কম্মর্স অমসুং ইন্দস্ত্রী, কঞ্জ্যুমর এফিয়র্স, ফুদ অমসুং পব্লিক দিস্ত্রিব্যুসন অমসুং তেক্সতাইলসকী কেন্দ্রগী মন্ত্রী পিয়ুশ গোয়লনা থাংজ নুমিৎতা মনিপুরগী ইন্দস্ত্রী বোদীশিংদা মখা তানা রাজ্যগী চাউখৎপগী ৱারীদা শোইদনা য়াওহনগনি হায়খ্রে।

রাজ্য অসিগী ইন্দস্ত্রী, ত্রেদ অমসুং কম্মর্সকী তোঙান তোঙানবা ওর্গানাইজেসনগী মীহুৎশিংগা ইম্ফালদা থাংজ নুমিৎকী নুমিদাংদা উনবদা কেন্দ্রগী মন্ত্রীনা হায়খি, ভারতকী চাউখৎপগী ৱারী অসি মনিপুরগী চাউখৎপগী ৱারী য়াওদনা মপুং ফারোই। মহাক্না হায়খি, কেন্দ্রনা মসিগী তাম্না লৈরিবা মফম অসিদা ইন্দস্ত্রী, ত্রেদ অমসুং কম্মর্সতা থেংনরিবা অৱাবশিং খঙই।

কেন্দ্রগী মন্ত্রীনা মখা তোনা হায়খি, মফম অসিদা নোর্থ-ইস্ত ইন্দস্ত্রিএল দিবলুমেন্ত স্কীম অমসুং ইন্দস্ত্রিএল প্রোজেক্তশিংগী ইন্তিগ্রেতেদ দিবলপমেন্ত অমসুং প্রোমোসনগী সেঙসন য়াওনা ইন্দস্ত্রী, ত্রেদ অমসুং কম্মর্সকী পুখৎনবা ইনফ্রাস্ত্রকচরেল দিবলপমেন্ত প্রোজেক্তশিংগী খোঙথাং কয়া অমা কন্না হোৎনরি। অদুম ওইনমক মহাক্না হায়খি, মফম অসিদা ইন্দস্ত্রী, ত্রেদ অমসুং কম্মর্স মখা তানা চাউখৎনবা পুনশিনবা অমসুং হিদান্নবগী ইথিল অমা চংই। মহাক্না ইন্দস্ত্রিএল বোদীশিংদা মতেং পাংননবা অমসুং হোৎনরিবা অসিগী মহৈ নিংথিনা ফংনবা ইন্দস্ত্রী অমসুং কর্ম্মসিএল ত্রেদ লোয়ননা তেক্নোলোজী পীননবা কন্না হায়খি।

মহাক্না হায়খি, অৱাং-নোংপোক রাজ্যশিংনা মখোয়গী মশক তাকচনবা চেকশিন্না হোৎনগদবনি অমসুং করিগুম্বা ইসু  অমগীদমক্তা দিল্লী নত্ত্রগা কোলকাতা চেল্লোইদবনি। মহাক্না মখা তানা হায়খি, মহাক্কী মিনিস্ত্রীনা ওনলাইন্দা লৈরিবা পুম্বা অশেংবা ওইনবা হোৎনবা অমসুং ময়েক শেংনা উৎনবা কন্না হোৎনরি। কেন্দ্রগী মন্ত্রীনা থাজবা অসিমসু থমখি মদুদি মহাক্কী মিনিস্ত্রীনা রাজ্য অসি ম্যানমার অমসুং এসিয়ন লৈবাকশিংদা থোঙ ওইনা মরম্না মনিপুরনা ফ্রী ত্রেদ এগ্রীমেন্ত ফংনবা হোৎনবা য়াবা হোৎনগনি।  

মনিপুরগী কম্মর্স অমসুং ইন্দস্ত্রীজ মন্ত্রী থোংঙাম বিস্বাজিত সিংহ, ভারত সরকারগী তেক্সতাইল মিনিস্ত্রীগী সেক্রেতরী উপেন্দ্র প্রসাদ সিংহ, রাজ্যগী চীফ সেক্রেতরী দাঃ রাজেশ কুমার অমসুং রাজ্যগী কম্মর্স অমসুং ইন্দস্ত্রীজ দিপার্তমেন্তগী মকোক থোংবা ওফিসিএলশিংনা উনবগী সেসন অসিদা শরুক য়াখি।  

উনবা অসিদা, কম্মর্স অমসুং ইন্দস্ত্রীগী মনিপুর চেম্বরগী – রাজ্যগী ইন্দস্ত্রিএল য়ুনিয়নগী মীহুৎশিং, ইন্দো-ম্যানমার বোর্দর ত্রেদরস য়ুনিয়ন,  ওল মনিপুর এন্ত্রেপ্রিন্যুরস এসোসিএসন, ব্যুজিনেস এক্সেলেন্স গ্রুপ, মনিপুর পাৱর লুম দিবলপমেন্ত এসোসিএসন, মনিপুর হেন্দলুম অমসুং হেন্দিক্রাফ এন্ত্রেপ্রিন্যুরস আর্তিসান দিবলপমেন্ত সোসাইতী অমসুং ওর্গানাইজেসন ফোর দিবলপমেন্ত ওফ ইকোনোমিক অমসুং সেল্ফ হেলপনা ইন্দস্ত্রী, ত্রেদ অমসুং কম্মর্সকী চাউখৎনবগীদমক মন্ত্রীগী পুক্নিং চিংশিল্লি।    

মখোয়না ত্রান্সিত দ্যুতী সিস্তেম, ভিজা ফী হন্থহনবা, ত্রেদ ওফিসশিং হায়বদি ইম্ফালদা লৈরিবা দি.জি.এফ.তি., এফ.আই.ই.ও., একজিম বেঙ্ক, আর.বি.আই. ফোরেক্স সেলশিং হাংদোকপা, মল্তি মোদেল লোজিস্তিক পার্ক শেমগৎপা, এক্সপোর্ত অমসুং ইম্পোর্ত ত্রেদরশিংদা ত্রান্সপোর্তকী সবসিদী, কোল্দ স্তোরেজ, কস্তম ওফিসকী খুদোংচাবগা লোয়ননা ইম্ফাল এয়রপোর্ত শেমগৎপা অসিগী ইসুশিং থাংগৎলক্লি।   

****