৌনা অমা ওইনা চারোল শুরোল কয়াদা তাঞ্জা অমা কান্নবা ফংগনি। অদুবু মীওই খরা মসিবু নান্থোকহঞ্জখ্রে। অদুবু বাবা সাহেব অম্বেদকরগী ১৫০শুবা মপোক কুমওন পাংথোকখিবা অসিদগী হেন্না শেংবা তাঞ্জা করি ওইবা য়াই। মদুদি বাবা সাহেব অম্বেদকরনা য়াম্না চাউনা কৎথোকপীরম্মি, মদু ঐখোয়না মতম পুম্নমক্কী ওইনা লাইরিক অমা ওইনা নীংশিংদুনা লাক্লি।

মরূপশিং,

ভারত অসি কন্সতিত্যুস্নেল দেমোক্রেতিক্কী চৎনবী অমনি। রাজনীতিগী দলশিংগী মশাগী মগুন অমমম লৈজৈ। অমসুং রাজনীতি দলসু ঐখোয়গী সংবিধানগী ৱাখল্লোন অসি মীপুম খুদিংমক্তা য়ৌহন্নবা মরুওইবা পাম্বৈ অমনি। অদুবু, সংবিধানগী ৱাখল্লোনশিং অসিসু চৈথেং ফংই। সংবিধানগী আর্তিকল খুদিংমকসু চৈথেং ফংই। রাজনীতিগী দলনা মখোয় মশানা মখোয়গী দেমোক্রেতিক কেরেক্তর অদু মাংহঞ্জরকপদা। দল মশানা দেমোক্রেতিক কেরেক্তর মাংহঞ্জরবদি দেমোক্রেসীবু করম্না ঙাক-শেনবা ঙমগদৌরিবনো। ঙসি লৈবাক অসিদা কশ্মীরদগী কন্যাকুমারী ফাওবা হিন্দুস্তানগী কাচিন কোয়া পুম্নমক্তা চৎপীয়ু, ভারত অসি অসিগুম্বা খুদোংথিবা অমগী মায়কৈদা চংশিল্লি, মদু সংবিধান্দা কৎথোক্লবা মীয়ামগী অৱাবগী হিরম অমা ওইরি। কেমোক্রেসীগী মফমদা থাজবা থম্বশিংগীদমক্তা অৱাবগী হিরমনি, অমসুং মদুদি ইমুং-মনুংগী ওইবা পার্তীশিং, রাজনীগী দলশিং, পার্তী ফোর দ ফেমিলী, পার্তী বাই দ ফেমিলী, হৌজিক অমুক হায়রুবগী মথৌ ঐ তাই হায়না খন্দ্রে।

জাপান্দা চাংয়েং অমা তৌখি। জাপান্দা উখি মদুদি, পোলিতিকেল্লী ফেমিলী খরা খক্তনা থৌরাং চৎথরি। অদুনা কনানা হোৎনখি মদুদি মীয়াম্বু শেম-শাহনগনি অমসুং পোলিতিকেল্লী ফেমিলীগী মপান্দা লৈবা মীওইশিং দিসিজন মেকিংদা করম্না য়াওহনগনি, অমসুং য়াম্না মায় পাক্না চহি কুনথ্রা নিফু চংখি অমা তৌবা তাখি। লোক্তন্ত্রবু মপুং ফাহন্নবগীদমক্তা ঐখোয়সু ঐখোয়গী লৈবাক্তা অসিগুম্বা পোৎশকশিং অসি খঙবগী মথৌ তাই, খন্ন-নৈনবগী মথৌ তাই, লৈবাক মীয়াম্বু হৌদোকপগী মথৌ তাই। অমসুং মতৌ অসুম্না ঐখোয়গী মফম অসিদা শেঞ্জা-থুমজা, ঐখোয়গী সংবিধান্না শেঞ্জা-থুমজাগী অয়াবা পীবরা। কাংলোন লৈরি অদুবু অৱাবদি জ্যুরিদিক্সন্না মশানা কনাবু করিগুম্বা শেঞ্জা-থুমজাগীদমক্তা লাওথোক্লবা, শেঞ্জা-থুমজাগীদমক্তা চৈরাক পীখ্রবা মতমদুদা ওইরকই। অদুবু রাজনীতিগী ওইবা খুদোংচাবনা মরম ওইদুনা মদুগীসু ইকাই খুম্নবা পীদুনা লাক্লি। শেঞ্জা-থুমজাবু থৌওইদনা অচুম্বা অদু তযেংলা ফাওবদসু রাজনীতিগী ওইবা কান্নবগীদমক্তা ঙমখৈ পুম্নমক নমখাইদুনা ইকাই খঙদবা ওইদুনা মখোয়গা লোইননা চৎমিন্নবা হৌই। অদুনা লৈবাক অসিগী নহারোলশিংগী পুক্নীংদা খল্লি মদুদি করিগুম্বা মতৌ অসুম্না রাজনীতিগী লমদা লুচিংলিবা মীয়াম্না শেঞ্জা-থুমজাদা লুপ্তুনা লৈবা মীওইশিংবু ঙাকপী-শেনবীরি। হায়বদি, মখোয়সু লম্বী অদু ফংই মদুদি শেঞ্জা-থুমজাগী লম্বীদা চৎপা অসি ফত্তবা নত্তে, চহি অনি-মরিগী মতুংদা মীয়ামনা অদুম্মক য়াজৈ। ঐখোয় অসিগুম্বা খুন্নাই অমা শেমগৎকদ্রা, খন্নাইগী মনুংদা হোয় শেঞ্জা-থুমজানা মরম ওইদুনা মরাল লৈরবা অমবু চুমথোকচনবগী তাঞ্জা অমা পীগদবনি।

