সাইন্স অমসুং তেক্নোলোজী মন্ত্রালয়
ওক্সীজেন মরাং কাইবা ভারতকীদমক্তা এম.এস.এম.ই.শিংগী সি.এস.আই.আর.-সি.এম.ই.আর.আই. ওক্সীজেন ইনরিচমেন্ত তেক্নোলোজী
Posted On:
04 MAY 2021 7:05PM by PIB Imphal
ওক্সীজেনগা মরী লৈনবা তেক্নোলোজীগী মতাংদা খঙনবা সেসন অমা জয়পুরগী এম.এস.এম.ই.-দিভেলপমেন্ত ইন্সতিত্যুৎনা সি.এস.আই.আর.-সেন্ত্রেল মেকানিকেল ইঞ্জিনিয়রিং রিসর্চ ইন্সতিত্যুৎ, দুর্গাপুরগা লোয়ননা ৪/৫/২০২১ শিন লাংদুনা পাংথোকখ্রে। থৌরম অসিদা প্রোফঃ (দাঃ) হরিশ হিরানী, দাইরেক্তর, সি.এস.আই.আর.-সি.এম.ই.আর.আই.না চীফ স্পীকরগী ৱারোল থমখি। রাজস্থান সরকারগী ইন্দস্ত্রীজকী এদিস্নেল দাইরেক্তর, শ্রী সঞ্জীব সক্সেনা, জয়পুরগী এম.এস.এম.ই.-দি.আই.গী দাইরেক্তর, শ্রী ভি.কে. শর্মা, সি.আই.দি.এ.গী প্রসিদেন্ত, দাঃ রোহিৎ জেন অমসুং লঘু উদ্যোগ ভারতীগী জেনেরেল সেক্রেতরী, শ্রী মহেন্দ্র মিশ্রা য়াওনা এম.এস.ই.গী মেম্বর, ওন্তোপ্রিনর অমসুং ইন্দস্ত্রিএলিস্ত ১০০না হায়রিবা খঙমিন্নবগী থৌরম অসিদা শরুক য়াখি।
প্রোফঃ (দাঃ) হরিশ হিরানী, দাইরেক্তর, সি.এস.আই.আর.-সি.এম.ই.আর.আই. মীওইবগী পুন্সি কনবা ঙম্বা ওক্সীজেন কন্সেন্ত্রেতর শিজিন্নবদা অহেনবা মিৎয়েং থমখি। লিক্বিদ ওক্সীজেন সিলিন্দরশিং নীংথিনা শিজিন্নবা অমসুং ওক্সীজেন কন্সেন্ত্রেতরগী মহুত্তা শিজিন্ননবা অতোপ্পা থৌরাং তৌবনা লাইচৎ অসিগা লান্থেংনবদা য়াম্না তেংবাংবা ঙমগনি। প্রোফঃ হিরানীনা সি.এস.আই.আর.-সি.এম.ই.আর.আই.না ওক্সীজেনগী অপাম্বা লৈরিবা অসিবু কোকহন্নবগীদমক্তা এম.এস.ই. ওন্তোপ্রিনরশিং মশিং য়াম্বনা খুৎশম্নদুনা ওক্সীজেন কন্সেন্ত্রেতর পাক শন্না শাবা হৌনবগীদমক্তা পুন্সিন্দুনা থবক তৌমিন্নবগী তঙাই ফদবা লৈ হায়বা ৱাফম ফোংদোকখি। হীরম অসিগী মতাংদা, মহাক্না কম্প্রেসর, এনালাইজর, পোত্থোকপ পুথোকপা ঙম্বগী মতিক্নচিংবগী রিসোর্স হান্ননা লৈরবা এম.এস.ই. খরগী খুদম পীখি। মখোয়শিংনা রিসোর্সশিং অসিবু অমত্তা ওইনা পুন্দুনা পোত্থোক পুথোকপগী থবকশিং মতম চানা হৌবা য়ানবগীদমক্তা হায়রিবা ওন্তোপ্রিনরশিংনা মাং থানা থোক্লকপগী মথৌ তাই। ওক্সীজেনগী অপাম্বা লৈবা অসিবু হন্থহন্নবগীদমক্তা সরকারগী পি.এস.য়ু. কম্পেনীশিংগী মরক্তা অমনদি ওক্সীজেন কন্সেন্ত্রেতর লাখ ১ শাবগী তেন্দর থাদোকখ্রে।
