ভারতকী উপ রাস্ত্রপতি, শ্রী এম. ভেঙ্কয়া নাইদুনা ঙসি নোর্থ ইস্তর্ন কাউন্সিলদা এন.ই. লমদম চাউখৎপদা থিন্থহল্লিবা খুদোংচাদবশিংগী ৱারোইশিনবু অথুবা মতমদা পুরক্তুনা এক্সলরেতেদ দিভেলপমেন্তপু তাঙ্কক নাইনা হেনগৎহন্দুনা লমদম অসি হেন্না চাউখৎহন্নবা খঙহনখ্রে।

“অৱাং-নোংপোক লমদম চাউখৎপদা নোর্থ ইস্তর্ন কাউন্সিলগী হোংলক্লিবা থৌদাং”গী মতাংদা শিল্লোংদা পাংথোকপা ৱর্কশোপ্তা ৱা ঙাংবদা, উপ রাস্ত্রপতিনা ভারতকী তোঙান-তোঙানবা মফমশিংগী চাউখৎপদা খল মান্নদ্রবদি ভারতকী চাউখৎপা মপুং ফাবা ঙম্লোই হায়বা ৱাফম ফোংদোকখি। “অৱাং-নোংপোক লমদম্না চাউখৎপদা ভারত চাউখৎকনি, লমদম অসিদা চাউখৎপা থিন্থবা মতমদা ভারতকী চাউখৎপসু থিন্থগনি”, হায়না মহাক্না ফোংদোকখি।

মহাক্না অৱাং-নোংপোক রাজ্যশিংনা তোঙানবা হীরমদা থেংনবা খ্বাইদগী ফবা থৌওং হায়নদুনা অমগা অমগগী খুদোংচাবা লৌসি হায়খি। “কেন্দ্র, রাজ্য অমসুং লোকেল বোদীশিংনা চাউখৎপদা শিংনরিবা হীরমশিংদা পুন্না থবক তৌমিন্নদুনা মদুগী ৱারোইশিন পুরক্তুনা ভারতনা তীম ইন্দিয়া ওইনা থবক তৌমিন্নগদবনি”, হায়না শ্রী নাইদুনা ফোংদোকখি।

এন.ই.সি কাউন্সিলনা পুরকখিবা মশক থোকপা মাই পাকপা কয়াগীদমক্তা থাগৎলদুনা, মহাক্না হায়খি, “ঐখোয়না মমাংগী মাই-পাকপশিংখক্তদা মখা পোনগদবা নত্তে। ঐখোয়না পাংথোক্কদবা কয়া অমা লৈরি”। অৱাং-নোংপোক লমদম অমসুং মসিগী মীয়ামগী য়াইফনবগীদমক্তা কাউন্সিল অসিনা মতম্না হোংলকপগী মতুং ইন্না লাকপা শিংনবশিংগী ৱারোইশিন পুরক্নবা শেম-শাবগী থৌওংসিংদা অমুক্কা হন্না মিৎয়েং চঙবগী খ্বাইদগী চান্নবা মতমদি হৌজিক্নি হায়না মহাক্না মখা তানা ফোংদোকখি।

পর্ফোরমেন্স অমসুং প্রদক্তিভিতী হেনগৎপগী পান্দমগা লোয়ননা প্রধান মন্ত্রী, শ্রী নরেন্দ্র মোদীভাইনা লুচিংবা সরকারনা হীরম খুদিংদা অহোংবা পুরক্তুনা পায়খৎলিবা খোঙথাং কয়াগী মতাংদা পল্লদুনা, শ্রী নাইদুনা হায়খিবদা কারবার তৌবা নুংঙাইহনবা অমসুং পুন্সি মহিং নুংঙাইহনবনা খ্বাইদগী মরু ওইবা পান্দম্নি হায়খি। “হৌজিকমক তৌদবা য়াদে খন্দুনা থবক পাংথোকপনা হৌজিক মতমগী অনৌবা কাংলোন ওইরবনি”, হায়না মহাক্না মখা তাখি।

থৌশিল-থৌরাং নত্ত্রগা প্রোগ্রাম অমা হৌদোকপদগীনা থবক ওইনা পাংথোকপা ফাওবদা, অপাম্বা পান্দমগী মপুং ফাবা কান্নবা লৌনবা ময়েক লারবা থৌওং অমসুং মতম য়াৎথোকপগী থৌওং পাংথোক্লি। স্বচ্ছ ভারত মিসন অমসুং “পুম্নমক্কী য়ুম শাবা” য়াওনা তোঙান-তোঙানবা খোংথাংশিংগী মমিং পল্লদুনা, উপ রাস্ত্রপতিনা হৌজিক লৈরিবা অনৌবা ৱাখল্লোন অমসুং পোলিসী ইনভাইরনমেন্তশিংনা নোর্থ ইস্তর্ন কাউন্সিলবু তেংবাংগনি হায়বগী থাজবা ফোংদোকখি।

