ਉਪ ਰਾਸ਼ਟਰਪਤੀ ਸ਼੍ਰੀ ਐੱਮ. ਵੈਂਕਈਆ ਨਾਇਡੂ ਨੇ ਅੱਜ ਭਾਰਤੀ ਰੇਲਵੇ ਦੀ ਸ਼ਲਾਘਾ ਕੀਤੀ ਕਿਉਂਕਿ ਉj ਮਹਾਮਾਰੀ ਦੌਰਾਨ ਮੌਕੇ ’ਤੇ ਡਟਿਆ ਤੇ ਆਪਣੀਆਂ ਨਿਵੇਕਲੀਆਂ ਕੋਸ਼ਿਸ਼ਾਂ ਨਾਲ ਟ੍ਰੇਨਾਂ ਦੇ ਪਹੀਏ ਚਲਦੇ ਰੱਖੇ ਤੇ ਕੋਵਿਡ–19 ਦੀਆਂ ਅਣਕਿਆਸੀਆਂ ਚੁਣੌਤੀਆਂ ਤੋਂ ਗਾਹਕਾਂ ਨੂੰ ਸੁਰੱਖਿਅਤ ਰੱਖਿਆ।

ਕੋਵਿਡ ਦੇ ਮਰੀਜ਼ਾਂ ਦੀ ਦੇਖਭਾਲ ਲਈ ਏਕਾਂਤਵਾਸ ਹਿਤ ਤਿਆਰ ਕੀਤੇ ਡੱਬਿਆਂ, ਸ਼੍ਰਮਿਕ ਵਿਸ਼ੇਸ਼ ਟ੍ਰੇਨਾਂ ਤੇ ‘ਆਕਸੀਜਨ ਐਕਸਪ੍ਰੈੱਸ’ ਦੀ ਮਿਸਾਲ ਦਿੰਦਿਆਂ ਸ਼੍ਰੀ ਨਾਇਡੂ ਨੇ ਕਿਹਾ ਕਿ ਭਾਰਤੀ ਰੇਲਵੇਜ਼ ਨੇ ਆਪਣੀ ਸਮੁੱਚੀ ਮਸ਼ੀਨਰੀ ਦਾ ਤਾਣ ਲਾਇਆ ਤੇ ਮਹਾਮਾਰੀ ਦਾ ਪ੍ਰਭਾਵਸ਼ਾਲੀ ਤਰੀਕੇ ਸਾਹਮਣਾ ਕਰਨ ਲਈ ਦੇਸ਼ ਦੀ ਮਦਦ ਕੀਤੀ।

ਉਪ ਰਾਸ਼ਟਰਪਤੀ ਨੇ ਪੀਪੀਈਜ਼ (PPEs), ਕਵਰਆਲਸ, ਹੈਂਡ ਸੈਨੀਟਾਈਜ਼ਰਸ ਤੇ ਮਾਸਕਾਂ ਦੇ ਵਿਕਾਸ ਤੇ ਉਤਪਾਦਨ ਵੀ ਆਪਣੇ ਕੋਲ ਹੀ ਕਰਨ ਅਤੇ ਸ਼ਹਿਰਾਂ ਤੇ ਪਿੰਡਾਂ ਤੱਕ ਮੈਡੀਕਲ ਉਪਕਰਣਾਂ ਤੇ ਆਮ ਵਸਤਾਂ ਨੂੰ ਯਕੀਨੀ ਤੌਰ ’ਤੇ ਪਹੁੰਚਾਉਣ ਲਈ ਵੀ ਰੇਲਵੇਜ਼ ਨੂੰ ਸ਼ੁਭ ਕਾਮਨਾਵਾਂ ਦਿੱਤੀਆਂ। ਉਨ੍ਹਾਂ ਕਿਹਾ,‘ਇਸ ਸਰਗਰਮੀ ਸਦਕਾ ਹੀ ਵਸਤਾਂ ਤੇ ਅਨਾਜ ਭੰਡਾਰਾਂ ਦੀ ਕਿੱਲਤ ਵੱਡੇ ਪੱਧਰ ’ਤੇ ਘਟ ਗਈ ਸੀ। ਇੰਝ ਰੇਲਵੇਜ਼ ਨੇ ਨਾ ਸਿਰਫ਼ ਮਹਾਮਾਰੀ ਨੂੰ ਪ੍ਰਭਾਵਸ਼ਾਲੀ ਤਰੀਕੇ ਸਿੱਝਣ ’ਚ ਦੇਸ਼ ਦੀ ਮਦਦ ਕੀਤੀ, ਸਗੋਂ ਸੰਕਟ ਦੀ ਘੜੀ ’ਚ ਖ਼ੁਦ ਨੂੰ ਇੱਕ ਜ਼ਰੂਰੀ ਜੀਵਨ–ਰੇਖਾ ਵਜੋਂ ਵੀ ਸਿੱਧ ਕੀਤਾ।’

