হোম এফিয়র্সকী কেন্দ্রগী মন্ত্রী অমসুং কোওপরেসনগী মন্ত্রী অমিত শাহনা ঙসি মনিপুরগী তমেংলোঙ দিস্ত্রীক্তা লৈবা লুৱাংকাও খুঙ্গংদা রানী গাইদিংলু ত্রাইবেল ফ্রীদম ফাইত্তরস ম্যুজিয়ম লিংখৎনবগী উরেপ উয়ুং তমখ্রে।

মনিপুরগী মুখ্য মন্ত্রী নোংথোম্বম বিরেন সিংহ অমসুং ত্রাইবেল এফিয়র্সকী কেন্দ্রগী মন্ত্রী আর্জুন মুন্দা অমদি অতৈ দিগ্নতরীশিংনা ঙসি ইম্ফালগী সিতী কনভেন্সন সেন্তরদা পাংথোকখিবা উরেপ উয়ুং তম্বগী থৌরম অসিদা শরুক য়াখি।

ম্যুজিয়ম অসি ভারত সরকারগী ত্রাইবেল এফিয়র্সকী মিনিস্ত্রীনা লুপা কোতি ১৫ কাইথদুনা শাগদবনি।

ভিদিও কনফরেন্সকী খুৎথাংদা উরেপ উয়ুং তমখ্রবা মতুং মীতিন অসিদা ৱা ঙাংলদুনা, কেন্দ্রগী গৃহ মন্ত্রীনা হায়খি মদুদি ম্যুজিয়ম অসি লৈবাক অসিগী নিংতম লান্মীশিংগী থৌনাবু তুংগী মীরোলদা লৈহৌবদা মতেং পাংবতা নত্তনা মখোয়গী মরৈবাক নিংবগী ৱাখল্লোনবু তুং কোইনা লৈহৌরগনি। ম্যুজিয়ম অসিনা লৈবাক অসিগী নহারোলশিংদা নিংতম লান ইথিল খঙবতা নত্তনা লৈবাক অসিদা মখোয়না কৎথোকপদা পুক্নিং থৌগৎলগনি। লৈবাক অসিনা ব্রিতিশকী মখুৎতগী নিংতম্বা ফংলকপা চহি ৭৫ ফারক্লে অমসুং লৈবক অসিনা মালেমগী থাক্তা শক্তি লৈনবা অকনবা ফিরেপ অমদা চহি ২৫গী মতুংদা নিংখা তম্বগী চহি ১০০শুবা পাংথোক্নবা হোৎনরি, হায়না মহাক্না হায়খি।   

“লৈবাক অসিগী নিংতম লান্মী নিংশিংবা মতমদা, ঐখোয়না কোলোনিএল লৈঙাক্কী মায়োক্তা লান্থেংনখিবা ত্রাইবেল নিংতম লান্মীশিং কৈদৌনুংদা কাওরোইদবনি,” হায়না মহাক্না হায়খি।

ত্রাইবেল নিংতম লান্মীশিং নিংশিংবগী তঙাইফদবা লৈ হায়না মরুওইবা পীরদুনা প্রধান মন্ত্রী নরেন্দ্র মোদীনা অজাদী কা অমৃত মহোৎসব পাংথোকপগী মথক্তা নবেম্বর ১৫দা জনজাতিয়া গৌরব দিবসকী চয়োলচুপ্না পাংথোক্কদবা থৌরম অমা হৌদোক্লি। ত্রাইবেল নিংতম লান্মীশিং নিংশিংবা ওইনা নবেম্বর ১৫ অসি জনজাতিয়া গৌরব দিবস হায়না চহি খুদিংগী পাংথোক্কনি, হায়না শ্রী শাহনা হায়খি।

