প্রধানমন্ত্রীগী লোইশঙ

প্রধান মন্ত্রীনা সাইক্লোন “য়াস” থেংননবা শেম-শাবগী থৌরাং য়াৎপা য়েংশিনবগী মীফম ফমখ্রে

এন.দি.আর.এফ.না হান্নদগী তীম ৪৬ থমখ্রে অমসুং তীম ১৩না ঙসি নোংথক্তা পুখ্রে

ইন্দিয়ন কোস্ত গার্দ অমসুং নেভীনা তেংবাংবা, থীবা-হুম্বা অমসুং মী কনবগী থবকশিংগীদমক্তা জহাজ অমসুং হেলিকোপ্তর থাদোকখ্রে

পি.এম.না সমুদ্র তোর্বানগী থবকশিংগা মরী লৈনবা মীওইশিংবু মতম চানা লৌথোক্নবা ওফিসরশিংদা হায়খ্রে

পি.এম.না ওফিসিএলশিংদা মৈ অমসুং তেলিফোন নেৎৱর্ক লেপহনবগী মতম তেনশিন্নবা হায়খ্রে

সমুদ্র মপালগী খুন্নাই, ইন্দস্ত্রীনচিংবা তোঙান-তোঙানবা স্তেকহোলদরশিংদা হকথেংননা পাউ ফাওদুনা অমসুং ফীভম অসিগী মতাংদা খঙহন্দুনা মখোয়সু থবক কয়াগী মনুং চলহল্লুঃ পি.এম.

Posted On: 23 MAY 2021 1:29PM by PIB Imphal

প্রধান মন্ত্রী, শ্রী নরেন্দ্র মোদীনা সাইক্লোন য়াসনা মরম ওইদুনা ওইরক্লিবা ফীভমশিংগা থেংননবা মরী লৈনবা রাজ্য অমসুং কেন্দ্রগী মন্ত্রালয়/এজেন্সীশিংনা শেম-শাবগী থবকশিংবু য়েংশিনবগী অৱাংবা থাক্কী মীফম অমা ঙসি ফমখ্রে।

ইন্দিয়ন মেতেওরোলোজিকেল দিপার্তমেন্ত (আই.এম.দি.)না সাইক্লোন “য়াস”না মে ২৬কী নুংথিলদা নুংশিৎকী খোঙজেল কে.এম.পি.ঐচ. ১৫৫-১৬৫দগী কে.এম.পি.ঐচ. ১৮৫দা ফাওবগী চাংদা খঙশিৎ-খঙশিৎ শিৎপগী মওং চেন্দুনা নোংচুপ-বেঙ্গোল অমসুং ওরিশা ফাউগনি হায়বা থাজবা লৈরি ফোংদোকখ্রে। মসিনা নোংচুপ-বেঙ্গোল অমসুং ওরিশাগী সমুদ্র মপালদা লৈবা মফমশিংদা অকনবা নোং চুহনবসু য়াই। আই.এম.দি.না নোংচুপ-বেঙ্গোল অমসুং অৱাং ওরিশাগী সমুদ্র মপালশিংদা চাউরাকপা মীতর ১-৪গী চাংদা সমুদ্রগী ইয়াই হেনগৎলকপা য়াবগী চেকশিনৱাসু পীরক্লি। আই.এম.দি.না মরী লৈনবা রাজ্যশিংদা খ্বাইদগী নৌবা ফোর্কাস্তকা লোয়ননা ই-পাউ কয়া চাং নাইনা পীরি।

কেবিনেৎ সেক্রেতরীনা মে ২২, ২০২১দা নেস্নেল ক্রাইসিস মেনেজমেন্ত কম্মিত্তী (এন.সি.এম.সি.)গী মীফম অমা সমুদ্র মপালগী রাজ্য/য়ু.তি.শিংগী চীফ সেক্রেতরীশিং অমসুং মরী লৈনবা কেন্দ্রগী মন্ত্রালয়/এজেন্সীশিংগা লোয়ননা ফমখ্রে হায়না প্রধান মন্ত্রীদা পাউদমখি।