ਸ਼੍ਰੀ ਨਾਇਡੂ ਅੱਜ ਅੱਪਗ੍ਰੇਡ ਕੀਤੇ ਐੱਲਐੱਚਬੀ (Linke Hofmann Busch) ਰੇਕ ਤੇ ਵਧੀਕ ਵਿਸਟਾਡੋਮ ਡੱਬਿਆਂ ਵਾਲੀ ਵਿਸ਼ਾਖਾਪਟਨਮ–ਕਿਰੰਦੌਲ ਯਾਤਰੀ ਟ੍ਰੇਨ ਨੂੰ ਝੰਡੀ ਦਿਖਾ ਕੇ ਰਵਾਨਾ ਕਰਨ ਤੋਂ ਬਾਅਦ ਵਿਸ਼ਾਖਾਪਟਨਮ ਰੇਲਵੇ ਸਟੇਸ਼ਨ ’ਤੇ ਬੋਲ ਰਹੇ ਸਨ।

ਇਸ ਸ਼ਹਿਰ ਨਾਲ ਆਪਣੇ ਨੇੜਲੇ ਸਬੰਧ ਨੂੰ ਚੇਤੇ ਕਰਦਿਆਂ ਉਪ ਰਾਸ਼ਟਰਪਤੀ ਨੇ ਸਰਕਾਰ ਦਾ ਸ਼ੁਕਰੀਆ ਅਦਾ ਕੀਤਾ ਤੇ ਵਿਸ਼ਾਖਾਪਟਨਮ–ਅਰਾਕੂ ਰੂਟ ’ਤੇ ਵਿਸਟਾਡੋਮ ਕੋਚਾਂ ਦੀ ਛੇਤੀ ਵਰਤੋਂ ਕਰਨ ਬਾਰੇ ਉਨ੍ਹਾਂ ਦੇ ਸੁਝਾਅ ਉੱਤੇ ਗ਼ੌਰ ਕਰਨ ਵਾਸਤੇ ਰੇਲ ਮੰਤਰੀ ਸ਼੍ਰੀ ਅਸ਼ਵਨੀ ਵੈਸ਼ਨਵ ਦੇ ਫ਼ੈਸਲੇ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ।

