আয়ুশ অমসুং পোর্তস, শিপ্পিং এন্দ ৱাতরৱেজকী কেন্দ্র মন্ত্রী শ্রী সর্বানন্দ সোনোৱালনা অসুম্না ফোঙদোকখি, লৈবাক অসিগী ইকনোমিক গ্রোথকী মথংগী ফেজকীদমক অৱাং-নোংপোক থংবা লমদমদা অচৌবা মতিক-ময়াই চেল্লি। লমদম অসিদা লৈরিবা ফ্লোরা মখলশিং অসিগী লোয়ননা য়েলহৌঙৈগী ওইবা হীদাক-লাংথক্কী মমল য়াম্লবা হেরিতেজ অসিনা লমদম অসিদা আয়ুশতা য়ুম্ফম ওইবা ইন্দস্ত্রীশিং শেমগৎপদা কেতলিস্ত অমা ওইনা মথৌ তৌরগনি। কেন্দ্র সরকারনা অৱাং-নোংপোক্কী শেন্মীৎলোনগী লৈরিবা ফীভম অসি ফগৎহন্নবা হোৎনখি অমসুং ভারতকী মথংগী ইকনোমিক গ্রোথকীদমক লোঞ্চ পেদ পীরি।

মেঘালয়গী রি ভোই জিলাদা লৈবা উমিয়মদা পাঙথোকখিবা নোর্থ ইস্তর্ন ইন্সতিত্যুত ওফ আয়ুর্বেদ এন্দ হোমিওপেথীগী য়েংশিন মীফম অমদা মন্ত্রীনা শরুক য়াখিবনি। পাউমীশিংদা ৱা ঙাংলদুনা মন্ত্রীনা লমদম অসিগী মহৈরোয়শিংগীদমক খ্বাইদগী ক্বালিতী লৈবা এজুকেসন ফংহনবা মথৌ তাবগী মতাংদা অকনবা ৱাফম থমখি। আয়ুর্বেদ নর্সিং অমসুং ফার্মাসী লোয়ননা পঞ্চকর্ম থেরাপীদা প্রোফেস্নেল শোর্ত-তর্ম কোর্সশিংদা খ্বাইদগী ফবা এজুকেসন থমদুনা অৱাং-নোংপোক্কী অমসুং লৈবাক অসিগী অতৈ শরুকশিংদগী মহৈরোয়শিংদা ফংহনগদবনি। মন্ত্রীনা ইকনোমিক গ্রোথ থৌগৎপা ঙমগদবা মালেমগী থাক্তা মেনপাৱর ত্রেনিং পীনবা অকনবা ৱাফম থমখ্রে।

কেন্দ্র মন্ত্রীনা হায়খি সরকারনা অৱাং-নোংপোক অসি ভারতকী গ্রোথ ইঞ্জিন ওইহন্নবা হোৎনখি। হীরম অসিদা মহাক্না ঐখোয়দা মহৌশানা পীরিবা মমল য়াম্লবা অমসুং মখল কয়াগী ফ্লোরাগী মতাংদা ফোঙদোকখি। আয়ুশতা য়ুম্ফম ওইবা ইন্দস্ত্রীশিংনা অৱাং-নোপোক অসিবু মখোয়গী অনৌবা য়ুনিতশিংগী মথংগী লমথুংফমশিং ওইনা উনবা অচৌবা খুদোংচাবা অমা লৈরি। আয়ুশ মন্ত্রালয়গী মখাদা লৈরিবা এন.ই.আই.এ.ঐচ. অমসুং অতৈ মরু ওইবা ত্রেনিং সেন্তরশিংদা মালেমগী থাক্তা প্রোফেস্নেলশিং ত্রেন তৌবা অসিনা লমদম অসিগী চাউখৎ-থৌরাং খোঙজেল য়াংশিনহনবদা লমদম অসিদা ফংলিবা ফ্লোরানা মতেং পাংশিল্লগনি।

কেন্দ্র মন্ত্রীনা হায়খি সরকার অসিনা এন.ই.আই.এ.ঐচ.তা মোদর্ন ইনফ্রা দিবেলপ তৌনবা হোৎনখি। সরকার অসিনা ইন্সতিত্যুত অসিদা পি.জি. কোর্সশিং হৌনবা খোঙথাংশিং লৌখৎলগনি অমসুং আয়ুর্বেদকা চাং চপ মান্ননা হোমিওপেথী ইনতর্নশিংগী স্তাইপেন্দ হেনগৎহল্লগনি হায়না মহাক্না লাউথোকখি।

মহাক্কী মন্ত্রালয়গী মকোক থোংবা ওফিসিএলশিংগা লোয়ননা পাঙথোকপা য়েংশিন মীফম অদুদা কেন্দ্র মন্ত্রীনা আয়ুশকী মখাদা লৌখৎলিবা থৌশিল-থৌরাংশিংদা কেপাসিতী লৈহন্নবা সরকারনা লৌখৎখিবা খোঙথাংশিং অদু য়েংশিনখি। মহাক্না শেমদোক-শেমজিন খরা তৌদুনা থৌশিল-থৌরাংশিং অসিগী ফলশিংনা এন্দ য়ুজরশিং অমসুং মীয়ামদা অথুবদা য়ৌহন্নবা পাউতাক পীখি। 

***