 “ঐখোয়না হৌজিক খোঙজেল তপ্পা য়াদ্রে। ঐখোয়না মগুন লৈতবা থৌওংশিংদা পেন্থোকপা য়াফ্রে। ঐখোয়না খ্বাইদগী হেন্না ফবদগী হেন্না অফবা তৌগদবনি হায়না চৎকদবনি”, হায়না মহাক্না থমখি।

হীরম অসিগা মরী লৈননা, উপ রাস্ত্রপতিনা প্রোগ্রাম খুদিংদা থাজবা য়াবা অমসুং মনুং-মপান ফাওনা উবগী ফিভম শোইদনা লৈহনবগী তঙাই ফদবগী মতাংদা মিৎয়েং চঙখি অমসুং দাইরেক্ত বেনেফিৎ ত্রান্সফরগুম্বা স্কিম্না অপাম্বা বেনিফিশরীশিংদা কান্নবা ফংহনবদা য়াম্না তেংবাংগনি হায়খি।

লৈবাক্না নীংতম্বগী ৭৫শুবা চহিগী হরাওবা ফোংদোক্লিবা অমসুং মথংগী চহি ২৫গী থৌরাং য়াৎলিবা তাঞ্জা অসিদা, উপ রাস্ত্রপতিনা মশা-মউ ফবা, মহৈ-মশিং হৈবা, স্কিল লৈবা অমসুং মীয়াম পুন্না আত্মানির্ভর ভারতকী থৌওংদা শরুক য়ামিন্নবা ভারত অমা শেম্বগা লোয়ননা লাইরবা, খল-মান্নদবগী ফিভম মুত্থৎপা, শহর-খুঙ্গং চাউখৎপগী খেন্নবগী চাং হন্থহনবা, এজুকেসন সীস্তেম শেমদোকপা অমসুং মীয়ামগী হকশেলগী ইনফ্রাস্ত্রকচর ফগৎহনবদসু মিৎয়েং চঙখি।

উপ রাস্ত্রপতিনা হায়খি, “ঐখোয়দি অনিঙবা অপাম্বা য়াম্না চাউবা ভারতনি। মতিক লৈবা অৱাং-নোংপোক লমদম্না চাউরাকপা মীশিং মিলিয়ন ৪৫গা লোয়ননা, মশাগী তোঙানবা অনিঙবা লৈজৈ”। নোর্থ ইস্তর্ন কাউন্সিলনা মঙলানশিং অসি পুন্সিনবদা, থৌরাং য়াৎপদা, খোঙজেল য়াঙখৎহনবদা অমসুং রাজ্য সরকারগা তেংবাংনদুনা পুন্না হোৎনমিন্নবদা তেংবাংবা ঙম্বা অফবা খুৎলাই ওইবা য়াই।

কাউন্সিল অসি শেমখিববু অৱাং-নোংপোক্কী লমদমদা চাউখৎপা পুরকপগী মাইকৈদা মশক থোকপা থৌওং অমনি হায়রদুনা, মহাক্না কাউন্সিল অসিগী মাই পাকপা কয়াগী মতাংদা পাউদমখি, মসিগী মনুংদা অতোপ্পা থবকশিংগা লোয়ননা কিলোমীতর ১১,০০০ হেন্না শাংবা লম্বী শোরোক শাখিবা, পাৱর ত্রান্সমিসন কিলোমীতর ১০,৩৪০ তিংদুনা মৈ পীখিবা অমসুং মশক-মমিং লৈবা ইন্সতিত্যুসন শেম-শাখিবগী থবক থৌরম কয়া য়াওখি।

হৌখিবা চহি ৬-৭তা লমদম অসিগী শেন্মিৎলোন্দা অফবা মওংদা অহোংবা কয়াদা হরাওবা ফোংদোক্লদুনা, মহাক্না লমদম অসিগী রাজ্য খুদিংমক্কী পর কেপিতা নেত স্তেত দোমেস্তিক প্রদক্তসু মশক থোক্না হেনগৎখি হায়না ফোংদোকখি।

