ভারত লৈঙাক, মেঘালয়া লৈঙাক অমসুং ৱর্ল্দ বেঙ্কনা মেঘালয়াদা দোলর মিলিয়ন ৪০গী হকশেলগী প্রোজেক্ত অমগী য়ানচে অমা ওক্তোবর ২৮, ২০২১দা খুৎয়েক পীনখ্রে‍। প্রোজেক্ত অসিনা হেল্থ সর্ভিসেসকী মতিং হেনগৎহল্লগনি অমদি কোবিদ-১৯ লাইচৎ য়াওনা তুংদা লাক্কদবা হকশেলগী ইমর্জেন্সীশিং থেংননবা স্তেত অদুগী মতিক হেনগৎহল্লগনি‍।

মেঘালয়া হেল্থ সিস্তেম স্ত্রেংধনিং প্রোজেক্ত অসিনা স্তেত অসিগী শীন লাঙবগী অমদি লৈঙাকপগী মতিক অমদি মখোয়গী হেল্থ ফেসিলিতীশিং হেনগৎহল্লগনি; স্তেত অদুগী হেল্থ ইন্স্যুরেন্স প্রোগ্রামগী মওং মতৌ অমসুং কোনশিনবগী চাং পাকথোক চাউথোকহনগনি; হেল্থ সর্ভিসেসকী মতিং সর্তিফিকেসন অমসুং হেন্না ফবা হ্যুমেন রিসোর্স সিস্তেমগী খুত্থাঙদা ফগৎহনগনি; অমদি হিদাক লাংথক অমসুং দাইগ্নোস্তিক হেন্না মতিং লৈনা ফংহনবা ঙমহনগনি‍।

স্তেত অসিগী দিস্ত্রিক্ত ১১মক্না প্রোজেক্ত অসিগী কান্নবা ফংগনি‍। মসিনা প্রাইমারী অমসুং সেকেন্দ্রী থাক্তা লৈবা হেল্থ সেক্তর স্তাফশিংদসু মখোয়গী প্লান্নিং অমসুং মেনেজমেন্তকী মতিক কনখৎহন্দুনা অমদি মখোয়গী ক্লিনিকেল স্কিল শেমগত্তুনা কান্নবা পীগনি‍। প্রোজেক্ত অসিনা নুপীশিংবু কম্ম্যুনিতীগী থাক্তা হেল্থকেয়র সর্ভিসশিং হেন্না ফবা মওংদা শীজিন্নবা ঙমহনগনি‍।

“হেল্থ কেয়র সিস্তেম মপাঙ্গল কনখৎহনবা অমদি পাকথোক চাউথোকহনবা হায়বসি ভারত লৈঙাক্কী মাঙজিল থাবা ৱাফম্নি‍। প্রোজেক্ত অসিনা স্তেত অসিগী হেল্থ সর্ভিসেসকী মেনেজমেন্ত অমসুং ক্বালিতী হেনগৎহল্লগনি‍। মসিনা হেল্থ সর্ভিসেসনা কোনশিনবগী চাং পাকথোক চাউথোকহনবদা মতেং পাংদুনা স্তেত অদুগী লায়রবা অমদি ফীভম চাদ্রবা মীওইশিংদা লায়না অহোঙবা মমলদা ফংহনবদা মতেং পাংগনি‍,” হায়না দিপার্তমেন্ত ওফ ইকনমিক এফ্যার্স, মিনিস্ত্রী ওফ ফাইনান্সনা ফোঙদোক্লি‍।

শ্রী রজত কুমার মিস্রা, এদিসনেল সেক্রেতরী, দিপার্তমেন্ত ওফ ইকনমিক এফ্যার্স, মিনিস্ত্রী ওফ ফাইনান্সনা ভারত লৈঙাক্কী মহুৎ শিন্দুনা; শ্রী রামকুমার এস, জোইন্ত সেক্রেতরী, দিপার্তমেন্ত ওফ হেল্থ এন্দ ফেমিলি ৱেলফ্যারনা মেঘালয়া লৈঙাক্কী মহুৎ শিন্দুনা; অমদি  মিস্তর জুনৈদ অহমদ, কন্ত্রী দাইরেক্তর, ইন্দিয়ানা ৱর্ল্দ বেঙ্ককী মহুৎ শিন্দুনা য়ানচে অদু খুৎয়েক পীনখি‍।