মহাত্মা গান্ধী য়াওনা ভারতকী নাগরীক পুম্নমকপু মখোয়গী হক ফংনবগীদমক লান্থেংনখিবা অসি অদুক্কী মতিক মশানা তাবা ৱাফম্নি। অদুবু মসিসু চুমই মদুদি মহাত্মা গান্ধীনা নীং খা তম্বগী খোঙজংদসু হক্কীদমক্তা লান্থেংননা, লৈবাক অসিগী থৌদাংগীদমক্তা শেম-শাননবা লেপ্তনা হোৎনখি। মহাক্না ভারতকী মীয়ামদা মরু অদু হুন্ননবা লেপ্তনা হেৎনখি, মদুদি লুনা নান্না লৈয়ু, অহল-লমনশিংবু মহৈ তমহল্লু, নুপীবু ইকাই খুমনৌ, নুপীবু চাউথোকহল্লু, নুপীবু ইম্পাৱর তৌ, খাদী শেৎলু, লমদম অসিগী ৱাখল্লোন, আত্মনির্ভরগী ৱাখল্লোন থৌদাংগী মায়কৈদা মহাত্মা গান্ধীনা লেপ্তনা লৈবাক অসিবু শেম-শাহন্দুনা লাকখি। অদুবু নীং খা তম্লবা মতুংদা মহাত্মা গান্ধীনা হুল্লবা থৌদাংগী মরু অদু নীং খা তম্লবা মতুংদা অচৌবা পাম্বী অমা ওইফম থোকপনি। অদুবু লাইবক থিবদি লৈঙাক থৌশিল অসুম্না শেমখি মদুদি মদুনা হক, হক, হক্কী মায়কৈতদা ৱা ঙাংদুনা ঐখোয় লৈরবদি অদোমগী হক ফংগনি হায়বা থৌরাং অসিদা মীয়াম্বু থমখি।

আজাদী কে অমৃত মহোৎসবতা ঐখোয়গীদমক্তা য়াম্না মরু ওইরিবদি ঐখোয় ইথৌদাংগী থোংদা হকশিং ঙাক-শেন্নবগী লম্বীদা চৎলি। থৌদাংগী অদুগুম্বা লম্বী অদুনি মদুদা হক্কী গরেন্তী লৈ, থৌদাংগী অদুগুম্বা লম্বী অদুনি, মদুনা হক্কী ইকাই খুম্নবগা লোইননা অতোপ্পবু লৌশিল্লি মখোয়গী হক পী। অমসুং মরম অসিনা ঙসি ঐখোয় সংবিধান নুমিৎ পাংথোকপা অসিদা ঐখোয়গী নুংদসু ৱাখল্লোন অসি লেপ্তনা হিংহন্নবা মদুদি ঐখোয় থৌদাংগী লম্বীদা চৎতুনা থৌদাংবু অদুক্কী মতিক য়াম্না পুচেল শেংবা অমসুং লাইনীংগা লোইননা ঐখোয়না পাংথোক্কনি পুম্নমক্কী হক ঙাক-শেনগনি। অমসুং নীং খা তম্বদা ঙাওজবশিংনা অদুগুম্বা মঙলান অদু মঙজদুনা ভারত অসি শেমখিবা অদুগুম্বা মঙলান অদু মঙফাওনহন্নবগী লাইবক ফরবা তাঞ্জা অদু ঙসি ঐখোয় ময়াম্না ফংজরে। ঐখোয় ময়াম্না অমত্তা ওইনা মঙলানশিং অদু মঙফাওনহনবদা করিসু অখাকপা থম্লোইদবনি। ঐনা অমুক্কা হন্না স্পীকর ইবুংঙোবু অসিগুম্বা মরুওইরবা তাঞ্জা অসিগীদমক হন্না হন্না থাগৎপা ফোংদোকচরি, নোল্লুকপা উৎচরি, মহাক্না থৌরম অসি য়াৎপীখিবনি। থৌরম অসি কনাগুম্বা সরকার অমগী নত্তে থৌরম অসি কনাগুম্বা রাজনীতিগী দল অমগী নত্তে, থৌরম অসি কনাগুম্বা প্রধান মন্ত্রী অমনা শিনবা নত্তে। সদন অসিগী মিংচৎ ওইরি স্পীকর, সদনগী মফম অসি চাউথোকচনীংঙাইনি, স্পীকরগী মতিক-মঙাল অমা ওই, বাবা সাহেব অম্বেদকরগী মতিক-মঙাল অমা ওইরি, সংবিধানগী মতিক-মঙাল অমা ওইরি। ঐখোয় পুম্নমক্না অদুগুম্বা অফাওবা মীওইশিং অদুবু খুরুমজসি মদুদি মতম পুম্নমক্তা স্পীকর ফম অসিগী মতিক-ময়াই কাইহন্দনা থম্নবা মখোয়না ঐখোয়দা মহৈ অসি তম্বীখি। বাবা সাহেব অম্বেদরকী মতিক-মঙাল কাইহন্দবা অমসুং সংবিধানগী মতিক-মঙাল কাইহন্দবা। মসিগী থাজবা অসিগা লোইননা অদোম ময়াম্বু হন্না হন্না থাগৎচরি।

****