PIB Headquarters
पत्र सूचना कार्यालयाचे कोविड-19 संबंधित बातमीपत्र
Posted On:
05 AUG 2021 9:43PM by PIB Mumbai
नवी दिल्ली/मुंबई 5 ऑगस्ट 2021
आरोग्य मंत्रालयाची कोविड-19 घडामोडींवरील माहिती
भारतातील लसीकरण मोहिमेत देण्यात आलेल्या कोविड प्रतिबंधक लसीच्या मात्रांनी काल, 48.93 कोटींचा टप्पा ओलांडला.
आज सकाळी 7 वाजता प्राप्त झालेल्या तात्पुरत्या अहवालातील आकडेवारीनुसार, आतापर्यंत 57,21,937 सत्रांच्या आयोजनातून कोविड प्रतिबंधक लसीच्या एकूण 48,93,42,295 मात्रा देण्यात आल्या आहेत. गेल्या 24 तासांत, लसीच्या 37,55,115 मात्रा देण्यात आल्या.
देशात 21 जून 2021 पासून कोविड-19 प्रतिबंधक लसीकरण मोहिमेच्या सार्वत्रिकीकरणाचा नवा टप्पा सुरु झाला. संपूर्ण देशात लसीकरण मोहिमेचा वेग वाढवत नेऊन मोहिमेच्या व्याप्तीचा विस्तार करण्यासाठी केंद्र सरकार कटिबद्ध आहे.
देशात महामारीच्या सुरुवातीपासून कोविडमुळे बाधित झालेल्यांपैकी 3,09,74,748 रुग्ण यापूर्वीच कोविड-19 आजारातून पूर्णपणे बरे झाले आहेत आणि गेल्या 24 तासांत 41,726 रुग्ण कोविड आजारातून बरे झाले. यामुळे एकूण रोगमुक्ती दर 97.37% झाला आहे.
भारतात गेल्या 24 तासांत, 42,982 नव्या कोविड बाधित रुग्णांची नोंद झाली.
रोज नोंदल्या जाणाऱ्या नव्या कोविड बाधितांची संख्या गेले सलग एकोणचाळीस दिवस 50,000 पेक्षा कमी असल्याचे दिसून आले आहे. केंद्र सरकार तसेच राज्ये आणि केंद्रशासित प्रदेश सरकारे यांच्या शाश्वत आणि सहयोगात्मक प्रयत्नांचा हा परिणाम आहे.
भारतातील कोविड सक्रीय रुग्णसंख्या आज 4,11,076 इतकी आहे आणि सध्या सक्रीय असलेल्या रुग्णांचे प्रमाण देशातील आतापर्यंतच्या एकूण कोविड बाधितांच्या संख्येच्या 1.29% इतके आहे.
देशभरात कोविड संसर्ग तपासणी चाचण्या करण्याची क्षमता लक्षणीयरीत्या वाढविण्यात आली असून गेल्या 24 तासांत देशात एकूण 16,64,030 चाचण्या करण्यात आल्या. आतापर्यंत देशात 47 कोटी 48 लाखांहून अधिक (47,48,93,363 ) चाचण्या करण्यात आल्या.
देशभरात एकीकडे कोविड चाचण्या करण्याची क्षमता वाढवली जात असतानाच, साप्ताहिक पॉझिटीव्हिटी दर सध्या 2.37% आहे तर दैनंदिन पॉझिटीव्हिटी दर आज 2.58 % इतका आहे. दैनंदिन पॉझिटीव्हिटी दर सलग 59 दिवस 5% हून कमी राहिला आहे.
इतर अपडेट्स :
- राष्ट्रव्यापी लसीकरण मोहिमेचा एक भाग म्हणून भारत सरकार सर्व राज्ये आणि केंद्रशासित प्रदेशांना कोविड प्रतिबंधक लसीचा मोफत पुरवठा करून त्यांना मदत करीत आहे. कोविड-19 प्रतिबंधक लसीकरण मोहिमेच्या सार्वत्रिकीकरणाच्या या नव्या टप्प्यात केंद्र सरकार, देशातील लस निर्मात्यांनी उत्पादित केलेल्या लसीच्या साठ्यापैकी 75% साठ्याची खरेदी करून त्याचा पुरवठा सर्व राज्ये आणि केंद्रशासित प्रदेशांना करणार आहे.सर्व उपलब्ध मार्गांद्वारे कोविड प्रतिबंधक लसीच्या मात्रांपैकी सर्व राज्ये आणि केंद्रशासित प्रदेशांना आतापर्यंत एकूण 51.01 कोटींहून अधिक (51,01,88,510) मात्रांचा पुरवठा केला आहे आणि आणखी 7,53,620 मात्रांचा पुरवठा करण्याची प्रक्रिया प्रगतीपथावर आहे.
- पंतप्रधान नरेंद्र मोदी यांनी उत्तर प्रदेशातील प्रधानमंत्री गरीब कल्याण अन्न योजनेच्या लाभार्थ्यांशी आज व्हिडिओ कॉन्फरन्सद्वारे संवाद साधला. यावेळी उत्तर प्रदेशचे मुख्यमंत्री योगी आदित्यनाथ उपस्थित होते. कार्यक्रमाला संबोधित करताना पंतप्रधान म्हणाले की, 5 ऑगस्ट हा दिवस भारतासाठी खूप खास बनला आहे. 2 वर्षापूर्वी 5 ऑगस्ट रोजी, कलम 370 रद्द करून देशाने एक भारत, श्रेष्ठ भारतची भावना आणखी मजबूत केली होती, जम्मू -काश्मीरमधील प्रत्येक नागरिकाला प्रत्येक अधिकार आणि सुविधा उपलब्ध करून दिली होती. शेकडो वर्षांनंतर भारतीयांनी 5 ऑगस्ट रोजी भव्य राम मंदिर उभारण्याच्या दिशेने पहिले पाऊल टाकले होते . अयोध्येत आज राम मंदिर उभारणीचे काम वेगाने होत आहे असे पंतप्रधानांनी नमूद केले .
M.Chopade/P.Malandkar
सोशल मिडियावर आम्हाला फॉलो करा: 
@PIBMumbai 
/PIBMumbai 
/pibmumbai 
pibmumbai[at]gmail[dot]com
(Release ID: 1742958)