হর-হর মহাদেব!

ঐহাক ঙাংবা হৌজরগে হৌজিক ময়াম্না ঐহাকপু অয়াবা পীনবীয়ু, অদুগা ঐহাক ৱা ঙাংবা হৌজগে। হর হর মহাদেব, বাবা বিশ্বনাথ, ইমা অন্নপুর্নাগী শহর ওইরিবা কাশীগী শেংলবা লমদম অসিগী ইচিল-ইনাও পুম্নমকপু খুরুমজরি। দীপাৱলী, দেব দীপাৱলী, অন্নাকূত, ভইয়াদুজ, প্রকাশোতসব অমসুং দালা ছথকী মীয়ামদা য়াইফ পাউজেল পীজরি। উত্তর প্রদেশকী রাজ্যপাল শ্রীমতি অনন্দিবেন পতেলজী, থৱায় য়াওরবা য়ু.পি.গী মুখ্য মন্ত্রী য়োগী অদিত্যনাথজী, কেন্দ্রগী হকশেল মন্ত্রী মনসুখ মন্দাবিয়াজী, য়ু.পি. সরকারগী অতৈ মন্ত্রীশিং, কেন্দ্রদগী ঐহাক্কী মরুপ মহেন্দ্র নাথ পান্দেজী, রাজ্য মন্ত্রী অনিল রাজভরজী, নীলকান্থ তিৱারীজী, রবিন্দ্র জায়সৱালজী, অতৈ মন্ত্রীশিং, সাঙসতকী মরুপ  শ্রীমতি সীমা দ্বিবেদিজী, বি.পি. সরোজজী, বরানাসিগী মেয়র শ্রীমত মৃদুলা জায়সৱালজী, অতৈ মীয়ামগী মীহুৎশিং, তেক্নোলোজীগী খুত্থাংদা লৈবাক অসিগী কাচিন কোয়াদা লৈরিবা হেল্থ প্রোফেস্নেলশিং, দিস্ত্রিক্ত হোস্পিতাল, মেদিকেল ইন্সতিত্যুত  অমসুং বনারসকী মফম অসিদা তিল্লিবা ইচিল-ইনাওশিং।

লৈবাক অসিনা কোরোনা লাইচৎকী মায়োক্তা লান্থেংনবদা ভেক্সিন দোজ করোর ১০০ কাপ্পগী অচৌবা মাইপাকপা ঙমখ্রে। বাবা বিশ্বনাথকী থৌজালশিং, ইমা গঙ্গাগী লেংদ্রবা থৌজাল, কাশী মীয়ামগী লেংদ্রবা থাজবগা লোয়ননা মীপুম খুদিংদা ভেক্সিন-লেম্না ভেক্সিন ফংহন্নবা অভিয়ান অসি মাইপাক্না খুমাং চাউশিল্লি। ঐহাক্না ময়াম পুম্নমক্তা ইকোক নোন্দুনা ইকাই খুম্নবা উৎচরি। ঙসি পুং খরগী মমাংদা থৌরম অমদা ঐহাক্না অনৌবা মেদিকেল কোলেজ  উত্তর প্রদেশতা খুৎশিন্নবগী খুদোংচাবা ফংজখি। মসিনা লায়রবা, দালিত, শোত্থরবা-নৈহৎপীরবা-খুদোংচাবা ফংদ্রবা পুর্ভঞ্চল অমসুং য়ু.পি. পুম্বগী মীয়ামদা চাউনা কান্নবা ফংহল্লগনি, অসিগুম্বা খুন্নাই অসিগী শরুক পুম্নমক্না অতোপ্পা শহরশিংদা অচৌবা হোস্পিতালশিংগীদমক কোইচেন চেন্নবা হন্থহল্লগনি।