শেন্মিৎলোন অমসুং হ্যুমেন দিভেলপমেন্ত প্রোফাইলদা মপুং ওইনা চাউখৎপগী ফিভম লৈবগা লোয়ননা, শ্রী নাইদুনা কাউন্সিল অসিনা লমদম অসিগী সোসিও-ইকোনোমিক দিভেলপমেন্ততা খেন্নবা লৈরিবা অসিবু হন্থহনবদা মিৎয়েং চঙহন্নীংবা পাম্মি অমসুং নিতি আয়োগনা ফোঙবা নোর্থ ইস্তর্ন রীজন সোসিএল দিভেলপমেন্ত গোল্স ইন্দেক্স, ২০২১-২২না হীরম অসিগী ময়েক লারবা ফিভম তাক্লি হায়না ফোংদোকখি। ইন্দেক্স অসি চাউখৎপগী চাং য়েংশিনবা অমসুং মথৌ তাবা খোঙথাং পায়খৎপগী খ্বাইদগী কান্নবা খুৎলায় অমনি। কাউন্সিলনা দেতাশিং অসি নীংথিনা য়েংশিনগদবনি অসুং হৌজিক্কী অমসুং তুংদা ওইরক্কদবা শিংনবশিং থেংনবা থৌরাংশিং নৌনা য়াৎকদবনি।

মফন অসিদা খ্বাইদগী অয়েৎপা পীরম্বা লালহৌবা অমসুং মসিগা মরী লৈনবা পামদবা থৌদোক থোকপগী চাংনা হন্থদুনা মতম শাংনা লাক্লে হায়রদুনা, লমদম অসিনা খোঙজেল থুনা চাউখৎপদা তংদু-লৈতানা লৈবগী য়াম্না তঙাই ফদবা লৈ হায়না মহাক্না অমুক্কা হন্না ফোংদোকখি। “ৱারী শান্নবনা খুদোংচাদবা অমা কোকহনবগী অমত্তা ঙাইরবা পাম্বৈনি। ঐখোয় অসি লৈবাক অমনি, রাজ্যশিংনা শিংনবা অমা হেক্তবু লোইশিন্নবা তত্তনা ৱারী শাদুনা লৈগদবনি”, হায়না মহাক্না মখা তাখি।

লমদম অসিগী নহাশিংনা, লৈবাক্কী অতোপ্পা নহাশিংগুম্না, লৈবাক অসিগী পুৱারীদা অনৌবা লমাই অমা ইবা পাম্মি। মতিক চাবা থবকশিংগী খুত্থাংদা মখোয়দা মসিগী খুদোংচাবা পীগদবনি হায়না মহাক্না থমখি।

হন্দক্কী চহিগী জনুৱারীদা পাংথোকখিবা কাউন্সিল অসিগী ৬৯শুবা প্লেনরী মীফমদা রাজ্য মশেলগী মরক্তা লৈনরিবা ঙমখৈগী উংখৎনবা অমসুং প্রাইভেৎ ইনভেস্তমেন্তকী পুক্নিং চিংশিনবগী মরু ওইবা হীরম অনি শকখঙখিববু নিংশিংলদুনা, উপ রাস্ত্রপতিনা ওন্তোপ্রিনর্শিপ, ভেঞ্চর ফন্দ, স্তার্ত-অপ অমসুং স্কিল দিভেলপমেন্ত পুক্নিং থৌগৎপগী খুত্থাংদা প্রাইভেৎ ইনভেস্তমেন্ত খুমাং চাউশিলহনবগী মথৌ তারে হায়না ফোংদোকখি।

মখা তারকপদা, উপ রাস্ত্রপতিনা রাজ ভবন্দা কলচরেল প্রোগ্রাম অমদা শরুক য়াখি অমসুং তুংদা তোঙান-তোঙানবা হীরমদা মিঙচৎ পুরক্লবা মেঘালয় রাজ্যগী মীওইশিংগা উন্নদুনা ৱারী শাখি।

শ্রী কোন্রাদ সাংমা, মেঘালয়গী মুখ্য মন্ত্রী; শ্রী কিশন রেদ্দী, দোনর মন্ত্রালয়গী মন্ত্রী; শ্রী বি.এল. ভর্মা, দোনর মন্ত্রালয়গী রাজ্য মন্ত্রী; শ্রী লোক রঞ্জন, দোনর মন্ত্রালয়গী সেক্রেতরী; শ্রী কে. মোসেস চলায়, নোর্থ ইস্তর্ন কাউন্সিলগী সেক্রেতরী অমসুং অতোপ্পা মীথুংলেন্না থৌরম অদুদা শরূক য়াখি।

মহাক্কী অপুনবা ৱারোল মখাদা পীরিঃ

লমদম অসিবু চাউখৎহন্নবা কাউন্সিল অসিনা লৌরিবা মরূ ওইবা থৌদাংগী মতাংদা অদোমগী মফমদগী তাবগী খুদোংচাবা ফংলিবা ঙসিগী “অৱাং-নোংপোক লমদম চাউখৎপদা নোর্থ ইস্তর্ন কাউন্সিলগী হোংলক্লিবা থৌদাং”গী ৱাখল্লোন্দা পাংথোকপা  মরু ওইরবা ৱর্কশোপ অসিগা মরী লৈনবা অসিদা ঐহাক্না য়াম্না নুংঙাইবা ফাওই”।