প্রোজেক্ত অসিনা য়ুমথোঙ ৫৬% কোনশিল্লিবা মেঘালয়া হেল্থ ইন্স্যুরেন্স স্কিম (এম.ঐচ.আই.এস.) হায়না খঙনবা মেঘালয়াগী হেল্থ ইন্স্যুরেন্স প্রোগ্রামবু হেন্না মতিং লৈহনগনি‍। মসিবু লৈবাক্কী প্রধান মন্ত্রী জন অরোগ্য য়োজনা (পি.এম.জে.এ.ৱাই.)গা পুনশিন্নদুনা এম.ঐচ.আই.এস.না হৌজিক য়ুমথোঙ ১০০% কোনশিন্দুনা হেন্না মপুং ফাবা পেকেজ অমা পীননবা থৌরাং তৌরি‍। মসিনা লায়রবা ইমুংশিংদা হোস্পিতাল চৎপদা লৈরমবা অপনবা হন্থহন্দুনা ফুরিৎখাউ তেংবমখৈ শেল পুথোকপগী ফীভম হন্থহনবা ঙমগনি‍।

মরুওইবা লাল্লোং অমা ওইনা প্রোজেক্ত অসিনা পর্ফোর্মেন্স বেজ ফাইনান্সিং সিস্তেম অমগী মায়কৈদা চঙশিন্দুনা দি.ও.ঐচ.এফ.দব্লিউ. অমসুং মসিগী সবসিদিয়রীশিংগগী মরক্তা ইন্তর্নেল পর্ফোর্মেন্স এগ্রীমেন্তশিংনা (আই.পি.এ.) থাক খুদিংদা একাউন্তেবিলিতী হেনগৎহনগনি‍। মসিনা মতিং লৈবা হেল্থ সর্ভিসশিং পীননবা সিস্তেম মেনেজমেন্ত ফগৎহনবদা চাউনা কান্নবা পীরবা য়াই হায়না পারি‍। প্রোজেক্ত অসিনা তোঙান তোঙানবা স্কিমশিংগী মরক্তা পুন্না থবক তৌমিন্নবগী ফীভম য়োকখৎপদা অমদি স্তেত ইন্স্যুরেন্স এজেন্সীগী মতিং হেনগৎহনবদা মীৎয়েঙ থম্লি‍।

প্রোজেক্ত অসিনা তুংগী লাইচৎ শন্দোরকপা অমদি হকশেলগী ইমর্জেন্সীশিংদা হেন্না মতিং লৈবা রেসপোন্স লৈহন্নবগীদমক ইন্ফেক্সন প্রিভেন্সন অমসুং কন্ত্রোলদা শেল থাদগনি‍।

ফীভম ফগৎলপা হকশেলগী সর্ভিস লৈবনা বাইও-মেদিকেল ৱেস্তসু হেনগৎহল্লক্লবা য়াই‍। বাইও-মেদিকেল ৱেস্ত অমসুং প্লাস্তিক ৱেস্ত অমদি ই-ৱেস্তনচিংবা অতৈ হকচাঙ শোক্নিংঙাই ওইবা ফত্ত হৌদিশিং মওং মরিল নাইদনা মেনেজ তৌবনা অকোয়বগী ফীভমদা মাঙহল্লক্কনি‍। প্রোজেক্ত অসিনা বাইও-মেদিকেল ৱেস্ত মেনেজমেন্তকী (মপং অমসুং মহি অনিমক) মপুং ওইবা ইকোসিস্তেম ফগৎহনবদা শেল থাদগনি‍। মসিদা অকোয়বগী ফীভম ঙাক্তুনা অমদি হেল্থ সর্ভিস অমসুং অনাবগী সেফ্তীগী মতিং হেনগৎহনবগা লোয়ননা ফত্ত-হৌদি খন্দোক খঞ্জিন, মহিক মতাং হাত্তোকপা অমদি খোমগৎপগী থৌওংশিং য়াওরি‍।

****