মরুপশিং,

ৱাখলদা সমস্যা অমা লৈ -

মুক্তি জন্ম মহি জানি, জ্ঞান খানিঅঘ হানি কর।

জহ বস সম্ভু ভৱানি, সো কাসী সৈ কস না।।

হায়বদি, কাশীদা শিব অমসুং শক্তি লৈ। লৌশিংগী পুখৈ ওইরিবা কাশী অসিনা ঐখোয়বু অৱা অনা অনিমক্তগী কোকপী। হকশেলগী মরী লৈনবা অসিগুম্বা অচৌবা থৌরাং অমা, লাইনা-তিন্না অমসুং অৱাং-অনাশিংদগী ঙাকথোক্নবা অসিগুম্বা অচৌবা ফিরেপ অমা থবক ওইনা ওন্থোক্নবা কাশীদগী হেন্না ফবা মফম অমা লৈগদ্রা? কাশীগী ইচিল-নাওশিং ঙসি প্লেতফোর্ম অসিদা অচৌবা থৌরম অনি পাঙথোক্লি। ভারত সরকারগী অমসুং ভারত পুম্বগী লুপা করোর লিশিং ৬৪ হেনবা থৌরাং হৌদোকপগী থৌরম অসি কাশীগী শেংলবা লমদম অসিদা ঙসি পাঙথোক্লি। অমসুং অনিশুবদা, কাশী অমসুং পুর্ভঞ্চলগী চাউখৎ-থৌরাংগীদমক লুপা করোর লিশিং কয়াগী থৌরাং হৌদোকখি অমসুং অতোপ্পা ৱাহৈদা হায়রগনা অহানবগী থৌরম অমসুং হৌজিক পাঙথোক্লিবা থৌরম অসি পুল্লগা ঙসো মফম অসিদা লুপা করোর লিশিং ৭৫রোমগী থৌরাং পাইখৎনবা ৱারেপ লৌখি নত্ত্রগা হৌদোকখি হায়না ঐহাক্না থমজগে। কাশীদগী হৌদোক্কদবা স্কীম অসিদা মহাদেবকী থৌজালসু য়াওরি। অমসুং মহাদেবকী থৌজাল ফংলবদি মদু য়াইফবা ওই অমসুং মাইপাকপা ওই। অমসুং মহাদেবকী থৌজাল ফংলবদি অৱা-অনাদগী কোকপা হায়বা অসি মহৌশানি।

মরুপশিং,

ঙসি য়ু.পি. য়াওনা লৈবাক পুম্বগী হেল্থ ইনফ্রাস্ত্রকচর মপাঙ্গল কনখৎহন্নবা, তুংলমচৎতা লাইচৎ থোরকপা মতমদা ঙাকথোক্নবা অৱাংবা থাক্তা ঐখোয়না শেম-শাদুনা লৈনবা, ঐখোয়গী হেল্থ সিস্তেম অসি খুঙ্গংদগী ব্লোক লেবেলদা য়ৌহনদুনা থাজবা হেনগৎনবা অমসুং মরোমদোম লেপচবা ঙম্নবা ঙসি ঐহাক্না কাশীদগী লুপা করোর লিশিং ৬৪গী পি.এম. আয়ুশ্মান ভারত হেল্থ ইনফ্রাস্ত্রকচর মিসন জাতি মীয়ামদা খুৎশিন্নবা খুদোংচাবা অমা ফংজরে। ঙসি কাশীগী ইনফ্রাস্ত্রকচরগা মরী লৈনবা লুপা করোর ৫০০০গী প্রোজেক্তশিংবু হৌদোকচখ্রে। মসিদা ঘাতশিং শেমগৎনবা, গঙ্গা অমসুং ৱরুনা লুনানহন্নবা, থোংশিং, পার্কিংগী মফমশিং শেমগৎনবা, বি.ঐচ.য়ু.দা খুদোংচাবশিং ফংহনবগা মরী লৈনবা প্রোজেক্ত কয়া য়াওরি। হরাও-কুহ্মৈগী মতম অসিদা পুন্সিবু নুংঙাইনবা, হকচাং ফানা অমসুং য়াইফ নুংঙাইনা লৈনবা চাউখৎ-থৌরাংগী কুহ্মৈ অসি কাশীদা পাঙথোক্লি, নাকল অমরোমদা মসি লৈবাক মীয়ামদা অনৌবা ইনোৎ, অনৌবা থৌনা, অনৌবা থাজবা পীরি। মসিগীদমক ঙসি কাশী য়াওনা কাশীগী লম অসিদগী ইরৈবাকচা করোর ১৩০, ভারতকী কাচিন কোয়া খুদিংদা লৈরিইবা, ভারতকী খুঙ্গংদগী শহর ফাওবা, ঐহাক্না মীয়ামদা নুংঙাইবা ফোঙদোকচরি!