মালেম অসি হীরম কয়াদা য়ুম্না থুনা চাউখৎলক্লি অমসুং ভারতসু মালেমগী মরু ওইবা শেন্মিৎলোন অমা ওইনবা খোঙজেল য়াঙনা শেমদোচরক্লি।

ঐখোয়না চাউরবা, মিৎয়েং শানবা অমসুং কান্নগদবা থৌশিল-থৌরাং কয়া য়াত্তুনা থম্লে।

ঐখোয়গী মীয়ামগী পুন্সি মহিং ফগৎহন্নবা খোঙথাং কয়া অমা শেমদুনা থবক ওইনা পাংথোক্লি।

ঐখোয়না তুং কোইনা চৎনবা, মীপুম খুদিংমক শরুক য়ামিন্নদুনা চাউখৎপগী মাইকৈদা লৈবাক অসিনা খোংদানবা খোঙফম চেত্তুনা লৈরে। ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’ হায়বসিনা ঐখোয়গী মপুং ওইবা ৱাখল্লোন্নি।

নুংশিরবা ইচিল ইনাওশিং,

ভারতকী তোঙান-তোঙানবা মফমশিংগী চাউখৎপদা খল মান্নদ্রবদি ভারতকী চাউখৎপা মপুং ফাবা ঙম্লোই। অৱাং-নোংপোক লমদম্না চাউখৎপদা ভারত চাউখৎকনি, লমদম অসিদা চাউখৎপা থিন্থবা মতমদা ভারতকী চাউখৎপসু থিন্থগনি।

ঐখোয়গী লৈবাক্কী চাউরবা মঙলান লৈ।

ঐখোয়না নীংতম্বগী ৭৫শুবা চহিগী হরাওবা ফোংদোক্লি অমসুং মথংগী চহি ২৫গী থৌরাং য়াৎলিবসিদা, ঐখোয়না ইশাবু লৈঙাকপগী মওং, ঐখোয়না মীয়ামগী থৌশিল-থৌরাং য়াৎপগী মওং-মতৌ অমসুং মীয়ামদা য়ুম্ফম ওইবা প্রোগ্রামগী খুত্থাংদা ঐখোয়গী মীয়ামগী মপাঙ্গল হাপ্পগী থৌওংদা মশক থোক্না শেমদোকপগী ফিভম উবা পাম্লি।

মশা-মউ ফবা, মহৈ-মশিং হৈবা, স্কিল লৈবা অমসুং মীয়াম পুন্না আত্মানির্ভর ভারতকী থৌওংদা শরুক য়ামিন্নবা ভারত অমা শেম্বগী পান্দমগা লোয়ননা খম-থেংনা লাইরবা অমসুং খল-মান্নদবগী ফিভম মুত্থৎপা, শহর-খুঙ্গং চাউখৎপগী খেন্নবগী চাং হন্থহনবা, এজুকেসন সীস্তেম শেমদোকপা অমসুং মীয়ামগী হকশেলগী ইনফ্রাস্ত্রকচর ফগৎহন্নবা ঐখোয়না পান্দম থম্লি।

ঐখোয়না আত্মানির্ভর, মরোমদোম-লেপচবা ঙম্বা, মীয়ামগী অনিঙবা-অপাম্বা থুংহনবা ঙম্বগী মতিক লৈবা ভারত অমা শেম্বগী মিৎয়েং য়েংলি। ঐখোয়না মীয়াম্না চত্থোক চৎশিন তৌবদা লাইহন্দুনা, নীংথিনা পাউ ফাওনবা, লৌশিং, অখঙ-অহৈ, হৈ-শিংবা, নাৎকী ল অমসুং চাউখৎপগী ভেল্যু লান্নবা য়াবা নীংথিনা শম্নরবা শ্রেস্থ ভারত অমগী মিৎয়েং য়েংলি। অমনা অমবু ইকায় খুম্নবা অমসুং পুক্নিং থৌগৎনবগী ইথিলগা লোয়ননা তোঙান-তোঙানবা মগুন চেনবগী থৌওংগী হরাওবা ফোংদোকমিন্নদুনা অমত্তা ওইনা চাউখৎমিন্নবা ভারত অমা ঐখোয়না পাম্লি।

ঐখোয়দি মতিক লৈবা ভারতনি। অদুগা চাউরাকপা মীওই মিলিয়ন ৪৫ লৈবা মতিক লৈরবা  অৱাং-নোংপোক লমদমগীসু মশাগী মঙলান লৈজরি।

নোর্থ ইস্তর্ন কাউন্সিলনা মঙলানশিং অসি পুন্সিনবদা, থৌরাং য়াৎপদা, খোঙজেল য়াঙখৎহনবদা অমসুং রাজ্য সরকারগা তেংবাংনদুনা পুন্না হোৎনমিন্নবদা তেংবাংবা ঙম্বা অফবা খুৎলাই ওইবা য়াই।

