ବିଜ୍ଞାନ ଓ ପ୍ରଯୁକ୍ତି ମନ୍ତ୍ରଣାଳୟ

କୋଭିଡ ଟିକା ପରୀକ୍ଷଣ ନିମନ୍ତେ ପୁଣେ ଓ ହାଇଦ୍ରାବାଦ ଠାରେ ଆହୁରି ଦୁଇଟି କେନ୍ଦ୍ରୀୟ ଔଷଧ ପରୀକ୍ଷାଗାର ପ୍ରସ୍ତୁତ କଲେ ସରକାର

ଟିକା ବିକାଶ ଓ ଉତ୍ପାଦନ ଇକୋସିଷ୍ଟମକୁ ବୃଦ୍ଧି କରିବା ଲାଗି ବିଜ୍ଞାନ ଓ ପ୍ରଯୁକ୍ତି ମନ୍ତ୍ରଣାଳୟ ଅଧୀନ ଜୈବପ୍ରଯୁକ୍ତି ବିଭାଗ ପକ୍ଷରୁ ନିରନ୍ତର ସହଯୋଗ

Posted On: 04 JUL 2021 6:51PM by PIB Bhubaneshwar

କୋଭିଡ 19 ମହାମାରୀର ବ୍ୟାପକତା ଏବଂ କୋଭିଡ ଟିକା ଉତ୍ପାଦନ ବୃଦ୍ଧିର ଆବଶ୍ୟକତାକୁ ବିଚାର କରି ଟିକା ପରୀକ୍ଷଣ/ଟିକାଗୁଡ଼ିକ ପାଇଁ ଆଗୁଆ ପ୍ରମାଣପତ୍ର ଜାରି କରିବା ସୁବିଧା ପ୍ରଦାନ କରିବା ନିମନ୍ତେ ସରକାର ସକ୍ରିୟ ଭାବେ ଦୁଇଟି ଅତିରିକ୍ତ ପରୀକ୍ଷାଗାର ବିକଶିତ କରିବା ଲାଗି ନିଷ୍ପତ୍ତି ଗ୍ରହଣ କରିଛନ୍ତି। ବର୍ତ୍ତମାନ, ଦେଶରେ କସୌଲି ଠାରେ ଗୋଟିଏ କେନ୍ଦ୍ରୀୟ ଔଷଧ ପରୀକ୍ଷାଗାର (ସିଡିଏଲ) ରହିଛି। ଭାରତରେ ମାନବ ଉପଯୋଗ ଲାଗି ଉଦ୍ଦିଷ୍ଟ ଇମ୍ୟୁନୋବାୟୋଲୋଜିକାଲ(ଟିକା ଓ ଆଣ୍ଟିସେରା) ର ପରୀକ୍ଷା ଓ ଆଗୁଆ ପ୍ରମାଣପତ୍ର ଜାରି କରିବା ନିମନ୍ତେ ଏହା ଜାତୀୟ କେନ୍ଦ୍ରୀୟ ପରୀକ୍ଷାଗାର ଭାବେ କାର୍ଯ୍ୟ କରୁଛି।

ଭାରତ ସରକାରଙ୍କ ବିଜ୍ଞାନ ଓ ପ୍ରଯୁକ୍ତି ମନ୍ତ୍ରଣାଳୟ ଅଧୀନ ଜୈବପ୍ରଯୁକ୍ତି ବିଭାଗ ପକ୍ଷରୁ ବ୍ୟାଚ୍‌ ଟେଷ୍ଟିଂ ଓ ଟିକାଗୁଡ଼ିକର ଗୁଣବତ୍ତା ପରୀକ୍ଷଣ ନିମନ୍ତେ ଏହାର ଦୁଇଟି ସ୍ବୟଂଶାସିତ ଗବେଷଣା ସଂସ୍ଥାନ ପୁଣେସ୍ଥିତ ନ୍ୟାସନାଲ ସେଣ୍ଟର ଫର ସେଲ୍‌ ସାଇନ୍ସ (ଏନସିସିଏସ) ଏବଂ ହାଇଦ୍ରାବାଦସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ ଅଫ ଆନିମଲ ବାୟୋଟେକ୍ନୋଲୋଜି (ଏନଆଇଏବି) ଠାରେ କେନ୍ଦ୍ରୀୟ ଔଷଧ ପରୀକ୍ଷାଗାର ଭାବେ ଦୁଇଟି ଟିକା ପରୀକ୍ଷଣ ସୁବିଧା କେନ୍ଦ୍ର ସ୍ଥାପନ କରାଯାଇଛି। ପିଏମ-କେୟାର୍ସ ଫଣ୍ଡ ଟ୍ରଷ୍ଟ ପକ୍ଷରୁ ଯୋଗାଇ ଦିଆଯାଇଥିବା ପାଣ୍ଠି ସହାୟତା ବଳରେ ଡିବିଟି-ଏନସିସିଏସ ଏବଂ ଡିବିଟି-ଏନଆଇଏବି ଠାରେ କେନ୍ଦ୍ରୀୟ ଔଷଧ ପରୀକ୍ଷାଗାର ଭାବରେ ଦୁଇଟି ନୂଆ ଟିକା ପରୀକ୍ଷଣ କେନ୍ଦ୍ର ପ୍ରତିଷ୍ଠା କରାଯାଇଛି। କୋଭିଡ-19 ମହାମାରୀ ପରଠାରୁ, ବାୟୋଟେକ୍ନୋଲୋଜି ବିଭାଗ ପକ୍ଷରୁ କୋଭିଡ-19 ସଂକ୍ରାନ୍ତ ବିଭିନ୍ନ କାର୍ଯ୍ୟକଳାପ ଯେପରିକି ଟିକା ବିକାଶ, ନିଦାନ ଓ ପରୀକ୍ଷଣ, ବାୟୋବ୍ୟାଙ୍କିଙ୍ଗ ଏବଂ ଜେନୋମ ସର୍ଭିଲାନ୍ସ ଆଦି ଜାରି ରଖିଛି। ଏହାଛଡ଼ା ମୌଳିକ ଗବେଷରା ଓ ଟ୍ରାନ୍ସଲେସନାଲ ଗବେଷଣା ଇକୋସିଷ୍ଟମ ବିକଶିତ କରିବା ଦିଗରେ ମଧ୍ୟ ଯୋଗଦାନ ଦେଇ ଆସୁଛି।

କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ଜାରି ହୋଇଥିବା ଗେଜେଟ୍ ବିଜ୍ଞପ୍ତି ଅନୁଯାୟୀ ପୁଣେସ୍ଥିତ ଏନସିସିଏସ କେନ୍ଦ୍ର ବର୍ତ୍ତମାନ କୋଭିଡ 19 ଟିକାର ପରୀକ୍ଷଣ ଓ ଲଟ୍ ରିଲିଜ୍ ପାଇଁ କେନ୍ଦ୍ରୀୟ ଔଷଧ ପରୀକ୍ଷାଗାର ଭାବେ ବିଜ୍ଞପିତ କରାଯାଇଛି। ଖୁବଶୀଘ୍ର ଏନଆଇଏବି, ହାଇଦ୍ରାବାଦ କେନ୍ଦ୍ର ଜରୁରି ବିଜ୍ଞପ୍ତି ହାସଲ କରିବ।

ପିଏମ କେୟାର୍ସ ପାଣ୍ଠି ଟ୍ରଷ୍ଟରୁ ଆର୍ଥିକ ସହାୟତା ପାଇ ଏହି ଦୁଇଟି ସଂସ୍ଥା ଖୁବ୍ ଅଳ୍ପ ଦିନ ମଧ୍ୟରେ ଏହି ଉଦ୍ଦେଶ୍ୟ ପାଇଁ ଅତ୍ୟାଧୁନିକ ସୁବିଧା ସ୍ଥାପନ କରିଛନ୍ତି। ଏହି ସୁବିଧା କେନ୍ଦ୍ରରେ ପ୍ରତି ମାସରେ ଆନୁମାନିକ 60 ବ୍ୟାଚ୍ ଟିକା ପରୀକ୍ଷା କରାଯାଇପାରିବ ବୋଲି ଆଶା କରାଯାଉଛି। ଏହି ନୂଆ ସୁବିଧା କେନ୍ଦ୍ରରେ ବର୍ତ୍ତମାନ ଦେଶରେ ପ୍ରଚଳିତ କୋଭିଡ-19 ଟିକା ଏବଂ ନୂଆ କୋଭିଡ-19 ଟିକା ପରୀକ୍ଷା ଚାହିଦା ଅନୁସାରେ ବୃଦ୍ଧି କରିପାରିବ ବୋଲି ଆଶା କରାଯାଉଛି। କେବଳ ଟିକା ବିକାଶ ଓ ଉତ୍ପାଦନ ନୁହେଁ ବରଂ ପୁଣେ ଓ ହାଇଦ୍ରାବାଦ ଭଳି ଟିକା ଉତ୍ପାଦନ କେନ୍ଦ୍ରରେ ଅବସ୍ଥିତ ଥିବାରୁ ଟିକା ଉତ୍ପାଦନ ଓ ଯୋଗାଣ ନିମନ୍ତେ ଏହା ପରିବହନ ଦୃଷ୍ଟିରୁ ଅନୁକୂଳ ସ୍ଥାନ ଭାବେ ସାବ୍ୟସ୍ତ ହୋଇପାରିବ।

imageimageimage

ପିଏମ କେୟାର୍ସ ପାଣ୍ଠି ଟ୍ରଷ୍ଟ ସହାୟତାରେ କୋଭିଡ-19 ଟିକା ପରୀକ୍ଷଣ ପାଇଁ ନିର୍ମାଣ କରାଯାଇଥିବା ନୂତନ ଭାବେ ନିର୍ମିତ ଡିବିଟି-ଏନସିସିଏସ୍ କେନ୍ଦ୍ରୀୟ ଔଷଧ ପରୀକ୍ଷାଗାର

 

ପିଏମ କେୟାର୍ସ ପାଣ୍ଠି ଟ୍ରଷ୍ଟ ସହାୟତାରେ କୋଭିଡ-19 ଟିକା ପରୀକ୍ଷଣ ପାଇଁ ନିର୍ମାଣ କରାଯାଇଥିବା ନୂତନ ଭାବେ ନିର୍ମିତ ଡିବିଟି-ଏନଆଇଏବି କେନ୍ଦ୍ରୀୟ ଔଷଧ ପରୀକ୍ଷାଗାର

 

*********

P.S



(Release ID: 1732707) Visitor Counter : 305