হোম এফিয়র্স মন্ত্রালয় (এম.ঐচ.এ.)না ফীভম অসিবু ২৪x৭কী য়েংশিল্লি অমসুং মরী লৈনবা রাজ্য/য়ু.তি. সরকারশিং অমসুং কেন্দ্রগী এজেস্নীশিংগা তত্তনা পাউ ফাওনরি। এম.ঐচ.এ.না রাজ্যশিংদা এদভান্স ওইনা এস.দি.আর.এফ.কী অহানবা ইন্সতোলমেন্তসু পীথোকখ্রবনি। এন.দি.আর.এফ.না রাজ্য/য়ু.তি. ৫দা হি, উ-ককপগী খুৎলায়, তেলিকোমগী খুৎলায়নচিংবা কয়াগা লোয়নবা তীম ৪৬ হান্ননা থমখ্রে। মসিগী অহেনবা ওইনা, থবক শিজিন্নবগীদমক্তা অতোপ্পা তীম ১৩সু ঙসি নোংথক্তা পুরকখ্রে অমসুং তীম ১০না ঙাইহন্দুনা থম্লি।

ইন্দিয়ন কোস্ত গার্দ অমসুং নেভীনা তেংবাংবা, থীবা-হুম্বা অমসুং মী কনবগী থবকশিংগীদমক্তা জহাজ অমসুং হেলিকোপ্তর থাদোকখ্রে। এয়র ফোর্স অমসুং আর্মীগী ইঞ্জিনিয়র তাস্ক ফোর্স য়ুনিৎশিংসু থবক শিজিন্ননবগীদমক্তা হি অমসুং মীওইবগী পুন্সি কনবগী খুৎলায়গা লোয়ননা ঙাইদুনা লৈরি। মীওইবগী তেংবাং অমসুং দিজাজতর রিলিফ য়ুনিৎকা লোয়নবা জহাজ ৭সু নোংচুপকী সমুদ্র তোর্বান্দা ঙাইদুনা লৈরি।

পেত্রোলিয়ম অমসুং নেচরেল গ্যাস মন্ত্রালয়না সমুদ্রদা লৈবা থাউ-শুংফমশিং ঙাক-শেন্নবা অমসুং মখোয়গী পোত্থোক পুবগী জহাজশিংবু তেক্ত কায়দবা হিথাংফমশিংদা পুরক্নবা থবকশিং পায়খৎপা হৌখ্রে। পাৱর মন্ত্রালয়না ইমর্জেন্সী রেস্পোন্স সীস্তেম মথৌ তৌবা হৌহনখ্রে অমসুং ত্রান্সফোর্মর, দি.জি. সেৎ অমসুং অতৈ খুৎলায়শিংবু খুদক্তা মৈ পীবা ঙমহন্নবা শেম-শাদুনা থম্লি। তেলেকোম মন্ত্রালয়না তেলেকোম তাৱর অমসুং এক্সচেঞ্জশিংবু মতম পুম্বদা য়েংশিল্লি অমসুং তেলেকোম নেৎৱর্ক মথৌ তৌবা হৌহন্নবা মপুং ফানা শেম-শাবা লোইরে। হকশেল অমসুং ইমুং-মনুংগী য়াইফ য়ুম্বাল মন্ত্রালয়না সাইক্লোন অসিনা শোকহনবা য়াবা রাজ্য।য়ু.তি.শিংদা হেল্থ সেক্তরনা শেম-শাদুনা লৈনবা অমসুং কোবিদনা শোকহল্লবা মফমশিংদা তেংবাংবগী এদভাইজরী কয়া পীখ্রে। পোর্ত, শিপ্পিং অমসুং ৱাতরৱেজ মন্ত্রালয়না পোত্থোক পুবগী জহাজ খুদিংমক তেক-কায়দনা থম্নবা থবক পায়খৎখ্রে অমসুং ইমর্জেন্সী ভেসেল (তগশিং) থাদোকখ্রে।