হোংলক্লিবা মতমগা চান্ননা চৎপা ঙম্নবগীদমক্তা, নীংথিনা থৌরাং য়াত্তুনা থবক পাংথোকপদা পাউখুম লোইনা লৈ। ইং ১৯৭১দা রিজনেল এদভাইজরী বোদী ওইনা শেমখিবা নোর্থ ইস্তর্ন কাউন্সিলবু ইং ২০০২দা মেম্বর রাজ্য ৮গী মরক্তা পুন্না কান্নবা লৌমিন্নবা য়ানবা থবক পায়খৎপদা অমত্তা ওইনা তাথোক-তাশিন তৌবা য়ানবগীদমক্তা রিজনেল প্লান্নিং এজেন্সী ওন্থোকখি।

থৌরাং য়াৎপা হায়বসি অখন্নবা মরু ওইবা ৱাখল্লোন অমসুং থৌওংশিংদা য়ুম্ফম ওইদুনা করি তৌগনি অমসুং করম্না তৌগনি হায়বগী অপুনবা থৌওংদুবুনি। নীংথিনা থৌরাং য়াৎপদা ৱাখলদা মওং-মতৌ শাগৎপা ঙম্বা অমসুং অপাম্বা মশক খঙবগী মথৌ তাই।

থৌরাং লৈতবা মিৎয়েংদি মঙগুম্বনি। নীংথিনা থবক পাংথোকপা থৌরাংনা মঙলান অমবু অসেংবা ওইহল্লি।

নোর্থ ইস্তর্ন কাউন্সিলগী হৌজিক ফাওবগী খোঙচৎশিং অসি মশক থোকপা মহৈদা ওন্থোক্লিবা মখোয়গী মিৎয়েং, থৌরাং অমসুং ৱাখলদা অনিঙবা-পাম্বগী মওং উবগী থৌওংদা য়ুম্ফম ওইরগা ওনবা য়াগনি।

কাউন্সিল অসিনা তোঙানবা হীরম কয়াদা থাগৎফম থোকপা থবক কয়া পাংথোকখিবগীদমক্তা ঐহাক্না নুংঙাইবা ফাওই। কাউন্সিল অসি শেমখিবসি অৱাং-নোংপোক্কী লমদমদা চাউখৎপা পুরকপগী মাইকৈদা মশক থোকপা থৌওং অমনি। কিলোমীতর ১১,০০০ হেন্না শাংবা লম্বী শোরোক শাখিবা, পাৱর ত্রান্সমিসন কিলোমীতর ১০,৩৪০ তিংদুনা মৈ পীখিবা, মেগাৱাৎ ৭০০কী পাৱর জেনেরেল কেপাসিতী খিনবা ঙমখিবা, মশক-মমিং লৈবা ইন্সতিত্যুসন শেম-শাখিবা, মান্নবা শিংনবা কয়াবু পুন্সিন্দুনা মশক খঙদোকখিবশিং অসি কাউন্সিল অসিগী পনবা য়াবা মাই পাকপশিংনি। ঐখোয় খুদিংনা মসিগীদমক্তা চাউথোকচরিবনি।

অদুবু, ঐখোয়না মমাংগী মাই-পাকপশিংখক্তদা মখা পোনগদবা নত্তে। ঐখোয়না পাংথোক্কদবা কয়া অমা লৈরি

অৱাং-নোংপোক লমদম অমসুং মসিগী মীয়ামগী য়াইফনবগীদমক্তা কাউন্সিল অসিনা মতম্না হোংলকপগী মতুং ইন্না লাকপা শিংনবশিংগী ৱারোইশিন পুরক্নবা শেম-শাবগী থৌওংসিংদা অমুক্কা হন্না মিৎয়েং চঙবগী খ্বাইদগী চান্নবা মতমদি হৌজিক্নি হায়না মহাক্না মখা তানা ফোংদোকখি।

পর্ফোরমেন্স অমসুং প্রদক্তিভিতী হেনগৎপগী পান্দমগা লোয়ননা প্রধান মন্ত্রী, শ্রী নরেন্দ্র মোদীভাইনা লুচিংবা সরকারনা হীরম খুদিংদা অহোংবা পুরক্তুনা খোঙথাং কয়া পায়খৎলি।

কারবার তৌবা নুংঙাইহনবা অমসুং পুন্সি মহিং নুংঙাইহনবনা খ্বাইদগী মরু ওইবা পান্দম্নি। হৌজিকমক তৌদবা য়াদে খন্দুনা থবক পাংথোকপনা হৌজিক মতমগী অনৌবা কাংলোন ওইরবনি।