ইচিল-ইনাওশিং,

ঐখোয়গী মফম অসিদা হকশেল অসি খোঙথাং খুদিংদা য়াম্না মরু ওইনা লৌনৈ। হকচাং ফনা থম্বা ঙম্নবা শেল থাদবা অসি মতম চুপ্পদা অফবা ইনভেস্তমেন্ত অমা ওইনা লৌনৈ। অদুবু নীংখা তম্লবা মতুং শাংলবা মতম অসিদা হেল্থ ফেসিলিতীশিংদা লৈবাক অসিনা মীৎয়েং চংফম থোকপা অদু চংদনা লাকখি। মতম শাংনা লৈবাক অসিদা পাল্লকখিবা সরকারশিংনা লৈবাক অসিগী হেল্থকিয়র সিস্তেমগী অপুনবগী চাউখৎ থৌরাং পুরকপগী মহুৎ খুদোংচাবশিং অমত্তা ফংদনা লৈরকখি।  খুঙ্গংদা হোস্পিতাল অমত্তা লৈরমখিদে, হোস্পিতাল লৈতবনা লায়েংবীনবা অমত্তা লৈরমখিদে। ঐখোয়না ব্লোক্তা লৈবা হোস্পিতালদা চৎলুবা মতমদা তেস্ত তৌনবগী খুদোংচাবা লৈরমখিদে। করিগুম্বা তেস্ত তৌরবসু, রিজলশিংগী মতাংদা চম্মনবা পোকখি, মদু কয়াম মরিক চুম্মি হায়বগী মতাংদা চীংনবশিং পোকখি, ঐখোয়না দিস্ত্রিক্ত হোস্পিতালদা লাকপা মতমদা মসু অরু অনাবনি অমদি সর্জরী মথৌ তাই হায়বা খঙবা ঙমখি। অদুবু তৌগদৌরিবা সর্জরী অসিগী খুদোংচাবদি অমত্তা লৈখিদে অদুনা অচৌবা হোস্পিতালশিংদা চৎপা তাখি, অচৌবা হোস্পিতালদদি মী য়াম্না চিল্লি, মতম শাংনা ঙাইবা তাই। অনাবা অমদি মহাক্কী ইমুং-মনুংনা অসিগুম্বা মান্নবা ফীভমশিং মায়োক্নবা ঐখোয়না উবা ফংখ্রে। পুন্সিদা অৱাবা থেংনবা তাখি মসিনা মরম ওইরগা অনাবা অদুসু শরুক কয়া হেঞ্জিনখি, মসিগী মথক্তা মখোয়গী মথক্তা শেলগী পোৎলুম অদুনা তোঙান্না পুবা তাখি। 

মরুপশিং,

ঐখোয়গী হেল্থকিয়র সিস্তেমদা লৈরিবা অচৌবা অৱাৎপা অসিনা লায়রবা অমদি মিদল ক্লাসশিংগী মরক্তা লায়েংবগী মতাংদা লোইনাইদ্রবা অৱা পোৎলুম অমা পীরি। লৈবাক অসিগী হেল্থকিয়র সিস্তেমদা লৈরিবা খুদোংচাদবশিং অসি কোকহন্নবা লম্বী আয়ুশ্মান ভারত হেল্থ ইনফ্রাস্ত্রকচর মিসন অসিনা ওইরগনি। ঐখোয়গী হেল্থ সিস্তেম অসু তুংলমচৎতা লাইচৎ অমা হেক্তা থেংনবা ঙম্নবা শেম-শাদুনা লৈনবা ঙসি শেমগৎলি। লাইনাশিং ঙন্না খঙদোকপা ঙম্নবা হোৎনরি, ইনভেস্তিগেসন চত্থবদা থেংথবা তৌহল্লোই।  মসিগী পান্দমদি মথংগী চহি ৪-৫ অসিদা লৈবাক অসিদা খুঙ্গংদগী ব্লোক, ব্লোক্তগী জিলা, জিলাদগী রিজনেল অমসুং রিজনেলদগী জাতিগী থাকশিংদা ক্রিতিকেল হেল্থকিয়র নেতৱর্ মপাঙ্গল কনখৎহনবনি। মরু ওইনা ঐখোয়গী চীং অমদি অৱাং-নোংপোক থংবদা লৈরিবা রাজ্যশিং, হেল্থ ফেসিলিতীশিংদা অৱাৎপা লৈরিবা মফমশিং অসিদা হেন্না মীৎয়েং চংগনি। উত্তরাখন্দ অমদি হিমাচল গুম্বদা।

মরুপশিং,

লৈবাক অসিগী হেল্থ সেক্তরদা লৈরিবা তোঙান-তোঙানবা অৱাৎপশিং অসি মেনখৎনবা আয়ুশ্মান ভারত হেল্থ ইনফ্রাস্ত্রকচর মিসনগী অচৌবা হীরম ৩ লৈ। অহানবা অসিনা দাইগ্নোস্তিক্স অমসুং লায়েং চত্থনবা খুদোংচাবশিং নীংথিনা লৈহনবগা মরী লৈনৈ। মসিগী মখাদা হেল্থ অমসুং ৱেলনেস সেন্তরশিং অসি খুঙ্গংশিং অমসুং শহরশিংদা হাংলি, মসিদা লাইনাশিং ঙন্না খঙদোকপগী খুদোংচাবা ফংহল্লগনি। সেন্তরশিং অসিদা লেম্না মেদিকেল কন্সলতেসন ফংবা, লেম্না তেস্ত তৌবা, লেম্না হীদাক-লাংথক ফংহনবা অসিগুম্বা খুদোংচাবশিং ফংহল্লগনি। করিগুম্বা লাইনা অসি মতম চানা খঙদোক্লবদি লাইনা অসি হেন্না শোকচিনবগী চাং হন্থহনগনি। অরুবা অনাবশিংগী ওইনা জিলা ৬০০তা অনৌবা ক্রিতিকেল কিয়রগা মরী লৈনবা বেদ লিশিং ৩৫ জিলা ৬০০তা লৈহল্লি অমসুং জিলা ১২৫তা রিফরেল ফেসিলিতীশিং লৈহল্লগনি। জাতিগী থাক্তা ত্রেনিং অমসুং অতৈ কেপাসিতী বিল্দিংগীদমক সেন্ত্রেল হোস্পিতাল ১২দা মথৌ তাবা ফেসিলিতীশিং লৈহন্নবা থবকসু পাইখৎলি। স্কীম অসিগী মখাদা সর্জরীগা মরী লৈনবা নেতৱর্ক মপাঙ্গল কনখৎহন্নবা রাজ্যশিংদা পুং ২৪ মথৌ তৌগদবা ইমর্জেন্সী ওপরেসন সেন্তর ১৫ লৈহল্লগনি।