এন.দি.আর.এফ.না রাজ্যগী এজেন্সীশিংদা খুদোংথিনীংঙাই ওইবা মফমশিংদগী মীওই পুথোক্নবা তেংবাংলি অমসুং সাইক্লোন্না ওইহনবা য়াবা ফীভমশিং থেংননবা ই-পাউ কয়া খুন্নাইদা খঙহনবগী কেম্পেন কয়া লেপ্তনা চত্থরি।

পি.এম. মোদীনা সেনিয়র ওফিসরশিংদা খুদোংথীবা থোকপগী চাং ৱাংবা মফমশিংদগী মীওইশিংবু তেক্ত-কায়দনা পুথোক্নবগীদমক্তা রাজ্যশিংগা নকশিন্ননা থবক তৌনবা খঙহনখ্রে। মহাক্না সমুদ্র মপালগী থবকশিংগা মরী লৈনবা মীওইশিংবুসু মতম চানা পুথোক্নবা মরী লৈনবা বিভাগশিংদা খঙহনখ্রে। মহাক্না মৈ অমসুং পাউ-ফাওনবগী থবকশিং লেপহনবগী মতম তেনশিনহন্দুনা মতম চানা অমুক মথৌ তৌবা হৌহনবগী তঙাই ফদবা লৈ হায়বা ৱাফমসু ফোংদোকখি। পি.এম.না কোবিদকী লাইয়েং অমসুং হোস্পিতালশিংদা ভেক্সিন কাপ্পগী থবক্তসু অয়েৎপা লৈহন্দনবগীদমক্তা ওফিসিএলশিংনা রাজ্য সরকারশিংগা তান্নদুনা নীংথিনা থৌরাং য়াৎনবা ৱাফমসু ফোংদোকখি। অফবা থবকশিংদগী নীংথিজনা মতৌ তম্নবা অমসুং থবক পাংথোকপবু মওং-মরিল চুমহন্নবগীদমক্তা শেম-শাবা অমসুং থৌরাং য়াৎপগী থৌওংশিংদা ওফিসিএলশিংনা জিলাগী লৈঙাক্লোইশিংগা নক্ননা থবক তৌমিন্নবগী তঙাই ফদবগী মতাংদসু মহাক্না পনখি। পি.এম.না ওফিসিএলশিংদা সাইক্লোনগী মনুংদা ইনগদবা অমসুং ইনলোইদবা পাউতাক অমসুং এদভাইজরীশিংবু অশোকপা নঙলবা জিলাশিংগী মীয়ামদা মখোয়গী লোলদা লায়না খঙনবা মওংদা পীনবা ৱাফমসু থমখি। পি.এম.না সমুদ্র মপালগী খুন্নাই, ইন্দস্ত্রীনচিংবা তোঙান-তোঙানবা স্তেকহোলদরশিংদা হকথেংননা পাউ ফাওদুনা অমসুং ফীভম অসিগী মতাংদা খঙহন্দুনা মখোয়সু থবক কয়াগী মনুং চলহন্নবা ৱাফমসু ফোংদোকখি।

মীফম অসিদা গৃহ মন্ত্রী, প্রধান মন্ত্রীগী প্রিন্সিপাল সেক্রেতরী, হোম এফিয়র্সকী রাজ্য মন্ত্রী, কেবিনেৎ সেক্রেতরী, হোম, তেলিকম্ম্যুনিকেসন, ফিশরী, সিভিল এভিএসন, পাৱর, পোর্ত, শিপ্পিং অমসুং ৱাতরৱেজ, আর্থ সাইন্স মন্ত্রালয় অমসুং দিপার্তমেন্তকী সেক্রেতরীশিং, রেলৱে বোর্দকী চেয়র্মেন, এন.দি.এম.এ.গী মেম্বর অমসুং মেম্বর সেক্রেতরী, আই.এম.দি. অমসুং এন.দি.আর.এফ.কী দাইরেক্তর জেনেরেল অমসুং পি.এম.ও. অমসুং এম.ঐচ.এ.গী সেনিয়র ওফিসরশিংনা শরুক য়াখি।

*****



(Release ID: 1721053) Visitor Counter : 23