امور داخلہ کے مرکزی وزیر  اور برائے  تعاون  جناب امت شاہ نے آج  نئی دہلی میں ساحلی سکیورٹی کے موضوع پر  وزارت داخلہ کی مشاورتی کمیٹی  کی میٹنگ کی صدارت کی۔ امور داخلہ  کے وزرائے مملکت  جناب  نتیانند رائے اور جناب اجے مشرا ، مرکزی داخلہ سکریٹری ، سکریٹری ماہی پروری، انڈین کوسٹ گارڈ کے اہلکار  اور امور داخلہ کی وزارت کے افسران  اس میٹنگ میں موجود تھے۔

میٹنگ سے خطاب کرتے ہوئے مرکزی وزیر داخلہ نے کہا کہ  وزیراعظم جناب نریندر مودی کے رہنما خطوط کے مطابق ، وزارت داخلہ  کا  بارڈر مینجمنٹ کا محکمہ گزشتہ کچھ برسوں سے  ساحلی  سکیورٹی کو  مزید مضبوط بنانے کی سمت میں  کام کر تا رہا ہے اور تمام  متعلقہ  فریقوں سے  مشورے موصول ہونے کے بعد  اس سمت میں مزید کام کیا جاسکتا ہے۔

جناب امت شاہ نے کہا کہ  سرحدی سکیورٹی  کے شعبے کو  در پیش  مشکلات  کا  وزارت داخلہ  انتہائی سنجیدگی سے  جائزہ لے رہی ہے۔ انہو ں نے کہا کہ  میٹنگ میں پیش کئے جانے والے مشوروں کی روشنی میں،  ریاستوں کے ساتھ سرحدی سکیورٹی  کو  محفوظ بنانے کے لئے  ضروری  اور مناسب اقدامات کئے جائیں گے۔ جناب شاہ نے  مزید کہا کہ  یہ پہلی بار  ہوا ہے کہ  ملک کے تمام  جزیروں کا سروے کیا گیا ہے اور  اس سلسلے میں  موصول ہونے والی رپورٹوں کی بنیاد پر  بہت سے  اہمیت کے حامل فیصلے کئے جارہے ہیں۔ انہوں نے  یہ بھی کہا کہ  ساحلی سکیورٹی میں  بہت سی وزارتوں  کا بھی  ایک کردار ہے اور  وزیراعظم جناب نریندر مودی  کی صدارت میں  جلد ہی  تمام متعلقہ فریقوں کے ساتھ  ایک میٹنگ کے بعد ان وزارتوں میں  باہمی  ارتباط  قائم کرکے  ساحلی سکیورٹی کو  مزید مضبوط کیا جائے گا۔

میٹنگ میں  بہت سے  اہم موضوعات پر  تبادلہ خیال کیا گیا اور  زمینی سرحدی سکیورٹی کے معیار پر ساحلی سکیورٹی کو  مضبوطی بخشنے کے لئے بہت سی تجاویز  پیش کی گئیں۔ میٹنگ میں موجود  ممبران نے  تمام ریاستوں میں  علیحدہ  ساحلی پولیس   کیڈر قائم کرنے اور ٹیکنالوجی  کی مدد  سے  جزیروں اور ساحلی علاقوں کی  نگرانی کے لئے  بھی مشورے دیئے۔ اس کے علاوہ، سرحدی علاقوں کی ہمہ جہت  ترقی اور  سرحدی پولیس اسٹیشنوں کی مؤثر کارروائی  کے لئے  ایک مناسب  بجٹ  مختص کئے جانے کی ضرورت پر بھی زور دیا گیا۔اس مقصد کے حصول کے لئے پولیس اہلکاروں کی مناسب تربیت   اور  تحفظ کے نقطہ نظر سے ماہی گیروں کی تربیت  کی ضرورت پر بھی زور دیا گیا۔ سمندر میں  جہازوں  اور ماہی گیروں کی کشتیوں کے درمیان  ٹکراؤ  کے واقعات  کی روک تھام  کے لئے ٹیکنا لوجی کے استعمال کئے جانے پر بھی تبادلہ خیال کیا گیا۔ ممبران نے  ساحلی  سکیورٹی کے ساتھ ساتھ  بحری تجارت  اور بحری معیشت  میں اضافہ کرنے کی  ضرورت پر بھی زور دیا۔

میٹنگ کے درمیان  ساحلی سکیورٹی کو  مضبوط بنانے کی سمت میں  کئے گئے اقدامات کے حوالے سے ، وزارت داخلہ کے  بارڈر مینجمنٹ کے محکمے کے ذریعے  ایک تفصیلی  پرزنٹیشن دیا گیا، جس میں  ساحلی سکیورٹی کے  پہلے مرحلے اور دوسرے مرحلے کی تکمیل  اور  تیسرے مرحلے کے شروع کئے جانے پر بھی تبادلہ خیال کیا گیا۔

۔۔۔۔۔۔۔۔۔۔۔۔۔۔۔۔۔۔

(ش ح- س ب- ق ر)

U-12304