মরুপশিং,

স্কীম অসিগী অনিশুবা হীরম অসিনা লাইনাশিং দাইগ্নোসিস তৌনবগী তেস্তিং নেতৱর্কশিংগা মরী লৈনৈ। মিসন অসিগী মখাদা লাইনাশিংগী দাইগ্নোসিস তৌনবা, মখোয়বু মোনিতর তৌনবা মথৌ তাবা ইনফ্রাস্ত্রকচর শেমগৎকনি। লৈবাক অসিগী জিলা ৭৩০দা ইন্তিগ্রেতেদ পব্লিক হেল্থ লেব লৈহল্লগনি অমসুং ব্লোক লিশিং ৩দা ব্লোক পব্লিক হেল্থ য়ুনিত লৈহল্লগনি। নেতৱর্ক অসি মপাঙ্গল কনখৎহন্নবা রিজনেল নেস্নেল সেন্তর ফোর দিজিজ কন্ত্রোল ৫, মেত্রোপোলিতেন য়ুনিত ২০ অমসুং বি.এস.এল. লেব ১৫ লৈহল্লগনি।

ইচিল-ইনাওশিং,

অহুমশুবা হীরম অসি লাইচৎশিং স্তদী তৌনবা হৌজিক লৈরিবা রিসর্চ ইন্তিত্যুসনশিং অসি পাকথোক-চাউথোকহনবনি অমসুং মপাঙ্গল কনখৎহনবনি। হৌজিক লৈবাক অসিদা ভাইরেল দাইগ্নোস্তিক অমসুং রিসর্চ লেব ৮০ লৈ। মখোয় অসি মপাঙ্গল কনখৎহল্লগনি। লাইচৎশিংদা  বাইওসেফতী লেবেল-৩ লেবশিং মথৌ তাই। অসিগুম্বা লেব ১৫ মথৌ তৌহল্লগনি। মসিগী মথক্তা লৈবাক অসিদা অনৌবা নেস্নেল ইন্সতিত্যুত ওফ ভাইরোলোজী ৪ অমসুং নেস্নেল ইন্সতিত্যুত ফোর ৱান হেল্থ অমা লিংখৎলি। রিসর্চকী নেতৱর্ক অসি দবল্যু.ঐচ.ও.গী রিজনেল রিসর্চ প্লেতফোর্ম ফোর সাউথ এসিয়ানাসু মপাঙ্গল কনখৎহল্লগনি। মসিনা তাকপদি পি.এম. আয়ুশ্মান ভারত হেল্থ ইনফ্রাস্ত্রকচর মিসনগী খুত্থাংদা লায়েংবদগী হৌরগা ক্রিতিকেল রিসর্চ ফাওবদা লৈরিবা সর্ভিসশিংগী অপুনবা ইকোসিস্তেম অমা লৈবাক অসিগী কাচিন কোয়া থুংনা শেমগৎলগনি।

মরুপশিং,

তশেংবদি থবক অসি দিকেদ কয়াগী মমাংদা তৌফম থোকপনি। অদুবু ঐহাক্না ফীভম অসি কমদৌবগে হায়বগী মথৌ তাদে, ঐখোয়না হৌখিবা চহি ৭ অসিদা লেপ্তনা ফগৎহন্নবা থবক পাইখৎতুনা লাকখি অদুবু হৌজিক্তি এগ্রেসিব এপ্রোচকা লোয়ননা থবক অসি য়াম্না চাউনা পাইখৎপা মথৌ তারে। নুমিৎ খরনিগী মমাংদা ঐহাক্না দিল্লীদা লৈবাক পুম্বগীদমক খ্বাইদগী চাউবা লৈবাক শিনবা থুংবগী ইনফ্রাস্ত্রকচর প্রোগ্রাম, গতি শক্তি হৌদোকপা অদোম্না উবীরম্লগনি। ঙসি অনিশুবা ওইনা লৈবাক অসিগীদমক কাশীগী লমদম অসিদগী হকশেলগীদমক, লাইনাশিংদগী ঙাকথোক্তুনা লৈবাক অসিগী প্রজা খুদিংমক মশা-মউ ফনা থম্নবা অচৌবা মিসন অমগা লোয়ননা হকশেকগীদমক লুপা লিশিং ৬৪ খক্তা চংদুনা হৌদোক্কদৌরি।