ওক্সীজেন ইনরিচমেন্ত য়ুনিৎ (ও.ই.য়ু.)না ওক্সীজেন সিলিন্দরগা চাংদম্নবদা ওক্সীজেন হেন্না কনবদা তেংবাংই। করিগুম্বা মতমদা, সিলিন্দর শিজিন্নদুনা ওক্সীজেনগী চাং ৱাংনা থাজিনবা অসিনা মীওইবদা য়াম্না খুদোংথিনীংঙাই ওইবা ওক্সীজেন তোক্সিসিতী থোকহল্লি। ও.ই.য়ু. নীংথিনা শিজিন্নবা অমসুং ত্রেন তৌরবা তেক্নিকেল ওইবা মীওইশিংগী মথৌ তাই অমসুং সি.এস.আই.আর.-সি.এম.ই.আর.আই.না অসিগুম্বা স্কিল লৈহন্নবা ত্রেনিং পীবসু য়াগনি। সি.এস.আই.আর.-সি.এম.ই.আর.আই.না মসিগী তেক্নোলোজী অসি এম.এস.ই. মরিদা পীখ্রবনি অমসুং অতোপ্পা কম্পেনী অনিদসু য়াম্না অথুবা মতমদা পীরগনি। মখোয় খরদি মে, ২০২১গী অনিশুবা চয়োলদগী পোত্থোক পুথোকপসু হৌরগনি।
রাজস্থান সরকারগী ইন্দস্ত্রীগী এদিস্নেল দাইরেক্তর, শ্রী সঞ্জীব সক্সেনানা সি.এস.আই.আর.-সি.এম.ই.আর.আই.গী থৌওং অসিবু থাগৎলদুনা কেন্দ্র অমসুং রাজ্য সরকার অনিমক্না ওক্সীজেনগী তঙাই ফদবা লৈবা মীওইশিংদা ওক্সীজেন পীনবা থৌরাং য়াৎলি হায়না ফোংদোকখি। মখোয়গী অসিগী ওক্সীজেন প্লান্তপু নৌনা থবক হৌহন্নবগীদমক্তা আর্মীসু মফম খরদা মখোয়গী মথৌদাং পাংথোক্লি। সরকারনা লান অসিবু থেংননবা শেলসু কায়থরি। এম.এস.এম.ই.শিংনা সি.এস.আই.আর.-সি.এম.ই.আর.আই. তেক্নোলোজীগী কান্নবা লৌদুনা তঙাই ফদবা মীওইশিংদা ওক্সীজেন পীবা ঙম্নবা মেন্যুফেকচরিং য়ুনিৎ শেমগৎপা অমসুং মরী লৈনবা রাজ্যশিংগী কাংলোন ইন্দুনা শেল থুমগী তেংবাং লৌবসু য়াই হায়না মহাক্না মখা তানা পনখি। এম.এস.এম.ই.শিংনা সেপ্তেম্বর ৩০, ২০২১ ফাওবা শেল-থুমগী তেংবাং ফংবা য়াবা স্কিম অমা রাজস্থান নিবেশ প্রোতশাহন য়োজনাগী মখাদা রাজস্থান সরকারনা হৌজিক চলায়রি।
