কম্মর্স অমসুং ইন্দস্ত্রী, কঞ্জ্যুমর এফিয়র্স, ফুদ অমসুং পব্লিক দিস্ত্রিব্যুসন অমসুং তেক্সতাইলসগী কেন্দ্রগী মন্ত্রী পিয়ুশ গোয়লনা থাংজ নুমিৎতা মনিপুরগী ইম্ফাল ইস্ত দিস্ত্রীক্তা লৈবা ওলিম্পিক মেদলিস্ত সাইখোম মিরাবাই চনুগী পোক্নফম খুঙ্গংদা মেগা হেন্দলুম ক্লস্তর অমা লিংখৎলগনি হায়না লাওথোকখ্রে। মনিপুরদা অহানবা ওইনা নুমিৎ নিনিগী খোঙচৎতা ইম্ফালদা লৈরিবা মহাক্না ভারত্তা অহানবা ওইনা আই.এন.এ.না মচু অহুমগী ফিরাল পাইহনখিবা মফম বিষ্ণুপুর দিস্ত্রীক্তকী মোইরাংদা  হেন্দলুম অমসুং হেন্দিক্রাফ খুঙ্গং অমা লিংখৎনবসু লাওথোকখি। মসিনা মরুওইনা আই.এন.এ.গী লান্মীশিংদা, মফম অসিগা চান্নবা নিংতম লান্মীশিংদা ইকাই খুম্নবা উৎকনি, হায়না মহাক্না হায়খি।     

ঙসি মন্ত্রীনা ইম্ফালগী, সিতী কনভেন্সন্দা মনিপুর সরকার অমসুং তেক্সতাইলগী য়ুনিয়ন মিনিস্ত্রীগী দিবলপমেন্ত কম্মিসনর (হেন্দিক্রাফ)কা খুৎশম্নদুনা শিনবা ক্রাফসকী থেমাতিক একজিবিসন অমা হৌদোকপগী ৱা ঙাংবদা লাওথোকখিবনি। একজিবিসন অসি অজাদী কা অমৃত মহোৎসব থৌরম পাংথোকপগী শরুক অমা ওইনা শিনবনি।

শ্রী গোয়লনা হায়খি মদুদি মহাক্কী মিনিস্ত্রীনা ওলিম্পিক সিলভর মেদলিস্ত সাইখোম মিরাবাই চনুগী পোক্নফম খুঙ্গং ওইরিবা নোংপোক ককচীংদা মহাক্কা লোয়ননা মনিপুরগা লোয়ননা হেন্দলুম অমসুং হেন্দিক্রাফকী পোত্থোক পুথোকপদা লৌরিবা থৌদাং অসিদা দেদিকেত তৌবা ওইনা মেগা হেন্দলুম ক্লস্তর অমা লিংখৎনবা ৱারেপ লৌরে।

মেগা হেন্দলুম ক্লস্তর অসিবু লিংখৎনবা লাওথোক্তুনা শ্রী গোয়লনা পাউদমখি মদুদি তেক্সতাইল মিনিস্ত্রীনা মেগা হেন্দলুম ক্লস্তর অসিগীদমক নেস্নেল হেন্দলুম দিবলপমেন্ত প্রোগ্রাম (এন.ঐচ.দি.পি.)গী মখাদা লুপা কোতি ৩০গী ওইগদবা শেনফম অমদা লিংখৎপনি। মহাক্না প্রধান মন্ত্রী নরেন্দ্র মোদীবু প্রোজেক্ত অসিগীদমক উরেপ উয়ুং তমহনবগী অপাম্বসু ফোংদোকখি।

লৈবাক অসিগী তেক্সতাইল পুথোকপদা ওইরকপা য়াবশিংগী মরমদা ৱা ঙাংলদুনা, মন্ত্রী অসিনা হায়খি মদুদি মনিপুরগী তেক্সতাইলগী পোত্থোকশিং অসি লৈবাক অসি খক্তা নত্তনা মালেম পুম্বদা মমিং লৈরি। “মসিবু ৱাখলদা থমদুনা, মহাক্কী মিনিস্ত্রীনা সেক্তর অসিগী চাউখৎ থৌরাংদা থবক কন্না তৌদুনা লৈবাক অসিবু হেন্না শক্তি লৈবা লৈবাক অমা ওইনবা থৌদাং লৌরি,’ হায়না মহাক্না হায়খি।

শ্রী গোয়ালনা মরুওইবা পীরি মদুদি লৈবাক অসিনা মালেমগী ওইবা শক্তি পায়নবগী মংলান মংফাওননবা, সেক্তর খুদিংমক খুৎশম্নবা অমা মথৌ তাই অমসুং লৈবাক অসিনা ঐখোয়গী ৱার্রকরশিংবু, লৌমীশিং অমসুং সমাজ অসিগী অতৈ সেক্সনশিং মসিবু ফংগনি হায়না থাজবা লৈরি

মমাংদা, মন্ত্রীনা মনিপুরগী মুখ্য মন্ত্রী এন. বিরেন সিংহ অমসুং অতৈ মন্ত্রীশিংগা লোয়ননা ক্রাফকী থেমাতিক একজিবিসন হাংদোকখ্রে। মহাক্না তেক্সতাইলগী য়ুনিয়ন মিনিস্ত্রীদগী মিরাবাই চনুদা লুপা লাখ ৩০গী চেক অমসু পীখ্রে। মিরাবাই চনুগী মমা, সাইখোম তোম্বী দেবীনা মহাক্কী মচানুপীগী মহুৎ শিন্দুনা চেক অসি লৌখি।

শ্রী গোয়লনা কিতস, পহেচান কার্দশিং, মনিপুর য়ার্দ কার্দ, লুম সর্তিফিকেত অমসুং ৱীভর মুদ্রা লোনশিং রাজ্য অসিগী খনগৎলবা ৱীবরশিংদা পীখি।

মহাক্না ইম্ফালগী কল্যান আশ্রমদা ভগবান বির্সা মুন্দাগী মপোক কুমওন নিংশিনবা পাংথোকপা অহানবা জনজাতিয়া গৌরব দিবসসু শরুক য়াখি।

******