লাইনা-লাইচৎ অসিগী অনিশুবা ৱেবনা চৈথেং পীরিবা মতম অসিদা, অয়ুশ-৬৪ হিদাক অসিনা মাইল্দগী মোদিরেত ফাওবা কোবিদ-১৯ লাইনা নারিবা পেসেন্তশিংদা অশা অমা উহল্লে৷ অয়ুশ মন্ত্রালয়গী সেন্ত্রেস কাউন্সিল ফোর রিসর্চ ইন অয়ুর্বেদ সাইন্সেস(সি.সি.আর.এ.এস.)না শেম্লিবা পোলী হর্বেল ফোর্মুলেসন অমা ওইরিবা অয়ুশ-৬৪ হিদাক অসি মাইল্দগী মোদিরেত ফাওবা নারিবা, সিম্পতোম উৎতবা কোবিদ পেসেন্তশিং লাইয়েং চত্থবদা কান্নবা পী হায়বা অসি লৈবাক অসিগী মমিং লৈরবা রিসর্চ ইন্সতিত্যুসনশিংগী সাইন্তিস্তশিংনা খঙবা ঙমখ্রে৷ হিদাক অসি ১৯৮০ চহি অসিদা মেলরিয়া লাইয়েংনবা শেমখিবনি অদুবু হৌজিক্তি হিদাক অসি অমুক হন্না কোবিদ-১৯ লাইচৎ অসি লাইয়েংনবা শেম্লিবনি৷

হন্দক্তা অয়ুশ মন্ত্রালয়-কাউন্সিল ওফ সাইন্তিফিক অমসুং ইন্দস্ত্রিয়েল রিসর্চ(সি.এস.আই.আর.) কোলাবোরেসননা মাইল্দগী মোদিরেত ফাওবা নারিবা কোবিদ পেসেন্তশিং অসি লাইয়েং চত্থবদা অয়ুশ-৬৪ শিজিন্নবগী সেফতী অমসুং ইফিকেসী অদু য়েংশিন্নবা রোবর্স্ত মল্তি-সেন্তর র্লিনিকেল ত্রাইএল অমা মপুং ফানা পাংথোকখ্রে৷

অয়ুশ-৬৪দা অল্সতোনিয়া স্কোলারিস, পিক্রোরিজা কুর্রো, স্বর্তিয়া চিরতা অমসুং কেসালপিনিয়া ক্রিস্তা য়াওরি৷ হিদাক অসি নিংথিনা নৈনরে, সাইন্তিফিকেল্লী ওইনা শেমখিবনি, সেফ অমসুং ইফেক্তিব ওইবা অয়ুর্বেদ ফোর্মুলেসন্নি৷ মসিগী হিদাক অসি আই.সি.এম.আর.গী কোবিদ-১৯ মেনেজমেন্তগীদমক শেম্লিবা নেস্নেল তাক্স ফোর্সনা কুপথনা য়েংশিন্দুনা অয়ুর্বেদ অমসুং য়োগদা বেজ তৌবা নেস্নেল ক্লিনিকেল মেনেজমেন্ত প্রোতোকোলদসু রিকম্মেন্দ তৌরে৷

হিদাক অসিগী ত্রাইএল অসি সেন্তর অহুমদা পাংথোকখ্রে হায়না পুনেদা লৈরিবা সেন্তর ফোর রিয়ুমেতিক দিজিজেস্কী দাইরেক্তর দা. আর্বিন্দ চোপ্রা অমসুং অয়ুশ মন্ত্রালয়-সি.এস.আই.আর.গী ইকাই খুম্নরবা চিফ ক্লিনিকেল কোওর্দিনেতরনা ফোংদোকখ্রে৷ ত্রাইএলশিং অদু আর্ম অমমমদা মীওই ৭০ শরুক য়াদুনা লখনৌগী কে.জি.এম.য়ু.; ৱার্ধাগী দি.এম.আই.এম.এস. অমসুং মুম্বাইগী বি.এম.সি. কোবিদ সেন্তরদা পাংথোকখ্রে৷ অয়ুশ ৬৪ হিদাক অসি স্তেন্দর্দ ওফ কেয়র(সি.ও.সি.)দা হাপচিনদুনা লাইয়েংবা অসিনা পেসেন্ত অদু হেন্না থুনা ফহল্লি অমসুং এস.ও.সি. খক্তনা লাইয়েং চত্থরিবা অসিগা য়েংনবা মতমদা হোস্পিতালদা লৈবগী মতম অসিবু হন্থহল্লি হায়না দা. চোপ্রানা ফোংদোকখ্রে৷ মীওইবগী হকশেলদা, চোকথগনবদা, পুক্নিং লাংতক্নবা, এপিতাইত, ৱাখল নুংঙাইহনবা অমসুং তুম্বা য়াহনবদা অয়ুশ ৬৪ হিদাক অসিনা কান্নবা কয়া অমা পী হায়নসু মহাক্না ফোংদোরকখ্রে৷ অয়ুশ ৬৪ হিদাক অসি এস.ও.সি.দা হাপচিন্দুনা মাইল্দগী মোদিরেত ফাওবা নারিবা কোবিদ পেসেন্তশিং অসি লাইয়েং চত্থবদা ইফেক্তিব অমসুং সেফ ওইনা শিজিন্নবা য়ারগনি হায়বা অসি মসিগী কন্ত্রোল দ্রগ ত্রাইএল স্তদী অসিনা খুদম চাংদম ওইনা উৎলে হায়না দা. চোপ্রানা ফোংদোকখ্রে৷ ওক্সিজেন শিজিন্নদুনা হেন্না ইন্তেন্সিব ওইবা থেরাপী দরকার ওইরিবা লাইনাশিংগী ফিভম অসি হেন্না শোকচিল্লব্রা হায়বা অসি য়েংশিন্নবা অমসুং হোস্পিতেলাইজেসন তৌরিঙৈদা পীরিবা অতোপ্পা ত্রিতমেন্ত মিজরশিং অদু খন্দোক্নবা অয়ুশ ৬৪ শিজিন্নরিবা পেসেন্তশিং অদু মখাতানা য়েংশিল্লগনি হায়না মহাক্নসু মখাতানা ফোংদোকখ্রে৷