ਬਹੁਤ ਸਾਰੇ ਮੋੜਾਂ ਤੋਂ, ਸੁਰੰਗਾਂ ’ਚੋਂ ਤੇ ਪੁਲ਼ਾਂ ਉੱਤੋਂ ਦੀ ਅਤੇ ਪੂਰਬੀ ਘਾਟਾਂ ਦੀਆਂ ਸੋਹਣੀਆਂ ਪਹਾੜੀ ਵਾਦੀਆਂ ਵਿੱਚੋਂ ਲੰਘਣ ਵਾਲੇ ਇਸ ਰੂਟ ’ਤੇ ਸੈਰ–ਸਪਾਟੇ ਦੀ ਸੰਭਾਵਨਾ ਦਾ ਜ਼ਿਕਰ ਕਰਦਿਆਂ ਸ਼੍ਰੀ ਨਾਇਡੂ ਨੇ ਕਿਹਾ ਕਿ ਵਿਸਟਾਡੋਮ ਡੱਬਿਆਂ ਦੀ 360–ਡਿਗਰੀ ਦੀ ਦ੍ਰਿਸ਼ ਪ੍ਰਣਾਲੀ ਯਾਤਰੀਆਂ ਲਈ ਇਸ ਯਾਤਰਾ ਨੂੰ ਕਦੇ ਵੀ ਨਾ ਭੁੱਲਣ ਵਾਲਾ ਤਜਰਬਾ ਬਣਾ ਦੇਵੇਗੀ। ਉਨ੍ਹਾਂ ਰੇਲ–ਗੱਡੀ ’ਚ ਐੱਲਐੱਚਬੀ ਕੋਚ ਜੋੜਨ ਲਈ ਵੀ ਰੇਲਵੇਜ਼ ਦੀ ਸ਼ਲਾਘਾ ਕੀਤੀ ਕਿਉਂਕਿ ਇਸ ਨਾਲ ਯਾਤਰੀਆਂ ਦੀ ਸੁਵਿਧਾ ਦੀ ਸੁਰੱਖਿਆ ’ਚ ਵਾਧਾ ਹੁੰਦਾ ਹੈ।

ਸਫ਼ਾਈ ਲਈ ਵਿਸ਼ਾਖਾਪਟਨਮ ਸ਼ਹਿਰ ਦੀ ਤਾਰੀਫ਼ ਕਰਦਿਆਂ ਸ਼੍ਰੀ ਨਾਇਡੂ ਨੇ ਜਨਤਾ ਨੂੰ ਲੋਕ ਲਹਿਰ ਵਜੋਂ ‘ਸਵੱਛ ਭਾਰਤ’ ਦੀ ਰਫ਼ਤਾਰ ਜਾਰੀ ਰੱਖਣ ਦਾ ਸੱਦਾ ਦਿੱਤਾ। ਉਨ੍ਹਾਂ ਖ਼ਾਸ ਕਰਕੇ ਲੋਕਾਂ ਨੂੰ ਜ਼ਿੰਮੇਵਾਰੀ ਲੈਣ ਤੇ ਟ੍ਰੇਨਾਂ ਤੇ ਰੇਲਵੇ ਸਟੇਸ਼ਨਾਂ ਨੂੰ ਸਾਫ਼ ਰੱਖਣ ਦੀ ਅਪੀਲ ਕੀਤੀ।

ਇਸ ਸਮਾਰੋਹ ’ਚ ਸ਼੍ਰੀ ਮੁੱਤਮਸੇਤੀ ਸ੍ਰੀਨਿਵਾਸ ਰਾਓ, ਮੰਤਰੀ, ਆਂਧਰ ਪ੍ਰਦੇਸ਼ ਸਰਕਾਰ, ਸ਼੍ਰੀ ਐੱਮ.ਵੀ.ਵੀ. ਸੱਤਿਆਨਾਰਾਇਣ, ਮੈਂਬਰ, ਲੋਕ ਸਭਾ, ਸੁਸ਼੍ਰੀ, ਅਰਚਨਾ ਜੋਸ਼ੀ, ਜਨਰਲ ਮੈਨੇਜਰ, ਪੂਰਬੀ ਤਟੀ ਰੇਲਵੇ, ਸ਼੍ਰੀ ਅਨੂਪ ਕੁਮਾਰ ਸਤਪਥੀ, ਡੀਆਰਐੱਮ ਵਾਲਟੇਅਰ ਤੇ ਹੋਰ ਪਤਵੰਤੇ ਸੱਜਣਾਂ ਨੇ ਭਾਗ ਲਿਆ।

 **********

ਐੱਮਐੱਸ/ਆਰਕੇ/ਐੱਨਐੱਸ