থৌশিল-থৌরাং নত্ত্রগা প্রোগ্রাম অমা হৌদোকপদগীনা থবক ওইনা পাংথোকপা ফাওবদা, অপাম্বা পান্দমগী মপুং ফাবা কান্নবা লৌনবা ময়েক লারবা থৌওং অমসুং মতম য়াৎথোকপগী থৌওং পাংথোক্লি। স্বচ্ছ ভারত মিসন, হাউজিং ফোর ওল, স্মার্ত সিতী মিসন, ফাইনেন্সিএল ইনক্লুজন, বেনেফিশরীশিংগী ফংফম থোকপশিং দিজিতেলগী খুত্থাংদা পীবা, নেস্নেল হাইৱে শাবা অমসুং তোঙান-তোঙানবা ইনফ্রাস্ত্রকচর প্রোজেক্তকুম্বা খোঙথাং কয়াদগী হায়রিবশিং অসি ময়েক শেংনা খঙবা ঙম্লে। হৌজিক লৈরিবা অনৌবা ৱাখল্লোন অমসুং পোলিসী ইনভাইরনমেন্তশিংনা নোর্থ ইস্তর্ন কাউন্সিলবু তেংবাংগনি।

ঐখোয়না হৌজিক খোঙজেল তপ্পা য়াদ্রে। ঐখোয়না মগুন লৈতবা থৌওংশিংদা পেন্থোকপা য়াফ্রে। ঐখোয়না খ্বাইদগী হেন্না ফবদগী হেন্না অফবা তৌগদবনি হায়না চৎকদবনি।

অৱাং-নোংপোক লমদম্না মসিগী চাউখৎপা থিন্থহনবা পুৱারী ওইবা শিংনবা কয়া চেন্নদুনা চৎলি। ঐখোয়না শিংনবশিং অসি অথুবা মতমদা লোইশিন্দুনা তুংলমচত্তা খোঙজেল থুনা অমসুং থাজবগা লোয়ননা চঙশিনগে হায়রবদি হৌজিক চত্থরিবা অফবা থবকশিংদা য়ুম্ফম ওইদুনা অমসুং লমদম অসিগী মীয়ামগী পাঙ্গল শিজিন্নদুনা হৌজিকমক হোৎনগদবনি।

লমদম অসিদা এক্সলরেতেদ দিভেলপমেন্তপু তাঙ্কক নাইনা হেনগৎহন্দুনা কাউন্সিল অসিনা লমদম অসিবু হেন্না চাউখৎপগী লম্বীদা থমগদবনি।

লমদম অসিগী শিংনবশিং মশক খঙদোকপা অমসুং চাউখৎপা পুরক্নবগীদমক্তা মাংজিল থানা চঙশিনবগী তঙাই ফদবা লৈবনা ইং ৯০গী দিকেদকী অহৌবা শরুক্তা “লুক ইস্ত পোলিসী” লৈহনখি। অৱাং-নোংপোক লমদমশিং অমসুং লৈবাক চাউখৎনবগীদমক্তা লমদম অসিগী শেন্মিৎলোনশিং পুন্সিনবা হেনগৎনবগীদমক্তা নোংপোক অমসুং খা-নোংপোক এসিয়াগী লৈবাকশিংগা পাউ ফাওনবা হেনগৎহন্নবা অমসুং লমদম অসিগী মনুংদা লৈরিবা ইনফ্রাস্ত্রকচর ফবা হেনগৎনবা শেমখিবা  “এক্ত ইস্ত পোলিসী”না হৌজিক্কী মতমসিদা মসিদা অহেনবা শাফু অমুক্কা পীরি।

নোর্থ-ইস্তর্ন কাউন্সিল অসি “এক্ত ইস্ত পোলিসী”গী পান্দমশিং ফংহন্নবা লৈরিবা ৱাখল্লোনশিংনা ঙাক্লৌ পীগদবনি অমসুং থৌশিল-থৌরাংশিংগী থবক কয়া খোঙজেল য়াঙনা পায়খৎপা ঙম্নবগীদমক্তা মথৌ তাবা খোঙথাং খুদিংমক পায়খৎকদবনি।

অৱাং-নোংপোক লমদম অসি শাংলবা উমং, ব্রহ্মপুত্রা তুরেল অমসুং মসিগী মশা-মরোংশিং, কোয়লা, পেত্রোল অমসুং নেচরেল গ্যাসনচিংবা কয়া য়াওনা মহৌশাগী রিসোর্স কয়াগী তুংফম্নি। অদুবু, শাংলবা মতম কয়াদগী, মফম অসি ভারতকী অতোপ্পা মফমশিংগা য়েংনবদা শেন্মিৎলোন অমসুং খুন্নাই চাউখৎপগী চাংদি য়াম্না নেম্না লৈদুনা লাক্লি। মফমসিগী হৌজিক লৈরিবা মহৌশাগী পোত্থোকশিং শিজিন্নদুনা লমদম অপুনবা অসি চাউখৎহন্নবগীদমক্তা ঐখোয়না পাক শন্না য়েংবগী মথৌ তারে। অদুগা, থবকশিং অসি পাংথোকপা মতমদা ঐখোয়না ইকোলোজিকেল বেলেন্স ঙাক শেন্দুনা অকোয়বগী ফিভম্বুসু কায়হন্দনবা হোৎনগদবনি।