মরুপশিং,

অসিগুম্বা হেল্থ ইনফ্রাস্ত্রকচর অমা শেমগৎপা মতমদা মসিনা হেল্থ সর্ভিস ফগৎহনবতা নত্তনা থবক ফংনবগী ফীভম অমসু ওইহল্লি। স্কীম অসিগী খুত্থাংদা দোক্তরশিং, পেরামেদিকশিং, লেব, ফার্মাসী, শিৎ-শেংবগী, ওফিস, ত্রেবেল-ত্রান্সপোর্ত, চান্না থক্নবা অসিগুম্বগী থবক কয়া পীরগনি। করিগুম্বা অচৌবা হোস্পিতাল অমা শাবা মতমদা শহর পুম্বনা মফম অদুদা লাক্তুনা লৈবা ঐখোয়না উবা ফংখ্রে। মসিনা হোস্পিতালগা মরী লৈনবা থবক-থৌরমশিংগী হিংনবগী লম্বীগী তুংনফম ওই। মসিনা অচৌবা শেন্মীৎলোনগী থবক-থৌরমগী তুংনফম ওই। মসিনা মরম ওইরগা আয়ুশ্মান ভারত হেল্থ ইনফ্রাস্ত্রকচর মিসন অসি শেন্মীৎলোন অমদি মরোমদোম লেপচনবগী পাম্বৈ অমা ওইরি। মসি হোলিস্তিক হেল্থকিয়ত অমগী পাইখৎপা খোঙথাংশিংগী শরুক অমনি। হোলিস্তিক হেল্থকিয়র হায়বদি মীপুম খুদিংদা হোংনা এক্সেসিবল ওইহনবনি। হোলিস্তিক হেল্থকিয়র হায়বদি হেল্থ লোয়ননা ৱেলনেসতা মীৎয়েং চংবা হায়বনি। স্বছ ভারত মিসন, জল জীবন মীসন, উজ্বালা, পোসন অভিয়ান, মিসন ইন্দ্রাধানুশকুম্বা স্কীমশিংনা লাইনশিংদগী মীওই করোর কয়াগী পুন্সি কনখি। আয়ুশ্মান ভারত য়োজনাগী মখাদা লায়রবা মীওই করোর ২দগী হেনবনা লেম্না লায়েংবা ফংখি অমসুং আয়ুশ্মান ভারত দিজিতেল মিসনগী খুত্থাংদা হকশেলগা মরী লৈনবা ইসু কয়ামরুম কোকহনখ্রে।

ইচিল-ইনাওশিং,

ঐখোয়গী মমাংদা চহি কয়া সরকার পাইরম্বশিংনা হেল্থকিয়র অসি শেল তান্নবা, স্কেমশিং চত্থনবা পাম্বৈ অমা ওইরমখি। লায়রবশিংগী অৱাবশিং উরবসু মখোয়না মদুদগী নাথৈদুনা চেল্লি। ঙসি কেন্দ্র অমদি রাজ্যদা লায়রবশিং, নমথবীরবা, হন্থনা য়েংবীরবা, শোত্থরবা, মিদল ক্লাস পুম্নমক অসিগী অৱাবা খঙবীবা সরকার অমা লৈরে। ঐখোয়না লৈবাক অসিদা হেল্থ ফেসিলিতীশিং অসি ফগৎহন্নবা অয়ুক অমদি নুমিদাং হোৎনরি। মমাংদা মীয়ামগী শেল অসি স্কেমশিংদা শীজিন্নরম্মি, অসিগুম্বা মীওইশিং অসিগী শেনখাওদা চংলমখি, ঙসিদি শেল অসি অচৌবা প্রোজেক্তশিংদা থাদরি। মসিনা মরম ওইরগা লৈবাক অসিনা পুৱারীদা খ্বাইদগী চাউবা লাইচৎ মায়োক্নবগা লোয়ননা আত্মনির্ভর ভারত অমা ওইনবা লুপা করোর লাখ কয়াগী ইনফ্রাস্ত্রকচর শেমগৎলি।

মরুপশিং,

মেদিকেল ফেসিলিতীশিং হেনগৎহন্নবা দোক্তরশিং অমসুং পেরামেদিকেল স্তাফকী মশিং অসিসু চপ মান্ননা খোঙজেল য়াংনা হেনগৎহনবা য়াম্না মথৌ তাই। য়ু.পি.দা খোঙজেল য়াংনা অনৌবা মেদিকেল কোলেজশিং হাংলকপগা লোয়ননা মেদিকেল সীতশিং অমসুং দোক্তরশিংগী মশিংদা চাউনা কান্নবা অমা ওইরগনি। সীতশিং হেন্না লৈরকপনা মরম ওইরগা লায়রবা মমা-মপাশিংগী মচাশিংনা হৌজিক দোক্তর অমা ওইবগী মঙলান শাগৎচবা অমদি থুংহনবা ঙম্লগনি।