অয়ুশ-৬৪ স্তদী তৌবদা ফংলিবা রিজল্তশিং অসি হেন্না পুক্নিং থৌগৎনিংঙাইনি অমসুং হৌজিক লৈরিবা ক্রাইসিস্কী ফিভম অসিদা মতেং দরকার ওইরিবা পেসেন্তশিংনা অযুশ-৬৪ হিদাক অসিগী কান্নবশিং অদু ফংলগনি হায়না অয়ুশকী নেস্নেল রিসর্চ প্রোফেসর দা. ভুশন পতৱার্ধন অমসুং কোবিদ-১৯গীদমক শেম্লিবা ইন্তর-দিসিপ্লিনরী অয়ুশ রিসর্চ অমসুং দিবলপমেন্ত তাক্স ফোর্সকী চিয়রমেননা ফোংদোকখ্রে৷ মসিগী মল্তি-সেন্তর ত্রাইএল অসি ইন্দিয়ন কাউন্সিল ওফ মেদিকেল রিসর্চ(দি.জি., আই.সি.এম.আর.)কী মমাংগী দাইরেক্তর জেনেরেল অমসুং দিপার্তমেন্ত ওফ হেল্থ রিসর্চকী মমাংগী সেক্রেতরী দা. ভি.এম. কতোচকী চিয়রমেনশিপকী মখাদা শেম্লিবা অয়ুশ-সি.এস.আই.আর. জোইন্ত মোনিতরিং কম্মিতী (এম.সি.) য়েংশিল্লি হায়না মহাক্নসু পনখ্রে৷ হায়রিবা ক্লিনিকেল স্তদীশিং অসি ইন্দিপেন্দেন্ত দাতা অমসুং সেফতী মেনেজমেন্ত বোর্দ (দি.এস.এম.বি.)অমনা চাং নাইনা য়েংশিল্লি হায়না মহাক্না মখাতানা ফোংদোকখ্রে৷

কম্মিতী অসিনা অয়ুশ-৬৪ স্তদীগী আউতকম অদু চেকশিন্না য়েংশিল্লে অমসুং হিদাক অসি সিম্পতোম উৎচবা, মাইল্দগী মোদিরেত ফাওবা নারিবা কোবিদ পেসেন্তশিং লাইয়েং চত্থবদা শিজিন্ননবা খঙহনখ্রে হায়না এম.সি.গী চিয়রমেন দা. ভি.এম. কতোচনা ফোংদোকখ্রে৷

অয়ুশ ৬৪ হিদাক অসি চান্দিগর্হদা লৈরিবা মেদিকেল এজুকেসন অমসুং রিসর্চকী পোস্ত গ্রেজুয়েত ইন্সতিত্যুত; লখনৌদা লৈরিবা কিঙ্গ জিওর্জকী মেদিকেল য়ুনিভর্সিতী; নাগপুরদা লৈরিবা গভর্মেন্ত মেদিকেল কোলেজ; নাগপুরদা লৈরিবা দত্তা মেঘি ইন্সতিত্যুত ওফ মেদিকেল সাইন্সেস য়াওনা মেদিকেল কোলেজশিং, সি.এস.আই.আর.-আই.আই.আই.এম., দি.বি.তি.-তি.ঐচ.এস.তি.আই., আই.সি.এম.আর.-এন.আই.এন., এ.আই.আই.এম.এস. জোধপুর য়াওনা মমিং লৈরবা রিসর্চ ইন্সতিত্যুতশিংদা হিদাক অসিগী অহেনবা স্তদীশিং পাংথোক্লি হায়না সি.সি.আর.এ.এস.কী দাইরেক্তর জেনেরেল দা. এন শ্রীকান্থনা শন্দোক্না ফোংদোকখ্রে৷ হৌজিক ফাওবদা মাইল্দগী মোদিরেত ফাওবা নারিবা কোবিদ পেসেন্তশিংদা হিদাক অসি শিজিন্নবদা ফংলিবা রিজল্তশিং অদুনা হিদাক অসিগী কান্নবা অদু উৎলে৷ কোবিদ কেসশিং লাইয়েংবদা অয়ুশ ৬৪ হিদাক অসি শিজিন্নবা অসিনা লাইনা অসি য়াম্না থুনা ফহনবা ঙম্মী হায়বা অসি ক্লিনিকেল স্তদী তরেৎকী ফংলিবা আউতকম অসিনা তাক্লে হায়না মহাক্নসু ফোংদোকখ্রে৷ ক্লিনিকেল স্তদী পুম্নমক্তা, অয়ুশ ৬৪ হিদাক অসি ক্লিনিকেল সেপ ওইরে হায়না ফংবা ঙমখ্রে৷

                                                                                             ******