হৌখিবা চহি ৬-৭তা লমদম অসিগী শেন্মিৎলোন্দা মশক থোকপা অহোংবা লাকপসিদা ঐহাক্না য়াম্না নুংঙাইবা ফাওই। রাজ্য খুদিংমক্কী পর কেপিতা নেত স্তেত দোমেস্তিক প্রদক্তসু মশক থোক্না হেনগৎখি। শাহৌ লৌবগী চাংসি মিজোরমদা ৮৭% অমসুং ত্রিপুরাদা ৭৫% ওইদুনা খ্বাইদগী ৱাংবগী থাক য়ৌখি। অরুনাচল প্রদেশ, মিজোরম অমসুং সিক্কিমগী পর কেপিতা নেত স্তেত দোমেস্তিক প্রদক্তনা মমাংগী শেনবা চহি অনিগী নেত নেস্নেল ইনকমদগী হেনখি অমসুং নাগালেন্দ অমসুং ত্রপিরাগীনা লৈবাক্কী চাংচৎকা য়াম্না নক্নবা ওইখি। লৈবাক্কী নেত নেস্নেল ইনকম্না ইং ২০১৩-১৪গা য়েংনবদা ইং ২০১৮-২০দা চাউরাকপা ৬০%গী চাংদা হেনগৎপা মতমদা,  অৱাং-নোংপোক রাজ্য ৮গী মনুংদগী ৬কী হেনগৎপগী চাংনা লৈবাক্কী চাংচৎকী চাংদগী হেনখি।

নেস্নেল হ্যুমেন দিভেলপমেন্ত ইন্দেক্স ২০১৯গী মতুং ইন্না  অৱাং-নোংপোক রাজ্য ৮গী মনুংদগী ৭না নেস্নেল এভরেজতগী হেনবা হ্যুমেন দিভেলপমেন্ত ইন্দেক্স লৈখিবা অসিসু তাবদা য়াম্না নুংঙাইবা ৱাফম্নি। অসমখক্তনা ০.৬১৩গী স্কোর ফংদুনা ০.৬৪৫তা লৈবা নেস্নেল এভরেজতগী খরতমক তাখি।

শেন্মিৎলোন অমসুং হ্যুমেন দিভেলপমেন্ত প্রোফাইলদা মপুং ওইনা চাউখৎপগী ফিভম লৈরবসু, নীংথিনা য়েংশিন্দবা য়াদবা হীরম খরদি লৈখি।

কাউন্সিলনা হৌজিক সোসিও-ইকোনোমিক দিভেলপমেন্তকী চাংদা খেন্নবা লৈরিবসি হন্থহন্নবা হোৎনবদা মিৎয়েং চঙফম থোক্লে।

নিতি আয়োগনা ফোঙখিবা নোর্থ-ইস্তর্ন রিজন সোসিএল দিভেলপমেন্ত গোল ইন্দেক্স, ২০২১-২২না হীরম অসিগী ফিভমশিং ময়েক শেংনা তাক্লি। লমদমসিগী জিলা ১০৮বু পান্দমশিং অসিগী মখা পোন্না মখোয়গী থবক-থৌরমশিংগী হীরমদা থাক খায়রি। ইন্দেক্স অসি চাউখৎপগী চাং য়েংশিনবা অমসুং মথৌ তাবা খোঙথাং পায়খৎপগী খ্বাইদগী কান্নবা খুৎলায় অমনি। লমদমসিগী জিলা ৬৯দি ফ্রন্ত রন্নরগী কাংলুপ্তা য়াওরি। লমদম অসিনা অপুনবা অমা ওইনা উমংগী পাক চাউবা য়েংলগা ‘কংফালদা তাবা পুন্সি’গী মতাং ওইরিবা গোল-১৫ অমসুং ‘অশেংবা ঈশিং অমসুং সেনিতেসন”গী মতাং ওইবা গোল-১৬কী মতাংদা নীংথিজনা থবক পাংথোকখি। অদুবু লমদম অসিনা অপুনবা ওইনা “ইন্দস্ত্রী, ইন্নোভেসন অমসুং ইনফ্রাস্ত্রকচর” ওইরিবা গোল-৯; মগুন লৈবা মহৈ-মশিং তম্বগী থৌওং ওইরিবা গোল-১৪; সস্তেনেবল কম্ম্যুনিতী অমসুং শহর (গোল-১১) অমসুং অতোপ্পশিংদদি অতৈদগী থাক হন্থনা লৈরি।

