ঙাকশেল মন্ত্রালয়

দি.আর.দি.ও.না পি.এম. কেয়র ফন্দগী মখাদা থা অহুমগী মনুংদা মেদিকেল ওক্সীজেন প্লান্ত ৫০০ শারগনি

Posted On: 28 APR 2021 1:05PM by PIB Imphal

দি.ই.বি.ই.এল.না শাবা এল.সি.এ., তেজাস্তা শিজিন্নরিবা ওনবোর্দ ওক্সীজেন জেনেরেসন হায়রিবা দি.আর.দি.ও.না শাখিবা মেদিকেল ওক্সীজেন প্লান্ত (এম.ও.পি.) তেক্নোলোজীনা হৌজিক কোবিদ-১৯গী অনাবশিংনা ওক্সীজেন ৱাৎপগী খুদোংচাদবা থেংনরিবা অসিবু মাইয়োক্নরগনি। ওক্সীজেন প্লান্ত অসিবু মিনিৎ অমদা লিতর ১০০০ (এল.পি.এম.) পুথোকপা ঙম্নবা মওংদা শাবনি। পথাপ অসিনা এল.পি.এম. ৫গী পুথোকপগী চাংদা অমসুং নোংমদা সিলিন্দর ১৯৫ থলহন্দুনা অনাবা ১৯০দা তেংবাংনবা ঙমগনি। তেক্নোলোজী অসি বেঙ্গালুরুগী এম./এস. তাতা এদভান্সদ সীস্তেম লিমিতেদ অমসুং কোইম্বাতোরগী এম./এস. ত্রাইদেন্ত ন্যুমেতিক্স প্রাইভেৎ লিমিতেদতা শিন্নখ্রে অমসুং মখোয়না লৈবাক শিনবা থুংবগী হোস্পিতালশিংদা থম্নবগীদমক্তা প্লান্ত ৩৮০ পুথোক্কনি। সি.এস.আই.আর.গী মখাদা লৈবা দেহরাদুনগী ইন্দিয়ন ইন্সতিত্যুৎ ওফ পেত্রোলিয়মগা থবক তৌমিন্নবা ইন্দস্ত্রীশিংনা এল.পি.এম. কেপাসিতী ৫০০ লৈবা প্লান্ত ১২০ পুথোক্কনি।

ওক্সীজেন হায়বসি কোবিদ-১৯গী অনাবশিং লাইয়েংনবা হেল্থ কেয়র সেন্তর অমসুং হোস্পিতালশিংদা য়াম্না মরু ওইবা ক্লিনিকেল গ্যাস অমনি। মেদিকেল ওক্সীজেন প্লান্ত (এম.ও.পি.) তেক্নোলোজীনা হোস্পিতালগী ফমুংশিংদা হকথেংননা পীবা য়াবা নত্ত্রগা মেদিকেল ওক্সীজেন সিলিন্দরশিংদা হাপ্পা য়াবা ৯৩±৩%গী অকুংবগী চাংগী ওক্সীজেন পুথোকপা ঙম্মি। মসিনা প্রেসর স্বিং এদজোর্পসন (পি.এস.এ.)গী থৌওং অমসুং মোলীক্যুলর সিভ (জিওলাইৎ) তেক্নোলোজী শিজিন্নদুনা এৎমোস্ফ্যারিক এয়রদগী হকথেংননা ওক্সীজেন পুথোকপা ঙম্মি।

এম.ও.পি. তেক্নোলোজীনা কোরোনাগী ইরাং মরক অসিদা শহর অমসুং খুঙ্গংগী মফমশিংদা লৈরিবা হোস্পিতালশিংদা ওক্সীজেন পীবদা তেংবাংগনি। হোস্পিতালশিংনা অতোপ্পা মফমদগী ওক্সীজেন লৌবগী মহুত্তা, প্লান্ত অসিগী মতেংদগী, মখোয়গী মফমদা শেল য়াম্না চঙদনা ওক্সীজেন পুথোকপা ঙম্লগনি।

হোস্পিতালশিংদা প্লান্ত অসি থম্বনা, মরু ওইনা, মনুং হঞ্জিনবা অমসুং অৱাংবা লমদমদা লৈবা হোস্পিতালশিংনা ওক্সীজেন সিলিন্দর মরাং কাইদবগী খুদোংচাদবা কয়া থেংনবগী অৱাবা কয়াগী ৱারোইশিন পুরকপদা তেংবাংগনি। প্লান্ত অসিনা আই.এস.ও. ১০০৮, য়ুরোপিয়ন, য়ু.এস. অমসুং ভারতকী ফার্মাকোপিয়ানচিংবা মালেমগী থাক কয়া অমা ইল্লি। দিল্লী/এন.আই.আর.গী মফমশিংদা প্লান্ত ৫ খিন্ননবা মফম শেম্বা-শাবগী থবকসু হৌখ্রে।

দি.আর.দি.ও.না থা অমদা প্লান্ত ১২৫ পুথোকপগী পান্দম থমদুনা পি.এম. কেয়র ফন্দগী মখাদা বেঙ্গালুরুগী এম./এস. তাতা এদভান্সদ সীস্তেম লিমিতেদতা প্লান্ত মশিং ৩৩২ অমসুং কোইম্বাতোরগী এম./এস. ত্রাইদেন্ত ন্যুমেতিক্স প্রাইভেৎ লিমিতেদতা ৪৮গী সপ্লাই ওর্দর পীদুনা মেদিকেল ওক্সীজেন প্লান্ত ৩৮০ শেম-শাবগী থবক হৌখ্রে। মসিগা লোয়ননা, থা অহুমগী মনুংদা মেদিকেল ওক্সীজেন প্লান্ত ৫০০ খিনবা ঙমগনি হায়বগী পান্দমসু থম্লি।

ঙাকশেল মন্ত্রী, শ্রী রাজনাথ সিংহনা হৌজিক্কী ইরাং অসিবু মাইথীবা পীবদা য়াম্না তেংবাংগদবা অমসুং কোবিদ-১৯গী অনাবশিংদা য়াম্না তঙাই ফদবা ওক্সীজেন পীনবা এম.ও.পি. তেক্নোলোজী শিজিন্নবগীদমক্তা দি.আর.দি.ও.বু থাগৎখি। দিফেন্স আর. অমসুং দি. বিভাগকী সেক্রেতরী, দি.আর.দি.ও.গী চেয়রমেন, দাঃ জি. সতীশ রেদ্দীনা হোস্পিতাল অমসুং অতোপ্পা হকশেলগী এজেন্সীশিংনা তেক্নোলোজী শিজিন্নবদা দি.আর.দি.ও.না ঙাক্লৌ পীগনি হায়বগী থাজবা পীখি।

***



(Release ID: 1714614) Visitor Counter : 110