ইচিল-ইনাওশিং,

লৈবাক অসিনা নীংখা তম্লবা মতুং চহি ৭০ অসিদা মেদিকেল কোলেজশিংদগী পুথোকখিবা দোক্তরশিংগী মশিংদগী মথংগী চহি ১০-১২দা লৈবাক অসিদা লৈগদবা দোক্তরগী মশিংনা হেল্লগনি। লৈবাক অসিদা মেদিকেলগী লমদা থবক কয়াম তৌরি হায়বা অদোম্না খন্থদুনা য়েংবীয়ু।  দোক্তরশিংগী মশিং হেনগৎলক্লবা মতমদা লৈবাক অসিগী কাচিন-কোয়া খুদিংদা দোক্তরশিং লায়না ফংলগনি। মসি অৱাৎপশিং মেনখৎতুনা অনীংবা খুদিংমক থুংহন্নবগী মাইকৈদা অয়ুক নুমিদাং খাইদনা চংশিল্লিবা অনৌবা ভারত অদুনি।

ইচিল-ইনাওশিং,

মমাংদা লৈবাক অসিদা নত্ত্রগা উত্তর প্রদেশতা করিগুম্বা মসিগী মওংদা থবক পাইখৎলম্বা তারবদি, ঙসি কাশীগী ফীভম অসি করম তৌরমগনি? মখোয়না মালেমগী খ্বাইদগী অরিবা শহর, ভারতকী কলচরেল হেরিতেজকী খুদম ওইরিবা কাশী অসি মথন্তা হুন্দোক্তুনা থমখি। চোন্থদুনা লৈরিবা ইলেক্ত্রিক ৱায়রশিং, শেম্বীদ্রবা লম্বী, ঘাতশিং অমসুং গঙ্গা মৈয়াগী ফত্ত্রবা ফীভম, জাম, পুলুসন, খুদোংচাদবশিং অদুমক হোংদ্রি। ঙসি কাশীগী থমোয় অসি হোংদ্রি, ৱাখল হোংদ্রি অদুবু হকচাং অসি ফগৎহন্নবা থমোয় শেংনা হোৎনরি। বরানাসিদা হৌখিবা চহি ৭তা পাইখৎখিবা থবক অসি মমাংগী দিকেদ কয়াদা অমুক্তা পাইখৎখিদ্রি।

ইচিল-ইনাওশিং,

রিং রোদ লৈরমদ্রিঙৈ চহি কয়াগী মমাংদা কাশীদা থোক্লম্বা জামগী ফীভম অদোম্না উবীখ্রে। ‘নো এন্ত্রী’ অসি হাংলকপা ঙাইবা অসি বনারসকী মীয়ামগী হৈনবী অমা ওইখি। হৌজিক্তি রিং রোদ শেম্লকপনা প্রয়াগরাজ, লখনৌ, সুল্তানপুর, আজমগর, গাজিপুর, গোরাখপু, দিল্লী, কোলকাতা, অদোম্না মফম অমা হেক্তা চৎনীংলকপা মতমদা শহর অসিদা লাক্তুনা মীয়ামদা খুদোংচাদবা থোকহনবগী মথৌ তাররোই। মসিতা নত্তনা রিং রোদ অসি হৌজিক বির্নোনদগী ঘাজিপুর ফাওবা লেন-মরিগী নেস্নেল হায়ৱে অমনা শম্নহনখ্রে। তোঙান-তোঙানবা মফমশিংদা রোদ সর্ভিস ফেসিলিতীশিংসু লৈহনখ্রে। মসিনা খুঙ্গং কয়া লোয়ননাপ্রয়াগরাজ, লখনৌ, গোরাখপুর অমসুং বিহার, নেপালদা চৎথোক-চৎশিন তৌবদা খুদোংচাহল্লে। মসিনা চৎথোক-চৎশিন তৌবদা লায়হনবতা নত্তনা বিজিনেস থৌগৎলগনি অমসুং ত্রান্সপোর্তকী মমলসু হন্থহল্লগনি।