কেন্দ্রগী গৃহ মন্ত্রীনা রানী গাইদিংলুবু অঙনবা মতমদগী হৌদুনা ব্রিতিশকী মখুৎতগী মহাক্কী প্রজাবু মনিং তম্নবা হোৎনখিবা মহাক্কী পুন্সি অমসুং কৎথোকখিবশিংবুসু নিংশিংখি। মনিপুরগী নিংতম লান্মীশিং অমসুং অতৈ অৱাং-নোংপোক লমদমগী নিংতম লান্মীশিং পল্লদুনা, কেন্দ্রগী মন্ত্রীনা কেন্দ্র সরকারনা অন্দমান অমসুং নিকোবর ইথৎতা লৈবা ইথৎশিংগী মরক্তা খ্বায়দী ৱাংবা অহুমশুবদা লৈরিবা মাউন্ত হরিতপু, হায়রিবা অসিদা মনিপুরগী মহারাজা কুল্লাচন্দ্র অমসুং অতোপ্পা নিংতম লান্মী ২২বু এঙ্গলো-মনিপুর লান (১৮৯১)দা ফাদোক থমখিবা নিংশিংদুনা মমিং থোন্নবা ৱারেপ লৌখিববু নিংশিংখি।

মনিপুরগী নিংতম লান্মীনা ব্রিতিশকী মায়োক্তা মতম লৈবা খিবিক্তা লানফমদা কন্না হোৎনদুনা লান্থেংনবদা লৈখিবা থৌনাবু ইকাই খুম্নবা উৎনবা কেন্দ্র সরকারনা ৱারেপ অসি লৌখিবনি।

থৌরম অসিদা ৱা ঙাংলদুনা, ত্রাইবেল এফিয়র্সকী কেন্দ্রগী মন্ত্রী অর্জুন মুন্দানা হায়খি মদুদি লৈবাক অসিগী নিংতম লানগী মরমদা ৱারী শারকপদা, কনাগুম্বা অমনা ত্রাইবেল নিংতম লান্মীশিংবু কাওবা ঙম্লোই। ইম্ফালদা লৈরিবা কেন্দ্রগী মন্ত্রীনা, শাগদৌরিবা ত্রাইবেল ম্যুজিয়ম অসিবু রাজ্য অসিগী মীয়ামগী মতেংগা লোয়ননা থম্লিবা পান্দমগী মনুংদা মপুং ফানা লোইশিনবা ঙমগনি হায়না আসা তৌই হায়না ফোংদোকখি।  

শ্রী মুন্দাসু প্রধান মন্ত্রী নরেন্দ্র মোদীগী অখন্নবা মিৎয়েংগী মখাদা লৈরিবা কেন্দ্রগী সরকারনা মিনিপুর অমসুং মফম অসিগী  অতৈ অতোপ্পা রাজ্যশিং চাউখৎনবা অঙম্বা মতেং মহাক্কী মিনিস্ত্রীনা পীনবা থাজবা পীরি।

মনিপুরগী মুখ্য মন্ত্রী এন. বিরেন সিংহনা ম্যুজিয়ম অসিনা মনিপুরগী মশক খঙবিদ্রবা ত্রাইবেল নিংতম লান্মীশিংবু ইকাই খুম্নবা অমসুং নিংশিংবা ওইরগনি হায়না আসা তৌই হায়খি। মসিদা মখোয়গী নিংতম লান্দা থৱায় থাখিবা নিংশিংলগনি, হায়না মহাক্না মখা তাখি।

মুখ্য মন্ত্রীনা কেন্দ্রগী মুখ্য মন্ত্রী অমিত শাহবু মহাক্না অন্দমান্দা লৈরিবা মাউন্ত হেরিতপু রাজ্য অসিগী নিংতম লান্মীশিংদা ইকাই খুম্নবা উৎতুনা মমিং থোনবগীদমক থাগৎপা ফোংদোকখি। সিংহনা মখা তাখি মদুদি ভারতকী নিংতম লানগী পুৱারীদা মনিপুরনা লৌখিবা মরুওইবা কাওথোকপা য়ারোই।

ভারতকী মচু অহুমগী ফিরাল মনিপুরগী লৈমাইদা অহানবা ওইনা হৌজিক্না বিষ্ণুপুর দিস্ত্রীক্তা লৈরিবা মোইরাংদা আই.এন.এ.না ফিরাল চিংখৎখিবা মতমদা পাইহনখি।

*****