জয়পুরগী এম.এস.এম.ই.-দি.আই.গী দাইরেক্তর, শ্রী ভি.কে. শর্মনা প্রোফঃ হিরানীবু অসিগুম্বা অকুপ্পা ৱারোল পুথোক্লকপা অমসুং ওক্সীজেনগী ইরাং মনুং অসিদা পাউতাক পীরকপগীদমক্তা থাগৎপা ফোংদোকখি। মহাক্না মহাক মশামকসু লিক্বিদ ওক্সীজেনগী মারকেতিং তৌবদা খুদোংচাদবা কয়া থেংনখি অমসুং মসিবু সোলারগী পথাপকা পুল্লবদি হেন্না ফবা ৱারোইশিন ফংবা ঙমগনি হায়না ফোংদোকখি। মহাক্কী জয়পুরগী এম.এস.এম.ই.-দি.আই.গী লোইশঙনা এম.এস.এম.ই. খুদিংগী থবক্তা তেংবাংগনি অমসুং হায়রিবা ইন্দস্ত্রীশিং অসিদা অঙম্বা তেংবাংসু পীগনি হায়বগী থাজবা পীখি।
সি.আই.দি.এ.গী প্রসিদেন্ত, দাঃ রোহিৎ জেন্না সি.এস.আই.আর.-সি.এম.ই.আর.আই.গী তেক্নোলোজী অসিনা হৌজিক্কী লাইচৎকী মতম অসিদা ওক্সীজেন পীবা ঙমদবগী ফীভম থেংনরিবা অসিদা তেংবাংবা ঙম্নবা এম.এস.এম.ই.দা থৌজাল অমা ওইবা য়াই হায়না ফোংদোকখি। মহাক্না এম.এস.এম.ই.শিংনা মখোয়গী খুদোংচাবা ওইবা য়ারিবা মসিগী তেক্নোলোজী অসিগী কান্নবা লৌনবা তকশিনখি।
থৌরম অসি ৱারী-ৱাতাই শাবগীদমক্তা য়াম্না কান্নখি। মসিদা শরুক য়ারিবা ওন্তোপ্রিনর, এম.এস.এম.ই. অমসুং স্তার্ত-অপশিংনা সি.এস.আই.আর.-সি.এম.ই.আর.আই.না শাবা কন্সেন্ত্রেতর অসিদা থৱাই তাখি অমসুং তেক্নোলোজী অসিগী অকুপ্পা ৱারোল, তেক্নোলোজী অসিবু পীথোকপগী কাংলোন, তি.ও.তি. ফী, মসিদা চঙবা য়াবা শেনফম, প্রদক্সন হৌবদা চঙগদবা কেপিতেল অমসুং শেনফম, মসিগী চাংয়েং তৌবদা চঙগদবা তঙাই ফদবশিং, মতৌ করম্না শেম-শাবা হৌগদগে হায়বা ৱারোল, কত্তিং অমসুং অতোপ্পা ইন্দস্ত্রীশিংদা ওক্সীজেন কন্সেন্ত্রেতর শিজিন্নবা, কোবিদ য়ুগকী মতুংদা কন্সেস্ত্রেতর প্লান্তকী মথৌ তাবা, কন্সেন্ত্রেতরগী খুত্থাংদা ওক্সীজেন থম্বা য়াবা নত্ত্রগা য়াদবা, খুৎলায় অসিবু লেপ্তনা শিজিন্নবদা ওইরক্কদবা ফীভম, ৪০০সি.গী মথক্তা খুৎলায় অসিনা মথৌ পাংথোকপা ঙম্বগী মতিক্কী মতাংদা হেন্না খঙনীংবগী ইথিল উৎখি। সি.এস.আই.আর.-সি.এম.ই.আর.আই.গী দাইরেক্তরনা মথক্তা পল্লিবা হীরমশিংগী মতাংদা মীয়াম্না অপেনবা ফাওনবা পাউখুম পীখি অমসুং থৌওং অসিবু তিল্লিবা মীয়াম্না থাগৎনখি।
*****
(Release ID: 1716037)
Visitor Counter : 224