ইচিল ইনাওশিং,

লৈবাক অসিদা দেদিকেতেদ ইনফ্রাস্ত্রকচর অমা শেমগৎত্রিফাওবা চাওখৎপগী খোঙজেল অসি মপুং ফারোই। ভরুনা তুরেলদা থোং অনি শাখিবগা লোয়ননা খুঙ্গং কয়াগী মীওইশিংনা সহরদা লাইনা চৎপা য়ারে। মসিনা প্রয়াগরাজ, ভাদোহি অমসুং মির্জাপুরদগী মীয়াম্না এয়র্পোর্ত চৎপদা চাঊনা খুদোংচাবা ফংলগনি। কার্পেত ইন্দস্ত্রী তৌরিবা মরুপশিংনসু কান্নবা অসি ফংলগনি অমসুং মা বিদ্যভাসিনি খুরুম্বা চৎকদবা লাইনিংবশিংনা এয়র্পোর্ততগী মির্জাপুর তম্না দাইরেক্ত ওইনা চৎপদসু কান্নবা ফংগনি।  সহর অসিগী মনুংদা অমসুং অকোয়বদা লৈরিবা মীয়াম্না খুদোংচানবা লম্বী, থোং, পার্কিং লোতশিংগুম্বগা মরী লৈনবা প্রোজেক্ত কয়ামরুম ঙসিদি কাশীদা লৈরিবা মীয়ামগীদমক্তা কত্থোকচরে। রেলৱে স্তেসন্দা লৈরিবা মোর্দর্ন এক্সিক্যুতিব লোঞ্জ অসিনা মখাতানা পেসেঞ্জরশিংদা খুদোংচাবা হেনগৎহল্লগনি।

মরুপশিং,

গঙ্গা শেংদোক্নবা অমসুং তরু তনান্না থম্নবা হৌখিবা চহিশিংদা থবক কয়ামরুম পাইখৎখ্রে, মসিগী ফল অদু ঙসিদি ঐখোয়না উবা ফংলে। য়ুমথোংশিংদগী অমোৎপা ঈশিং অদু গঙ্গাদা তাদনবা লেপ্পা লৈতনা থবক কয়ামরুম পাইখৎলি। হৌজিক্তি দ্রেন ৫দগী চেন্থরকপা সিৱেজশিং ত্রিৎ তৌনবা মোরদর্ন ত্রিৎমেন্ত প্লান্ত অমা রামনগরদা মথৌ তৌবা হৌরে। মসিনা মরম ওইরগা অকোয়বদা লৈরিবা মীওই লিশিং ৫০ হেনবনা হকথেংননা কান্নবা ফংখ্রে। গঙ্গা খক্তা নত্তনা ভরুনাসু লু-নান্না থম্নবা অহেনবা মীৎয়েংগা লোয়ননা থবক পাইখৎলি। মতম কুইনা মীরাইবীদুনা লৈরম্লবা ভরুনা অসি মুৎখিগদবগী ফীভমদা লৈরে। ভরুনা কন্নবা চেনেল্লাইজেসন প্লান অসি পাইখৎপনি। ঙসিদি ভরুনাদা অরুবা ঈশিং য়ৌরক্লে, অপীবা অমসুং অচৌবা দ্রেন ১৩সু ত্রিৎ তৌরি। ভরুনাগী তোর্বান অনিমক্তা খোঙলম্বীশিং, রেলিংশিং, লাইতিং, পক্কা ঘাত, স্তিয়রশিংগুম্বা ফেসিলিতী কয়ামরুম শেমগৎপা লোইরে।

মরুপশিং,

কাশী অসি লাইনিং লাইশোলগা লোয়ননা খুঙ্গংগী শেন্মীৎলোনগী য়াম্না মরুওইবা সেন্তর অমনি। কাশী য়াওনা পুর্বাঞ্চলগী মফম খুদিংমক্কী লৌমীশিংগী পোত্থোকশিং লৈবাক অসিগী খৈথেলশিংদা অমসুং মাপান্দা য়ৌহন্নবা হৌখিবা চহিশিং অসিদা ফেসিলিতী কয়ামরুম শেমগৎলে। পেরিসেবল কার্গো সেন্তরশিংদগী পেকেজিং অমসুং প্রোসেসিং ফাওবগী মোরদর্ন ইনফ্রাস্ত্রকচরশিং মফম অসিদা দিবেলপ তৌরি। মসিগী ইপিসোদ অসিদা লাল বাহাদুর শাস্ত্রী উহৈ অমসুং মনা-মশিংগী কৈথেল মোরসর্নাইজ তৌখি, মসি শেমগৎখিবা অসিনা লৌমীশিংদা খুদোংচাবা কয়ামরুম ফংহল্লগনি। শহনশাহপুরদা বাইও-সি.এন.জি শেমগৎখিবা অসিনা বাইওগ্যাসসু ফংহল্লগনি অমসুং লৌমীশিংদা ওর্গানিক্কী ওইবা হার মেত্রিক তোন লিশিং কয়ামরুম ফংহল্লগনি।