খ্বাইদগী অনৌবা দেতানা করম্বা মফমদা হেন্না মিৎয়েং চঙগদগে হায়বা ঐখোয়দা খঙহল্লি। নোর্থ-ইস্তর্ন কাউন্সিলনা দেতাশিং অসি নীংথিনা য়েংশিনগদবনি অসুং হৌজিক্কী অমসুং তুংদা ওইরক্কদবা শিংনবশিং থেংনবা থৌরাংশিং নৌনা য়াৎকদবনি।

লেপ্তনা হোৎনরকপনা মরম ওইদুনা, মফন অসিদা খ্বাইদগী অয়েৎপা পীরম্বা লালহৌবা অমসুং মসিগা মরী লৈনবা পামদবা থৌদোক থোকপগী চাংনা হন্থদুনা মতম শাংনা লাক্লে।

লমদম অসিগী নহাশিংনা, লৈবাক্কী অতোপ্পা নহাশিংগুম্না, লৈবাক অসিগী পুৱারীদা অনৌবা লমাই অমা ইবা পাম্মি।

মতিক চাবা থবকশিংগী খুত্থাংদা মখোয়দা মসিগী খুদোংচাবা পীগদবনি।

হৌজিক্তি, ঐখোয়না তুংগী মতমদা করি পাংথোকসিগে হায়না খন্নগদবনি।

ঙসি ঐখোয়গী মরক্তা তিল্লিবা খঙ-হৌরবা প্লান্নর অমসুং একাদমিসিয়নশিংনা মখোয়গী কোক অমসুং থৱাই চুংশিন্নদুনা খ্বাইদগী নৌবা দেতা অমসুং খুদমশিং থমদুনা থবক ওইনা পাংথোকপা য়াবা থৌরাং য়াৎকদবনি।

হন্দক্কী চহিগী জনুৱারীদা পাংথোকখিবা কাউন্সিল অসিগী ৬৯শুবা প্লেনরী মীফমদা রাজ্য মশেলগী মরক্তা লৈনরিবা ঙমখৈগী উংখৎনবা অমসুং প্রাইভেৎ ইনভেস্তমেন্তকী পুক্নিং চিংশিনবগী মরু ওইবা হীরম অনি শকখঙখি।

ওন্তোপ্রিনর্শিপ, ভেঞ্চর ফন্দ, স্তার্ত-অপ অমসুং স্কিল দিভেলপমেন্ত পুক্নিং থৌগৎপগী খুত্থাংদা প্রাইভেৎ ইনভেস্তমেন্ত খুমাং চাউশিলহনবগী মথৌ তারে। প্রাইভেৎ ইনভেস্তমেন্ত অসি হৌজিক ফাওবদা লালহৌবগী ইরাংগা লোয়ননা পব্লিক সেক্তরনা লমদম অসিদা কা-হেন্না শরুক য়াবনা মরম ওইদুনা লমদম অসিগী শেন্মিৎলোনগী মনুং চন্দনা লাক্লি। এন.ই.সি. গাইদলাইন – ২০২০না মাইকৈ অসিদা ঐখোয়গী থবক য়াঙখৎপগী তঙাই ফদবশিংদা মিৎয়েং চঙলি।

কাউন্সিল অসি ৱাখল নীংথিনা খনবা, থবক ওইনা পাংথোকপা, খুদোংচাবা ফংহনবা, খোঙজেল য়াঙহনবা অমসুং তুংলমচত্তা য়েংদুনা থৌশিল-থৌরাং য়াৎপা বোদী অমা ওইগদবনি। ইং ২০১৬তা প্রধান মন্ত্রী, শ্রী নরেন্দ্রভাই মোদীনা হায়খিবগুম্না মসিনা লমদম অসিগী মতমগা চান্নবা ই-পাউ অমসুং লৌশিংগী তুংফম ওইগদবনি।

ঐহাক্না হৌখিবা দিকেদ মঙাদা থেংনরকপশিংদগী তমদুনা, কেন্দ্রগী গৃহ মন্ত্রী, শ্রী অমিৎ শাহগী মতিক লৈবা লুচিং মখাদা নোর্থ-ইস্তর্ন কাউন্সিলনা  অৱাং-নোংপোক লমদম্বু চাউখৎপগী লম্বীদা চৎপা ঙমহন্নবা মশাগী থৌদাংশিংগী অনৌবা ৱাহন্থোক পীদুনা নীংথিনা পাংথোকপা ঙমগনি হায়না অচেৎপা থাজবা লৈরে।

ঐহাক্না কাউন্সিলবু মখোয়না তুংদা পায়খৎকদবা থবক-থৌরম খুদিংদা মাই পাকপা ওইসনু হায়না য়াইফ পাউজেল পীজরি।

জয় হিন্দ!!!

*****