ইচিল ইনাওশিং,

করিগুম্বা হৌখিবা চহিশিং অসিদা কাশীগী মরুওইবা মাই পাকপশিংগী মনুংদা অমা ওইরিবদি বি.ঐচ.য়ু.না গ্লোবল এক্সিলেন্সকী মাইকৈদা খুমাং চাওশিল্লকপা অসিনি। ঙসিদি বি.ঐচ.য়ু.দা তেক্নোলোজীদগী হৌরগা হকশেল ফাওবগী মমাংদা লৈরমদবা খুদোংচাবশিং ফংহল্লে। লৈবাক অসিগী মফম কয়ামরুমদগী নহা ওইরিবা মরুপশিংনা মফম অসিদা মহৈ তম্নবা লাক্লি। মহৈরোয় চা কয়াগী মফম অসিদা শারিবা রেসিদেন্সিএল ফেসিলিতীশিং অসিনা নহা ওইরিবা ময়ামবু ফগৎহনবদা মতেং পাংলগনি। নুপী মহৈরোয় চা কয়াগী অখন্ননা শারিবা হোস্তেল ফেসিলিতী অসিনা মালভিয়াজীগী তুংগী ওইবা থৌরাং অদু খংনবা ইনোৎ অমা হাপ্লগনি। ইচানুপীশিং আৱাংবা অমসুং মোরদর্ন এজুকেসন ফংহন্নবা মসিনা মখোয়না মংজরিবা মংলান অদু ফংনবা ঐখোয়গী ৱারেপ অদু উবা ফংহল্লগনি।   

ইচিল ইনাওশিং,

মসিগী দিবেলপমেন্ত প্রোজেক্ত খুদিংমক অসিনা মীপান তাংদনবা ঐখোয়গী ৱারেপ অদুগী মশক তাক্কদৌরিবনি। কাশী অমসুং মসিগী অকোয়বদা লৈরিবা মফমশিং অসি মশক নাইরবা ক্লে আর্তিস্তশিং, ক্রাফমেন অমসুং মশক থোকপা ফীরোল পুথোক্লিবা ৱীভরশিংগীদমক মমিং চৎলি।  সরকারগী থৌরাংশিংনা মরম ওইরগা বরানাসিদা হৌখিবা চহি ৫ অসিদা খাদি অমসুং অতোপ্পা লশিংগী ইন্দস্ত্রীগী পোত্থোকশিংগী পুথোকপগী চাংদা চাদা ৬০ হেনগৎলকপা অমসুং য়োনবগী চাংদা চাদা ৯০ হেনগৎখ্রে। মরম অদুনা মফম অসিদা লৈরিবা মীপুম খুদিংমক্কী পুক্নিং ঐহাক্না চিংশিনজরি মদুদি লাক্কদৌরিবা দিৱালি অসিদা হায়রিবা মীওইশিং অসিগী দিৱালিসু ঐখোয়না পাঙথোকহনগদবনি। ঐখোয়গী য়ুম-কৈ লৈতেংবদগী হৌরগা ফীরোল অমসুং দিৱালিগী দিয়াশিং ফাওবা ঐখোয়না ভোকেল ফোর লোকেল ওইগদবনি। ধান্তেরাসতগী দিৱালি ফাওবা অদোম্না লোকেল পোৎ-চৈ কয়ামরুম লৈরবদি মীপুম খুদিংমক্কী দিৱালি অসি হরাউ-তয়াম্বনা থল্লগনি। অদুগা ঐহাক্না ভোকেল ফোর লোকেলগী মতাংদা হায়বা মতমদা ঐখোয়গী তি.ভি.দা লৈরিবা মীয়াম্নসু লৈবাক্কী থাউমৈশিং খক্তমক উৎলি। ভোকেল ফোর লোকেল হায়বসি ইচিল ইনাওশিং থাউমৈ খক্তদা লোইবা নত্তে, ঐহাক্কী ইরৈচাশিংগী হুমাং মমলনা শাজরবা পুথোকপা খুদিংমক, ঐহাক্কী লৈবাক অসিগী লৈহাওদগী পুথোকপা খুদিংমক অসি ঐগী ৱাখল্লোন্দা ভোকেল ফোর লোকেলনি। অদুগা ঐখোয়না লৈবাক অসিদা পুথোকচবা পোৎলমশিং লৈবা হৌখ্রবদি পুথোকপসু হেনগৎলগনি, থবক পীবসু হেনগৎলগনি, খ্বাইদগী লাইরবা মীওইশিংসু থবক ফংলগনি অমসুং মসিগী থবক অসি ঐখোয় পুন্না পাংথোকপা য়াগনি, মীয়াম পুম্নমক্না হোৎনবগা লোয়ননা অচৌবা অহোংবা অমা ঐখোয়না পুরকপা ঙমগনি।

মরুপশিং,

লৈবাক পুম্ববু আয়ুশ্মান ভারত হেল্থ ইনফ্রাস্ত্রকচর মিসনগী অমসুং কাশীবু দিবেলপমেন্ত প্রোজেক্ত কয়ামরুমগীদমক হন্না হন্না নুংঙাইবা ফোঙদোকচরি। লাক্কদৌরিবা হরাউ কুহ্মৈশিং অসিগীদমক পুম্নমকপু অমুক্কা হন্না য়াইফ-পাউজেল পীজরি, খুমরুমজরি!

*****